ශ්‍රේෂ්ඨාධිකරණ විනිසුරු තනතුර පුරප්පාඩු වෙන්නට පෙරම… විනිසුරු ලෆාර්ගේ නම ජනපති ව්‍ය. සභාවට යවයි

අගවිනිසුරු නිර්දේශය ලැබිලාත් නැහැ

එළඹෙන ජුනි 20වැනිදා ඇතිවන්නට නියමිත ශ්‍රේෂ්ඨාධිකරණයේ විනිසුරු පුරප්පාඩුවක් සඳහා පත්කරන ලෙස, වර්තමාන අභියාචනාධිකරණ වැඩ බලන සභාපති එම් ටී මොහොමඩ් ලෆාර් විනිසුරුවරයාගේ නම ජනාධිපති අනුර කුමාර දිසානායක විසින් ආණ්ඩුක්‍රම ව්‍යවස්ථා සභාවට යවා ඇතැයි වාර්තා වෙයි. ජනාධිපතිවරයා ලෆාර් මහතාගේ නම සභාවට යවා ඇත්තේ පසුගිය ජුනි 9 වැනිදාය.

එහෙත්, ශ්‍රේෂ්ඨාධිකරණයේ විනිසුරු ධුරයක් හිස්වන්නට නියමිතව ඇත්තේ ජුනි 20 වැනිදා වන අතර, ඒ විනිසුරු ගාමිණී අමරසේකර විශ්‍රාම ගැනීම නිසාය. සාමාන්‍යයෙන් ශ්‍රේෂ්ඨාධිකරණ විනිසුරු ධුරයක් පුරප්පාඩු වන තෙක් එම ධුරය සඳහා නාම යෝජනාවක් ජනාධිපතිවරයා විසින් ආණ්ඩුක්‍රම ව්‍යවස්ථා සභාවට යවනු ලබන්නේ නැත.

ඒ අතර වාර්තා වන්නේ, අභියාචනාධිකරණ සභාපති මොහොමඩ් ලෆාර්, මෙම ජුනි මස 18 වැනිදා, (එනම් ශ්‍රේෂ්ඨාධිකරණ පුරප්පාඩුව ඇතිවීමට දින දෙකකට පෙර) සිය වයස අවුරුදු 63 සම්පූර්ණ වීම නිසා විශ්‍රාම ලැබීමට නියමිත බවයි. ජනාධිපතිවරයා ලහි ලහියේ ඔහුගේ නම ආණ්ඩුක්‍රම ව්‍යවස්ථා සභාවට යවා ඇත්තේ, ඔහු විශ්‍රාම ගැනීමට පෙර ශ්‍රේෂ්ඨාධිකරණයට පත්කිරීමට විය හැකිය. (ශ්‍රේෂ්ඨාධිකරණ විනිසුරුවරුන් විශ්‍රාම ගන්නේ වයස අවුරුදු 65 දීය) එහෙත් එවැනි සම්ප්‍රදායක් අධිකරණ ක්ෂේත්‍රයේ මෙතෙක් පැවැතී නැතැ’යි අධිකරණ ආරංචි මාර්ග කියයි.

ආණ්ඩුක්‍රම ව්‍යවස්ථාවේ 41(ඇ) ව්‍යවස්ථාවට අනුව, ආණ්ඩුක්‍රම ව්‍යවස්ථා සභාව ඉහළ අධිකරණවලට පත්කිරීම් පිළිබඳ සිය තීරණය ගැනීමට පෙර අගවිනිසුරුවරයාගේ/වරියගේ අදහස විමසිය යුතුය. ඒ නිසා, අගවිනිසුරුගේ නිර්දේශය එම විනිසුරුවරයා/වරිය නම් කිරීමට පෙර ලබාගැනීම සාමාන්‍ය සම්ප්‍රදාය වෙයි. එහෙත්, දැනගන්නට තිබෙන පරිදි ලෆාර් විනිසුරුවරයා සම්බන්ධයෙන් අගවිනිසුරු මුර්දු ප්‍රනාන්දුගේ නිර්දේශයද ලැබී නැත.

මීට පෙර පසුගිය ජනවාරි මාසයේදී ශ්‍රේෂ්ඨාධිකරණ විනිසුරුධුර හතරක් සඳහා පුරප්පාඩු ඇතිවූ විට, ඒ සඳහා අගවිනිසුරුවරිය නිර්දේශ කළ නම්වලද ජ්‍යෙෂ්ඨ විනිසුරුවරයකු වුණත්, ලෆාර් මහතාගේ නම තිබුණේ නැත. ඒ නිසා ජනාධිපතිවරයාද ඔහුගේ නම ආණ්ඩුක්‍රම ව්‍යවස්ථා සභාවට යෝජනා නොකළේය. ඒ හේතුවෙන් ලෆාර් මහතාට වඩා ජ්‍යෙෂ්ඨත්වයෙන් අඩු අභියාචනාධිකරණ විනිසුරුවරුන් වන සම්පත් විජේකෝන් සහ සම්පත් විජේරත්න යන විනිසුරුවරුද, ජ්‍යෙෂ්ඨත්වයෙන් ඉහළ සිටි සෝභිත රාජකරුණා හා මේනකා විජේසුන්දර යන විනිසුරුවරුද අගවිනිසුරුවරියගේ නිර්දේශ මත ශ්‍රේෂ්ඨාධිකරණ විනිසුරු පත්වීම් ලදහ.

එම අවස්ථාවේදී ශ්‍රේෂ්ඨාධිකරණ විනිසුරුධුරයක් සඳහා සුදුසුයැයි අගවිනිසුරුවරිය විසින් නිර්දේශ නොකරන ලද ලෆාර් විනිසුරුගේ නම, මේ අවස්ථාවේදී ජනාධිපතිවරයා විසින් යෝජනා කෙරෙන්නට තරම් සිදුවූ වෙනස හා හේතුව කුමක්දැයි අධිකරණ ක්ෂේත්‍රයේ අවධානයට යොමුවී තිබේ.

මේ අතර අභියාචනාධිකරණ වැඩබලන සභාපති ලෆාර් ඉදිරියේ ඇසෙමින් තිබුණු නඩුවක කාර්ය පටිපාටිය සම්බන්ධයෙන් ශ්‍රේෂ්ඨාධිකරණයට ඉදිරිපත් කෙරුණු අභියාචනා ඉල්ලීමක් සලකා බලා (ස්පෙෂල් ලීව් ටු ඇපීල්) අභියාචනාධිකරණයේ එම නඩුව ඇසීම තාවකාලිකව තහනම් කරමින් නියෝගයක් ශ්‍රේෂ්ඨාධිකරණය නිකුත් කරන්නේ ජුනි මස 9 වැනිදාය. ඒ ජනක් ද සිල්වා, මහින්ද සමයවර්ධන හා අර්ජුන ඔබේසේකර යන විනිසුරුවරුන් විසිනි. එහිදී අභියාචකයන් වෙනුවෙන් නීතිඥවරුන් ශ්‍රේෂ්ඨාධිකරණයට දැනුම් දුන්නේ අභියාචනාධිකරණයේ යුක්තිය පසිඳලීමේ ක්‍රියාවලිය නිසි ආකාරයෙන් සිදු නොවීම ගැන තමන් ශ්‍රේෂ්ඨාධිකරණයේ අවධානය යොමු කරවන බවයි.

කොල්ලුපිටිය මුස්ලිම් පල්ලිය සම්බන්ධයෙන් පවරා තිබුණු එම නඩුවේදී, නීතිඥවරුන්ට පෙනීසිටීමට නොහැකි බව පෙන්වා දී තිබියදීත්, ජුනි 18 වැනිදාට පෙර (ලෆාර් විනිසුරු විශ්‍රාම යන දිනය) ලෆාර් විනිසුරු ඉදිරියේ එම නඩුව කැඳවීමේ ප්‍රයත්නයක් තිබුණු බව පෙනේයැයි අභියාචක පාර්ශ්වයේ නීතිඥවරු ශ්‍රේෂ්ඨාධිකරණයට පෙන්වා දුන්හ.

මීට පෙරද කොහිලවත්තේ මුස්ලිම් පල්ලියක් සම්බන්ධයෙන් ලෆාර් විනිසුරුවරයා දුන් නියෝගයක් ශ්‍රේෂ්ඨාධිකරණය විසින් අත්හිටුවනු ලැබ තිබේ.

මේ අතර විවිධ පාර්ශ්ව හා ඔවුන්ගේ නීතිඥයන් එකතුවී අභියාචනාධිකරණයේ විනිශ්චයාසන වුවමනා පරිදි සකස්කර ගැනීමට උත්සාහ දැරීමේ (බෙන්ච් ෆික්සින්) භාවිතයක් තිබෙන බවටද, අනෙක් පාර්ශ්වයේ නීතිඥවරුන්ට අධිකරණයට පැමිණිය නොහැකි බවට පෙන්වාදී තිබියදීත්, එවැනි විශේෂ නඩු විශේෂ විනිශ්වයාසන ඉදිරියේ විශේෂ දිනවලට නියම කරගැනීමට උත්සාහ දරන බවටද, අධිකරණ ක්ෂේත්‍රයේ කතාබහක් මතුවී තිබේ.

මීට පෙර ලෆාර් විනිසුරුවරයා අභියාචනාධිකරණ සභාපතිධුරයට පත්කරන විටත්, ඔහුට අගවිනිසුරුවරියගේ නිර්දේශය නොතිබුණු අතර, ඒ බව නොසලකා ආණ්ඩුක්‍රම ව්‍යවස්ථා සභාවේ සාමාජිකයන් දස දෙනාගෙන් හය දෙනකු (එනම් ආණ්ඩු පක්ෂ-විපක්ෂ දේශපාලන පත්වීම් ලබා එහි සාමාජිකයන් වන පිරිස) ඔහුට පක්ෂව ඡන්දය දී තිබුණු අතර, විරුද්ධ වී තිබුණේ සිවිල් සමාජය නියෝජනය කරන සභිකයන් තිදෙනා පමණකි. අගවිනිසුරුවරිය ශ්‍රේෂ්ඨාධිකරණයට නිර්දේශ නොකළ විනිසුරුවරයකු, අභියාචනාධිකරණයේ සභාපතිධුරයට සුදුසු වන්නේ කෙසේදැයි ඒ අවස්ථාවේදීද අධිකරණ ක්ෂේත්‍රයේ පැනනැගී තිබුණු ප්‍රශ්නයකි. ආණ්ඩුක්‍රම ව්‍යවස්ථා සභාව ජුනි 13 වැනිදා රැස්වීමට නියමිතය.