ජනමාධ්‍ය අමාත්‍යාංශය තුළ වෙබ් අඩවි ලියාපදිංචි කිරීමේදී හා ලියාපදිංචිය අලුත් කිරීමේදී මෙතෙක් භාවිත කළ පෝරමයට අමතරව ඇමුණුමක් වශයෙන් අලුත් පෝරමයක් ලබාදී තිබේ. පෞද්ගලික තොරතුරු පෝරමය වශයෙන් හඳුන්වා ඇති එහි ආයතන හිමිකරුවන්, අධ්‍යක්ෂවරුන්, කොටස්කරුවන්, ලේකම්වරුන් හා කළමනාකරුවන්ගේ තොරතුරු ඇතුළත් කළ යුතුය.
සම්පූර්ණ නම, උපන් දිනය, ජාතික හැඳුනුම්පත් අංකය, විදේශ ගමන් බලපත් අංකය, වර්තමාන ලිපිනය, පොලිස් වසම, වර්තමාන ලිපිනයට පැමිණීමට පෙර පදිංචිව සිටි ලිපිනයන්, (ඒවාහි සිටි කාලය හා පොලිස් වසමද සමග) ජංගම හා නිවාස දූරකථන අංක, විද්‍යුත් තැපැල් ලිපිනය, ආයතනයේ නම, ලිපිනය හා කාලසීමාව, වර්තමානයේ දරන තනතුර (තත්වය) වෙනත් ආයතනයක/ආයතනවල (හිමිකාරිත්වය /අධ්‍යක්ෂ/ කොටස්කරු/ ලේකම් හෝ කළමනාකාර) තනතුරු දරන්නේ නම් එම තොරතුරු සහ ඒ යටතේ ආයතනය, ව්‍යාපාර ලියාපදිංචි අංකය, ලිපිනය, තනතුර හා කාලසීමාව යන තොරතුරු ඉල්ලා තිබේ.
ඊට අමතරව අධිකරණයෙන් දඬුවම් ලබා තිබේද? නැතහොත් විරුද්ධව පැමිණිල්ලක් තිබේද? යන්න අසමින් එම විස්තර කෙටියෙන් සඳහන් කරන ලෙස දන්වා තිබේ.
ඉන්පසු පෝරමය පුරවන්නාගේ පියාගේ නම, ජාතික හැඳුනුම්පත් අංකය, ලිපිනය හා රැකියාව විමසා තිබේ. මවගේද එම විස්තරම ඉල්ලා තිබේ. ඉන්ද නොනැවතී සහෝදර සහෝදරියන්ගේ එම විස්තරම ඉල්ලා තිබේ. තවදුරටත් භාර්යාවගේ හෝ ස්වාමිපුරුෂයාගේ නම, ජාතික හැඳුනුම්පත් අංකය, වර්තමාන ලිපිනය, පෙර ලිපිනය, රැකියාව සහ සේවා ස්ථානය ඉල්ලා තිබේ. ඉන්ද නොනැවතී දරුවන්ගේ නම්, ඔවුන්ගේ ජාතික හැඳුනුම්පත් අංක සහ පාසල හෝ රැකියාවද ඉල්ලා තිබේ.
තොරතුරු ඉල්ලීම ඉන්ද අවසන් වන්නේ නැත. භාර්යාවගේ හෝ ස්වාමි පුරුෂයාගේ පියාගේ සහ මවගේ නම, ජාතික හැඳුනුම්පත් අංකය, ලිපිනය හා රැකියාව ඉල්ලා තිබේ.
තවදුරටත් භාර්යාවගේ හෝ ස්වාමි පුරුෂයාගේ සහෝදර සහෝදරියන්ගේ නම්, ජාතික හැඳුනුම්පත් අංක සහ ලිපිනයන් ඉල්ලා තිබේ.
ඉන්ද සෑහීමකට පත් නොවී එම තොරතුරු පෝරමයේ අංක 11 යටතේ ඉල්ලන්නේ ‘ඔබගේ ඥාතීන් කිසිවකුට විරුද්ධව නඩු පවරනු ලැබ තිබේද නැතහොත් උසාවියකින් නඩු පවරනු නොලැබ ඔවුන්ට විරුද්ධව පොලිස් ස්ථානයක පැමිණිලි කර ඇත්තේද එසේ නම් ඒ පිළිබඳව කෙටියෙන් විස්තර කර ඔහුට/ඇයට ඇති ඥාති සම්බන්ධතාව සඳහන් කරන්න’ යනුවෙනි.
තවදුරටත් අංක 12 මෙසේ සඳහන් කරයි. ‘ඔබගේ කිසියම් ඥාතියෙක් ත්‍රස්තවාදී, ආගමික අන්තවාදී රාජ්‍ය විරෝධී ක්‍රියාවකට සම්බන්ධව සිටියේද නැතහොත් සැකකරනු ලැබ සිටියේද එසේ නම් ඒ පිළිබඳ විස්තර’ සපයන ලෙසය.
ඉහත සඳහන් කරන ලද තොරතුරු වෙබ් මාධ්‍ය ආයතනවල හිමිකරුවන් ඇතුළු ඉහත සඳහන් කරන ලද පාර්ශ්වයන්ගේ හත්මුතු පරම්පරාවේ තොරතුරු පමණක් නොව ඔවුන්ගේ අලගිය මුලගිය තැන් පිළිබඳ විස්තර ඉල්ලීමක් බව පැහැදිලිය. මෙතෙක් වෙබ් මාධ්‍ය ජනමාධ්‍ය අමාත්‍යාංශයේ ලියාපදිංචි කිරීමේදී හෝ ලියාපදිංචිය අලුත් කිරීමේදී තිබුනේ සරල තොරතුරු ප්‍රමාණයක් ඉල්ලූ පෝරමයක් පමණය. මෙම අතිරේක පෝරමය එම සරල පෝරමයට අතිරේකව වත්මන් ආණ්ඩුව බලයට පත්වීමෙන් පසු ලබාදී ඇති එකකි.
මෙම අතිරේක පෝරමය සම්බන්ධයෙන් රජයේ ප්‍රවෘත්ති අධ්‍යක්ෂ ජනරාල් හර්ෂ බණ්ඩාරගෙන් කළ විමසීමකදී ඔහු පැවසුවේ වේබ් ලියාපදිංචිය රජයේ ප්‍රවෘත්ති දෙපාර්තමේන්තුව විසින් සිදුකරන එකක් නොවන බවත්, එය ජනමාධ්‍ය අමාත්‍යාංශය විසින් සිදුකරන කාර්යයක් බවත්ය. ඒ අනුව ප්‍රවෘත්ති අධ්‍යක්ෂ ජනරාල්වරයා දැනුම් දුන්නේ ජනමාධ්‍ය අමාත්‍යාංශයේ අතිරේක ලේකම් (සංවර්ධන) එන්ඒකේඑල් විජේනායකගෙන් ඒ පිළිබඳ කරුණු විමසන ලෙසය. ඒ අනුව විජේනායක මහතාගෙන් ඒ පිළිබඳ විමසීමේදී ඔහු කීවේ ආරක්ෂක අමාත්‍යාංශය විසින් ආරක්ෂක නිෂ්කාශනය ලබාගැනීම පහසු කිරීම සඳහා එම අතිරේක පෝරමය හඳුන්වා දී ඇති බවයි. එම තොරතුරු සෙවීමට කාලය වැයවන නිසා වෙබ් සඳහා ආරක්ෂක නිෂ්කාශනය ලබාදීම මෙතෙක් ප්‍රමාද වූ බව ඔහු පැවසීය. ඒ ආකාරයට තොරතුරු ඇත්නම් ප්‍රමාද නොවී වෙබ් සඳහා ලියාපදිංචිය ලබාදිය හැකි බවද ඔහු පැවසීය.
වෙබ් ලියාපදිංචිය සඳහා මෙතෙක් පැවති හා දැන්ද වලංගු සාමාන්‍ය පෝරමයෙන් තොරතුරු ඉල්ලා ඇත්තේ වෙබ් අඩවියේ ඩොමේන් නාමය, අයිපී ලිපිනය, වෙබ් අඩවියේ අන්තර්ගතය, වෙබ් අඩවි හිමිකරුගේ නම, ලිපිනය, දුරකතන අංකය, ජාතික හැඳුනුම්පත් හෝ විදේශ ගමන් බලපත් අංකය සහ ඊමේල් ලිපිනය පමණය.
හිමිකරු ශ්‍රී ලාංකිකයෙක් නොවේ නම් හෝ හිමිකරු විදේශයක වාසය කරන්නේ නම් හිමිකරු නියෝජනය කරන දේශීය නියෝජිතයාගේ එම විස්තරම ඉල්ලා තිබේ. ඊට අමතරව වෙබ් අඩවි පරිපාලකගේ හා එහි සංස්කාරකගේ එම විස්තරම ඉල්ලා තිබේ. තවදුරටත් ඉල්ලා ඇත්තේ වෙබ් අඩවියේ සේවය කරන මාධ්‍යවේදීන්ගේ නම, ලිපිනය, ජාතිකත්වය, දුරකතන අංක හා මාධ්‍ය හැඳුනුම්පත් අංක පමණය.
වෙබ් අඩවි ලියාපදිංචි කිරීමේදී අලුතින් ඉල්ලා ඇති හත්මුතු පරම්පරාව සහ එහි අලගිය මුලගිය තැන්වල විස්තර පුවත්පත් හා සඟරා ඇතුළු මුද්‍රිත මාධ්‍ය ලියාපදිංචි කිරීමේදී ඉල්ලන්නේ නැත. ජනමාධ්‍ය අමාත්‍යාංශයෙන් රූපවාහිනී, ගුවන් විදුලි, කේබල් රූපවාහිනී, චන්ද්‍රිකා ඇතුළු නාලිකා සඳහා බලපත්‍ර හෝ අවසර ලබාදීමේදී ඒ ආකාරයේ තොරතුරු ඉල්ලන්නේ නැත.
ඊට අදාළ පෝරමයෙන් ඉල්ලන්නේ ආයතනයේ නම, ලිපිනය, ව්‍යාපාර ලියාපදිංචි අංකය, වැඩසටහන් පරාසය, ඒවායේ අන්තර්ගතය, විකාශන මාධ්‍යය, බලාපොරොත්තු වන ආවරණ ප්‍රදේශය, චැනල් ප්‍රමාණය සහ ඒවායේ නම්, හිමිකරුගේ නම, ලිපිනය, දුරකතන අංකය, ජාතික හෝ විදේශ ගමන් බලපත් අංකය, ඊමෙල් ලිපිනය පමණය. හිමිකරු ශ්‍රී ලාංකික නොවේ නම් හා විදේශයක වාසය කරන්නෙක් නම් හිමිකරු වෙනුවෙන් දේශීයව නියෝජනය කරන පුද්ගලයාගේ එම තොරතුරුම ඉල්ලනු ලබයි.
ඊට අමතරව ආයතනයේ කොටස් හිමියන්ගේ නම, ලිපිනය, ජාතික හෝ විදේශ ගමන් බලපත් අංකය, දුරකතන අංක හා ඊමේල් ලිපිනය ඉල්ලයි. අධ්‍යක්ෂ මණ්ඩලය සම්බන්ධයෙන්ද එම තොරතුරුම ඉල්ලයි.
අවසන් වශයෙන් කාර්ය මණ්ඩලයේ විස්තර ඉල්ලයි. ඒ තනතුර, නම, ජාතික හැඳුනුම්පත් අංකය හා දුරකතන අංක වශයෙනි.
පුවත්පතක් ලියාපදිංචි කිරීමේදී හෝ ලියාපදිංචිය අලුත් කිරීමේදී පුවත්පත් මණ්ඩලය ඉල්ලනු ලබන්නේ පුවත්පතේ නම, ආරම්භ කරනු ලැබූ දිනය, එහි මිල, මුද්‍රණය කරන හා විකුණන පිටපත් ප්‍රමාණය, පළකරන මාධ්‍යය, එය පළකරනු ලබන්නේ දිනපතාද, සතිපතාද නැතහොත් වෙනත් ආකාරයකටද යන්න, එහි අන්තර්ගතය, ඉලක්කගත පාඨක වර්ගය, පුවත්පතේ ලිපිනය, සම්බන්ධකරගත හැකි ස්ථාවර හා ජංගම දුරකතන, ඊමේල් හා වට්ස්ඇප් අංකයි.
වැඩිදුර විස්තර වශයෙන් පුවත්පතේ හිමිකරුගේ නම, පෞද්ගලික ලිපිනය, ජාතික හැඳුනුම්පත් අංකය, දුරකතන අංකය හා ග්‍රාම නිලධාරි මගින් පදිංචිය සනාථ කිරීම ඉල්ලනු ලබයි. එම තොරතුරු සහ එම සහතික කිරීම් පුවත්පතේ ප්‍රකාශකයා, මුද්‍රණකරුවා හා සංස්කාරකවරයා සම්බන්ධයෙන් ඉල්ලනු ලබයි.
හත්මුතු පරම්පරාවක තොරතුරු හා ඔවුන්ගේ අලගිය මුලගිය තැන් පුවත්පත් ලියාපදිංචියේදී ඉල්ලන්නේ නැති බව ඉන් පෙනී යයි.
වෙබ් ලියාපදිංචිය සඳහා ඉල්ලා ඇති එම හත්මුතු පරම්පරාවේ තොරතුරු අනුව යම් වෙබ් හිමිකරුවෙක්, සංස්කාරකවරයෙක් හෝ ඊට සම්බන්ධ වෙනත් ආකාරයක පුද්ගලයෙක් අධිකරණයෙන් දඬුවම් ලබා තිබේනම්, ඔහුට හෝ ඇයට විරුද්ධව පොලීසියක චෝදනාවක් තිබේ නම් එකී වෙබ් අඩවිය ලියාපදිංචිය සඳහා අවසර ලබාදෙන්නේ නැත්ද? එය රටේ කිනම් නීතියකින් සලසා ඇති ප්‍රතිපාදනයක්ද?
පළමුව සඳහන් කළ යුත්තේ වෙබ් අඩවි ජනමාධ්‍ය අමාත්‍යාංශයේ ලියාපදිංචි විය යුතු බවට නීතියක් රටේ නැති බවයි. පැවති ආණ්ඩුද, වත්මන් ආණ්ඩුවද මේ කරමින් පවතින්නේ අනීතික දෙයකි. මෙසේ කියූ කළ ජනාධිපතිවරයා කියන ලෙස ඔහුට පාර්ලිමේන්තුවේ තුනෙන් දෙකක බහුතර බලයක් ඇති නිසා වෙබ් අඩවි ලියාපදිංචිය සඳහා අලුත් නීතියක් ලෙහෙසියෙන්ම සම්මත කරගත හැකිය. එහෙත් කිවයුත්තේ ඊට පෙර මේ කරන්නේ නීති විරෝධී කටයුත්තක් බවය.
උදාහරණයකට ගතහොත් මේ වනවිට පුවත්පත්, රූපවාහිනී නාලිකා, ගුවන් විදුලි නාලිකා හා ජනමාධ්‍ය අමාත්‍යාංශය බලපත්‍ර ලබාදී ඇති අන්තර්ජාලය මත පදනම් වූ නාලිකාවල හිමිකරුවන්, අධ්‍යක්ෂවරුන් ඇතුළු ඊට සම්බන්ධ පිරිස් අතරින් යම් පිරිසක් විවිධ වැරදි සම්බන්ධයෙන් අධිකරණයෙන් වරදකරුවන් වී සිටිය හැකිය. අධිකරණයෙන් වරදකරුවන් නොවුණත් ඔවුන්ට එරෙහි චෝදනා පොලිස් ස්ථානවල තිබිය හැකිය. ඉනුත් නොනැවතී ආරක්ෂක අමාත්‍යාංශයේ අවශ්‍යතාව අනුව එම ඉල්ලුම් පත්‍රයෙන් ඉල්ලා ඇති පරිදි ඔවුන්ට ඥාති වන පිරිස් අධිකරණයෙන් වරදකරුවන් වී සිටිය හැකිය. නැත්නම් පොලීසිය හමුවේ චෝදනා ලබා සිටිය හැකිය.
ආරක්ෂක අමාත්‍යාංශයේ එම නිෂ්කාශන අවශ්‍යතාව අනුව අප තේරුම් ගත යුත්තේ අධිකරණයෙන් වරදකරුවන් වන පිරිස්වලට ඉන්පසු ජීවිතයේ කිසිම දෙයක් කළ නොහැකි බවද? පොලීසියේ චෝදනා ලබන පිරිස්වලට ඉන්පසු ජීවිතයේ කිසිම දෙයක් කළ නොහැකි බවද? ඔවුන්ගේ බිරිඳ, ස්වාමි පුරුෂයා, දූ දරුවන්, නැන්දනිය, මාමණ්ඩිය හෝ ඥාතීන් වරදකරුවන් හෝ පොලීසියේ චෝදනාවට ලක් වුවහොත් කිසිම දෙයක් කළ නොහැකි බවද?
එහෙත් අප දන්නා සාමාන්‍ය නීතිමය තත්වය වන්නේ ඔහු හෝ ඇය හැර ඔහු හෝ ඇය සිදුකරන දෙයක් සම්බන්ධයෙන් වෙනත් අයකු වරදකාරිත්වයකට වගකියන්නේ නැති බවයි. එය බිරිඳ, ස්වාමි පුරුෂයා, දූ දරුවන්, මව, පියා හා සෙසු ඥාතීන් සම්බන්ධයෙන් ද අදාළ වේ. යම් අයෙකුගේ වරදක් සම්බන්ධයෙන් ඔහුගේ පවුලේ සාමාජිකයකු හෝ ඥාතියකු ප්‍රාණ ඇපයට පොලීසියට ගත නොහැකි බවට සරලව අප පෙන්වා දෙන්නේ එම තත්වයයි.
තවදුරටත් උදාරණයක් වශයෙන් කිවහොත් යුරෝපා රටකට හෝ ඇමරිකා එක්සත් ජනපදයට අප යම් කටයුත්තක් සඳහා යෑමේදී වීසා ඉල්ලුම් කිරීමේදී වෙබ් අඩවි ලියාපදිංචි කිරීම සඳහා එහි හිමිකරුවන් හා අනෙකුත් පාර්ශ්වයන් සඳහා ඉල්ලන තරමේ තොරතුරු ඉල්ලන්නේ නැත. අයැදුම්කරුගේ, ඔහුගේ බිරිඳ දූ දරුවන් ඇතුළු පවුලේ සාමාජිකයින්ගේ විස්තර හා අයදුම්කරුගේ මව, පියා හා සහෝදර සහෝදරියන්ගේ විස්තර පමණක් ඉල්ලනු ලැබේ. එම තොරතුරු ඉල්ලන්නේද ආරක්ෂක නිෂ්කාශනයක් වශයෙන්ය.
එහෙත් මෙම ආරක්ෂක අමාත්‍යාංශ නිෂ්කාශන තොරතුරු ඊට වඩා එහා යයි. යුරෝපීය හෝ ඇමරිකාව බඳු රටක් එම රටවල වීසා සඳහා ඉල්ලන තොරතුරු වලටත් වඩා තමන් පෞද්ගලිකව නොදන්නා හෝ ආශ්‍රය නොකරන ඥාතින්ගේ තොරතුරු පවා ඉල්ලයි. මෙය අමුම අමු පිස්සුවකි. වෙබ් අඩවි ලියාපදිංචි කිරීමේදී මෙතෙක් ආරක්ෂක අමාත්‍යාංශය සිදුකර ඇත්තේ මෙම පිස්සුව බව පෙනේ. එම පිස්සුවට දැන් ප්‍රසිද්ධියේම කර ගසා ඇත්තේ ජාතික ජන බලවේග ආණ්ඩුව බව පෙනේ.
පුවත්පත් සම්බන්ධයෙන් ගතහොත් රාවය පුවත්පතේ හිටපු කර්තෘ වික්ටර් අයිවන් හා යුක්තිය පුවත්පතේ හිටපු කර්තෘ සුනන්ද දේශප්‍රිය යන දෙදෙනාම 1971 කැරැල්ල සම්බන්ධයෙන් වන රජය පෙරළීමේ මහ නඩුවේ විත්තිකරුවන්ය. පුවත්පත් සම්බන්ධයෙන් ආරක්ෂක අමාත්‍යාංශයේ මෙම නිෂ්කාශනය තිබුණේ නම් ඔවුන්ටද මාධ්‍යවේදයේ යෙදෙන්නට හැකි වන්නේ නැත. මව්බිම පුවත්පත් සමාගම ගතහොත් එහි හිමිකරු වන ටිරාන් අලස්ට අධිකරණය හමුවේ නඩු තිබී ඇත. දැනට වසා දමා ඇති ලක්බිම පුවත්පත් සමාගම ගතහොත් එහි හිමිකරු වූ තිලංග සුමතිපාලට අධිකරණයේ නඩු තිබී ඇත. මේ ආකාරයට පුවත්පත්, රූපවාහිනී නාලිකා, ගුවන් විදුලි නාලිකා හා අනෙකුත් ආකාරයේ මාධ්‍ය සම්බන්ධයෙන් ගත්කල ඒවායේ හිමිකරුවන් හා සංස්කාරකවරුන් සම්බන්ධයෙන් වන අධිකරණ නඩු හා පොලීසිය හමුවේ ඇති චෝදනා දිගු ලැයිස්තුවකට ගත හැකිය.
ඒ අනුව අවසානයේ සිදුවිය හැක්කේ ආරක්ෂක අමාත්‍යාංශයේ නිෂ්කාශනය අනුව සියලු මාධ්‍ය අවකාශයන් වසා දැමීමට සිදුවීමය. මාධ්‍ය අවකාශය ආණ්ඩුවට පමණක් ඉතිරි වීමය. මාධ්‍ය සම්බන්ධයෙන් ආණ්ඩුවේ ආදර්ශයත් චීනය වීම නිසා, පෞද්ගලික මාධ්‍යයක් නැති, ස්වාධීන මාධ්‍යයක් නැති, සමාජ මාධ්‍ය අවසරයක් නැති චීනයක් බවට ශ්‍රී ලංකාව පත්විය හැකිය.
මෙම වෙබ් ලියාපදිංචියට පාර කපා ඇත්තේ රජයේ ප්‍රවෘත්ති දෙපාර්තමේන්තුව ලබාදෙන මාධ්‍ය හැඳුනුම්පතයි.
පාර්ලිමේන්තුව වාර්තා කිරීම, කැබිනට් මණ්ඩල තීරණ දැනුම් දීමේ ප්‍රවෘත්ති සාකච්ඡාව ආවරණය කිරීම, ජනාධිපතිවරයා ඇතුළු රාජ්‍ය බලධාරීන් සහභාගි වන රාජ්‍ය තාන්ත්‍රික අවස්ථා ආවරණය කිරීම, රාජ්‍යයේ කටයුතු ආවරණය කිරීම සඳහා මාධ්‍යවලට රජය ලබාදෙන මාධ්‍ය හැඳුනුම්පත අනිවාර්ය කිරීම මෙම තත්වයට හේතුවයි. එම තත්වය නිදහස් මාධ්‍ය අවකාශය සීමා කිරීමට හෝ අවසන් කිරීමට ආණ්ඩුව දරන උත්සාහයක එක් පියවරක් පමණය. ඉදිරියේදී මාධ්‍ය සම්බන්ධයෙන් වන තව තවත් දේ අපට දැක බලාගත හැකි වනු ඇත.
