21.5 C
Sri Lanka
6 October,2022

squid game
ෆැන්ටසියෙන් ඇහැරවන කොරියාවේ
දැල්ලො සෙල්ලම

Must read

■ ඇන්තනී වෙරංග පුෂ්පික

කොරියාව කියූ සැණින් අපගේ සිහියට නැගෙන්නේ නිරන්තරයෙන්ම යුද අභ්‍යාස සිදු කරමින්, න්‍යෂ්ටික අත්හදා බැලීම් කරන සෙසු ලෝකයාගෙන් හුදකලා වූ කිම් ජොන් අන්ගේ අත්තනෝමතික පාලනයක් ගෙනියන උතුරු කොරියාවත්, විචිත්‍ර සංස්කෘතියක් සහ ලෝකයේ දියුණු රටවල් අතරින් කාර්මික නිෂ්පාදන අතින් ලොව ප්‍රමුඛ රටවල් අතරට එක් වූ තවත් එක් රටක් ලෙස දකුණු කොරියාවත්. ලෝකයේ බොහෝ රටවලින් දකුණු කොරියාවට පිරිස් පැමිණෙන්නේ වැඩි වැටුපකට රැකියාවක් කොට ජීවිතය ගොඩ දමා ගැනීමටයි. ඒ නිසාම ලංකාවේ ඉන්නා තරුණයන්ගේත් සිහිනයක් තමයි කොරියාවට ගිහින් රස්සාවක් කරන එක. නමුත් කොරියාවේ රැකියාවල යෙදෙන අයගේ සහ ඒ රටේ මිනිසුන්ගේ ශෝකජනක ඉරණම සහ රැකියාවෙහි කටුකබව බාහිරට පෙනෙන්නේ නැහැ.squid game කතාමාලාව අප වටා මවා ඇති කොරියානු සිහිනය හා යථාර්ථය මුණගස්වන කතාමාලාවක් වගේම ජීවිතය වෙනුවට මරණය තෝරාගැනීමට බල කරන සමාජ ක්‍රමයක් ඇතුළේ තිබෙන ඛේදනීය ඉරණම කෙබඳුද යන්න පිළිබඳ කතාකරන ටෙලි කතාමාලාවක් ලෙස හඳුනාගැනීමට පුළුවන්.


පසුගිය වසර කිහිපය තුළම කොරියානු කතාමාලා මෙරට ප්‍රේක්ෂකයන් නරඹන්නට පුරුදු වුණේ ඇබ්බැහියක් ලෙසටයි. ‘චංගුමී’ ඉන්න ‘සුජාත දියණී’ ටෙලිනාට්‍යයෙන් පටන් ගත්ත කොරියානු කතාමාලා රැල්ල එන්න එන්න ජනප්‍රියත්වයටම පත්වුණා. විශේෂයෙන්ම තරුණියන් අතර කොරියානු කතාමාලා එක්තරා ආකාරයක උමතුවක් වන තරමටම ජනප්‍රියත්වයට පත්වෙලා තියෙනවා. ඒ කතාමාලාවල ඉන්න ආකර්ෂණීය නළුනිළියන්, ප්‍රේමනීය රංගනය, කොරියාවෙ තියෙන විචිත්‍රවත් සංස්කෘතිය, නානාප්‍රකාරයේ විලාසිතා වැනි කාරණා නිසාම කොරියානු කතාමාලාවලට ලංකාව පමණක් නොව ලෝකයක්ම වසඟයට ගන්නට හැකිවෙලා තිබෙනවා. බොහෝ විට මේ කතාමාලා ඓතිහාසික සිදුවීම් වටා ගොඩනැඟුණු ඒවා සහ ධනවත් පවුල් වටා ගෙතිච්ච කතාමාලා.


මේ කතාමාලා තුළින් කොරියාව මුහුණ දෙන ඇත්ත ප්‍රශ්න අමතක කරමින් එක්තරා ආකාරයක ෆැන්ටසියකට ගෙනයන්නට උත්සාහ කළා. මෑත කාලයේ ‘පැරසයිට්’ සිනමා නිර්මාණයෙන් පසුව ෆැන්ටසි ලෝකයෙන් ප්‍රේක්ෂකයා එළියට ගෙනැවිත් කලාත්මක් අයුරිනුත් යථාර්ථවාදී ලෙසත් කොරියාව සහ ලෝකය දෙස බලමින් නිර්මාණය කොට ඇති squid game කතාමාලාව නිෂ්පාදකයන් පවා නොසිතූ ලෙස ලොව පුරා රසිකයන් අතර ජනප්‍රිය වුණා. මේ වන විටත් squid game නෙට්ෆ්ලික්ස්හි මෙතෙක් වැඩිම පිරිසක් නැරඹූ කතාමාලාව බවට පත්ව තිබෙනවා. එය පළමු දින 28 තුළ දී පමණක් මිලියන 111ක ජනතාවක් නරඹමින් වාර්තා බිඳදමමින් ප්‍රේක්ෂක ජනප්‍රියත්වයට පත්වෙච්ච කොරියානු කතාමාලාවක් බවට පත්වී අවසන්.


squid game කතාමාලාවෙ පළමුවෙනි දිග හැරුම ලෙස එන කොටස් 9හිම ත්‍රාසය භීතිය සහ කුතුහලය අවසානය දක්වාම නොනැසී තිබීම නිසා ඕනෑම අයෙකුට කොටස් 9ම වුණත් එක දිගටම නරඹන්නට පොළඹවන කතාමාලාවක් බවට පත්වෙලා තියෙනවා.
squid game එහෙම නැතිනම් දැල්ලො සෙල්ලමෙන් තමයි කතාමාලාව ආරම්භ වෙන්නෙ. දැල්ලො සෙල්ලම කියන්නෙ අවුරුදු ගාණකට කලින් කොරියාවෙ තිබුණ ළමා ක්‍රීඩාවක්. මේ ක්‍රීඩාවෙ රැකවලෙක් සහ ප්‍රතිවාදියෙක් ඉන්නවා. ප්‍රතිවාදියා ජයග්‍රහණය කිරීමට නම් දැල්ලාගේ ඔළුව හැඩය ගත්ත කොටසට ඇතුළුවෙන්න ඕනෑ. රැකවලා ජයග්‍රහණය කිරීමට නම් ප්‍රතිවාදියාව දැල්ලාගේ හැඩය තියෙන කොටුවෙන් පිටතට තල්ලු කළ යුතුයි. මේ සෙල්ලමෙන් දිනන්නේ එක් අයෙක් විතරයි කියන පණිවිඩය තමයි කතාවේ ආරම්භයේදීම ප්‍රේක්ෂකයාට ලබා දෙන්නෙ.squid game අතිශය ප්‍රචණ්ඩ දර්ශන ඇතුළත් කතාමාලාවක් නිසාම මේ සඳහා නිෂ්පාදකයෙකු සොයාගැනීමට නොහැකිව වසර ගණනාවක්ම බලාගෙන ඉන්න සිද්ධවෙලා තියෙනවා. තරගකරුවන් ළා කොළ පැහැති ඇඳුම් ඇඳගෙනත් තරගය හසුරුවන නිලධාරීන් රතු පැහැති ඇඳුම් ඇඳගෙනත් කරන රංගනය නිසාම මේ කතාමාලාවටම අනන්‍ය වූ වර්ණ සංකලනයක් දැක ගන්න පුළුවන්.


මේ කතාමාලාවේ කතානායකයා තමයි ගී හුම්. ඔහු තමන්ගේ විවාහ ජීවිතයත් විනාශ කරගෙන, අශ්ව රේස් ඔට්ටු තියලා පොහොසත් වෙන්න උත්සාහ කරන පුංචි ගෑනු ළමයෙක් ඉන්න පියෙක්. ඔහුගේ ආර්ථික නොහැකියාව නිසාම පුංචි ළමයාගේ වගකීම හිමිවෙන්නේ වෙන් වුණ බිරිඳට. ඇයත් ඒ වෙනකොට විවාහකයි. ගී හුම් හැම තැනකටම ණය වෙච්ච ණයකාරයෙක් වෙලා ඉවරයි. අවසානයේ ඔහු තමන්ගේ වියපත් වෙච්ච අම්මා මහන්සිවෙලා හම්බකරන සල්ලිවලිනුත් රේස් ඔට්ටු දාන්න යනවා. ඒ අවස්ථාවෙ නම් ඔහු විශාල මුදලක් දිනනවා. නමුත් ඔහුගේ ණයකාරයෝ සල්ලි ඉල්ලාගෙන පස්සෙන් පන්නනකොට ඒ සල්ලි ටික කෙනෙක් සොරකම් කරනවා. අවසානයේ ණයකරුවන් අතට අහුවෙන ගී හුම්ට ණය මුදල් ටිකවත් පියවන්න ලැබෙන්නේ නෑ.


මාසයක් ඇතුළත ණය මුදල් නොගෙව්වොත් තමන්ගෙ ශරීර කොටස් විකුණන්න බලෙන්ම එකඟ කරවාගෙන ණයකාරයන් ගී හුම්ගෙන් අත්සන් කර ගන්නවා. මේ අතර තුර තමයි කවදාවත්ම දැකපු නැති කෙනෙක් ගී හුන්ට පුංචි සෙල්ලමක් කරන්න ආරාධනා කරන්නෙ. ඒ සෙල්ලමෙන් ගී හුම්ට ලොකු මුදලක් ලැබෙනවා. ඊට පස්සෙ මේ වගේ සරල සෙල්ලම් කිහිපයක් කරලා ලොකු මුදලක් හොයන්න පුළුවන් ක්‍රමයක් තියෙනව කියලා ඔහුගේ අංකය ගී හුම්ට දෙනවා. ගී හුම් දන්නවා මාසයක් ඇතුළත ණය සල්ලි දුන්නේ නැත්නම් තමන්ට මැරෙන්න වෙන්නේ කියලා. ගී හුම් ඒ අංකයට කතා කරලා තරගයට සම්බන්ධ වෙනවා. එතැන් සිට තමයි කතාව ඉදිරියට ගලාගෙන යන්නෙ.
කලින් කිව්වා වගේම මේකෙදි කරන්න තියෙන්නේ සරල ක්‍රීඩා තරග හයක්. ගී හුම් ඇතුළු ක්‍රීඩකයන් 456 දෙනෙක් සම්බන්ධවෙලා ඉන්නවා. ජයග්‍රහණය කරන්නේ එක් අයෙක් පමණයි. ජයග්‍රාහකයාට කොරියන් වොන් බිලියන 45.6ක ලංකාවෙ මුදලින් නම් රුපියල් මිලියන 7713.6ක මුදලක් ලැබෙනවා. තරගය පවත්වන්නේ කවුරුත්ම දන්නෙ නැති රහස් දූපතක. කරන්න තියෙන්නේ පුංචි පුංචි සෙල්ලම් ටිකක් වුණාට සෙල්ලමේ පරාජිතයන්ට හිමි වෙන්නෙ කවුරුවත්ම දන්නෙ නැති මරණයක් විතරයි. මේ තරගයට එකතුවෙන්නෙ විවිධ මට්ටම්වල ලිහාගත නොහැකි ප්‍රශ්නවලින් හෙම්බත්වෙලා ඉන්න මිනිස්සු. ඒ අතර උපාධිධාරියෙක්, පාකිස්තානයේ ඉඳලා කොරියනු සිහිනය පසු පස ආ තරුණයෙක්, මවක්, මැරයෙක් වගේ මිනිස්සු පිරිසක්. මේ සියල්ලන්ටම පොදු කාරණය වන්නේ විසඳුමක සේයාවක්වත් නැති ජීවන අර්බුදයක හිරවෙලා සිටීම. එකිනෙකට වෙනස් විවිධ පුද්ගලයන් හරහා සමාජ අර්බුදය හා ජීවන ඛේදවාචකය අනාවරණය කරනවා. පළවෙනි තරගයට ක්‍රීඩා කරන 456 දෙනාගෙන් ඉතුරු වෙන්නේ 201 දෙනෙක් විතරයි. ඉතුරු 255 දෙනාටම සෙල්ලමෙන් වගේම ජීවිතයෙනුත් ඉවත් වෙන්න සිද්ධ වෙනවා. පළමු තරග වටය ඉවර වුණාට පස්සේ පළමු තරගයෙන් ඉතුරු වුණ බහුතරයේ කැමැත්ත මත තරගයෙන් ඉවත්ව යෑමට අවස්ථාවක් ලැබෙනවා. නමුත් මෙම මාරාන්තික ක්‍රීඩාවට වඩා එළියේ සමාජයේ තිබෙන භයානකකම සහ ඒ ප්‍රශ්නවලට උත්තර නැති බව තේරුම් ගන්න ඒ අයට වැඩි කාලයක් යන්නේ නෑ. මේ නිසා ඔවුන් කැමැත්තෙන්ම මරණයේ ක්‍රීඩාව තෝරා ගන්නවා.


මෙම ක්‍රීඩාව ඇතුළේ ගී හුම් ඇතුළු තරගකරුවන්ට එකට ඉන්න අනිකා ගැන සැක කරන්න සිද්ධ වෙනවා. එකට ඉන්න අනිකා ලුහුබඳින්න සිද්ධ වෙනවා. එකට ඉන්න අනෙකා එක්ක මුදල් වෙනුවෙන් තරග කරන්න සිද්ධ වෙනවා. මේ තරග මාලාව ඇතුළෙ සංවේදී පුද්ගලයෙකු විදිහට මනුෂ්‍යත්වය පෙන්නූ ගී හුම්ටත් එක් අවස්ථාවකදී පළමු තරගයේ සිටම තමා සමගින්ම හිටපු සටන් සගයටත් මුදල් වෙනුවෙන් වංචා කරන්න සිදුවෙනවා. ඒක ගී හුම්ගෙවත් අනෙක් පිරිසගේවත් මනුෂ්‍යත්වය පිළිබඳ කාරණයක් නොවෙයි. ඒ තරග රටාව තමයි ඔවුන් එතැනට ඇදලා දැම්මෙ. මේ සමාජයත් මිනිසුන් එවැනි තත්වයකට පොලඹවලා තියෙන්නේ. මේ සමාජ ක්‍රමයේ ඇති බරපතළ අර්බුදය විසින් කියැවෙන කාරණය මේ කතාමාලාව ඇතුළෙ අපිට කියාදෙනවා.


තරග මාලාව අවසානයේ ගී හුම් දිනලා තෑග්ග ගත්තාට ඒ සතුට බෙදාගන්න කවුරුවත් ඉතිරි වෙන්නේ නෑ. මිනිසා විසින් මිනිසාවම හූරාගෙන කන සමාජයක ආත්මාර්ථයේ ගිලෙමින් එකිනෙකා පරයා තරග වදිමින්, සමාජ සබඳතා අත්හරිමින් සිටින අපටද මුහුණ දෙන්නට සිදු වන්නේ ගී හුම් මුහුණ දෙන හුදකලාභාවයට සහ මේ සමාජ ක්‍රමය තුළ ජීවත් වනවා යැයි කියමින් සිදු කරන අතිභයානක මරණයේ ක්‍රීඩාවකට බව squid game කතාමාලාව අපිට මතක් කරලා දෙනවා.


මෙය මේ කතාමාලාවෙ පළමුවෙනි දිගහැරුම පමණයි. ඉදිරියේදී තවත් කොටස් පැමිණෙන්න නියමිතයි. ඒ වගේම මේ වෙනකනුත් මේ කතාමාලාව බලන්න බැරිවුණ කවුරුහරි ඉන්නවා නම් මෙය නැරඹිය යුතුම කතාමාලවක් ලෙස අපි යෝජනා කරනවා.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි