No menu items!
22.3 C
Sri Lanka
29 March,2024

ඒ බුද්ධිමතා
කරළියට පැමිණ තිබේ

Must read

‘මේ රටේ මිනිසුන් බුද්ධිමතකු සෙව්වා නම් ඒ බුද්ධිමතා දැන් කරළියට පැමිණ තිබේ. ඔබ හෙව්වේ මානව හිතවාදී නායකයකු නම් ඒ මානව හිතවාදී නායකයා කරළියට පැමිණ තිබේ. ඔබ සෙව්වේ දුර දක්නා නායකයෙක් නම් ඒ දුර දක්නා ප්‍රඥාවන්ත නායකයා මේ කරළියට පැමිණ තිබේ.’ සීතා අරඹෙපොල

පළවෙනි ප්‍රශ්නෙ තමයි, තේ වවන්නො ලොකු අමාරු තත්වෙක ඉන්නේ. පලදාව සීයට 30-50ක් අඩු වුණොත් ඒගොල්ලන්ට ඒ කර්මාන්තෙ කරගෙන යන්න බෑ. එහෙම වුණොත් ඒ මිනිස්සු තේ නිෂ්පාදනයෙන් එළියට යයි.’

■ පුලස්ති දන්තුරේබණ්ඩාර

‘නිරෝගී සහ ඵලදායී පුරවැසියෙක් බිහි කිරීමට නම් රජය විසින් වස විසෙන් තොර ආහාර වේලක් සඳහා ජනතාවට ඇති අයිතිය සහතික කළ යුතු ය. ඒ සඳහා ඉදිරි දශකය තුළ ශ්‍රී ලංකාවේ කෘෂිකර්මාන්තය මුළුමනින් ම කාබනික පොහොර භාවිතයට යොමු කළ යුතු අතර ඒ සඳහා කාබනික පොහොර නිෂ්පාදන වේගවත් කළ යුතු ය.’


එහෙම ලියා තිබෙන්නේ, ‘සෞභාග්‍යයේ දැක්මේ’ය. 39 වැනි පිටුවේය. එහි මාතෘකාව ‘පොහොර භාවිතයේ නව පෙරළිය’යි. ඒ පිටුවේ තවදුරටත් ලියා තිබෙන්නේ මෙහෙමය.


‘මුළුමනින් ම බිඳ වැටී ඇති අපේ ගොවියා නැවත නඟා සිටුවීම සඳහා පොහොර සහනාධාර ක්‍රමය වෙනුවට වගාවට අවශ්‍ය පොහොර සහ කාබනික පොහොර නොමිලේ ලබා දීමට කටයුතු කෙරේ. ක්‍රමානුකූල ව ගොවියා පූර්ණ වශයෙන් කාබනික පොහොර භාවිත කරන වස විසෙන් තොර ආහාර නිෂ්පාදනය සඳහා දිරි ගන්වනු ලැබේ.’ඒ පිටුවේම ඊළඟ වාක්‍ය මෙහෙමය. ‘කාබනික එළවඵ හා පලතුරු පරිභෝජනය ගෘහ මට්ටමෙන් පුඵල් කිරීම සඳහා ගෙවතු ලක්ෂ 20ක් වගා කිරීමේ වැඩ පිළිවෙළක් ක්‍රියාත්මක කෙරේ.’


සෞභාග්‍යයේ දැක්ම කියන්නේ, 2019 නොවැම්බර් 16 වැනිදා, ලංකාවේ හරිහමන් රස්සාවක්වත් නැතිව හිටපු ගෝඨාභය රාජපක්‍ෂ මහතා, රටේ ජනාධිපති පුටුවටම ඔසොවා තැබූ ලියැවිල්ලය. ඒ තරම් ආනුභවසම්පන්න ලියවිල්ලක තියෙන්නේ, ‘ඉදිරි දශකය තුළ ශ්‍රී ලංකාවේ කෘෂිකර්මාන්තය මුළුමනින් ම කාබනික පොහොර භාවිතයට යොමු කළ යුතු’ය කියාය. ඒ කියන්නේ 2019 සිට අවුරුදු දහයකිනි. ඒ කියන්නේ කෘෂිකර්මාන්තය මුළුමනින් ම කාබනික කරන්නේ 2029දී බවය.


එහෙත් දැන් වැඩ සිද්දවෙන්නේ එහෙම නොවේ. ගෝඨාභය රාජපක්‍ෂ මහතා අවුරුදු දහයකින් පිළිවෙළට, ක්‍රමේට ඉවසීමෙන් කරන්නට ආ, එහෙම කරන බවට ජනතාවට පොරොන්දුවක් දුන්, රටක් වටින ප්‍රතිපත්තියක් අවුරුද්දකටත් අඩු කාලයකින් තදියමේ කරන්නට ගොස් වැඩේ අනාගෙන කන තත්වයකට පත්වෙන විදියටය. කවුරු අනාගෙන කෑවත් රටේ මහජනතාවට අවුලක් නැත. අවුල ඇත්තේ, කවුරු හරි රටත් අනාගෙන කන්නට හදන විටය.


ගෝඨාභය රාජපක්‍ෂ ජනාධිපතිවරයාගේ ‘ඉන්ස්ටන්ට්’ කාබනික ගොවිතැන් ව්‍යාපෘතිය, රටේ මුළු මහත් කෘෂිකර්මාන්තයම උලා කා දමමින් තිබෙන බව නොතේරෙන්නේ ගෝඨාභය රාජපක්‍ෂ මහතාටම පමණක් විය යුතුය. පොහොට්ටු ආණ්ඩුවේ හැම මැති ඇමතිවරයෙකුම, ලොකු පොඩි හැම නිලධාරියෙකුම තම තමන්ගේ යාළු මිත්‍රාදීන් එක්ක පෞද්ගලිකව කතාකරන විට හොරාට හොරාට කියන්නේ, එහෙත් කිසිසේත්ම ප්‍රසිද්ධියේ නොකියන්නේ, ‘ජනාධිපතිතුමාගේ කාබනික පොහොර වැඩේ නම් ඓතිහාසික අනාගැනීමක්’ කියාය. කොටින්ම එය, මීට අවුරුදු එකහමාරකට පෙර ගෝඨාභය රාජපක්‍ෂ මහතා සිතූ පැතූ ආකාරයටම සපුරා පරස්පර බවය.


කාබනික එළවඵ හා පලතුරු පරිභෝජනය ගෘහ මට්ටමෙන් පුඵල් කිරීම සඳහා ගෙවතු ලක්ෂ 20ක් වගා කිරීමේ වැඩ පිළිවෙළක් ක්‍රියාත්මක කෙරේ’ යනුවෙන්ද සෞභාග්‍යයේ දැක්මේ ඒ පිටුවේම සඳහනක් වෙයි. ඒ වනාහි කාගේ හෝ හිසේ පහළ වූ තවත් මනෝ විකාරයකි. ගෝඨාභය රාජපක්‍ෂ මහතාගේ ජනාධිපති ධුර කාලය අවුරුදු 5ක්මය කියා හිතුවත්, ඒ කාලය ඇතුළත ගෙවතු ලක්‍ෂ 20ක් වගාකරන්න නම්, එක දවසකට ගෙවතු 1096ක් ගානේ රට පුරා වගාකරන්න පටන් ගත යුතුය. එච්චර ගානක් දිනකට වගාකරන්න පුළුවන් විය හැකිය. එහෙත්, දවස් 1825ක් නොනවත්වා ඒ වැඩේ කරගෙන යෑම නම් (දැනටමත් දවස් 700කට කිට්ටුවෙන්න ගෙවී ගිහින්ය.) පුදුමයක්ය. ඒ තරම් ගෙවතු ප්‍රමාණයක් වගාකිරීම දවසකට කරන්නට හැකි ජගතෙකු ඉන්නවා නම්, විශ්වකර්මයා වහාම ඉල්ලා අස්වී තමන්ගේ පුටුව ඒ ජගතාට පූජා කර, පැරදී මනුස්ස ලෝකයට පැමිණිය යුතුය.


ගෝඨාභය ජනාධිපතිතුමාට විතරක් නොතේරෙන, රටේ අනෙක් හැම දෙනාටම තේරෙන (සමාවෙන්න, සමහර රාජපක්‍ෂ නිකායේ හාමුදුරුවරුන්ටත් නොතේරෙන) එකම දේ නම්, කිසිකිසියේ කාබනික පොහොරට රට යටකරන්නට ගිය විට වගාවත් රටත් දෙකම කිසිකිසියේ කාබාසිනියා වන බවය. දැන් සිදුවෙමින් තිබෙන්නේ එයයි.


කාබනික පොහොර මනෝවිකාරය මුලින්ම කර තියාගෙන යන්නට පටන්ගත් වෙලාවේ, කවුරුත් පෙන්නා දුන්නේ තනිකර කාබනික පොහොරවලින් වගාකරන කිසිම රටක් ලෝකයේ නැති බවයි. එවිට ජනාධිපතිතුමා දුන් උද්දච්ච පිළිතුර මෙසේය.


‘එහෙම කරන පළමුවැනි රට බවට ලංකාව පත්කරනවාෟ’


බැලූ බැල්මට එය අධිෂ්ඨන සහගත නායකයකුගේ අරමුණකි. එහෙත්, අධිෂ්ඨානය වැඩ කරන්නේ අනිත් පැත්තට නම්?


‘මම පහුගිය කන්නයේ විදෙස් බීජ අර්තාපල් කිලෝ 50ක් රුපියල් 18000ක මිලට ගෙන වගාකළා. එමගින් නිෂ්පාදනය කරගත් බීජ අර්තාපල් හොණ්ඩර 8ක් සපුගොල්ල කුඹුරු යායේ වගාකළා. මේ වගාවට රසායනික පොහොර කිලෝ 250ක් ඕනෑ. රසායනික පොහොර නැති නිසා කැප්පෙටිපොළ අනුමත කර ඇතැයි කියන පුද්ගලයකුට අයත් කාබනික පොහොර ඇසුරුමක් රුපියල් 550 ගානේ ඇසුරුම් 20ක් මිලට ගත්තා. ඒ පොහොර යොදා වගාකළත් දින 45ක් ගතවෙලාත් වගාවේ වර්ධනයක් නෑ. වගාව අවසාන භාගයේදී රජයෙන් පොහොර කිලෝ 50ක් දුන්නා. කාලය ඉක්ම ගියාට පස්සේ පොහොර දාලා වැඩක් නැහැ. යාබදව වෙනත් ගොවියෙක් රසායනික පොහොර දාලා ඉතාමත් සරුවට අර්තාපල් වැව්වා. වගා දෙකේ ගස්වල කොළ පාට වෙනස්. නිසරු වගාවක් බවට පත්වෙලා තියෙන මගේ අර්තාපල් අස්වනු අඩුවීම හා ප්‍රමිතියෙන් තොරවීම මත අලෙවි කිරීමත් ගැටලුවක්.’ මේ වැලිමඩ, ඌව පරණගම සපුගොල්ල පදිංචි ටීඑම් මුතුබණ්ඩා ඔක්තෝබර් 4 වැනිදා ලංකාදීපයට කියා තිබුණු කතාවය.


ඒ ගමේම ප්‍රසන්න කුමාර ලංකාදීපයට කියන්නේ මෙහෙමය. ‘මගේ කැරට් වගාවට දින 40ක් විතර වෙනවා. වගාවේ මුල් අවස්ථාවේ රසායනික පොහොර මිලදී ගන්න බැරිවුණා. ගොවිජන සේවා මධ්‍යස්ථානයෙන් පොහොර ලැබුණේ දැනට දවස් කීපෙකට පෙරයි. අපේ කැරට්වල ඇත්තේ අල වෙනුවට කොළයි. කැරට් අල කේඬෑරි වෙලා. විකෘතියි. මේ වගේ අස්වනු අලෙවිකරගත නොහැකි වීමෙන් ඉදිරි කන්නයට වගාකරන්නත් මුදල් නැහැ.’


මේ අර්තාපල් සහ කැරට් වගාවට ගෝඨාභය රාජපක්‍ෂගේ ඉන්ස්ටන්ට් කාබනීකරණයෙන් සිදුවී තිබෙන වින්නැහිය පිළිබඳ ‘භූමියේ යථාර්ථය’ය. විඳවන්නේ මහපොළවේ ඉන්නා ගොවියාය.


අවුරුද්දේ ලොකුම කන්නය, මහ කන්නය පටන්ගන්නේ ඔක්තෝබර් 15 වැනිදා තරම් සිටය. එහෙත්, ඒ කන්නය වගාකරන්නට රසායනික පොහොර නැත. සම්පූර්ණයෙන් කාබනික විදියට මහ කන්නය වගාකිරීම ආණ්ඩුවේ දරදඬු ප්‍රතිපත්තියයි. ඒ වුණාට කාබනික පොහොරද නැත. මහ කන්නයේදී රට පුරා හෙක්ටෙයාර් ලක්‍ෂ 8ක් පමණ වගාකරන්නට සැලසුම් කර තිබෙන බව කියයි. හෙක්ටෙයාර් එකකට කාබනික පොහොර මෙටි්‍රක් ටොන් ගණනක් අවශ්‍යය. ඒ ඉල්ලුම සපුරන්නට ලංකාවේ කාබනික පොහොර නැති නිසා, චීනයෙන් ගෙන්වන්නට හැදූ කාබනික පොහාර මේ වන විට තුන්පාරක්ම ‘ක්ලිනිකලි ෆේල්’ය. ඒ කියන්නේ, රසායනාගාරයේදී ඒවා අසමත් වූ බවය. චීන කාබනික පොහොර ගෙන්වීම අත්හිටුවන්නට ආණ්ඩුව තීරණය කළ බව පසුව නිවේදනය කෙරුණේය. දැන් ගොවියාට කාගේ පිහිටක්ද?


‘මටත් කුඹුරු තියෙනවා. පොහොර ප්‍රශ්නය නිසා මාත් බයෙන් ඉන්නේ’ පරිසර ඇමති මහින්ද අමරවීර බිය පළකළේ තම අමාත්‍යාංශයේ පැවැති මාධ්‍ය හමුවකදීය.


ආණ්ඩුවේ බැංකුවලින් 4% පොලියට පසුගිය කාලයේ පෝලිමේ දුන් ණය අරගෙන නිෂ්පාදනය කෙරුණු දේශීය කාබනික පොහොර නිස්පාදකයන්ගේ පොහොර සාම්පල් බොහොමයක්ද ‘ක්ලිනිකලි ෆේල්’ය. ෆේල් විතරක් නොවේ, ඒවායේ ප්‍රතිඵලදායි බව ගැන කිසිම සහතිකයක්, ප්‍රමිතියක්ද ගොවියන්ට නැත. දැන් කියන්නේ, ලංකාවේ පොහොරවල තත්වය පරීක්‍ෂාවට තදින් ලක් නොකරන හැටියට කෘෂිකර්ම අමාත්‍යාංශයේ ලොක්කෙකු ජාතික පොහොර ලේකම් කාර්යාලයේ සහ රජයේ පොහොර සමාගම්වල නිලධාරීන්ට නියම කළ බවයි. (ඔක්තෝබර් 4 දිනපතා අරුණ) ඒ අතරේ රසායනික පළිබෝධ නාශක ආනයනයද තහනම් කිරීමෙන් වගා බිම්වල වල් මර්දනයට වල්නාශකත් නැති තත්වයක් උද්ගත වී තිබේ.


‘පොහොර ප්‍රශ්නෙ ලොකුවට බලපාලා තියෙනවා තේවලට. අපි තේ වවන අය ඔක්කොම ලොකු කරදරයක මේ දවස්වල ඉන්නේ. ඊයේ තිබුණා කොළඹ තේ වෙළඳුන්ගේ සංගමයේ වාර්ෂික මහා සභා රැස්වීම. අප එතෙන්දීත් කිව්වේ, (අපි ජනාධිපතිතුමාටත් මේ ගැන ඉදිරිපත් කළා,) මේකෙන් ලොකු හානියක් රටට වෙනවා කියලා. ඩොලර් බිලියන් 1.4ක් විතර තේවලින් ලැබෙනවා. දැන් අපි හිතන විදියට, මාස තුනක් හතරක් පහක් යනකොට සීයට තිහත් පනහත් අතර පලදාව අඩුවෙයි. ඊට අමතරව තේවල කොලිටි බහිනවා. අපේ තේ පුරුදු වෙච්ච රටවල් තියෙනවා. ඒගොල්ලන්ට දැනුණාම කොලිටි එක වෙනස් කියලා, මාකට් එක ආපහු ලබාගන්න ඒ තරම් ලේසි වෙන්නේ නැහැ. පළවෙනි ප්‍රශ්නෙ තමයි, තේ වවන්නො ලොකු අමාරු තත්වෙක ඉන්නේ. පලදාව සීයට 30-50ක් අඩු වුණොත් ඒගොල්ලන්ට ඒ කර්මාන්තෙ කරගෙන යන්න බෑ. එහෙම වුණොත් ඒ මිනිස්සු තේ නිෂ්පාදනයෙන් එළියට යයි.’


එහෙම කියන්නේ ලංකාවේ ප්‍රමුඛ තේ වෙළෙන්දකු වන ඉම්පීරියල් ටී පුද්ගලික සමාගමේ කළමනාකාර අධ්‍යක්‍ෂ, ජයන්ත කරුණාරත්නය. ඔහු එසේ කීවේ සිරස රූපවාහිනියට ඇවිත් නොවේ. ආණ්ඩුවට හොඳටම හිතවත් දෙරණ රූපවාහිනියට ඇවිත්ය. චතුර අල්විස්ගේ මූණටය. ගෝඨාභයගේ ඉන්ස්ටන්ට් කාබනීකරණයෙන් තේ වගාවට හැම පැත්තකින්ම විය හැකි හානිය, ඔහුගේ මේ වචනවල භයානක විදියට කැටිවී තිබෙනවා නොවේද?


‘රසායනික පොහොර සහ කෘෂිරසායනික ද්‍රව්‍ය ආනයනය තහනම් කිරීමත්, ඊට විකල්ප ලෙස සුදුසු පොහොර වර්ග සපයා ගැනීමට නොහැකි වීමත් යන කාරණා මත තේ කර්මාන්තය සහ රබර් කර්මාන්තය දැවැන්ත අභියෝගයකට මුහුණ දී ඇති බැවින්, ආර්ථිකය රැක ගැනීම සඳහා සංවේදී තීරණයක් ගන්නා ලෙස ඉල්ලා සිටිමු.’ එහෙම ඉල්ලන්නේ ලංකා වැවිලිකරුවන්ගේ සංගමයයි. ඒ ප්‍රසිද්ධ නිවේදනයක් නිකුත් කරමිනි.
රසායනික පොහොර හා කෘෂි රසායනික ද්‍රව්‍ය තහනමට තමන් විරුද්ධ නැති බව පවසන සංගමය, තහනම ක්‍රමානුකූලව ක්‍රියාත්මක කළ යුතුව තිබුණු බවත්, සුදුසු විකල්ප සොයාගැනීමෙන් පසුව එම තීරණය සඳහා රජය යා යුතුව තිබුණු බවත් පවසයි. සංගමය කියන විදියට තේ අපනයනයෙන් ලැබෙන ආදායමට සාපේක්‍ෂව පොහොර සඳහා වැයවන්නේ 2%ක් පමණකි. ඉතින් මෙවැනි දත්තවත් නොසලකා රසායනික පොහොර තහනම් කිරීමෙන් පෙනෙන්නේ, දත්ත මත පදනම්ව මේ ආණ්ඩුව තීරණ ගන්නා බවට කියන පුරාජේරු අමු බේගල් බව නොවේද?


මේ බටු වගාකරුවෙකු කාබනීකරණය ගැන නාලිකාවකට කියන දේය.


‘බටුගස් හොඳට තියෙනවා. නමුත් පලදාව නෑ. තියෙනවා කොළදාව. කොළ කන්න හොඳයි බටුවල. නමුත් ගෙඩි හැදෙන්නේ නැහැ. හේතුව බටුවලට අනිවාර්යයි යුරියා. අද යුරියා නෑ. රුපියල් 4000ට 5000ට යුරියා අරගෙන මේ බටුවගාවේ වැඩක් නෑ.’

හැමදාකම පාහේ රූපවාහිනි නාලිකාවල ප්‍රවෘත්තිවලත්, පත්තරවලත් දිගඇරෙන මේ විලාපය සහ විරෝධය, හැමෝටම ඇසෙයි. පෙනෙයි. හැමෝටම ඒ වෙන්න යන බහුවිධ විනාසය ගැන ඇත්තේ ඇඟ කිලිපොලා යන අවබෝධයකි. බියකි. එහෙත්, රටේ එකම එක්කෙනෙකුට පමණක් ඒ බව නොවැටහේ. නැත්නම් නොතේරෙන ගානට සිටියි. අවාසනාවකට ඔහු මේ රටේ විධායක ජනාධිපති නිසා, තමන් දන්නා, තමන්ට තේරෙන භයානක ඇත්ත ඔහුට කියා දෙන්නට රටේ කිසිම ඇමති-මැතිවරයෙක්, රාජ්‍ය නිලධාරියෙක් ඉදිරිපත් නොවෙයි. අඩු ගණනේ ‘රජ්ජුරුවෝ හෙළුවෙන් ඇවිදිනවෝ’ යැයි පෙන්වා දුන්නු පන්නයේ පොඩි එකකුවත් නැත. එවැනි රටක් කවදා හරි ඉතිහාසගත වනු ඇත්තේ, එක මිනිසකු තනියෙන්ම විනාශයට ඇදගෙන ගිය රටක් ලෙසය. එසේ විනාශයට ඇදගෙන යද්දී, අන් කිසිවකු ඊට විරුද්ධ නොවුණු රටක් ලෙසය.


ඉන්ස්ටන්ට් කාබනීකරණය පටන්ගත්තේ මේ අවුරුද්දේ අප්‍රේල් මාසෙ 22 වැනිදා ජනාධිපතිතුමා කළ ප්‍රකාශයක් රූපවාහිනියෙන් විකාශය වුණාට පස්සේ අප්‍රේල් 27 වැනිදා කැබිනට් මණ්ඩලය, කෘත්‍රිම රසායනික පොහොර සහ කෘත්‍රිම පලිබෝධනාශක ලංකාවට ගෙන්වීම සම්පූර්ණයෙන් තහනම් කිරීමත් සමගය.


කෘෂිනාශක, වල්නාශක, පොහොර මේවාට අපි කොච්චර විදේශ විනිමයක් වැය කරනවාද කියලා බැලුවොත්, ඒ අනුව අස්වැන්න වැඩි වෙනවාද කියලා බැලුවොත්, ගොවියට නිකං ඒ සල්ලි ප්‍රමාණය දුන්නත් අපිට ලාබයි. අපි මේ කන්නයෙ ඉඳලා, ‘ඔයා කාබනික පොහොර සහ අපි නිෂ්පාදනය කරන පොහොර පාවිච්චි කරලා රසායනික පොහොර පාවිච්චි කරන්නේ නැතිව වැඩ කරන්න’ කියලා ගොවියාට කියන්න ඕනෑ. ගොවියා කියනවා නම් මට මෙච්චර පාඩු වෙනවා කියලා, ඒ පාඩුව සල්ලිවලින් දුන්නත් රජයට ලාබයි. පොහොර අද ඉඳලා නවත්තවානං ඒ තරම් මේ රටට වෙන කිසිම ලාබයක් නෑ. අපිට ගොවියා දැනුවත් කරන්න පුළුවන්. අමාත්‍යාංශයට කියන්න පුළුවන්. ඔයා බය නැතිව වගා කරන්න. අස්වැන්න අඩු වුණොත් අපි ඒ මුදල අපි දෙනවා. ඒක ලාබයි අපිට. කවුරු මොනව කිව්වත් රසායනික පොහොර ගෙන්වීම සහ කෘමිනාශක තහනම් කරනවා. මොනව කිව්වත් මම නවත්තනවා තව ටික දවසකින්.’ නිලධාරින් පිරිවරගෙන ගෝඨාභය කීවේ එහෙමය.


ඒ වචන අවසන් වෙනවිට, ජනාධිපති ලේකම් කාර්යාලයේ රැස්වීම් ශාලාව නිලධාරීන්ගේ අත්පොළසන් නාදයෙන් ගිගුම් දුන්නේය.


එවැනි දූරදර්ශී නායකයකු රටට පහළ වන්නට නියමිත බව 2019 නොවැම්බර් 16ට පෙර පෙරදී, වියත් මග රැස්වීමකදී කියැවුණේ මේ විදියටය.


‘මේ රටේ මිනිසුන් බුද්ධිමතකු සෙව්වා නම් ඒ බුද්ධිමතා දැන් කරළියට පැමිණ තිබේ. ඔබ හෙව්වේ මානව හිතවාදී නායකයකු නම් ඒ මානව හිතවාදී නායකයා කරළියට පැමිණ තිබේ. ඔබ සෙව්වේ දුර දක්නා නායකයෙක් නම් ඒ දුර දක්නා ප්‍රඥාවන්ත නායකයා මේ කරළියට පැමිණ තිබේ.’


ඔව්. එහෙම උදාන වාක්‍ය කිව්වේ සීතා අරඹෙපොළ නම් වියත් මැතිනියකි.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි