ඇඳිරි නීති සමයේ ඇඳිරි නීති බලපත‍්‍රයක් නොමැතිව ඔබ මොබ ගෙනයෑම සම්බන්ධයෙන් චෝදනා ලබා සිටි හිටපු පාර්ලිමේන්තු මන්ත‍්‍රී රන්ජන් රාමනායකට නුගේගොඩ මහේස්ත‍්‍රාත් අධිකරණය ඇප නියම කරනු ලැබුයේ අපේ‍්‍රල් 20 වැනිදාය.
එම වරද සම්බන්ධයෙන් ඊට සතියකට පෙර අධිකරණයට ඉදිරිපත් කරන ලද ඔහු රක්ෂිත බන්ධනාගාරගත කරනු ලැබීය. එම අවස්ථාවේදී පොලීසිය පාර්ශ්වයෙන් කියවුණේ පොලිස් රාජකාරියට බාධා කිරීමද රන්ජන් රාමනායක මහතාට එරෙහි චෝදනාවක් බවයි.
රන්ජන් රාමනායක මහතාගේ එම සිදුවීමට පෙර දිනක හිටපු පාර්ලිමේන්තු මන්ත‍්‍රී පාලිත තෙවරප්පෙරුමට එරෙහිවද පොලීසිය අධිකරණයට කරුණු ගොනු කරමින් සඳහන් කළේ ඔහුද ඇදිරි නීතිය කඩ කරමින් හැසිරෙන බවයි. එහෙත් එම අධිකරණය එදින පොලීසියේ කරුණු මගින් සෑහීමට පත් නොවී දැනුම්දෙන ලද්දේ පාලිත තෙවරප්පෙරුම මහතා රක්ෂිත බන්ධනාගාරගත කරන නියෝගයක් ලබා නොදෙන බවයි.
රන්ජන් රාමනායක මහතාට හා පාලිත තෙවරප්පෙරුම මහතාට පොලීසියෙන් මෙම චෝදනා ලැබීමට ප‍්‍රධානම හේතුව ඔවුන් කොරෝනා වසංගතයෙන් විපතට පත් ජනතාවට ද්‍රව්‍යමය සහන ලබාදීමට උත්සාහ කිරීමය.
ආණ්ඩු පක්ෂයේ දේශපාලනඥයන් මෙකී සහන ක‍්‍රියාවලියේ නිරතවුවද ඔවුන්ට එරෙහිව පොලීසිය අධිකරණයට කරුණු වාර්තා කිරීමක් දක්නට නැත. එයින් පෙනෙන්නේ ද්‍රව්‍ය බෙදාදීමේ කටයුතු සඳහා ආණ්ඩු පක්ෂ දේශපාලන සාමාජිකයන්ට පොලීසිය ලබාදෙන අවසරය හා ඔවුන් සම්බන්ධයෙන් අනුගමනය කරන සහන පිළිවෙත විපාක්ෂික දේශපාලන සාමාජිකයන් වෙනුවෙන් පොලීසිය අනුගමනය නොකරන බවයි.
ඒ සඳහා ඇති හොඳම උදාහරණය වන්නේ කළුතර අටලූගම ප‍්‍රදේශය නිරෝධායනයට ලක් කිරීමෙන් පසු පාලිත තෙවරප්පෙරුම මහතා හිටපු මන්ත‍්‍රී නාමල් රාජපක්ෂට කතා කිරීමයි. නාමල් රාජපක්ෂ යනුද පාලිත තෙවරප්පෙරුම වාගේම හිටපු මන්ත‍්‍රීවරයෙකු පමණය. එහෙත් වෙනස වන්නේ ඔහු ආණ්ඩු පාක්ෂික වීම හා තෙවරප්පෙරුම මහතා විපාක්ෂික වීමය. එහිදීත් බැහැ කියූ පොලීසියට හා කියන්නට සිදුවූයේ නාමල් රාජපක්ෂගේ බලපෑම නිසා නොවේද? එයත් පොලිසියේ රාජකාරියට බාධා කිරීමක් නොවේද?
රන්ජන් රාමනායක මහතාට ඇප නියමවීමෙන් පසු ඔහු වෙනුවෙන් අධිකරණයේ පෙනී සිටි ජනාධිපති නීතිඥ එම්.ඒ. සුමන්තිරන් මාධ්‍යයට කළ අදහස් දැක්වීම දැඩි සාකච්ඡුාවට ලක්විය යුත්තකි. එහිදී සුමන්තිරන් මහතා කීවේ මේ ඇඳිරි නීතිය නීතිවිරෝධී එකක් බවය. ඇත්තටම පසුගිය මාසයක කාලයක් පුරාවටම රට තුළ ක‍්‍රියාත්මක කරන්නේ පොලිස් ඇඳිරි නීතියය. පොලිස් ඇඳිරි නීතියට ගරු කළ යුත්තේ රට තුළ ඇති කොරෝනා වසංගත තත්වය නිසා බවද සුමන්තිරන් මහතා කීවේය. පොලිස් ඇඳිරි නීතියක් කඩ කළා යැයි පුද්ගලයන් අත්අඩංගුවට ගැනීමක් කළ නොහැකි බව නීතිවේදීන්ගේ මතයය.
මේ පොලිස් ඇඳිරි නීතියෙන් මිනිසුන් අත්ඩංගුවට ගත නොහැකි බව කියමින් පොලීසියේ නියෝග අභියෝගයට ලක්කරන තත්වයට ජනතාව පත් වුවහොත් සිදුවන්නේ මිනිසුන්ගේ අයිතිවාසිකම් කඩවීම සම්බන්ධයෙන් පොලීසිය බොහෝ විට විරදකරුවන් වීමය. වඩා භයානක වන්නේ එය නොවේ. කොරෝනා වසංගතය පැතිරී යෑම වැළැක්වීම සඳහා කරන මේ ව්‍යායාමය නිරර්ථක එකක් වීමය. පොලිස් ඇඳිරි නීතිය බොහෝ විට පනවන්නේ හදිසි කැරලි කෝලාහල තත්වයකදී මහජන සාමය ආරක්ෂා කිරීම සඳහා සීමිත ප‍්‍රදේශයකට තාවකාලික වශයෙන්ය.
එහෙත් ස්ථීර ලෙසට රට පුරා මාසයකට අධික කාලයක් තිස්සේ පවත්වාගෙන එන්නේ මේ බල රහිත පොලිස් ඇඳිරි නීතියය.
මේ පොලිස් ඇඳිරි නීතියේ බලධරයා වන්නේ පොලිස්පතිවරයාය. වත්මනට අදාලව කිවහොත් වැ.බ. පොලිස්පතිවරයාය. යටත්වැසියන් සිතාගෙන සිටින ලෙස සර්වබලධාරී ජනාධිපති ගෝඨාභය රාජපක්ෂ නොවේය.
නීතියෙන් බලය සහිත ඇඳිරි නීතිය වන්නේ මහජන ආරක්ෂක ආඥාපනත යටතේ ජනාධිපතිවරයා පනවන හදිසි අවස්ථා නියෝග යටතේ පනවන ඇඳිරි නීතියය. මේ රටේ ජනතාවට ජනාධිපතිවරයා ඇත්තටම ආදරේ නම් ජනාධිපතිවරයා කළ යුත්තේ එයය. එහෙත් ජනාධිපතිවරයා එසේ ජනතාවට ආදරේ නැති බව මේ පොලිස් ඇඳිරි නීතියෙන් පෙන්වාදී ඇත. කොරෝනා වසංගත තත්වයෙන් ජනතාවට මොන වින්නැහියක් සිදුවුණත් කම් නැතැයි ඔහු මේ පොලිස් ඇඳිරි නීතියෙන් ප‍්‍රදර්ශනය කර තිබේ.
ආණ්ඩුක‍්‍රම ව්‍යවස්ථාවේ 155 ව්‍යවස්ථාව යටතේ සඳහන් කර ඇත්තේ ජනාධිපතිවරයාට මහජන ආරක්ෂක ආඥාපනත යටතේ හදිසි නීති රෙගුලාසි පැනවිය හැකි බවයි.
එය පාර්ලිමේන්තුවට විසුරුවා හැර ඇති විටද, පාර්ලිමේන්තුවේ වාර අවසාන කර ඇති විටද, පාර්ලිමේන්තුවේ රැුස්වීම් කල් තැබීමක් කර ඇති විටද කළ හැකිය.
පනවා ඇති එකම කොන්දේසිය වන්නේ නියමිත දින ගණනාවකදී ඒ සඳහා පාර්ලිමේන්තුවේ අවසර ලබාගැනීමය. එම නියමිත දින ගණන නව පාර්ලිමේන්තුව රැස්වීමට පෙර දිනයක් නම් හෝ වාර අවසාන කර ඇති පාර්ලිමේන්තුව රැුස්වීමට නියමිත දිනට පෙර දිනයක් නම් හෝ කල් තැබූ පාර්ලිමේන්තුව රැුස්වීමට නියමිත දිනට පෙර දිනයක් ජනාධිපතිවරයා පාර්ලිමේන්තුව රැස්කළ යුතුය.
ඒ අනුව පෙනෙන්නේ නියමිත කාලයට පෙර විසුරුවාහරින ලද පාර්ලිමේන්තුව නැවත රැුස්කිරීම සඳශා ඇති උද්දච්ච නොකැමැත්ත මත ජනාධිපතිවරයා බල සහිත ඇඳිරිනීතිය පනවා නැති බවයි. ජනාධිපතිවරයාගේ මේ ප‍්‍රජාතන්ත‍්‍රවාදී ක‍්‍රමවලට ඇති බිය ඔහුගේ මිලිටරි පසුබිම නිසා ඇතිවූවක් විය හැකිය.
එහෙත් එහි ඇති තවත් අනතුරක්ද ඇත. ඒ අප මීට පෙර කිහිප අවස්ථාවකදීම පෙන්වා දී ඇති පරිදි රටට ආරක්ෂක ඇමතිවරයෙකු නැතිකමය. පොලීසියද දැන් අයත් වන්නේ ආරක්ෂක අමාත්‍යාංශය යටතටය. එම අමාත්‍යාංශයට ඉන්නේ ලේකම්වරයෙකු පමණය. උපදෙස් ගන්නට හෝ නියෝග නිකුත් කරන්නට දේශපාලන නායකත්වයක් නැත.
චමල් රාජපක්ෂ මහතාගේ ආරක්ෂක රාජ්‍ය අමාත්‍යධුරයද පාර්ලිමේන්තුව විසුරුවාහැරීමෙන් පසු දැන් අහෝසිය. භාරකාර ආණ්ඩුව වශයෙන් ක‍්‍රියාකරන කැබිනට් මණ්ඩලයේ දැන් ආරක්ෂක ඇමතිවරයෙක් නැත.
කොරෝනා වසංගතයක රටට ජනතාවට ආදරේ ජනාධිපතිවරයෙකුගේ කෙරුම් එසේය. පොලිස් ඇඳිරි නීතිනේ පාලනය කරන රට අනුව පෙනෙන්නේ වැ.බ. පොලිස්පතිවරයා රට කරවන බවය.
ඡායාරූපය : ලක්රුවන් වන්නිආරච්චි/Getty Images
