පාස්කු ඉරිදා ත‍්‍රස්ත ප‍්‍රහාරය පිලිබඳව විමර්ශනය කිරීමට පත්කළ පාර්ලිමේන්තු විශේෂ කාරක සභාව ජාතිය පාවාදීමක් බව ඇතැම්හු කියති. 2019 අපේ‍්‍රල් 21 වැනි දින ශ‍්‍රී ලංකාවේ විවිධ ස්ථානවල සිදුවූ ත‍්‍රස්තවාදී ප‍්‍රහාර පිළිබඳ සොයාබලා පාර්ලිමේන්තුවට වාර්තා කිරීම සඳහා වන පාර්ලිමේන්තු විශේෂ කාරක සභාව යන නාමයෙන් යුතුව මෙම කාරක සභාව පත්කර තිබුණි. එම විශේෂ කාරක සභාවේ කාර්යභාරය එය පිහිටවූ අවස්ථාවේ පැහැදිළිව සඳහන් කර තිබුණි. ත‍්‍රස්ත ප‍්‍රහාරවලට පෙර ඒ සම්බන්ධයෙන් බුද්ධි තොරතුරු ලැබී තිබුණාද, එවැනි ප‍්‍රහාරය වැළැක්වීමට පියවර ගත්තේද, එවැනි ප‍්‍රහාර වැළැක්වීමට නොහැකි වීමට හේතු වූ රාජ්‍ය යාන්ත‍්‍රණයේ අඩුපාඩු තිබුණේද, එවැනි ත‍්‍රස්ත ප‍්‍රහාරවලටදායක වූ වෙනත් කරුණු තිබේද, ත‍්‍රස්තවාදීන්ට අනුබල දුන් ඕනෑම පාර්ලිමේන්තු මන්ත‍්‍රීවරයෙකුට හෝ ආණ්ඩුකාරවරයෙකුට හෝ ඕනෑම පුද්ගලයෙකුට විරුද්ධව ඇති චෝදනා සත්‍යයද යන්නත්, අනාගතයේදී එවැනි ප‍්‍රහාරයන් සිදුවීම වැළැක්වීමට ගත යුතු ක‍්‍රියාමාර්ග කවරේද යන්නත් පිළිබඳව සොයාබැලීම ලිඛිතව සඳහන් පැහැදිළි අරමුණුය. වෙනත් කිසිදු කාරණයක් ගැනවත්, ඉදිරියේදී ජාතික ආරක්ෂාවට තර්ජනයක් විය හැකි කරුණක් ගැනවත් සෙවීම එහි අරමුණු අතර නැත. මේ කිසිදු කරුණක් මාධ්‍යවලට විවෘත කිරීම හෝ සජීවීව විකාශය කිරීම ජාතික ආරක්ෂාවට තර්ජනයක් බව පෙනෙන්නේ නැත. එහෙත් මේ විශේෂ කාරක සභාව මාධ්‍යවලට විවෘත කිරීම ජාතික ආරක්ෂාවට තර්ජනයක් බව පවසන්නෝ සිටිති. මේ ඒ පිළිබඳව කාරක සභාවේ සාමාජිකයන්, සිවිල් ක‍්‍රියාකාරිකයන් හා මාධ්‍ය සංවිධාන නියෝජිතයන් කිහිපදෙනෙකු දැක්වූ අදහස්ය.
කරුණු හෙළිවෙද්දී දරාගන්න බෑ
සරත් ෆොන්සේකා විශේෂ කාරක සභා සාමාජික
පසුගිය කාරක සභාව රැුස්වූ පසුදාම කාරක සභාවේ සාකච්ඡුා කළ දේ සවිස්තරව තිබුණා. සමහර පුවත්පත් මේ සවිස්තර තොරතුරු දමලා පසුදා කතුවැකියේ කියා තිබුණා කාරක සභාවේ තොරතුරු ජනතාව දැනගත යුතු නෑ කියා. අපි හමුදාවල වැඩ කරද්දී මා යටතේ බුද්ධි අංශය තිබුණා. බුද්ධි තොරතුරු එළියට දැමීමට හැකි අවස්ථා නැහැ. එසේ නැති අවස්ථාවක් තිබිය හැකියි.
හතුරා ගැන මෙන්ම මිත‍්‍ර හමුදාවල මෙහෙයුම් ගැනත් බුද්ධි තොරතුරු තියෙන්න පුලූවන්. මෙහෙයුම කරන තුරු එය හෙළිකළ යුතු නැහැ. නමුත් රටට හානිකර දෙයක් වූ පසු ඒ ගැන සොයාබලා හෙළිකිරීම ජනතාවට අවශ්‍යයි. ඒවා බුද්ධි තොරතුරු නොවේ. ඒ ගැන ජනතාව දැනුවත් කිරීම බුද්ධි තොරතුරක් හෙළි කිරීමක් නොවේ. අප සාක්ෂිකරුවන්ට කීවා රහස්‍ය තොරතුරු හෙළි කරන්න එපා. මාධ්‍ය නැතිව ඒවා ගැන කතාකළ හැකියි කියා. ඒ නිසා අප ආරක්ෂාවට අහිතකර පරිසරයක් ගොඩනඟනවා කියා කියන්න බැහැ.
සමහර කරුණු මෙතැන හෙළිවෙද්දී ඇතැමුන්ට දරාගන්න බෑ. මේ තොරතුරු හෙළිවීම වැළැක්වීමටයි මේ අය උත්සාහ කරන්නේ. හමුදාවල නිලධාරීන් දෙවර්ගයක් සිටිනවා. ඕවර්ටි ඔපරේෂන් කඑන අය. ඒ නිල ඇඳුම ඇඳගෙන රහස්‍යභාවයක් නැතිව වැඩකරන අය. ඊට අමතරව කෝවර්ටි ඔපරේෂන් කියලා පිරිසක් ඉන්නවා. ඒ අය නිල ඇඳුම් අඳින්නේ නෑ. ඒ අයගේ කටයුතු රහස්‍ය සේ සලකනවා. ජී.අයි.ජී.ලා ආරක්ෂක ලේකම්ලාගේ වගකීම්වල රහස්‍යභාවයක් නෑ. ඒවා සම්ප‍්‍රදායානුකූල වගකීම්. ඒ වගකීම් ගැන පොතපතේ ලියැවිලා තියෙනවා. යුධ හමුදාවේ ප‍්‍රමාණය, බුද්ධි අංශවල ප‍්‍රමාණය, කාලතුවක්කු හමුදාවේ ප‍්‍රමාණය, ආයුධ සංඛ්‍යාව වැනි කරුණු සාම්ප‍්‍රදායානුකූලයි. මේවා ගැන කතාකිරීම ජාතික රහස් හෙළිකිරීමක්ය කියන්නේ ඒවා ගැන නොදන්නාකම නිසායි.
එහෙත් හමුදාව යොදවන ආකාරය බුද්ධි තොරතුරක් විය හැකියි. එවැනි ප‍්‍රශ්න අහන්න බලාපොරොත්තුවක් නැහැ. තව්හිද් ජමාත් සංවිධාන කිහිපයක් තියෙනවා. සමස්ත ලංකා තවුහිද් ජමාත් එකට කවුරුහරි සල්ලි දුන්නාද කියා ඇසීම වරදක් විය හැකියි. ඒ සම්බන්ධ මුදල් ගෙවීම රටේ ආරක්ෂාවට අදාළ නැත්නම් ඒක බුද්ධි තොරතුරු හෙළිවීමට හේතුවක් වන්නේ නැහැ. ඒත් අතීතයේ මුදල් ලැබූ ඔත්තුකරුවන් ගැන අහන්න අපට අයිතියක් නෑ.
බණ්ඩා නගරයට ගියා වගේ සමහරු නොදන්නා වචන ඇහුණා. ‘අයිස් ඔන්ලි‘ වචන ලොව හැම හමුදාවක්ම පාවිච්චි කරනවා. එය බුද්ධි අංශ වචනයක් නොවේ. ‘අයිස් ඔන්ලි නෝ සෝඩා‘ කියා හතරපස් දෙනෙක් තේරුම් අරන් තියෙනවා. මේවා පාඨමාලාවල ප‍්‍රසිද්ධියේ උගන්වන වචන. පරමාණු බෝම්බය තියෙන තැන සතුරාට කිව්වා වගේ සමහරු ‘අයිස් ඔන්ලි‘ වචනයට කුලප්පු වෙලා. ආරක්ෂක කවුන්සිලය ගැන අපට ප‍්‍රශ්න කළ හැකියි. මෙහෙයුම්, උපක‍්‍රම ගැන අප අහන්නේ නැහැ. ඇහුවත් උත්තර දෙන්න ඕනෙත් නැහැ.
( ජුනි 05 වැනිදා විශේෂ කාරක සභාව රැුස්වූ අවස්ථාවේදී කළ
ප‍්‍රකාශය *
වගවීම හොඳ දෙයක්
පාක්‍යසෝති සරවනමුත්තු විකල්ප ප්රතිපත්ති කේන්ද්‍රය
මේ කාරක සභාවේ කටයුතු ජාතික ආරක්ෂාවට තර්ජනයක් හැටියට දකින්න බැහැ. ඒක ජනතාවට ලබාදෙන එක මොනතරම් හොඳ දෙයක්ද. අද පාර්ලිමේන්තුව වැනි ආයතන පිළිබඳවත් දේශපාලඥයන් පිළිබඳවත් මහජනතාවට විශ්වාසය අඩුයි. ඒ නිසාම ප‍්‍රජාතන්ත‍්‍රවාදය ගැනත් විශ්වාසය බිඳවැටෙන්න ඉඩ තියෙනවා. එහෙම පසුබිමක මෙවැනි ක‍්‍රියාවලියකින් පාර්ලිමේන්තු ක‍්‍රියාවලිය පිළිබඳව ජනතාවගේ විශ්වාසය වර්ධනය කරන්න පුලූවන්. ප‍්‍රජාතන්ත‍්‍රවාදී සමාජයක් ගොඩනැගීමේදී වගවීම කියන්නේ ඉහළ තැනක තියෙන සංකල්පයක්. මෙවැනි ක‍්‍රියාවලියකින් ඒ වගවීමට වටිනාකමක් ලැබෙනවා. මේ කාරක සභාව පමණක් නොවෙයි, කෝප් කාරක සභාව ඇතුලූ අනෙක් කාරක සභාවල ක‍්‍රියාවන් පවා ජනතාවට පෙන්වන්න ඕනෑ. මෙතැනින්වත් ඒක පටන්ගැනීම ඉතාම හොඳ දෙයක්.
රහසිගත තොරතුරු විවෘත නෑ
මහාචාර්ය ආශු මාරසිංහ විශේෂ කාරක සභාවේ සාමාජික
අපි පාර්ලිමේන්තුවේදී කාලෙක පටන්ම ඉල්ලූවා. අපි ඉල්ලූවේ සියලූ කාරක සභා මාධ්‍යවලින් ආවරණය කරන්න ඉඩදෙන්න කියලා. රජයේ ගිණුම්කාරක සභාව, පොදු ව්‍යාපාර කාරක සභාව ඇතුලූ කාරක සභා විස්සට වැඩි සංඛ්‍යාවක් පාර්ලිමේන්තුවේ තියෙනවා. ඒ සියලූ කාරක සභා මාධ්‍යවලට නිරාවරණය කරන්න කියලා ඉල්ලූවා. කොහෙන් හරි ආරම්භ කරන්න ඕනෑ නිසා තමයි අපි මේ ජාතික වැදගත්කමක් තියෙන කාරණයක් කතාකරන කාරක සභාවෙන්ම ඒක පටන්ගත්තේ. ඉදිරියේදී අනෙක් කාරක සභාත් මහජනතාවට විවෘත කරන්න බලාපොරොත්තු වෙනවා. සභාගර්භයේ කෑගහන ඒවා විතරක් මාධ්‍යවලට විවෘත කරලා වැඩක් නැහැ. මේ කාරක සභාවල කරන සාකච්ඡුා පවා මහජනතාවට විවෘත විය යුතුයි.
කවුරු මොනවා කිව්වත් අපි පහුගිය දවස් ටිකේ මේ කාරක සභාව මාධ්‍යවලට විවෘත කළා. ඉදිරියේදී අපි හිටපු පොලිස්පතිවරයා, ආරක්ෂක අමාත්‍යාංශයේ හිටපු ලේකම්වරයා ඇතුලූ අයවත් කාරක සභාව ඉදිරියට ගෙන්වනවා. මේ කවුරුවත් රහසිගත බුද්ධි නිලධාරීන් නෙවෙයි.ඒ අය ඒ තනතුරුවල ඉන්න බව රටම දන්නවා. එහෙම නොවන, රහසිගත තොරතුරු ගැන කතාකරන්න අවස්ථාවක් ආවොත් අපි ඒක කරන්නේ මාධ්‍යවලට විවෘත නොකර රහසිගතවයි.
මේ ත‍්‍රස්ත කණ්ඩායම ගැන 2011 පටන්ම පරීක්ෂණ කරලා තියෙන බව කියනවා. 2016 දීත්, 2018දීත් මේ අයව අත්අඩංගුවට ගැනීමට වරෙන්තු පවා නිකුත් කරලා තියෙන බව කියනවා. ඒව වැළැක්වුවේ කවුද, ඒවා පසුපස හිටියේ කවුද කියලා දැනගැනීම ජාතික ආරක්ෂාවට තර්ජනයක් නෙවෙයි. ජාතික ආරක්ෂාවට අනතුරක් වන එවැනි පුද්ගලයන්ව අඳුනාගැනීම ජාතික ආරක්ෂාවට යහපත් කාරණයක්. අපි මෙතැනට ඉදිරියේදී අගමැතිවරයා, ජනාධිපතිවරයා හෝ ජනාධිපති ලේකම්වරයා වැනි ඉහළ අයව පවා ගෙන්වනවා.
මෙවැනි කාරක සභාවලට ආරක්ෂක අංශ ප‍්‍රධානීන්ව ගෙන්වීමත්, ඒවා මාධ්‍යවලින් ආවරණය කිරීමත් අලූත් තත්වයක් නෙවෙයි. මෑතකදී ඇමෙරිකානු කොංග‍්‍රසය එෆ්බීඅයි ප‍්‍රධානියාව ගෙන්වලා ප‍්‍රශ්න කළා. තවත් ආරක්ෂක ප‍්‍රධානීන්ව ප‍්‍රශ්න කළා. ඒ 2016 ඇමෙරිකානු ජනාධිපතිවරණයේදී රුසියාව මැදිහත් වුණාද කියලා සිදුකළ විමර්ශනයකටයි. මෙවැනි පරීක්ෂණ නිතිපතා සිදුවෙලා තියෙනවා. තවත් රටවල් ගණනාවක් මෙවැනි කාරක සභා රැුස්වීම් මාධ්‍ය ඉදිරියේ කරලා තියෙනවා.
තර්ජනයක් නම් වාර්තා කළේ ඇයි
නියෝජ්‍ය අමාත්‍ය කරුණාරත්න පරණවිතාන
ජාතික ආරක්ෂාවට හානියක් වෙන විදියට පාර්ලිමේන්තු කාරක සභා කටයුතු කරන්නේ නැහැ. මේක විවෘත ආණ්ඩු සංකල්පය ප‍්‍රවර්ධනය කෙරුණු අවස්ථාවක්. ලංකාවේ ජනාධිපති මෛත‍්‍රීපාල සිරිසේන ටික කාලෙකට කලින් විවෘත ආණ්ඩු සංකල්පය ප‍්‍රවර්ධනය කිරීම පිළිබඳ ජාත්‍යන්තර සමුළුවකටත් සහභාගී වුණා. විවෘත ආණ්ඩුවක වැදගත්කම ගැන ඔහු කීවා. ඇත්තටම ගොඩක් රටවල අධීක්ෂණ කාරක සභාවල කටයුතු මාධ්‍යවලට විවෘතයි. ඇමෙරිකාවේත් එහෙමයි.
අප මේ කතාකරන කාරක සභාවේ කටයුතු ජාතික ආරක්ෂාවට තර්ජනයක් නොවෙයි. ජාතික ආරක්ෂාවට ලොකුම හානිය තමයි මේ සිද්ධිය වළක්වාගන්නට බැරිවුණේ ඇයිද කියන අබිරහස. ඒ අබිරහස යටපත් වීම තමයි ජාතික ආරක්ෂාවට තියෙන ලොකුම හානිය.
තොරතුරු පනතේ පස්වැනි වගන්තිය යටතේ ජාතික ආරක්ෂාවට හානිවෙන දේවල් හෙළි නොකර ඉන්න පුලූවන්. ඒත් එවැනි තොරතුරු පවා ලබාදීම ප‍්‍රතික්ෂේප කරන අවස්ථාවක අධිකරණයට ඉදිරියට යන්න පුලූවන්. අධිකරණය ජාතික ආරක්ෂාවට හානියක්දැයි විමසා බලා ජාතික ආරක්ෂාවට හානියක් නොවේයැයි පැහැදිළි වුණොත් ඒ තොරතුරු ලබාදෙන්නැයි නියෝග කරනවා. ජාතික ආරක්ෂාවට හානියක් නම් තොරතුරු නොදී ඉන්න නියෝග කරනවා. මේ කාරක සභාවේ සාමාජිකයන් ඒවා ගැන හොඳින් දන්නවා. කාරක සභාව ඉදිරියට එන අයත් ඒවා ගැන දන්නවා.
දැන් විශේෂ කාරක සභාව දින කිහිපයක් රැුස්වෙලා තියෙනවා. එතැන සමහර කරුණු මාධ්‍ය ඉදිරියේ කතාකරලා තියෙනවා. මුල්ම දිනයේ කාරක සභාව සජීවීව විකාශය කිරීම අබිරහස් විදියට නවත්වලා තිබුණා. ඒක නැවැත්වුවේ කවුද කියන එක ප‍්‍රශ්නයක්. මේ කාරක සභාව ජාතික ආරක්ෂාවට හානියක් බව ඇතැම් මාධ්‍ය කියලා තියෙනවා. ඉන්පස්සේ ඒ මාධ්‍ය ආයතනම ඒ තොරතුරු වාර්තා කරලා තියෙනවා. ජාතික ආරක්ෂාවට තර්ජනයක් නම් ඒ කරුණු වාර්තා කළේ ඇයිද කියන එක ප‍්‍රශ්නයක්. මේ කාරක සභාවට විරුද්ධව ඝෝෂාවක් ආවේ විශේෂ කාරක සභාව අක‍්‍රීය කිරීමේ කූඨ වුවමනාවෙනුයි.
තොරතුරු එපා කීම විහිළුවක්
දුමින්ද සම්පත්
ශ‍්‍රී ලංකා වෘත්තීය ජනමාධ්‍යවේදීන්ගේ සංගමයේ සභාපති
සමහර මාධ්‍ය ආයතනවලින් තමන්ගේ කතුවැකි වලිනුත්, ප‍්‍රධාන ප‍්‍රවෘත්ති විදියට තමන්ගේ මතවාද පළකරමිනුත් මේ කාරක සභාවේ තොරතුරු එපායැයි කියා තිබුණා. ජනතාවගේ තොරතුරු දැනගැනීමේ අයිතිය වෙනුවෙන් පෙනීසිටින මාධ්‍ය ආයතනම මේ තොරතුරු එපා කීම මටනම් පෙනෙන්නේ ජාතික ආරක්ෂාව පිළිබඳ ප‍්‍රශ්නයක් විදියට නෙවෙයි. විහිළුවක් විදියටයි.
ඇත්තටම මේ කාරක සභාවේදී විමසන්නේ ලංකාවේ ජාතික ආරක්ෂාවට විශාල හානියක් කරමින් එල්ලකරපු බෝම්බ ප‍්‍රහාරයක් වළක්වාගන්න අසමත් වූ ආකාරය පිළිබඳවයි. එය වළක්වාගන්න තිබුණාද කියලායි. ඒ කියන්නේ මෙහිදී විමසන්නේ ඒ සිදුවීමට අදාල ආරක්ෂක අංශ තොරතුරුයි. ඒ තොරතුරු දැන් ජාතික ආරක්ෂාව යැයි කියමින් හංගාගෙන ඉඳලා ප‍්‍රයෝජනයක් තියෙනවාද. ඒ බෝම්බ ප‍්‍රහාරය සිද්ධවෙලා ජාතික ආරක්ෂාවට හානි වෙලා ඉවරයිනෙ. ඉදිරියේදී සිදුවිය හැකි ප‍්‍රහාරයක් ගැන තොරතුරු තියෙනවානම් එතැනට එන ආරක්ෂක අංශ ප‍්‍රධානීන්ට පුලූවන් ඒවා මෙතැන නොකියා ඉන්න. ඔවුන් වගකීම් සහගත නිලධාරීන්. ඔවුන් දන්නවානේ හෙළි කළොත් ආරක්ෂාවට තර්ජනයක් වෙන තොරතුරු මොනවද, තර්ජනයක් නොවෙන තොරතුරු මොනවාද කියලා. ආරක්ෂක අංශවල නිලධාරීන්ව අපේ මාධ්‍ය හඳුන්වන්නේ රණවිරුවන් කියලානේ. ජාතික ආරක්ෂාවට තර්ජනයක් වෙන තොරතුරු හෙළි නොකිරීම ඒ රණවිරුවන්ගෙ රාජකාරිය. ඒක එයාලා බලාගනීවි. මාධ්‍ය ප‍්‍රධානීන් ඒ වගකීම බදාගන්න ඕනෑ නැහැ. ඔවුන්ගේ රාජකාරිය ජනතාවට සත්‍ය හා නිරවද්‍ය තොරතුරු වගකීමෙන් ලබාදීම.
මෙතැන විහිළුකාරයන් තමයි අනුන්ගේ රාජකාරියක් බදාගෙන තොරතුරු ප‍්‍රතික්ෂේප කරන මාධ්‍ය ආයතන ප‍්‍රධානීන්. වෙනත් රටවල ජනමාධ්‍ය ප‍්‍රධානීන් තොරතුරු ලබාගැනීම වෙනුවෙන් ජීවිත පුදකරලා සටන් කරනවා. ලංකාවේත් එහෙම සටන් කරන විශාල පිරිසක් ඉන්නවා. ඇත්තටම මේ මොහොතේත් තොරතුරු එපා කියලා තියෙන්නේ ජනමාධ්‍ය සමාජයේ බහුතරය නෙවෙයි. ඔය නැෙ`ගන්නේ දේශපාලන වුවමනා මත මාධ්‍ය පාලනය කරන සුළුතරයකගේ හඬ. ආණ්ඩුව තොරතුරු දෙන්න ලෑස්ති වෙද්දී ඒක එපා කියන මාධ්‍ය ආයතනවලින් තමන්ගේ තොරතුරු දැනගැනීමේ අයිතිය තෘප්ත වේවි කියලා ජනතාවට විශ්වාස කරන්න බැහැ. ඇත්තටම ජනතාවට අද මාධ්‍ය අවිශ්වාසයි.
මාධ්‍ය හැසිරෙන්නේ ඒජන්තයන් විදියට
ධර්මසිරි ලංකාපේලි මාධ්‍ය සේවක වෘත්තිය සමිති සම්මේලනය
මාධ්‍ය සංවිධානයක් විදියට අපේ අදහස වුණේ මේ ප‍්‍රහාරය ගැන සිදුකරන විමර්ශනය විවෘත එකක් විය යුතු බවයි. ලංකාවේ මහා විනාශයක්, ඛේදවාචකයක් සිදුවුණාට පස්සේ ඒ ප‍්‍රහාරය පිළිබඳව ආරක්ෂක අංශ හා ඒවා පිළිබඳ වගකියන ප‍්‍රධානීන් වගකීම් ඉටුකළාද නැද්ද කියන එක
දැනගැනීම ජනතාවගේ අවශ්‍යතාවයක්. ඒ සඳහා ජනතා නියෝජිතයන්ගෙන් සමන්විත පාර්ලිමේන්තුවේ තියෙන විශේෂ කාරක සභා ක‍්‍රමය වැනි විධික‍්‍රමයක් පාවිච්චි කිරීම යහපත්. එහෙම කරද්දී ඒක අභ්‍යන්තර වශයෙන් සිදු නොකර විවෘතව සිදුකිරීම වඩා යහපත් දෙයක්. මේක මොන විදියටද සිද්ධවුණේ කියලා දැනගැනීම ජනතාවගේ අයිතියක්. ඒක ජාතික ආරක්ෂාවට තර්ජනයක් නෙවෙයි. ඉදිරියේදී මෙවැනි දෙයක් සිදුනොවීම සඳහා ජාතික ආරක්ෂාව ශක්තිමත් කරන දෙයක්. මේ තොරතුරු ප‍්‍රතික්ෂේප කරන මාධ්‍ය ගැන අපට තියෙන්නේ කණගාටුවක්.
අද ඔය මාධ්‍ය ආයතන හැසිරෙන්නේ මාධ්‍ය විදියට නොවෙයි. දේශපාලඥයන්ගේ, ව්‍යාපාරිකයන්ගේ හා පුද්ගලයන්ගේ වුවමනා ඉටු කරන ඒජන්තයන් විදියට තමයි මාධ්‍ය හැසිරෙන්නේ. අද මාධ්‍ය ආයතන ගොඩක් කළුසල්ලි සුදු කරන්නට පාවිච්චි කරනවා. අප අගය කරන නිදහස් මාධ්‍ය සම්ප‍්‍රදාය ඒ මාධ්‍යවේදීන් අතර විරලයි. ඇත්තටම ඒ ගැන රටේ පුළුල් සංවාදයක් නැතිවීම ගැන මාධ්‍ය සංවිධාන විදියට අපිත් වගකියන්න ඕනෑ. ඒත් සංවිධාන විදියට අපි මෙවැනි පටු අදහස්වලට විරුද්ධයි. මේවා ලෝකයට අලූත් නැහැ. ලෝකයේ පවතින විධික‍්‍රම ගැන මූලික අවබෝධයක්වත් අද ප‍්‍රධාන ධාරාවේ මාධ්‍යවේදීන් බොහොමයකට නෑ. x
