ඉදිරි මහමැතිවරණයට ශ‍්‍රීලනිපය තනිව ඉදිරිපත් විය යුතු බවත්, ඒ පිළිබඳව ශ‍්‍රීලනිපයට බලපෑම් කිරීමට තමා ඇතුළු කණ්ඩායම බලාපොරොත්තු වන බවත් පාර්ලිමේන්තු මන්ත‍්‍රී කුමාර වෙල්ගම පවසයි.

අනිද්දා කළ විමසීමකදී ඔහු ප‍්‍රකාශ කළේ ගෝඨාභය රාජපක්ෂ මහතාට විරුද්ධව මැතිවරණයේදී කටයුතු කළ පුද්ගලයෙකු වන නිසා ඉදිරියේදී ආණ්ඩුවට හෝ ආණ්ඩුව නියෝජනය කරන සන්ධානයට සහාය දීමට තමා කටයුතු නොකරන බවයි. කෙසේ වෙතත් තමා එජාපය සමඟ එක්වීමට තීරණය කර නැති බවද ඔහු කීය.

පසුගිය ජනාධිපතිවරණයේදී පොදුජන පෙරමුණට එරෙහිව කටයුතු කළ ශ‍්‍රීලනිප කණ්ඩායම එකතු කරගැනීමට බලාපොරොත්තු වන බවත්, ශ‍්‍රීලනිපයට ඉදිරියේදී තනිව තරග කරන ලෙස බලපෑම් කිරීමට බලාපොරොත්තු වන බවත් ඔහු කීය. ශ‍්‍රීලනිපය තනිව ඉදිරිපත් නොවන්නේ නම්, තම කණ්ඩායම වෙනත් පක්ෂයක් සමග තරග කරන්නේද නැද්ද යන්න පිළිබඳව තීන්දුවක් ගන්නා බව ඔහු කීය.