මැතිවරණයට තනිව ඉදිරිපත් වීම සඳහා පැවති සාකච්ඡුා අසාර්ථක වීමට ප‍්‍රධාන හේතුව පක්ෂ සභාපති මෛත‍්‍රීපාල සිරිසේන ඇතුළු පිරිසක් පක්ෂයේ තීරණයට පිටින් පොදුජන පෙරමුණේ නාමයෝජනා ලැයිස්තුවට අත්සන් කිරීම බව අනිද්දා සමඟ අදහස් දැක්වූ ශ‍්‍රීලනිප ප‍්‍රබලයෝ කිහිපදෙනෙක් පැවසූහ.

පක්ෂයේ සභාපති ඇතුළු නායකයන් නාමයෝජනාවලට අත්සන් තැබූ පසු පක්ෂයේ ලේකම්, භාණ්ඩාගාරික, ජාතික සංවිධායක හා මාධ්‍ය ප‍්‍රකාශක ප‍්‍රමුඛ තවත් පිරිසක් වෙනම මැතිවරණයට ඉදිරිපත් වීම සුදුසු නොවන නිසා වෙනම ඉල්ලීමේ තීරණය අත්හැර දැමූ බවත් පක්ෂයේ ප‍්‍රබල නායකයන් නියෝජනය නොකරන කළුතර, නුවරඑළිය, වන්නි හා යාපනය යන දිස්ත‍්‍රික්කවලට පමණක් වෙනම ඉදිරිපත් වීමට තීරණය කළ බවත් ඔවුහු කීහ.

තම පක්ෂය පොදුජන පෙරමුණ සමඟ අත්සන් කරන ලද අවබෝධතා ගිවිසුමට අනුව ප‍්‍රමාණවත් තරම් නාමයෝජනා ලබා නොදුන් නිසාත්, පොදුජන පෙරමුණේ නායකයන් තම පක්ෂය විවේචනය කිරීම නිසාත් වෙනම ඉල්ලීම ගැන සාකච්ඡුා කිරීමට හා එතෙක් කිසිවෙකු නාමයෝජනාවලට අත්සන් නොකිරීමට එකඟ වූ බව එම නායකයෝ කීහ. කෙසේ වෙතත් මාර්තු 11 වැනිදා එම තීරණයට පිටින් ගොස් ශ‍්‍රීලනිප ජ්‍යෙෂ්ඨ උපසභාපති නිමල් සිරිපාල ද සිල්වා නාමයෝජනාවලට අත්සන් තබා තිබුණි. මාර්තු 12 වැනිදා පක්ෂයේ සභාපති මෛත‍්‍රීපාල සිරිසේන නාමයෝජනාවලට අත්සන් තැබීය. එම දින දෙකේදී කොළඹ දිස්ත‍්‍රික්කයෙන් තිලංග සුමතිපාල, හම්බන්තොට දිස්ත‍්‍රික්කයෙන් මහින්ද අමරවීර නාමයෝජනාවලට අත්සන් තබා තිබුණි.

ඒ ඒ දිස්ත‍්‍රික්කවලින් ශ‍්‍රීලනිපයට ලැබිය යුතු අපේක්ෂකයන් සංඛ්‍යාව තීරණය කිරීමටද පෙර එම නායකයන් නාමයෝජනාවලට අත්සන් තැබූ බව අනිද්දා සමඟ අදහස් දැක්වූ නායකයෝ කීහ. එලෙස පක්ෂයේ නායකයන් තනි තනිව අත්සන් කිරීම නිසා පක්ෂය පොදු තීන්දුවක් ගැනීම සඳහා ගත් උත්සාහය අසාර්ථක වූ බවත්, අවසානයේ අනෙකුත් ප‍්‍රධාන නායකයන්ද තම පක්ෂයට ලබාදුන් අවස්ථාව ප‍්‍රයෝජනයට ගනිමින් නාමයෝජනාවලට අත්සන් තැබීමට සිදුවූ බවත් ඔවුහු කීහ.

ශ‍්‍රීලනිපය දිස්ත‍්‍රික්ක ගණනාවකින් මීට වඩා වැඩි නාමයෝජනා ප‍්‍රමාණයක් බලාපොරොත්තු වූ බවත්, විශේෂයෙන්ම ශ‍්‍රීලනිපයේ තිඹිරිගෙය බඳු ගම්පහ දිස්ත‍්‍රික්කයට ශ‍්‍රීලනිපයේ විශාල බලයක් තිබෙන නිසා එම දිස්ත‍්‍රික්කයේම වැඩි නාමයෝජනා ප‍්‍රමාණයක් බලාපොරොත්තු වූ බවත් එම නායකයා කීය.x