පසුගිය අප්‍රේල් 20 දින බස්නාහිර පළාත, පුත්තලම දිස්ත්‍රික්කය ඇතුළු සීමිත ප්‍රදේශ කිහිපයක් හැරෙන්නට ඉතිරි ප්‍රදේශ සඳහා පනවා තිබූ ඇඳිරි නීතිය දහවල් කාලය සඳහා ඉවත්කරනු ලැබිණි. ඒ සමග ජනාධිපති කාර්යාලය නිවේදනය කළේ කොළඹ, ගම්පහ, කළුතර, පුත්තලම යන දිස්ත්‍රික්කවල සීමිත පොලිස් බල ප්‍රදේශ කිහිපයක් හැර ඉතිරි ප්‍රදේශවලද ඇඳිරි නීතිය අප්‍රේල් 22 වැනිදා සිට දහවල් කාලය සඳහා ඉවත් කරන බවයි. මේ සමග දූරකථනය නාද වෙන අතරතුර කොවිඞ් පිළිබඳව අප දැනුවත් කළ හඬපටද ඉවත්කර තිබූ අතර, හමුදාපති ශවේන්ද්‍ර සිල්වා, සෞඛ්‍ය අමාත්‍ය පවිත්‍රා වන්නිආරච්චි වැනි අයවලූන්ද මාධ්‍යයේ සුලබ දසුන් නොවිණි.

ආණ්ඩුව නිවේදනය කළේ දැන් කොවිඞ් වෛරසයේ පාලනය ලංකා රාඡ්‍යය සතු බවය. ඒ අනුව පසුගිය අප්‍රේල් 20 වැනි දින රැස්වූ මැතිවරණ කොමිසමද දින නියමයක් නොමැතිව කල් දමනවා යැයි කියූ මැතිවරණය ඩුනි 20ට යොදනු ලැබීය.

දේවල් මෙලෙස සෝබමානව සිදුවුණත් අප්‍රේල් 20 වැනි දා හවස වනවිට ලංකාව තුළ කොවිඞ් වසංගත තත්ත්වය දරුණු අතට හැරුණි. කොළඹ කෙසෙල්වත්ත, බණ්ඩාරනායක මාවතේ නිරෝධායනයට ලක්වෙමින් සිටි පිරිස් අතරින් කොරෝනා ආසාදිතයෝ මතුවූහ. ඒ සමගම ආණ්ඩුව ඇඳිරි නීතිය පිළිබඳ තමන්ගේ ස්ථාවරය නැවත වෙනස් කරමින් කොළඹ කළුතර පුත්තලම ගම්පහ යන ප්‍රදේශවලට අදාළ ඇඳිරි නීතිය ඉවත් නොකරන බව ප්‍රකාශ කළේය. ආණ්ඩුව සාර්ථකව පාලනය කළා යැයි කියූ කොවිඞ් මේ වනවිට දරුණුම තත්ත්වයකට ළඟාවෙමින් ඇති බව පසුගිය දා නැවත සනාථ කරනු ලැබිණි. ඒ වැලිසර නාවික හමුදා කඳවුරේ නාවික භටයන් 30 දෙනෙකුට කොරෝනා වැළඳී ඇති බව පීසීආර් පරීක්ෂණ මගින් තහවුරු කිරීම නිසා ය.

ලංකාපුර රෝගියා

මේ වනවිට වැලිසර නාවික හමුදා කඳවුර හුදකලා කර ඇත. වැලිසර හමුදා කඳවුරේ නාවික භටයන්ට මෙම රෝගය වැළඳී ඇති බවට සැකයක් මතුවන්නට පටන්ගන්නේ පසුගිය 20 වනදා පොළොන්නරුව පුලස්තිගම රෝහලෙන් ප්‍රතිකාර ගැනීමට පැමිණි නාවික හමුදා නිලධාරියෙකු නිසා ය. ඔහු මුලින්ම රෝහට පැමිණ ඇත්තේ තමන්ට දැඩි ඔළුවේ කැක්කුමක් තිබෙන බව පවසමින් ය. ඉන්පසුව මෙම සෙබළා පොළොන්නරුව රෝහලට එවා ඇත. පසුව ඔහු වැලිකන්ද රෝහලට යවා ඇති අතර එහිදී පීසීආර් පරීක්ෂාවට ලක්කර ඇත. අප්‍රේල් 22 දින වන විට ඔහු කොවිඞ් ආසාදිතයෙකු බවට තහවුරු කරගෙන ඇත. ඔහු දැනට වැලිකන්ද රෝහලේ ප්‍රතිකාර ලබමින් සිටී.

ඔහු ජීවත්වූ පොළොන්නරුව ලංකාපුර සෞඛ්‍ය බල ප්‍රදේශයේ ගම්මාන 12ක් මේ වන විට වසාදමා ඇත. එහි ජනගහනය 22,000ක් පමණය. අභයපුර පූමාඩිය මෙම නාවික සෙබලා ජීවත්වූ ගම්මානයයි. මෙම ගම්මානය ඇතුළුව අභයපුර, සෝමපුර, පටුනුගම, පුලස්තිගම, කෑගලූගම, රිෆායිපුර, අල්හිලාල්පුර, තඹාල, ලංකාපුර, වීරපුර, බෞද්ධාර්ථගම, සංඝබෝධිගම  වසාදැමුණු අනෙකුත් ගම්මානයෝ ය. මෙම ආසාදිත නාවිකයා නිසා දැන් අපේ කොවිඞ් මර්දන මෙහෙයුම්වල තිබෙන විශාල දුර්වලතාවන් ද පෙනෙන්නට පටන්ගෙන ඇත.

සෙබලාට බෝ වුණේ කෙසේද?

පොළොන්නරුවෙන් වාර්තා වූ මෙම කොවිඞ් ආසාදිත නාවික සෙබළා රාජකාරි කළේ වැලිසර නාවික හමුදා කඳවුරට අනුයුක්තවය. එහිදී ඔහු වැලිසර නාවික හමුදා නිරෝධායන මධ්‍යස්ථානය සහ රාගම සුදුවැල්ල  ප්‍රදේශයේ නිරෝධායනයට ලක්වූ පිරිස් සමග රාජකාරි කර ඇත. එමෙන් සුදුවැල්ල ප්‍රදේශයෙන් සොයාගත් මුල්ම ආසාදිත පුද්ගලයා (මතට ඇබ්බැහිවූ පුද්ගලයා) පිළිබඳව සහ ඔහු සම්බන්ධතා පැවැත්වූ පිරිස් සොයා හමුදා සාමාජිකයන් කළ මෙහෙයුම් සඳහා ද මෙම නාවික සෙබළා සිය දායකත්වය ලබාදී ඇත.

මේ පිළිබඳව අදහස් දැක්වූ මහජන සෞඛ්‍ය පරීක්ෂකවරයෙකු ප්‍රකාශ කළේ මෙම හමුදා මෙහෙයුම් සමහරවිට ආරක්ෂිත පියවර අනුගමනය නොකරමින්, සමහර අවස්ථාවල සිදුවන බවය. මෙහෙයුම් අවස්ථාවකදී මාස්ක් එකක් නොමැති වුණත් හමුදා සෙබළුන්ට එය ඉවසාගෙන කටයුතු කරන්නට සිදුවී ඇතැයි ද ඔහු ප්‍රකාශ කරයි. එය එක පැත්තකින් එම හමුදා සෙබළාගේ ජීවිතය අනතුරේ හෙලීමකි. අනෙක් පැත්තෙන් එය මෙම වෛරසය ව්‍යාප්තියට සහයෝගය ලබාදීමකි. මෙම නාවික සෙබළා එම කඳවුරට අදාළ නිරෝධායන මධ්‍යස්ථානයේ කටයුතු කළා නම් සති දෙකක කාලයක් නිරෝධායනය නොවී ගෙදර ගියේ කෙසේද? සුදුවැල්ල ප්‍රදේශයේ ආසාදනයට ලක්වී ඇතැයි සැකකරන පුද්ගලයන් සමග සමීපව කටයුතු කළ මෙවැනි නිලධාරීන්ට මෙලෙස නිවාඩු ලබා සිය නිවෙස්වලට යා හැකිද? මේවා මෙම කොවිඞ් මර්දන මෙහෙයුමේ තිබෙන අපට පෙනෙන දුර්වලතාවන් ය.

හෝමාගම රෝහලේ වෛද්‍යවරයෙකු ප්‍රකාශ කළේ තමන් සති දෙකක් රාජකාරි කර සති දෙකක් නිරෝධායනය වන බවය. එම ක‍්‍රමය මෙම රෝගය සමග වැඩකරන සෑම කෙනෙකුම අනුගමනය කිරීම රෝග ව්‍යාප්තිය පාලනයට මෙන්ම, මෙම රෝගය හා සෘජුව ගැටෙමින් එයට විරුද්ධව සටන් කරන පුද්ගලයන්ගේ සුරක්ෂිතාවට හොඳය. එහෙත් අපට නැඟෙන ප්‍රශ්නය මෙම මර්දන මෙහෙයුම්වලට සහභාගිවූ හමුදා සාමාජිකයන් මෙවැනි ක‍්‍රමයක් අනුගමනය නොකරන්නේද යන්නයි. එය සමාජය මෙන්ම එම හමුදා නිලධාරීන්ගේ ජීවිතද ඔවුන්ගේ පවුල්වල ජීවිතද අනතුරේ හෙළීමක් ය. එනිසා රජය, බලධාරීන් මේ පිළිබඳ සැලකිලිමත් විය යුතුය.

රෝගය පොළොන්නරුවේ ව්‍යාප්ත විය හැකිද?

මෙම නාවික හමුදා සෙබළා වැලිසර නාවික හමුදා කඳවුරෙන් නිවාඩු ලබා පිටවෙන්නේ අප්‍රේල් 18 වන දිනයේදී ය. එහිදී 12 දෙනෙකු ඔහු සමග නිවාඩු ලබා පිටත්වී ඇති බව දැනගන්නට ඇත. ඔවුන් ලංකාවේ නෙක ප්‍රදේශවල පදිංචිකරුවන් විය යුතුය.! තත්ත්වය එය නම් ඔවුන්ද ගම්වලට මෙම රෝගය රැගෙන ගියාද? ප්‍රශ්නාර්ථයක් ය. අප කතාකරන මෙම සෙබළා පොළොන්නරුව දක්වා ගමන් කරන්නේ මැදිරිගිරියේ සහ අත්තනකඩවල පදිංචිකරුවන් දෙදෙනෙකු සමගය. ඒ ඇඳිරි නීති කාලය තුළ අත්‍යවශ්‍ය සේවා ලොරියකය. මේ අනුව ඔහු අඹේපුස්සේ සිට පුලස්තිගම අබේපුර පූමාඩිය සිය නිවසට පැමිණෙන අතරතුර ලොරි රථයක, ත‍්‍රීවිලරයක සහ යතුරු පැදියක සිය ගමන් පහසුව සලසාගෙන ඇත. ඒ අනුව ඔහු සමග එම වාහන තුළ ගමන්කළ අනෙකුත් පිරිසටද මෙම රෝගය බෝවීමේ අවදානමක් නැතිද?

ගෙදර පැමිණි ඔහු අප්‍රේල් 20 වෙනිදා වනවිට පොළොන්නරුව නගරය, පුලස්තිගම, තඹාල, ආදි බොහෝ ප්‍රදේශවල සංචාරය කර ඇත.  ඒ ඔහුගේ නෙක අවශ්‍යතාවන් සඳහාය. ජයන්තිපුර සතිපොල භූමියේදී  හිඟුරක්ගොඩ ගුවන්හමුදා කඳවුරේ මිතුරන් රැසක් සමග මධුවිතෙන් සප්පායම් වී ඇති බවද දැනගන්නට ඇත. සෙබළාගේ බිරිඳ මේ වනවිට ගැබිණියක් ය. ඇයගේ උපන්ගම දෙහිඅත්තකණ්ඩිය සිරිපුරය. එනිසා මෙම නාවික හමුදා සෙබළාට එම ප්‍රදේශය සමගද සමීප සම්බන්ධතා තිබී ඇත. එම ප්‍රදේශයෙන් බිරිඳගේ ඥාතීන් සමූහයක් මෙම දිනවල මෙම සෙබළාගේ නිවසටද පැමිණ ඇත. ඒ අනුව මෙම ප්‍රදේශයටද රෝගය ව්‍යාප්ත වී ඇති බවට පොළොන්නරුව සෞඛ්‍ය අංශ සැක පළ කරයි.

මෙම සෙබළා වැලිසර නාවික හමුදා නිරෝධායන මධ්‍යස්ථානට අදාළව සහ සුදුවැල්ල ප්‍රදේශයේ නිරෝධායන රාජකාරි කළා නම් මොහු මෙලෙස නිවසට පැමිණීම මෙන්ම, පැමිණ ගෙදරට වී නොසිට රංචු ගැසීමද අවධානයට ලක්විය යුතුය. ඒ මන්ද මෙවැනි සිදුරු තව තවත් නිර්මාණය වුණොත් කොවිඞ් වසංගතය මුළු ලංකාවම ගිලගනු ඇති බැවින් ය.