මීගමුව මුන්නක්කරය ප‍්‍රදේශයේ කඩොලාන පරිසරයක පිහිටි ඉඩමක් ක‍්‍රීඩා පිටියක් සකස් කිරීම සඳහා වෙන්කරන්නැයි කරන ලද ඉල්ලීමක් ගම්පහ දිසා වන නිලධාරිනී දේවානි ජයතිලක ප‍්‍රතික්ෂේප කළාය.

ධීවර හා මිරිදිය මත්ස්‍ය කර්මාන්ත රාජ්‍ය අමාත්‍ය සනත් නිශාන්ත එකී මීගමුව ප‍්‍රදේශවාසීන්ගේ ඉල්ලීම මත මීගමුව පිටිපන ධීවර සමිති කාර්යාලයක කැඳවන ලද සාකච්ඡුාවකදී මෙම ප‍්‍රතික්ෂේප කිරීම හා ඊට අදාළ තවත් කරුණු දැක්වීම් සිදුකර ඇත.

තමා නීතියට පිටින් වැඩ නොකරන්නේ යැයි එහිදී අවධාරණය කර ඇති වන නිලධාරිනිය විද්‍යාත්මක තීන්දු තීරණ නොගෙන මිනිසුන්ට අවශ්‍ය ආකාරයට කටයුතු කළහොත් පරිසරය විනාශ වී ජීවත්වීමට ඔක්සිජන් සොයා ගැනීමට නොහැකි තත්වයකට මිනිසුන් පත්විය හැකි බවද කියා ඇත.

එමෙන්ම ඇය අවධාරණය කර ඇත්තේ නීතියට පිටින් වැඩ කිරීම සඳහා අධ්‍යාපනය ලබා මෙවැනි තනතුරුවලට ආ යුතු නැති බවය.

ඇයගේ මේ ප‍්‍රකාශයට අදාළ වීඩියෝපටය මේ වනවිට සමාජ ජාලාවල සැරිසරමින් තිබේ. ඇගේ ක‍්‍රියාව පැසසුමට ලක් කරමින් වනජීවී අමාත්‍යවරයාද කියා ඇත්තේ ඇය නිවැරදි බවත් තමාගේ සහායත් ඇයට හිමිවෙන බවත්ය.

රාජ්‍ය සේවයට ඇත්තටම අවශ්‍ය වන්නේ ගම්පහ දිසා වන නිලධාරිනී වැනි නිලධාරීන්ය. එසේ නොමැතිව දේශපාලනඥයන් කියන කියන ලෙස නීතියට පිටින් වැඩකරන උපාධිධාරීහු, පශ්චාත් උපාධිධාරීහු හෝ ආචාර්ය උපාධිධාරීහු නොවෙති.

කොන්ද පණ ඇති නීතියට අනුව කටයුතු කරන රාජ්‍ය සේවයක් රටට තිබුණා නම් සමහරවිට රට මෙතරම් ¥ෂණය වීමට ඉඩ නොතිබුණි. වනජීවී වන සංරක්ෂණ කැලෑ පමණක් නොව මහජන මුදල්ද බොහෝ ඉතිරි කරගත හැකිව තිබුණි.

නියෝග දුන්නාට දේශපාලනඥයන් අවසානයේ කිසිවකට වගකියන්නේ නැත. වැරදි නියෝග ක‍්‍රියාත්මක කර අවසානයේ දඬුවම් විඳීමට සිදුවන්නේ රාජ්‍ය නිලධාරීන්ටය. සිල් රෙදි නඩුව, රතුපස්වල වෙඩි තැබීම, මාධ්‍යවේදී ප‍්‍රගීත් එක්නැලිගොඩ අතුරුදහන් කිරීම සම්බන්ධ නඩුව ඊට උදාහරණය.

නිලධාරීන් දේශපාලනඥයන්ට කිව යුත්තේ නියෝග දෙනවා නම් ලිඛිතව එසේ නියෝග දෙන ලෙසය. එම ලිඛිත නියෝගය අනුව ක‍්‍රියාත්මක වූවා යැයි කියා සටහන් තබා  ඕනෑ නම් නිලධාරීන්ට අවසානයේ ඇඟ බේරාගත හැකිය. එහෙත් විය යුත්තේ නියෝගය ලිඛිත වුවත් වාචික වුවත් එය නීතියට පිටින් නම් සිදු නොකිරීමය. ඒ ගැන කරුණු දැක්වීමය. ගම්පහ දිසා වන නිලධාරිනියගේ ආදර්ශය එයය. ඇයට අප ආචාර කළ යුත්තේ එම නිවැරදි ප‍්‍රවේශය නිසාය.