පෝල් වෝල්ට් හෙවත් රිටි පැනීමේ ලෝක වාර්තාව තමන් සතු කරගැනීමට ස්වීඩනයේ විසි හැවිරිදි ක‍්‍රීඩක ආමන්ඞ් ඩුප්ලැන්ටිස් සමත් වී ඇත. ඒ පෙබරවාරි 8 වැනිදා පෝලන්තයේ ටොරුන් නුවර පැවති ගෘහස්ථ මලල ක‍්‍රීඩා තරගාවලියකදීය. ඩුප්ලැන්ටිස්ගේ එම ලෝක වාර්තා උස මීටර් 6.17ක් හෙවත් අඩි 20 අඟල් 2 4/3 කි.


මෙසේ ඩුප්ලැන්ටිස් විසින් බිඳ දමනු ලැබුයේ මීට වසර හයකට පෙර 2014දී යුකේ‍්‍රනයේ ඩොනෙට්ස් නගරයේ පැවති ගෘහස්ථ මලල ක‍්‍රීඩා තරගාවලියකදී ප‍්‍රංශයේ රෙනවු ලැවීනි පිහිටුවා තිබූ මීටර් 6.16ක් හෙවත් අඩි 20 අඟල් 2 2/1 ලෝක වාර්තාවය.


රෙනවු රිටි පැනීමේ ලෝක වාර්තාව ඔහු සතු කරගෙන තිබුණේ ඊට අවුරුදු විස්සකට පෙර එනම් 1994 දී සර්ජි බුබ්කා පිහිටුවා තිබූ මීටර් 6.14 ක් හෙවත් අඩි 20 අඟල් 1 2/1 ක වාර්තාව බිඳ දමමිනි. සර්ජි බුබ්කාගේ එම ලෝක වාර්තා පැනීම වාර්තා වී තිබුණේ ඉතාලියේ සෙස්ටි‍්‍රයරි නුවර එළිමහන් මලල ක‍්‍රීඩා තරගාවලියකදීය. එළිමහන් තරගාවලියකදී මෙන් ගෘහස්ථ ක‍්‍රීඩාංගණයකදී සුළෙඟ් බාධාවන්, ක‍්‍රීඩකයන්ගේ ධාවනයන් සඳහා හෝ පැනීම් සඳහා එතරම් බලපාන්නේ නැත.
ඒ අනුව තවමත් එළිමහන් තරගාවලියක රිටි පැනීමේ ලෝක වාර්තාව සතු වන්නේ සර්ජි බුබ්කා සතුවය. මීට අමතරව සර්ජි බුබ්කා 1993 යුකේ‍්‍රනයේ ඩොනෙට්ස් නුවරදී මීටර් 6.15ක උසක් ගෘහස්ථ තරගාවලියකදී පැන තිබේ.


ගෘහස්ථ හා එළිමහන් රිටි පැනීමේ ලෝක වාර්තාව සර්ජි බුබ්කා සිය ක‍්‍රීඩා දිවියේදී 35 වරක් අලූත් කර තිබේ. ඒ එළිමහන් ලෝක වාර්තාව 17 වරක් හා ගෘහස්ථ ලෝක වාර්තාව 18 වරක් වශයෙන්ය. ලෝක රිටි පැනීමේ ඉතිහාසයේ ඒ අසාමාන්‍ය තත්වයට පත්වීමට තවම වෙන කිසිදු ක‍්‍රීඩකයෙකුට හැකිවී නැත. මුලින් සෝවියට් රුසියාවත්, සෝවියට් රුසියාව බිඳී යෑමෙන් පසුව යුකේ‍්‍රනයත් නියෝජනය කළ සර්ජි බුබ්කා මානව විද්‍යාඥයන්ගේ අනාවැකිද බොරු කරමින් සිය රිටෙන් තරණය කළ උස විස්මයජනකය.


විසිවන සියවස තුළදී කිසිදු රිටි පැනීමේ ක‍්‍රීඩකයෙකු අඩි 20ක උස තරණය කරනු ඇතැයි මානව විද්‍යාඥයන් විශ්වාසය පළකළේ නැත. එහෙත් සර්ජි බුබ්කා නම්වූ මේ විශ්වකර්මයා සෝවියට් රුසියාව නියෝජනය කරමින් 1991 අගෝස්තු 5 වැනිදා ස්වීඩනයේ මයිමෝ නුවරදී මීටර් 6.10ක් හෙවත් අඩි 20ක උසක් තරණය කරමින් එම විශ්වාසයන් සුණුවිසුණු කළේය. ඔහු එම දස්කම කළේ 20 වන සියවස අවසන් වීමට වසර 9කට පෙරදීය. 1984 දී මීටර් 5.85ක උසක් තරණය කරමින් රිටි පැනීමේ ලෝක වාර්තාව සතු කරගත් බුබ්කාගේ එම පැනීම් වපසරිය ඔහු අවසන් කරන විට සෙන්ටිමීටර් 31ක් දක්වා ඔහුගේම ලෝක වාර්තාව අලූත් කර තිබුණි.


බුබ්කාගේ 20 වන සියවසේ ලෝක වාර්තාව රෙනවු ලැවීනි හිමිකරගත්තේ ඊට අවුරුදු 20කට පසු 2014 දීය. එහෙත් අදටත් ඉන් අවුරුදු 26කට පසු බුබ්කා පරදවන උසක් එළිමහනේදී තරණය කරන්නට කිසිවකු සමත් වී නොතිබීම කියාපාන්නේ රිටි පැනීමේ ලෝක වාර්තාව කවුරු සතු වූවත් රිටි පැනීමේ අසමසම විශිෂ්ටයා සර්ජි බුබ්කා බවය.

ලයින්ස්මන්