එජාප රනිල් වික‍්‍රමසිංහ ලංකා දේශපාලනයෙන් ඉවත් කළ සපත්තුවකි. තනි සපත්තුවකින් ඇති ප‍්‍රයෝජනයක් නැත. එක්කෝ ඉවතට විසි කළ යුතුය. නැතොත් එවැනි තවත් සපත්තුවක් සොයා සපයාගත යුතුවේ. තනි සපත්තු විකිණීමට නැත. තනි සපත්තුවක් හදන්නේ ද නැත. හේතුව සපත්තු යනු ජෝඩු මිස, එකක් පමණක් නොවන හෙයිනි. එහෙත් රනිල් වික‍්‍රමසිංහ මේ වසංගත අර්බුදය හමුවේ අබු කාසිම්ගේ සපත්තුව මෙන් බැහැර කළ හෝ නොතකා හැර යා නොහැකි ලෙස ඉස්මතු වෙමින් පවතී. රනිල් වික‍්‍රමසිංහ මෙම අර්බුදය හමුවේ කළ ප‍්‍රකාශ ගණනාවකි.

ඔහු දැඩි සේ අවධාරණය කර සිටියේ හැකි තරම් රෝගී සාම්පල පරීක්ෂා කරන ලෙස ය. වසංගතයකදී රෝගීන් පරීක්ෂා කළ යුතුය යන්න අමුතු සොයාගැනීමක් නොවේ. එහෙත් ඒ ගැන අවධානය යොමු කළ යුතුව තිබුණේ රනිල් වික‍්‍රමසිංහ නොවේ. වෛද්‍ය විශේෂඥයන් හෝ රටේ සෞඛ්‍ය ඇමති විසිනි. එහෙත් සෞඛ්‍ය ඇමතිගේ අවධානය යොමු වුණේ මහ මැතිවරණය පැවැත්වීම පිළිබඳවය. ඇය වසංගත තත්වය ගැන වැඩි අවධානයක් යොමු කළේ නැත. ඇය කීවේ වසංගත තත්වය ගැන සෞඛ්‍ය අංශ බලාගත යුතු බවය.


රනිල් තනි සපත්තුවක් විය හැකිය. එහෙත් ඊට සමගාමීව පවිත‍්‍රා වන්නිආරච්චි වර්තමාන සෞඛ්‍ය ඇමති හැසිරෙන්නේ තනි සපත්තුවක් නොව ලාඩං හතරක අවශ්‍යතාව ඉස්මතු කරමිනි. මේ නිරීක්ෂණය හරහා කෙනෙකුට එසේ නම් එවැන්නියක සෞඛ්‍ය ඇමති ලෙස පත්කිරීම ගැන ප‍්‍රශ්න කළ හැකිය. ඇය පත්කළ ජනාධිපති ගෝඨාභය රාජපක්ෂ, වසංගතය ගැන කීවේ කුමක්ද? ලෙඩුන් 28ක් හමු වුණා කියන්නේ රටක් ලොක් ඩවුන් කිරීමට තරම් දෙයක් නොවන බවය. ඔහු එදා කළ ප‍්‍රකාශය ඇසූ සමහරු මවිත වූහ. හේතුව බය වෙන්න දෙයක් නැහැ. යුද්දෙ කළා වාගේ වසංගතයට පිළියම් යොදනු ඇත කියාය. (රටම අදත් ඒ මැජික් එක ගෝඨාගෙන් අපේක්ෂා කරයි.) ඒ ප‍්‍රකාශය කරන විට රෝගි ප‍්‍රමාණය 29කි. මේ වනවිට රෝගීන් 183කට ආසන්න වෙමින් ඇත. තවම වසංගතයට අවශ්‍ය පිළියම් යෙදීමට අවශ්‍ය කොරෝනා රෝගීන්ගේ ගණපූරණය ඇති වී නැත.


28ත් ගණනක්ද යනුවෙන් ජනාධිපති ගෝඨාභය කළ ප‍්‍රකාශයට ඍජු එමෙන්ම සැර පිළිතුරක් රජයේ වෛද්‍ය නිලධාරි සංගමයෙන් නිකුත් විය. ඔවුහු අදටත් අඛණ්ඩව පවත්නා රජයේ අදූරදර්ශී හැසිරීම අභියෝගයට ලක්කරමින් සිටිති. රටම ඊට ගරුකරති. එහෙත් රජයේ වෛද්‍ය නිලධාරී සංගමයේ සත්‍ය මුහුණ එය නොවේ. නාමයෝජනා භාරගෙන අවසන් වන තෙක් රජයේ වෛද්‍ය නිලධාරී සංගමය, රෝගීන් 28ත් ගණනක්ද යන මතයේ රැඳී සිනාසිසී ඉන්න ගෝඨාට ඉඩ දී බලාසිටියේය. ජනාධිපති ගෝඨාභය රාජපක්ෂ පාර්ලිමේන්තුව විසුරුවා හැරියේ කොරෝනා අවදානම ගැන නිවැරදි තාක්ෂණික තක්සේරුව පිළිබඳ උපදෙස් ලැබීමෙන් පසුවය. කොරෝනා වයිරසය දිගු කලක් පවතිමින් මහා විනාසයක් කරන බව පාලකයෝ දැනසිටියහ.

චීනයේ වුහාන් නගරයේ සිටි දේශපාලනඥයන්ගේ දරුවන් ගෙනාවේ ඒ තත්වය දන්නා නිසාය. අදටත් ජනාධිපති ගෝඨාභය රාජපක්ෂ සිටින්නේ කොයි මොහොතක හෝ මැතිවරණයක් පවත්වන අධිෂ්ඨානය ඇතිවය. අපේ‍්‍රල් 6 වෙනිදා දෙරණ 360 හරහා මැතිවරණ කොමසාරිස්ට විමල් වීරවංශ ලවා තර්ජනය කරවන ලද්දේ ඒ නිසාය.

රාජපක්ෂලා 2010 ජනාධිපති මැතිවරණය දිනුවේ දයානන්ද දිශානායක උස්සලාය. 19 ව්‍යවස්ථාව නිසා තටු කැපුණ ජනාධිපතිි තනතුර හිස කුඩුවූ සර්පයෙකු මෙන් කි‍්‍රයාකරනු පෙනේ. මේ උත්සාහ කරන්නේ තමන්ට උවමනා තැනට එන්නටය. ඒ සඳහා ඔවුහු කොරෝනා වසංගතය පාවිච්චි කරමින් සිටිති. ජනතාවට මරණ බය පෙන්වමින් ජනාධිපති ගෝඨාභය සියල්ල දේශපාලනීකරණය කරමින් සිටියි.
මේ ව්‍යසනය හරහා ජනතාව විනාසවීම අවම කරන ආස්ථානයක ආණ්ඩුව ඇත්තේම නැත. ව්‍යසනයට මුහුණ දීම ආණ්ඩුවේ අංක එක නොවේ. බැසිල් රාජපක්ෂ රටට අවශ්‍ය සියලූ පහසුකම් සලසන්නා ලෙස පත් කරන්නේ ඒ නිසාය. ඊට අනුගතව ය. ප‍්‍රාදේශීය මට්ටමෙන් පත් කළ කමිටුවල ප‍්‍රධානත්වය සඳහා ගමේ කසිප්පු පෙරන අවලමේ යන ප‍්‍රාදේශීය සභාකාරයන් නම් කිරීම සත්තකින්ම ගෝඨාගේ් නොව මහින්දගේ වේ.


රනිල් වික‍්‍රමසිංහ හෙවත් දේශපාලන තනි සපත්තුව අබුකාසිම්ගේ සපත්තුව මෙන් ඉස්මතු ඒ නිසාය. ඔහුගේ පිරිහීම කොපමණ වුවද, මේ වසංගත තත්වයට එරෙහි මතයක් දැක්මක් ඇත්තේ ඔහුුට පමණය. ඔහුගේ අනුප‍්‍රාප්තිකයාගේ චරිතයට ආවේස වූ සජිත් පේ‍්‍රමදාස කඩා වැටෙමින් පවත්නා ආර්ථීකය ගැන කිසිවක් නොදැන මිනිසුන්ගේ නැතිකම, පවත්නා අසීරුව හරහා දේශපාලනය කිරීම නතර කර නැත. ඔහු කියන ආකාරයට කි‍්‍රයා කිරීමට පාර්ලිමේන්තුවක් නැති ආණ්ඩුවකට බැරිය. ඔහු උත්සාහ කරන්නේ ඒ හරහා පාර්ලිමේන්තුව කැඳවීමට විය හැකිය. එයද පැහැදිලි නැත. ජවිපෙය සද්භාවයෙන් සහන සේවා සලසමින් සිටියි. එහෙත් ලංකාවේ අබුකාසිම්ගේ සපත්තුව බෙහෙවින් ශක්තිමත් ය.


ඒ ප‍්‍රකාශ කිසිවක් නොන්ඩි ගැසුවේ නැත. පරීක්ෂණ ටෙස්ටින් හැකි තරම් වැඩි කරන ලෙස කළ ඉල්ලීම හමුවේ ආණ්ඩුව තවමත් දුර්වලය. මේ වනවිට රජයේ වෛද්‍ය නිලධාරි සංගමය කිහිප වරක් සිදුකරන ටෙස්ටින් ප‍්‍රමාණ නොවන බවට චෝදනා කරමින් සිටියි. වෛද්‍ය පර්යේෂණ ආයතනය කියන්නේ පහසුකම් ඇති අතර, තවත් පරීක්ෂණ ටෙස්ටින් වැඩිකළ හැකි බවය. එසේ නම් මේ කියන නොන්ඩි ගැසිල්ල ඇත්තේ කොහේද? කොරෝනා මර්දනය සඳහා සියලූ බලතල සහිත කමිටුවක් පත් කිරීමට පක්ෂ නායකයන් කළ යෝජනාව තවමත් රජයේ අවධානයට ලක්ව නැත. ඒ වෙනුවට බැසිල් රජපක්ෂට සියලූ බලතල භාරදෙමින් ඔහු තනතුරකට නම් කළේය. බැසිල් රාජපක්ෂ තම යාන්ත‍්‍රණය ගම තෙක් ව්‍යාප්ත කොට එහි නායකත්වය ප‍්‍රාදේශීය සභා නියෝජිතයන්ට භාර කළේය.

එතෙක් මහත් කැපකිරීමකින් රාජකාරි කළ රාජ්‍ය නිලධාරීහු අර ඊනියා චක‍්‍රලේඛයෙන් පසුව සේවා අපහසුතා මුල් කොට වර්ජන තර්ජනය මුදාහැරියාහ. බැසිල් පත්කරන තෙක් නිලධාරීන්ට හෝ රටේ සාමාන්‍ය ජනතාවට ආණ්ඩුවේ මේ පවුලේ සෙල්ලම තේරුණේ නැත. රාජපක්ෂවරුන් එළඹෙන මැතිවරණය අරමුණ කොට උද්ගත ව්‍යසන තත්වය පාවිච්චි කිරීම ගැන රටේ නොසතුටක් මතුවුණේ එහෙමය. රටේ කොරෝනා අවදානම වසංගතය වර්ධනය වුණේ පැතිරුණේ ඒ නිසාය. පාස්කු ප‍්‍රහාරය ආසන්නයේ රනිල් මෛතී‍්‍ර ආණ්ඩුව හැසිරුණේ මෙහෙමය. රටේ පැවැත්මට අවශ්‍ය ආරක්ෂක කවුන්සිලය ජනාධිපති සිරිසේන ඒ කාලයේ රැස්කර නැත. රටේ තත්වය අගමැති දැනසිටියේ නැත.


ජනවාරි මාසයේ අග භාගයේ සිට කොරෝනා යනු රහසක් නොවීය. ලෝක සෞඛ්‍ය සංවිධානය ජනවාරි අග අනතුරු ඇගවීම සිදු කළේය. විපක්ෂ නායක සජිත් පේමදාස පෙබරවාරි 5 වෙනිදා පාර්ලිමේන්තුවේදී මේ ගැන ප‍්‍රශ්න කළේය. රටේ සෞඛ්‍ය ඇමති දුන් පිළිතුරු අනුව, ආණ්ඩුවේ කෙරුවාව පැහැදිලි වේ. ඒ සමග ජනාධිපතිගේ ලෙඩුන් 28 කතාව ඓතිහාසික එකකි. දැන් සියල්ල සිදුවී ඇත. මෙච්චර දෙයක් වෙලාත් පාලකයා ජාතික ආපදාවකට අවශ්‍ය ලෙස හැසිරෙන්නේ නැත. පහතින් විස්තර කෙරෙන ආකාරයට ලංකාව මෙන් කිහිප ගුණයකින් විශාල ජනගහනයක් සහ භූමි ප‍්‍රමාණයක් කළමනාකරණය කරන මියන්මාරය කොරෝනා වසංගතය කළමනාකරණය කළ ආකාරය ඊට නිදසුනකි. සත්‍ය ලෙසම මැතිවරණ කොමිසමට රටේ මැතිවරණ පැවැත්වීම පිළිබඳ අනන්‍ය අධිකාරය නොතිබුණා නම් අපේ‍්‍රල් මස අවසානයේ මහ මැතිවරණය පැවැත්වෙනවාමය. එහෙම කියන්නේ ද්වේෂයෙන් නොවේ. රාජපක්ෂ පවුලේ වැඩිහිටියා චමල් කී පරිදි තමන් ආරක්ෂා වෙන්න ජනතාව දැනගත යුතුයි. අප නියම කරගත් දිනයට මැතිවරණය පවත්වනවා කියාය.

සුනාමි රැළ මතු වෙනවා මෙන් කොරෝනා ලෙඞ්ඩු ගම් නියම්ගම් වසා දමමින් මතුවෙති. අටුලූගම සහ අකුරණ රෝග වාහකයන් දෙදෙනා ගුවන් තොටුපළේ සිට හඹා ගියා නම් අදටත් මහනුවර ආරක්ෂිතය. ඒ විනාසය කළේ පාලකයාගේ නොහැකියාව විසිනි. ඔහු කල්පනා කළේ සැමන් පරිප්පු පෙන්වා වසංගතය තුනී කළ හැකි බවය. ගුවන් තොටින් රටට ඇතුල්වූ ස්වදේශිකයන්ට නිදැල්ලේ යන්ට හැරියේද පරිප්පු සැමන් මිල අඩු කළා වැනි ඡන්ද මානසිකත්වයකින් මිස ජාතික වගකීමකින් නොවේ. ආසාදිත මුස්ලිම් භක්තිකයාගේ අවසන් කටයුතු කිරීම සම්බන්ධව මහා ආරවුලක් ඇති විය.

එහිදී ප‍්‍රශ්නය මතු කළ රවුෆ් හකීම් පටලා සුවිශාල දේශපාලනයක් කළහ. මේ ගැන පොහොට්ටුවේ ජාතික ලැයිස්තුවේ සිටින නීතිඥ අලි සබ්රි දෙරණ සමග කළ සාකච්ඡාවේදී හෙළිවුණේ කුමක්ද? කොරෝනා රෝගියෙකුගේ අවසන් කටයුතු පිළිබඳ විකල්ප පවත්නා බව සහ පාලකයන් එහිදී හැසිරී ඇත්තේ මුස්ලිම් පාර්ශ්ව නොවිමසා බවය. මේ හරහා ලැබෙන පණිවිඩය ඔවුන් තවමත් ජනවාර්ගික වෛරය රට තුළ තම වාසියට යොදාගනිමින් සිටින බවය. ඩලස් අලහප්පෙරුම, කාන්චන විජේසේකර සමග මැතිවරණ ප‍්‍රචාරක රැස්වීම් පැවැත්වීම ඊට නිදසුනකි. ජනමතය මතු කළ පොල්ලෙලි එහෙම හැසිරීම ඉවසිය හැකිය. විශේෂඥ වෛද්‍ය සුදර්ශනී ප‍්‍රනාන්දුපුල්ලේත් ඒ පදයටම නැටුවාය. අපහසු මොහොතක පැමිණීම ගැන පැමිණි පිරිසට ස්තුති කරන තරමට ඇය තම දැනුම ප‍්‍රදර්ශනය කළාය. ඒවා සති ගණන් පැරණි කතාය.

ගිය ඉරිදා රූපවාහිනී නාලිකාවක් ඇඳිරි නීතිය නොතකා අවුරුදු උත්සව පැවැත්වීමෙන් පාලකයා රෝගයෙන් මියගිය අයගේ ආත්මයන් පවා කෙළෙසූ බව පිළිගත යුතුවේ. දහස් ගණන් දිනපතා ඇඳිරි නීතිය කැඞීම නිසා අත්අඩංගුවට පත්වෙද්දී එකී නාලිකා ප‍්‍රධානියා එසේ හැසිරෙන්නේ කෙසේද? එය හරියටම ඡන්දෙට හුගක් මුදල් වැය කළ නිසා අරක්කු ස්කාගාරයක් විවෘත කළා වාගේ එකකි. ඩලස්, කාංචන කළ ජනරාශිය ගැන මුළු රටම කතාකළේය. දෙරණ, පාඨලී චම්පිකගේ රැස්වීමක් උපුටා නඩු දැමිය යුතු බවට ප‍්‍රවෘත්ති ප‍්‍රකාශයක් හරහා කියා සිටියේය. ආගම් දේශපාලන ආදි පටු භේද ප‍්‍රවර්ධනය කිරීම රාජපක්ෂලාගේ උපන්ගෙහි දෝෂයකි.


මේ සියලූ කරුණු හරහා තහවුරු වන්නේ කුමක්ද? රට මළ ගෙයක් වුණද රාජපක්ෂ ක‍්‍රමය එසේම සකි‍්‍රය බව නොවේද? එය හරියටම කොරොනා වයිරසය තරම් ප‍්‍රබලව සකි‍්‍රය වේ. එහිදී ඩලස්ද සුදර්ශනී ප‍්‍රනාන්දුපුල්ලේද කියා වෙනසක් නැත.


රනිල් වික‍්‍රමසිංහ පක්ෂ භේදයකින් තොරව සියලූ දෙනා වසංගතය ජය ගැනීමට එක්විය යුතු බවට කළ ප‍්‍රකාශය ප‍්‍රතික්ෂේප වන්නේ ඇයි? අර රාජපක්ෂ ක‍්‍රමය නිසාය. සුනාමි ව්‍යසනයේදී රාජපක්ෂලා හැසිරුණේත් මෙහෙමය. අනාථයන් සඳහා විදේශවලින් ලැබුණ මුදල් ආධාරය පුද්ගලික ගිණුමක දමා ගත් නඩුවෙන් රාජපක්ෂලා වැරදිකරුවන් බව අගවිනිසුරු සරත් නන්ද සිල්වා කළ ප‍්‍රකාශය අදටත් වලංගු ය.

කොරෝනා වසංගතයේදී රාජපක්ෂලාගෙන් අලූත් යමක් අපේක්ෂා කළ යුතු නැත. රටේ නීතිය අනුව අපේ‍්‍රල් මාසයෙන් පසුව රටේ වියදම පිණිස මුදල් අනුමත කරගැනීමට පාර්ලිමේන්තුව කැඳවිය යුතුව ඇත. පවත්නා තත්වය තුළ ව්‍යවස්ථා අර්ථ නිරූපණයක් ගැනීමේ යෝග්‍යතාව මැතිවරණ කොමිසම අවධාරණය කර ඇත. ඒ ගැන කතා කරන අමාත්‍ය විමල් වීරවංශ ජනාධිපතිට එවැනි නිර්දේශයක් කිරීමට ඔහු කවුදැයි ප‍්‍රශ්න කරයි. සත්තකින්ම මේ කතාකරන්නේ වීරවංශ නොවේ. ප‍්‍රශ්නය තේරුම් ගත් බියගුල්ලන් වීරවංශ ලවා රට බිය පත්කරනවා පමණකි. මේ අවස්ථාවේ ආණ්ඩු පෙරළිය නොහැකිය. අවදානම දෙතුන්සිය ගුණයකින් ඉහළ ගොස් ඇත. රටේ කවුරුත් අපේක්ෂා කරන්නේ ජනාධිපති ගෝඨාභය කොටුවී සිටින තැනින් එළියට පැමිණ සත්‍යයට යථාර්ථයට මුහුණ දිය යුතු බවය.


ලංකාවේ කොරෝනා වසංගත තත්වය කුමක්ද? ශී‍්‍ර ලංකා දින දර්ශනයේ පළමුවෙන් සටහන් වන්නේ ජනවාරි 27 වෙනිදාය. මේ ලිපිය ලියන අදට මාස දෙකක් සති එකක් සහ දින හයකි. හඳුනාගත් රෝගීන් ප‍්‍රමාණය 180කි. සුවපත් වූ ප‍්‍රමාණය 38කි. මරණ සංඛ්‍යාව 06කි.


තවත් ථෙරවාද බෞද්ධ රටක් වන මියන්මාර් හෙවත් පැරණි බුරුමයේ සෞඛ්‍ය වාර්තා රාජපක්ෂ පාලනය තේරුම් ගත හැකි හොඳම නිදසුන වේ. ලංකාවේ භූමි ප‍්‍රමාණය වර්ග මීටර් 65,610කි. ජනගහනය මිලියන 21.44කි. මියන්මාර් වර්ග මීටර් 676,578 කි. (ඉලක්කම් 6කි) ජනගහනය මිලියන 54කි. මියන්මාරයේ කොරොනා තත්වය හඳුනාගත්තේ මාර්තු 15 වෙනිදාය. මාර්තු 22 දිනට රෝගීන් 5 දෙනෙකි. මාර්තු 30 දිනට රෝගීන් 10 දෙනෙකි. මාර්තු 31 පළමු මරණය වාර්තා වේ. අපේ‍්‍රල් 01 දිනට රෝගීන් 20 දෙනෙකි. අපේ‍්‍රල් 04 දිනට රෝගීන් 25 දෙනෙකි. අපේ‍්‍රල් 01 දිනට රෝගීන් 20 දෙනෙකි. මියන්මාරය භූමි ප‍්‍රමාණයෙන් ලංකාව මෙන් 10 ගුණයක් විශාලය. එහි ජනගහනය ලංකාවේ ජනගහනය මෙන් ප‍්‍රමාණයෙන් තුන් ගුණයකට ආසන්න වේ. ලංකාව මුහුදින් වටවූ දිවයිනකි.

මියන්මාරය තුන් පැත්තකින් වෙනත් රටවලින් මායිම්වී ඇත. ලංකාව රෝගය හඳුුනාගෙන අදට මාස දෙකක්, සති එකක් සහ දින හතක් ගෙවී ඇත. වාර්තාවන රෝගීන් සංඛ්‍යාව 180කි. මරණ සංඛ්‍යාව 06කි. සුවපත්වූ රෝගීන් 42කි. රෝගීන් ලෙස සැක කර රෝහල් ගතකළ ප‍්‍රමාණය 255කි.


කඩතොලූ සහිත මියර්මාර් චීන දේශසීමාව කිලෝමීටර් 2240කට වඩා දිගු වේ. එහෙත් කොරෝනා රෝගීන් වාර්තා වී ඇත්තේ එක් පැත්තකින් පමණකි. ආසන්න චීනයේ මිනිසුන් 80,800කට පමණ රෝගය ආසාදනය වී ඇත. මියන්මාරයට බටහිරෙන් පිහිටි ඉන්දියාවේ කොරෝනා රෝගීන් 114ක්ද, බංගලාදේශයේ රෝගීන් 5ක් ද අසල්වැසි තායිලන්තයේ රෝගීන් 114ක් වාර්තා වී ඇති පසුබිමක අප මියන්මාර් පාලනයට ආශීර්වාද කළ යුතුවේ.

නීතිඥ චන්ද්‍රසිරි සෙනෙවිරත්න