හිටපු අමාත්‍ය රාජිත සේනාරත්න නිදහස් කරන ලෙස ඉල්ලා කළුතරදී සමගි ජන බලවේගයේ සාමාජිකයන් විසින් උද්ඝෝෂණයක් පවත්වනු ලැබීය. කොවිඩ්-19 වසංගතය හමුවේ වැඩි පිරිසක් සහභාගි කරගැනීමෙන් තොරව සමාජ දූරස්ථභාවය තබාගෙන කටයුතු සිදුකරන ලෙස සෞඛ්‍ය අංශ ලබාදුන් උපදෙස් මෙම උද්ඝෝෂකයන් විසින් පැහැදිලිව කඩනු ලැබීය. එසේ එම උපදෙස් කඩනු ලැබූ අය අතර හිටපු විපක්ෂ නායක සජිත් ප්‍රේමදාස ඇතුළු හිටපු මැති ඇමතිවරුන් සිටීම සැලකිල්ලට ගත යුතුය.

සෞඛ්‍ය අංශ ලබාදී ඇති උපදෙස් ආණ්ඩු පක්ෂයේ මැති ඇමතිවරුන් හා ඔවුන්ගේ ගෝලබාලයන් කඩන අයුරු අපට නිතර දකින්නට අසන්නට ලැබෙන බව ඇත්තකි. දේශපාලන ක්‍රියාධරයන් නොවන ජනමාධ්‍ය ආයතන හා අනෙකුත් අයද එම කඩකිරීම් සිදුකරයි. එහෙත් සමගි ජන බලවේගයේ මේ උද්ඝෝෂණයේ අරමුණ වූයේ ආණ්ඩු ක්‍රියාකාරිකයන්ගේ එම සෞඛ්‍ය උපදෙස් කැඩීමට ප්‍රතිචාර දැක්වීමක් නොවේ. එවැනි ප්‍රතිචාර දැක්වීමක් නම් එය වෙනම සාකච්ඡාවට ගත යුත්තකි.මේ උද්ඝෝෂණය වූ කලී එවැනි දේ සඳහා කිසිදු ජනතා ආකර්ෂණයක් නැති රටේ වසංගත අවස්ථාවක සිදුකළ මෝඩ චූන් එකක් පමණය.

චෝදනාලාභීන්ගේ හමුදා උසස්වීම්

උතුරේ යුද ජයග්‍රහණය සැමරීමේ නිමිත්තෙන් යුද හමුදා නිලධාරීන් 177කට හා සෙසු නිලයන් 14,617කට උසස්වීම් ලබාදී ඇත. මැතිවරණයක් ප්‍රකාශයට පත් කිරීමෙන් පසු ලබාදුන් මෙම උසස්වීම් නීත්‍යනුකූලද යන ප්‍රශ්නය මේ වන විට පැන නැගී තිබේ. එම උසස්වීම් සම්බන්ධයෙන් සාකච්ඡාවට භාජනය වී ඇති තවත් කරුණක් වන්නේ බ්‍රිගේඩියර් ප්‍රියංක ප්‍රනාන්දු මේජර් ජෙනරාල්වරයෙකු ලෙස උසස් කිරීමය.

බ්‍රිගේඩියර් ප්‍රියංක ප්‍රනාන්දු යනු බ්‍රිතාන්‍යයේ ශ්‍රී ලංකා තානාපති කාර්යාලයේ මිලිටරි ඇටෑච් ලෙස සේවය කරමින් සිටියදී ශ්‍රී ලංකා දෙමළ ඩයස්පෝරා උද්ඝෝෂකයන්ට මරණීය තර්ජන එල්ල කිරීම සම්බන්ධයෙන් චෝදනා ලැබූ පුද්ගලයාය.එම මරණීය තර්ජනය සම්බන්ධයෙන් ඔහුට එරෙහිව බ්‍රිතාන්‍යයේ පරීක්ෂණයක්ද පැවැත්වේ.

අපරාධ චෝදනා ලැබූ හමුදා සාමාජිකයන්ට උසස්වීම් ලබාදීම හා නැවත සේවයේ පිහිටුවීම පසුගිය කාලයේ සිදුවූ එක් නරක පූර්වාදර්ශයක්ය.රතුපස්වල වතුර ඉල්ලා උද්ඝෝෂණය කළ ජනතාවට වෙඩි තබන්නට නියෝග කළ මේජර් ජෙනරාල් දේශප්‍රිය ගුණවර්ධන එවැනි උසස්වීම් ලැබූ අයෙකි. කප්පම් ලබාගැනීම සඳහා දරුවන් පැහැර ගැනීමට චෝදනා ලැබූ නාවික හමුදාවේ ඩී.කේ.පී. දසනායක එවැනි අයෙකි.

වත්මන් මහවැලි අමාත්‍යාංශ ලේකම් හිටපු මේජර් ජෙනරාල් සුමේධ පෙරේරාද ඔබේසේකරපුර වලව්ව සම්බන්ධ නඩුව හේතුවෙන් වැඩ තහනමට ලක් වී පසුව සේවයේ පිහිටුවූ අයෙකි.විනයගරුක හමුදාවක උසස්වීම් සිදුවන්නේ ඒ ආකාරයෙන්ය.

නිරෝධායනය උතුරට හා දකුණට

උතුරේ යුද්ධයේදී මියගිය අය සැමරීම සදහා එම ප්‍රදේශයේ දේශපාලනඥයන් හා සාමාන්‍ය ජනතාව ගත් උත්සාහයන්ට ආරක්ෂක අංශ හා පොලීසිය බාධා කරන අයුරු හා තහනම් පනවන අයුරු මාධ්‍ය විසින් වාර්තා කරනු ලැබීය. උතුරු පළාතේ හිටපු මහ ඇමති සී.වී. විග්නේෂ්වරන්ට එම සැමරුමක් පැවති මුලතිව් ප්‍රදේශයට යෑමට යුද හමුදාව අවසර ලබාදී නැත. එමෙන්ම හිටපු පළාත් සභා මන්ත්‍රී එම්.කේ. සිවාජිලිංගම් මියගිය අය වෙනුවෙන් කළ සැමරුමේදී පොලීසිය ඔහුට තර්ජනය කරන්නේ නිරෝධායන නීති කඩ කිරීම හේතුවෙන් ඔහු නිරෝධායනයට ලක් කිරීමට සිදුවන බව පවසමින්ය.

තවත් මාධ්‍ය වාර්තාවක දැක්වෙන්නේ යුද්ධයෙන් මියගිය උතුරේ වැසියන් සැමරීම් සිදුකළ එකොළොස්  දෙනෙකු යාපනය මහේස්ත්‍රාත් අධිකරණයට ඉදිරිපත් කිරිමෙන් පසු ස්වයං නිරෝධානයට ලක් කළ බවයි.දකුණේදීද ආණ්ඩුව උතුරේ යුද්ධයෙන් මියගිය හමුදා සාමාජිකයන් සැමරීම හා යුද ජයග්‍රහණය සැමරීම සිදුකරන ලදි. ඊට නිරෝධායන නීතිය අදාළ වූයේ නැත. ජනාධිපතිවරයා එම උත්සවයට සහභාගි වූයේ මුහුණු ආවරණයක්ද නොමැතිවය. එම උත්සවයේ අසුන් පැනවීම් මීටරයක දුරකින් තිබුණේද නැත.

කොතෙක්ද කිවහොත් එම යුද සැමරුමේ පුහුණුවීම්වලට සහභාගි වූ නාවික හමුදා සාමාජිකාවෝ දෙදෙනෙක් කොවිඩ්-19 ආසාදිතයන් ලෙසද හඳුනා ගනු ලැබූහ. ඒ නිසාම එම පුහුණුවීම්වලට සහභාගි වූ යුද, නාවික, ගුවන්, පොලිස් හා සිවිල් ආරක්ෂක සේවාවල පිරිස් නිරෝධායනයටද යොමු කරනු ලැබූහ.එහෙත් යුද සැමරුම අත්හිටුවේවත්, එයට තහංචි පැනවූයේවත් නැත. නිරෝධායන නීතිය උතුරේදී හා දකුණේදී ක්‍රියාත්මක වන්නේ එසේය.

මංගලගේ අභීත ප්‍රකාශය

හිටපු මුදල් අමාත්‍ය මංගල සමරවීර අපරාධ පරීක්ෂණ දෙපාර්තමේන්තුවට කැඳවා දින දෙකක් තිස්සේ දීර්ඝ ප්‍රශ්න කිරීමකට ලක් කරනු ලැබීය.ඒ දැනට පුත්තලම කල්පිටිය ප්‍රදේශයේ පදිංචිව සිටින මන්නාරම වැසියන් ඔවුන්ගේ ඡන්දය පාවිච්චි කිරීම සඳහා එම ප්‍රදේශයට යෑමට ප්‍රවාහන පහසුකම් සැපයීම ප්‍රශ්න කිරීම උදෙසාය.

සීඅයිඩීයේ එම ප්‍රශ්න කිරීම්වලින් පසු පිටතට පැමිණි මංගල සමරවීර මහතා මාධ්‍යවේදීන් යැයි කියාගන්නා කුලීකරුවන්ගේ ජඩ ප්‍රශ්නවලට නිර්භීත පිළිතුරු සමුදායක් ලබාදුන්නේය.එකක් එම වැසියන්ට ඡන්දය ප්‍රකාශ කිරීම සඳහා යෑමට හිටපු අමාත්‍ය බැසිල් රාජපක්ෂ පහසුකම් සැපයීම හොඳ වීමටත් තමා එය කිරීම නරක වීමටත් හේතුව කුමක්ද යන්නය.

එමෙන්ම එල්ටීටීඊ සංවිධානය මුල් ගම්බිම්වලින් එළවා දමන ලද එම ජනතාවට අවුරුදු 30ක කාලයක් ඉකුත්වීත් සාධාරණය ඉටුකිරීමට නොහැකිවීම ගැන ආණ්ඩුවලට සම්බන්ධ වී සිටි තමා කනගාටු වන බවත් එම වගකීම් පැහැරහැරීමේ වගකීම බාරගන්නා බවත්ය.එමෙන්ම ඡන්දය යනු ජනතාවගේ අයිතියක් බවත්, එම අයිතිය භාවිත කිරීමට පහසුකම් සැලසීම රජයක වගකීම බවත් මංගල සමරවීර මහතා අධාරණය කළේය. තවද ඔහු කීවේ වැරදි මිනිහාට මේ ආණ්ඩුව අත තබා ඇති බවය.

මේ ප්‍රශ්න කිරීම දේශපාලනික වශයෙන් පළි ගැනීමට කරන ප්‍රශ්න කිරීමක් බව පැහැදිලිය. මේ කුලී ජඩමාධ්‍යකරුවන් මංගල සමරවීර මහතාගෙන් නොව පොලීසියෙන් ඇසිය යුතු ප්‍රශ්නයක් තිබේ. ඒ බැසිල් රාජපක්ෂ එම ක්‍රියාව කරනකොට හොඳ වෙන්නේ කෙසේද කියාය.