ශ‍්‍රී ලංකා නිදහස් පක්ෂය හා ශ‍්‍රී ලංකා පොදුජන පෙරමුණ අතර ඇති කරගත් ශ‍්‍රී ලංකා පොදුජන සන්ධානයේ සමනායකත්වයට හිටපු ජනාධිපති මහින්ද රාජපක්ෂ හා වත්මන් ජනාධිපති මෛත‍්‍රීපාල සිරිසේන යන දෙදෙනාම පත්කිරීම පිළිබඳව පොදුජන පෙරමුණේ මන්ත‍්‍රීවරුන් අතර විරෝධයක් ඇතැයි වාර්තා වෙයි.

ඔක්තෝබර් 31 වැනිදා පදනම් ආයතනයේ පැවති උත්සවයකදී එම සන්ධානය පිහිටුවීම සඳහා ගිවිසුම් අත්සන් කරනු ලැබීය. ශ‍්‍රී ලංකා නිදහස් පොදුජන සන්ධානය ලෙස එය හැඳින්වීමට නියමිතය.

වත්මන් ආණ්ඩුවේ නායකයාද වන මෛත‍්‍රීපාල සිරිසේන මහතා නායකයා ලෙස පිළිගැනීමට නොහැකි බව මේ පිළිබඳව අදහස් දක්වමින් ශ‍්‍රී ලංකා පොදුජන පෙරමුණේ මන්ත‍්‍රීවරු කිහිපදෙනෙක් කීහ. මීට පෙර එම සන්ධානයේ සංයුතියෙන් සීයට 31ක් ශ‍්‍රීලනිපයට ලැබීම පිළිබඳව විරෝධය දැක්වූ මන්ත‍්‍රීවරුන් මෙම තීරණයටද එකඟ නොවන බව අනිද්දා සමඟ අදහස් දැක්වූ මන්ත‍්‍රීවරු කීහ.

ශ‍්‍රී ලංකා පොදුජන පෙරමුණ පසුගිය වසර තුනක කාලයක් තිස්සේ එජාපය ප‍්‍රමුඛ ආණ්ඩුවට විරෝධය දක්වමින් විපක්ෂයේ කටයුතු කළ පසුව, 2015දී මහින්ද රාජපක්ෂ ආණ්ඩුව පරාජය කළ පුද්ගලයා නායකත්වය පත් කිරීම ගැන එකඟ විය නොහැකි බව අනිද්දා සමඟ අදහස් දැක්වූ එක් මන්ත‍්‍රීවරයෙක් පැවසීය.

තවත් මන්ත‍්‍රීවරයෙකු ප‍්‍රකාශ කළේ පාස්කු ඉරිදා ත‍්‍රස්ත ප‍්‍රහාරයටද ජනාධිපති මෛත‍්‍රීපාල සිරිසේන වගකිව යුතු බවට චෝදනා එල්ලවී ඇති බවත්, ඔහු නායකයා ලෙස පිළිගැනීම අසීරු බවත්ය. ඔහු වැඩිදුරටත් සිහිපත් කළේ ශ‍්‍රීලනිපය හා පොදුජන පෙරමුණ එක්වීමට සති දෙකකට පෙරද නෙළුම් කුලූන ගැන ප‍්‍රකාශයක් කරමින් ජනාධිපතිවරයා තම කණ්ඩායමට වාග් ප‍්‍රහාර එල්ලකළ බවයි.

කෙසේ වෙතත් ජනාධිපතිවරණයට පෙර තමන්ගේ විරෝධය ප‍්‍රසිද්ධියේ ප‍්‍රකාශයට පත් නොකරන බවත්, ජනාධිපතිවරණයෙන් පසුව අනිවාර්යයෙන්ම ඒ ගැන විරෝධය පළ කරන බවත් එක් මන්ත‍්‍රීවරයෙක් ප‍්‍රකාශ කළේය.