මාධ්‍යවේදී ප‍්‍රගීත් එක්නැළිගොඩ පළමු වරට පැහැරගෙන ගොස් අයුතු ලෙස සිරකර තබාගැනීම සම්බන්ධයෙන් යුද හමුදා බුද්ධි අංශ නිලධාරීන් 7 දෙනෙකුට එරෙහිව නීතිපතිවරයා අධිචෝදනා ගොනු කර ඇත.

හෝමාගම මහාධිකරණය හමුවේ නොවැම්බර් 07 වැනිදා මෙම අධිචෝදනා ගොනුකිරීම සිදුවූ අතර ඒ යුද හමුදා ලූතිනන් කර්නල් ෂම්මි කුමාරරත්න, ලූතිනන් කර්නල් ප‍්‍රබෝධ සිරිවර්ධන ඇතුළු බුද්ධි අංශ නිලධාරීන් 7 දෙනෙකුට එරෙහිවය.

2009 අගෝස්තු 27 දින හෝ ඊට ආසන්න දිනකදී ගිරිතලේ, හබරණ හා කොට්ටාව යන ප‍්‍රදේශවලදී මාධ්‍යවේදී ප‍්‍රගීත් එක්නැළිගොඩ අයුතු ලෙස සිරකර තැබීම සඳහා පැහැරගෙන යෑමට කුමන්ත‍්‍රණය කිරීම හා ඊට ආධාර අනුබල දීම බුද්ධි අංශ සාමාජිකයන්ට එරෙහි චෝදනා වේ.

එම පළමු පැහැරගෙන යෑමේ සිද්ධියෙන් දිනකට පසු ප‍්‍රගීත් එක්නැළිගොඩ මුදාහරිනු ලබන අතර ඔහු දෙවැනි වරට පැහැරගෙන යනු ලබන්නේ 2010 ජනවාරි 24 වැනිදාය. එම පැහැරගෙන යෑමෙන් පසු ප‍්‍රගීත් එක්නැළිගොඩ අදටත් අතුරුදහන්ය. එම දෙවන පැහැරගෙන යෑම හා අතුරුදහන් කිරීම සම්බන්ධයෙන්ද අපරාධ පරීක්ෂණ දෙපාර්තමේන්තුව පරීක්ෂණ සිදුකර නීතිපතිවරයාට උද්ධෘත යවා ඇත.

ඉඳුවර බණ්ඩාර