දෙපාර්ශ්වයේ ප‍්‍රකාශකයන් කියූ හා අනුමාන කළ දේවල් බොරු බවට පත්කරමින් පොහොට්ටු පක්ෂයත් ශ‍්‍රී ලංකා නිදහස් පක්ෂයත් අතර දේශපාලන සන්ධානය මැතිවරණ කොමිසමේ අනුමැතියට යොමුකර තිබේ.


එම දේශපාලන සන්ධානයේ ප‍්‍රකාශයට පත්කර ඇති නිලධාරී මණ්ඩල නාමලේඛනය අනුව එය පොහොට්ටු පක්ෂයට හා ශ‍්‍රී ලංකා නිදහස් පක්ෂයට සීමා වූ එකක් බවට පත්වී නැත. මෙතෙක් පොහොට්ටු පක්ෂය සමඟ කටයුතු කළ දිනේෂ් ගුණවර්ධන, වාසුදේව නානායක්කාර, විමල් වීරවංශ, උදය ගම්මන්පිල, තිස්ස විතාරණ හා ඩිව් ගුණසේකර යන පක්ෂ නායකයෝද ඒ තුළ සිටිති. ඒ අනුව බලන විට මෙම දේශපාලන සන්ධානය පොහොට්ටු පක්ෂය සමඟ කටයුතු කළ දේශපාලන ධාරාවේ පුළුල් සන්ධානය ලෙසද අපට හඳුනාගත හැකිය.


මෙම සන්ධානය ඉදිරි මහා මැතිවරණයට ඉදිරිපත් වන්නේ පොහොට්ටු ලකුණෙන් බව දැනටමත් ප‍්‍රකාශ කර ඇත. ඒ අනුව මෙම දේශපාලන සන්ධානය එයට හිමි ලකුණකින් ඉදිරි මැතිවරණයට තරඟ නොකරනු ඇත. මේ සන්ධානයේ සියලූ දෙනාට සිදුවන්නේ පොහොට්ටු පක්ෂය යටතේ ඉදිරි මැතිවරණයට ඉදිරිපත් වීමටය.


එහිදී මෙම දේශපාලන සන්ධානයට එකතු වූ ශ‍්‍රී ලංකා නිදහස් පක්ෂයට තබා පොහොට්ටු පක්ෂය සමග සිටි කුඩා පක්ෂ කණ්ඩායම්වලට පවා කිසිදු බලයක් හිමිනොවන බව පැහැදිලිය.
මෙම දේශපාලන සන්ධානය ලියාපදිංචි කිරීමේ ඇති විශේෂත්වය වන්නේ ඉන් පෙර ශ‍්‍රීලනිපය සමඟ පසමිතුරු අදහස් දැක්වූ පොහොට්ටු පක්ෂ සාමාජිකයන් මෙන්ම කුඩා පක්ෂ සාමාජිකයන්ද නිහඬතාවක ගිලී සිටීමයි. එහි තේරුම වන්නේ යමක් තීරණය කරන්නේ රාජපක්ෂවරුන්ද, එයට එරෙහිවීමේ හැකියාවක් මේ කිසිවෙකුට නැති බවයි. එරෙහිවීම යනු සියදිවි නසාගැනීමක් බව මේ කටමැත දොඩවන්නන් දන්නා බවයි. මේ සියල්ලන්ටම ඇත්තේ දේශපාලන දර්ශනයක් නොව රාජපක්ෂ වන්දනාව මගින් මැති ඇමතිකම් දැරීමේ හා දේශපාලනයේ සළුවී සිටීමේ වුවමනාවක් බවයි.


මේ දේශපාලන සන්ධානය තුළ අනෙක් කැපී පෙනෙන කාරණය වන්නේ ජනාධිපති ගෝඨාභය රාජපක්ෂ ඍජුව හෝ වක‍්‍රව ඒ තුළ නියෝජනය නොවීමය. මහින්ද රාජපක්ෂ මේ දේශපාලන සන්ධානයේ නායකයා වන විට සම නායකත්වය කෙසේ වෙතත් උපනායකත්වයක්වත් ගෝඨාභය රාජපක්ෂට නැත. ඔහුගේ විද්වත් පර්ෂදයේ ප‍්‍රධානීන් කිසිවෙකුටත් එහි කිසිදු තනතුරක් නැත. ඒ නිසා ගෝඨාභය රාජපක්ෂ මෙන්ම ඔහුගේ විද්වත් පර්ෂදයත් නොතකා හැරි දේශපාලන සන්ධානයක් ලෙසද මෙය හඳුනාගත හැකිය.


එමෙන්ම ගෝඨාභය රාජපක්ෂගේ විද්වත් පර්ෂදයට ඉදිරි මහා මැතිවරණය සඳහා කෙතරම් නාමයෝජනා සංඛ්‍යාවක් පොහොට්ටු පක්ෂයෙන් ලැබේද යන ප‍්‍රශ්නාර්ථයද මෙහිදී ඉතිරි කර ඇත. මන්ද ශ‍්‍රී ලංකා නිදහස් පක්ෂය මෙම සන්ධානය බලෙන්ම ඉල්ලා ගන්නේ පසුගිය ජනාධිපතිවරණයට පෙර පොහොට්ටු පක්ෂය හා ශ‍්‍රීලනිපය අතර තිබූ අවබෝධතා ගිවිසුමේ කොන්දේසි හා එකඟතා දැන් බැහැ යැයි කියූ අවස්ථාවකදී නිසාය. ශ‍්‍රීලනිපයට මෙම දේශපාලන සන්ධානය තුළ සීයට 30 නාමයෝජනා ඇතුළු බලය ලැබෙනවා යැයි කියූ එකඟතා දැන් අවලංගුය. අනේ කෙසේ හෝ අපවත් එකතු කරගන්න කියූ යාදිනි පමණක් දැන් එහි ඉතිරි වී ඇත.


මේ අනුව ඉදිරි මහමැතිවරණයෙන් පසු ශ‍්‍රීලනිපය පොහොට්ටු පක්ෂය තුළ දියවී යෑම වැළැක්විය නොහැකි වනු ඇත. මේ අවස්ථාවේදී දැනට සිටින ශ‍්‍රීලනිප මන්ත‍්‍රීවරුන්ටත් අමතර යම් පිරිසකටත් නාම යෝජනා ලැබිය හැකිමුත් ජයග‍්‍රහණය කිරීම ඉතා අසීරු එකක් බවට පත්වීම වැළැක්විය නොහැකිය. ‘ජෙනුයින් පොහොට්ටු පක්ෂ අපේක්ෂකයෙක්’ සංවිධානාත්මකව ජෙනුයින් පොහොට්ටු පක්ෂ ඡුන්ද හෙවත් මනාපවලින් ශ‍්‍රීලනිප අපේක්ෂකයන් පරාද කරනු ඇත.
පසුගිය 2015 මහමැතිවරණයේදී ශ‍්‍රීලනිපය ලෙස ඡුන්දය ඉල්ලා මෛත‍්‍රීපාල සිරිසේනගේ නායකත්වය යටතේම මෛත‍්‍රීපාල සිරිසේන හිතවාදීන් පැරදවීමට හැකිවූ රාජපක්ෂවාදීන්ට මෙය නම් කජ්ජක් නොවේ. එදා යන්තම් ජාම බේරා ගැනීමට හැකිවූයේ දයාසිරි ජයසේකර, දුමින්ද දිසානායක, නිමල් සිරිපාල ද සිල්වා, මහින්ද අමරවීර, ලසන්ත අලගියවන්න වැනි අය පමණය. ඡුන්දයෙන් පැරදුණු එස්.බී. දිසානායක, තිලංග සුමතිපාල, විජිත් විජයමුණි සොයිසා, ලක්ෂ්මන් යාපා, සරත් අමුණුගම, ෆයිසර් මුස්තාෆා සහ මහින්ද සමරසිංහ වැනි අය ජාතික ලැයිස්තුවෙන් ගෙනෙන්නට සිදුවූයේ ඒ නිසාය.


ජනතා විමුක්ති පෙරමුණ ශ‍්‍රීලනිප ප‍්‍රමුඛ එක්සත් ජනතා නිදහස් සන්ධානය යටතේ ඡුන්දය ඉල්ලා සෑම දිස්ත‍්‍රික්කයකටම ඉදිරිපත් කළ ඔවුන්ගේ අපේක්ෂකයන් දෙදෙනා හෝ තිදෙනාම සංවිධානාත්මකව මනාප ලැයිස්තුවෙන් ඉහළට ගත්තා වැනි යමක් ශ‍්‍රීලනිපයට කළ නොහැකිය. මන්ද ඊට ශ‍්‍රීලනිප ඡුන්ද ප‍්‍රමාණය මදිය. අමතරව පොහොට්ටු ඡුන්ද ඔවුන්ට ලැබෙන්නේ නැත. පොහොට්ටුවට ආකර්ෂණීය ඡුන්දද ඔවුන්ට ලැබිය හැකි යැයි සිතිය නොහැකි නිසාය. ජවිපෙට එදා එක්සත් ජනතා නිදහස් සන්ධානයේ ඡුන්දවල ආකර්ෂණයක් තිබුණි. එම ඡුන්ද බොහෝවිට මෙවර ඩැහැගනු ඇත්තේ පොහොට්ටුවෙන් එන ගෝඨාභය රාජපක්ෂගේ විද්වත් පර්ෂදයේ සාමාජිකයන් විය හැකිය.


එම නිසා ශ‍්‍රීලනිපයට ඉදිරි මහා මැතිවරණය තීරණාත්මක එකක් බවට පත්වනු ඇත. පොහොට්ටු පක්ෂය තුළ ශ‍්‍රීලනිපය තවදුරටත් දිය නොවීම සඳ
හා ඔවුන්ට උපක‍්‍රම භාවිත කිරීමට අනිවාර්යයෙන් සිදුවනු ඇත. ඒවා තනි තනි උපක‍්‍රම නොව සාමූහික හා සංවිධානාත්මක උපක‍්‍රම බවට පත්කරගතහොත් හා එම උපක‍්‍රම වැඩ කළහොත් පමණක් ඉදිරි මහා මැතිවරණයෙන් පසු ශ‍්‍රී ලංකා නිදහස් පක්ෂයක් තවදුරටත් ඉතිරි වනු ඇත.