ණය ගෙවීමේදි ඇති වී තිබෙන ගැටලු නිරාකරණය කරගැනීමට අධිකරණය වෙත යාමට සමස්ත ලංකා රථවාහන ලීසිං ණය ගෙවන්නන්ගේ සංගමය තීරණය කර ඇති බැව් එහි ලේකම් දිමිත්‍රි නාලක පවසයි.

ලීසිං ආයතන මඟින් රටේ ඇඳිරි නීතිය ක්‍රියාත්මක වන පෙදෙස්වල ජනතාවට ණය වාරික ගෙවන ලෙසට තර්ජනය කරමින් එම ජනතාව පීඩාවට පත් කරන බවත් එම සමාගම්වලට එරෙහිව නඩු පැවරීමට බලාපොරොත්තු වන බවත් මේ පිළිබඳ පැහැදිලි කරමින් නාලක මහතා ප්‍රකාශ කළේය.

නැවත රට ස්ථාවර තත්වයට පත් වෙන තෙක් ණය ගෙවීමට සහන කාලයක් ලබා දෙන මෙන් රජයෙන් ඉල්ලා සිටින බවද ඔහු කීය.

ඔහු වැඩිදුරටත් පවසා සිටියේ බොහෝ ලීසිං ආයතන අධික ණය පොලියක් අය කරන අතර ඊට කිසිදු සහනයක් ලබා දී නොමැති බවයි. සිය වාහන පවා තමාට අහිමිවන තත්වයක් උදා වී ඇති මෙවන් අවස්ථාවක රජය ඊට මැදිහත්ව ක්‍රියා කර ඒ සඳහා කඩිනම් විසඳුමක් ලබා දෙන මෙන් නිරන්තරයෙන් ඉල්ලීම් සිදු කළ ඊට නිසි ප්‍රතිචාර නොලැබුණු බව ඔහු පැහැදිලි කළේය.

නිත්‍යා සෙව්වන්දි