මීළඟ නිදහස් දින උත්සවය 2020 පෙබරවාරි 04 වැනිදා නිදහස් චතුරස‍්‍රයේදී පැවැත්වීමට රජය තීන්දු කර ඇත. ඒ පිළිබඳව රාජ්‍ය පරිපාලන අමාත්‍යාංශයේ දෙසැම්බර් 23 වැනිදා සාකච්ඡුාවක් පවත්වා තිබුණි. එහිදී ගෙන තිබුණු එක් තීන්දුවක් වන්නේ ජාතික ගීය සිංහලෙන් පමණක් ගායනා කිරීමය.

2015 සිට මේ දක්වා නිදහස් උත්සවවලදී ජාතික ගීය සිංහලෙන් ගායනා කර තිබුණි. ඒ යහපාලන ආණ්ඩුව පත්වූ විගස පාලනය පිළිබඳව සාකච්ඡුා කිරීමේ පහසුව සඳහා ඇති කරගත් ජාතික විධායක සභාව නම් ආයතනයේදී ඇති කරගත් එකඟතාවක් අනුවය. එහි සාමාජිකත්වය දැරූ මනෝ ගනේෂන් මහතා එහිදී ශ‍්‍රී ලංකාවේ ජාතික ගීය සිංහල හා දෙමළ භාෂාවලින් තිබුණත්, ලංකාවේ රාජ්‍ය භාෂාවක් ලෙස දෙමළ භාෂාව සැමරුවත් ජාතික ගීය සිංහලෙන් පමණක් ගායනා කරන බව කියා තිබුණි. එවකට අතිශය ප‍්‍රගතිශීලී ස්ථාවරයන්හි සිටි ජනාධිපති මෛත‍්‍රීපාල සිරිසේන මහතා කියා තිබුණේ ජාතික ගීය දෙමළෙන් ගායනා කිරීමට කිසිදු බාධාවක් නැති බවයි. නිදහස් උත්සවය ඇතුළු ජාතික උත්සවවලදී ජාතික ගීය භාෂා දෙකෙන්ම ගායනා කිරීමේ සම්ප‍්‍රදායක් ඇතිවුණේ ඒ අනුවය.


එය ලංකාවේ ජනවර්ග අතර සමානාත්මතාව පිළිබඳ හැඟීම වර්ධනය කළ අවස්ථාවක් විය. තමන්ගේ භාෂාව අනෙක් ජනවර්ග මත පැටවීම වෙනුවට අනෙක් ජනවර්ගවල භාෂා අයිතිය පිළිගැනීම වැදගත් කාරණයකි.


යුද්ධය සමග ජනවර්ග අතර ඇතිවූ ගැටුම් නිසා අභියෝගයට ලක්වුණු නමුත් ලංකාවට ජාතික ගීයක් ලැබුණු කාලයේ පටන්ම ලංකාවේ දෙමළ ජාතික ගීයක් තිබුණි. ලංකාවේ ආණ්ඩුක‍්‍රම ව්‍යවස්ථාවට ජාතික ගීය ඇතුළත්ව තිබෙන අතර එහි දෙමළ ජාතික ගීයද ඇත. 1978 දී සම්මත වූ ආණ්ඩුක‍්‍රම ව්‍යවස්ථාව අනුව ජාතික භාෂා ලෙස දෙමළ හා සිංහල භාෂා පිළිගැනුණි. ලංකාවේ සියලූ ව්‍යවස්ථා සහ අණපනත්වල දෙමළ පිටපත් ඇත. ආණ්ඩුක‍්‍රම ව්‍යවස්ථාවේ පස්වෙනි වගන්තියෙහි ශ‍්‍රී ලංකා ජාතික ගීය පිළිබඳව සඳහන්ව තිබේ.


තුන්වැනි උපලේඛනයෙහි ජාතික ගීයෙහි පදමාලාව සහ සංගීතය සඳහන්ව ඇත. ව්‍යවස්ථාවේ සිංහල පිටපතෙන් ජාතික ගීය ලෙස සිංහලෙන් ‘ශ‍්‍රී ලංකා මාතා අප ශ‍්‍රී ලංකා’ යනුවෙන් ජාතික ගීය සඳහන් වන අතර එහි දෙමළ පිටපතෙහි එම සංගීතයට අදාළ එම ජාතික ගීයම දෙමළ භාෂාවට පරිවර්තනය වී සඳහන් වන අතර ‘ශ‍්‍රී ලංකා තායේ’ යනුවෙන් එම පරිවර්තනය ආරම්භ වේ. ආණ්ඩුක‍්‍රම ව්‍යවස්ථාවේ දෙමළ පරිවර්තනය සලකා බලන අයකුට මෙම ව්‍යවස්ථාවේ අවුල ලිහාගත හැකිවනු ඇත. ජාතික ගීයේ පදමාලාව එකමය. සංගීතය එකමය. ගායනා කරන විට දැනෙන හැඟීමද එකමය.


වත්මන් ආණ්ඩුව ගෙන ඇති පියවර අනුව සිදුවන්නේ සිංහල භාෂාව නොදන්නා අයට ශ‍්‍රී ලංකාව තමන්ගේ මව බවට හැඟීමක් නොදැනීමය. නොදන්නා සිංහල බසින් කියන අර්ථයක් නොදන්නා හුදු වචන ටිකක් පමණක් අසන්නට සිදුවීමය.


මීට පෙර මහින්ද රාජපක්ෂ මහතාගේ ආණ්ඩුව සමයේ ජාතික ගීය දෙමළෙන් ගැයීම පිළිබඳව වාසුදේව නානායක්කාර මහතා පාර්ලිමේන්තුවේදී අදහස් දැක්වූ අවස්ථාවක ඊට විරුද්ධ වෙමින් විමල් වීරවංශ මහතා කියා තිබුණේ ඉන්දියාවේ වැඩි පිරිසක් කතා කරන භාෂාව වන හින්දි භාෂාවෙන් වෙනත් භාෂා කතා කරන බහුතර ජනතාවක් ජාතික ගීය ගයන බවත් ලංකාවේ රටේ බහුතරය සිංහල භාෂාවෙන් දෙමළ ජනතාවද ජාතික ගීය ගායනා කළ යුතු බවත්ය. එදා විමල් වීරවංශ ඇමතිවරයා කී කතාව සම්පූර්ණ බොරුවකි. ඉන්දියාවේ ජාතික ගීය රබීන්ද්‍රනාත් තාගෝර් විසින් ලියා ඇත්තේ සුළුතර භාෂාවක් වන බෙංගාලි භාෂාවෙන්ය. එම බසින් ඇති ජාතික ගීය ගයන්නට බහුතර ජනතාවට විනයක් තිබුණි.


එම කතාවේදී විමල් වීරවංශ කියා තිබුණේ මෙවන් විකාර වැඩ ලෝකයේ කොහේවත් නොවන බවය. එහෙත් දකුණු අප‍්‍රිකාවේ ජාතික ගීය භාෂා පහකින් ගයන බවත්, කැනඩාව, නවසීලන්තය, කැමරන්, අයර්ලන්තය, ස්විට්සර්ලන්තය ඇතුළු රටවල් විශාල ප‍්‍රමාණයක් ජාතික ගීය එකකට වැඩි භාෂා ගණනකින් ගයන බවත් ඔහු දැන සිටියේ නැත.


1948 පැවති පළමු නිදහස් උළෙලේද ජාතික ගීය භාෂා දෙකකින් ගායනා කර තිබුණි. ඒ වත්මන් ජාතික ගීය නොවේ. 1951දී ආනන්ද සමරකෝන් මහතා ලියූ වත්මන් ජාතික ගීය භාවිතා කිරීම අරඹා තිබුණි. එම කාලයේදීම එම්. නල්ලතම්බි නමැති ශ‍්‍රී ලාංකිකයා විසින් එම ජාතික ගීය දමිළ භාෂාවට පරිවර්තනය කර තිබුණි. ඒ සිංහල කතා කරන පුරවැසියෙක් ජාතික ගීය ගයද්දී දැනෙන හැඟීම දෙමළ පුරවැසියෙකුටද ඇතිවනු පිණිස ය. දෙමළ පෙළපොත්වල පවා ජාතික ගීයේ දෙමළ පරිවර්තනය තිබුණි. දෙමළ ශිෂ්‍ය ශිෂ්‍යාවෝ් අභිමානයෙන් ජාතික ගීය ගැයූහ. අවබෝධ කරගත්හ.
‘ශ‍්‍රී ලංකා මාතා’ යනුවෙන් ආරම්භ වී ‘එක මවකගේ දරු කැල බැවිනා-යමු යමු වී නොපමා’ යනුවෙන් අර්ථාවබෝධයද සමග සිංහල නොදන්නා දෙමළ කතාකරන දරුවන් ජාතික ගීය ගායනා කිරීම වත්මන් ආණ්ඩුවේ බියට හේතුවනවාදැයි අපි නොදන්නෙමු. මෙවැනි ක‍්‍රියාවලින් ලංකාවේ අනෙකුත් ජනවර්වලට යන පණිවුඩය කුමක්දැයි අප කල්පනා කළ යුතුය. ආණ්ඩුව රට හැදීම යැයි කියන්නේ මේ ජාතීන් එකතු කොට ශ‍්‍රී ලාංකික ජනවර්ගයක් ගොඩනැඟීම නොවේදැයි අප කල්පනා කර බැලිය යුතුය.


ජාතික ගීය දෙමළින් ගායනා කළහොත් සිදුවන හානිය කුමක්ද, රිදෙන්නේ කාටද, මොහොතකට දෙමළ භාෂාවට ඇහුම්කන් දෙන්නට බැරි තරම් අප‍්‍රියතාවක් ආණ්ඩුවේ නායකයන්ට තිබෙනවාද වැනි ප‍්‍රශ්න අපට මතුවෙයි. පෙනෙන විදියට නිදහස් දිනයේදී අමතර විනාඩි කිහිපයක් වැයකොට දෙමළෙන් ජාතික ගීය ගැයීම වැනි සුළු දෙයක්වත් ජනවර්ග අතර සමගිය වෙනුවෙන් කළ නොහැකි ආණ්ඩුවක් දැන් අපට ඇත.