පවතින තත්වය යටතේ මැතිවරණයට දිනයක් නියම කළහොත්, දේශීය මෙන්ම ගෝලීය සෞඛ්‍යාරක්ෂාවට තර්ජනයක් එල්ලවෙන බව පෙන්වාදෙමින් දෙමළ ජාතික සන්ධානය මැතිවරණ කොමිෂන් සභාව වෙත ලිපියක් යොමු කර ඇත.

අපේ‍්‍රල් 18 වැනිදා යොමුකළ එම ලිපියට දෙමළ ජාතික සන්ධානයේ නායක ආර්. සම්බන්ධන් අත්සන් තබා ඇති අතර ඊට අමතරව දෙමළ ජාතික සන්ධානයේ සාමාජික පක්ෂවල නායකයන් වන මාවෙයි සේනාධිරාජා, ඒ. අඩෙයික්කලනාදන්, ධර්මලිංගම් සිද්ධාර්ථන් යන මහත්වරුන්ද අත්සන් තබා ඇත.

එම ලිපියෙහි මෙසේ සඳහන්ය.

‘නිසිකලට මැතිවරණ පැවැත්වීම අනිවාර්යයෙන්ම ප‍්‍රජාතන්ත‍්‍රවාදයේ මූලික පදනමකි. කිසිසේත් අපේක්ෂා නොකළ තත්වයක් ඇතිවුවහොත් මිස, මේ සම්ප‍්‍රදාය වෙනස් විය නොහැකිය. අවාසනාවකට ලෝකයේ අනෙක් රටවල් මෙන්ම ශ‍්‍රී ලංකාවද එලෙස අපේක්ෂා නොළ තත්වයට මුහුණදෙමින් සිටී. ගෝලීය වසංගතයක් නිසා මහජන සෞඛ්‍ය සහ ආරක්ෂාවට පමණක් නොව ජාතික සහ ගෝලීය ආර්ථිකයට පවා තර්ජන එල්ලවී ඇත.

දේශීය සහ ජාත්‍යන්තර සෞඛ්‍ය විශේෂඥයන් පැහැදිලිවම පෙන්වා ඇත්තේ රෝගය මර්දනය කිරීමට මහජන ඒකරාශීවීම්, අත්‍යවශ්‍ය කටයුතු සහ ආර්ථිකය පවත්වාගැනීමේ කටයුතු සඳහා හැර සිදුවන අනවශ්‍ය මහජන ගමනාගමනය සීමා කළ යුතු බවය. හැම උත්සාහයක්ම යෙදිය යුත්තේ වසංගතය මර්දනය කිරීම සඳහාය.

මේ වන විටත් විශාල බරක් දරමින් සිටින සෞඛ්‍ය අංශ ඉදිරියේදී ඇතිවිය හැකි තත්වයන්ට මුහුණදීම සඳහා උපරිමයෙන් ශක්තිමත් කළ යුතුය.

මෙවැනි තත්වයක් යටතේ ප‍්‍රමුඛ සැලකිල්ල විය යුත්තේ සෞඛ්‍ය, පුද්ගල ආරක්ෂාව සහ ජාතික ආරක්ෂාව යන කාරණා කෙරෙහිය. මෙවැනි වසංගතයක් මැද මැතිවරණයක් පැවැත්වීම කිසිසේත්ම ප‍්‍රජාතන්ත‍්‍රවාදය වෙනුවෙන් බලපෑම් සහගත ක‍්‍රියාවක් නොවේ.

ලෝක සෞඛ්‍ය විශේෂඥයන් පෙන්වා ඇති පරිදි, මෙය ඉදිරි මාස කිහිපයේදී වසංගතයෙන් විශාල තර්ජනයක් පවතිනු ඇත. මැතිවරණයක් පැවැත්වීමෙන් දැවැන්ත මහජන එකතුවීම් සිදුවනු ඇත. මැතිවරණය පවත්වන දිනයේ හෝ දිනවල පමණක් නොවේ, මැතිවරණ ප‍්‍රචාරක කාලසීමාවේදීද එවැනි ක‍්‍රියාකාරකම් සිදුවනු ඇත. වැදගත්, බලපෑම් සහගත මැතිවරණයක් සඳහා මැතිවරණ ප‍්‍රචාරණ කටයුතු අත්‍යාවශ්‍ය වේ.

මේ අනුව මැතිවරණයට දිනයක් නියම කිරිම ශ‍්‍රී ලංකාවේ පුරවැසියන්ගේ සෞඛ්‍යයට පමණක් නොව, දීර්ඝකාලීනව ලෝක ප‍්‍රජාවගේ සෞඛ්‍යයටත් අවදානම් සහගත ක‍්‍රියාවක් වනු ඇත. දේශීය සහ ගෝලීය සෞඛ්‍ය විශේෂඥයන් මැතිවරණයක් පැවැත්වීම ආරක්ෂිත බව ප‍්‍රකාශ කරනතුරු, පවතින තත්වය යටතේ මැතිවරණයක් පැවැත්වීම අතිශ්‍ය භයානක මෙන්ම වගකීම් විරහිත ක‍්‍රියාවක් වනු ඇත.

මෙම තත්වය නිසා අප ගෞරවයෙන් ඉල්ලා සිටින්නේ පවතින තත්වය යටතේ මැතිවරණයට දිනයක් නියම කිරීමෙන් වළකින ලෙසය. දිනයක් නියම කළ යුත්තේ එසේ දිනයක් නියම කිරීම සඳහා දේශීය සහ ගෝලීය සෞඛ්‍ය විශේෂඥයන් සහතිකයක් ලබාදීමෙන් පසුවය.’

අනුරංග ජයසිංහ