අප විසින් අවස්ථා කිහිපයකදී මතු කරනු ලැබූ ප‍්‍රශ්නය ජනතා විමුක්ති පෙරමුණු මන්ත‍්‍රී විජිත හේරත් ජනවාරි 22 දින පාර්ලිමේන්තුවේදී මතුකර තිබුණි. ඒ රටේ ආරක්ෂක ඇමතිවරයා කවුද යන ප‍්‍රශ්නයය.


කැබිනට් මණ්ඩලයක් පත්කර තිබුණත් රටේ ආරක්ෂාව භාර ආරක්ෂක ඇමතිවරයෙකු නැති බව විජිත හේරත් මන්ත‍්‍රීවරයා ප‍්‍රශ්න කළේය. එහිදී ආණ්ඩු පක්ෂයේ සුමේධා ජයසේන අමාත්‍යවරිය ආරක්ෂක ඇමතිවරයෙකු සිටින බවත් ඒ අග‍්‍රාමාත්‍ය මහින්ද රාජපක්ෂ බවත් කීවාය. එයට පිළිතුරු දෙමින් හේරත් මන්ත‍්‍රීවරයා ඒ පිළිබඳව ගැසට් මගින් ප‍්‍රකාශ කර ඇත්තේ කවදාදැයි ප‍්‍රශ්න කරමින් ජයසේන අමාත්‍යවරිය කරුණු නොදන්නා බව කීවේය.

විජිත හේරත් මන්ත‍්‍රීවරයා කිව්වේ කැබිනට් මණ්ඩලය දිවුරුම් දුන් දිනයේ අග‍්‍රාමාත්‍ය මහින්ද රාජපක්ෂ ආරක්ෂක ඇමතිවරයා ලෙසත් දිවුරුම් දුන් බව නිවේදනය කළත් ගැසට් නිවේදනයේ එවැන්නක් සඳහන්ව නැති බවය. රටේ ආරක්ෂක ඇමතිවරයෙකු නොසිටීම බරපතළ කරුණක් බවත් රටේ ආරක්ෂක ඇමතිවරයා කවුද යන්න වහාම ආණ්ඩුව කිවයුතු බවත් ඔහු කිව්වේය.
ආරක්ෂක අමාත්‍යාංශ ලේකම්වරයෙකු සිටින බවත් ආරක්ෂක ඇමතිවරයෙකු නොමැතිව ලේකම්වරයෙකු සිටින්නේ කෙසේදැයි තවදුරටත් විජිත හේරත් මන්ත‍්‍රීවරයා ප‍්‍රශ්න කර තිබුණි.
එමෙන්ම මන්ත‍්‍රීවරයා වැඩිදුරටත් ප‍්‍රශ්න කළේ අග‍්‍රාමාත්‍ය මහින්ද රාජපක්ෂට ආරක්ෂක ඇමතිධුරය නොදුන්නේ ඇයිද යන්නය. යුද්ධය පැවති අවුරුදු දහයක කාලයේදී ආරක්ෂක ඇමතිධුරය දැරුවේ මහින්ද රාජපක්ෂ මහතා බවත්, ඒ අවස්ථාවේ ආරක්ෂක අමාත්‍යාංශ ලේකම්වරයා ලෙස ගෝඨාභය රාජපක්ෂ මල්ලි කටයුතු කළ බවත්ය.


මෙය අයියලා මල්ලිලා අතර ප‍්‍රශ්නයක් බවත්, මල්ලී අයියාට ආරක්ෂක ඇමතිධුරය දෙන්නට බය බවත්, ඒ ගැන සැකයක ඉන්නා බවත්, ඒ සම්බන්ධයෙන් මේ දිනවල කසුකුසුවක් යන බවත් එය දැනගැනීමට කැමති බවත් විජිත හේරත් මන්ත‍්‍රීවරයා වැඩිදුරටත් කියා තිබුණි.


ජනාධිපති ගෝඨාභය රාජපක්ෂ මල්ලි අග‍්‍රාමාත්‍ය මහින්ද රාජපක්ෂ අයියාට පමණක් නොව අමාත්‍ය චමල් රාජපක්ෂ අයියාටත් භය බව ජනවාරි 24 දිනැතිව නිකුත් කර ඇති අතිවිශේෂ ගැසට් පත‍්‍රයෙන් පෙනේ. එම ගැසට් පත‍්‍රය නිකුත් කර ඇත්තේ රාජ්‍ය ආරක්ෂක රාජ්‍ය අමාත්‍යවරයා වන චමල් රාජපක්ෂට ආරක්ෂක අමාත්‍යාංශය යටතේ ඇති විෂයයන් හා කාර්යයන් පැවරීම සඳහාය.
ආණ්ඩුක‍්‍රම ව්‍යවස්ථාවේ ජනාධිපතිවරයාට පැවරී ඇති රාජ්‍ය, නියෝජ්‍ය හෝ කැබිනට් මණ්ඩලයේ නොවන වෙනත් අමාත්‍යවරයෙකුට විෂයන් හා කාර්යයන් පැවරිය හැකිය යන ප‍්‍රතිපාදනය යටතේ ජනාධිපතිවරයා මෙම බලතල පැවරීම සිදුකර ඇත.


ඒ අනුව රාජ්‍ය ආරක්ෂක රාජ්‍ය ඇමතිවරයාට පැවරී ඇත්තේ ආගමන හා විගමන දෙපාර්තමේන්තුව පමණය. එය පසුගිය ආණ්ඩු සමයේදී ආරක්ෂක අමාත්‍යාංශය යටතේ තිබූවක් නොවන අතර මෙවර අමාත්‍යාංශ විෂයන් පැවරීමේදී ජනාධිපතිවරයා එය ආරක්ෂක අමාත්‍යාංශය යටතට ගත්තේය. මේ අනුව ආගමන හා විගමන කටයුතු හා ශ‍්‍රී ලාංකික පුරවැසිභාවයට අදාළ කටයුතු රාජ්‍ය ආරක්ෂක රාජ්‍ය අමාත්‍යවරයාට පැවරේ. ආගාමික හා විගාමික පනතත්, පුරවැසි පනතත් ඒ යටතට වැටේ.


මෙහිදීත් අප මීට පෙර අවස්ථා කිහිපයකදී මතුකළ හා විජිත හේරත් මන්ත‍්‍රීවරයා පාර්ලිමේන්තුවේදී මතුකළ රටේ ආරක්ෂක ඇමතිවරයෙකු නැත යන්න යළි තහවුරු වේ. ඒ කැබිනට් මණ්ඩල සාමාජිකයෙකු ඔහුට පැවරී ඇති බලතල රාජ්‍ය, නියෝජ්‍ය හෝ වෙනත් අමාත්‍යවරයෙකුට පැවරීම යටතේ චමල් රාජපක්ෂ මහතාට මෙම දෙපාර්තමේන්තුව පැවරීම සිදුවී නැති නිසාය. එම පැවරීම සිදුකර ඇත්තේ ඒ සඳහා ජනාධිපතිවරයාට පැවරී ඇති බලතල යටතේය. ඊට හේතුව වශයෙන් නැවතත් අපට පෙන්වන්නේ රටේ ආරක්ෂක විෂය බාර කැබිනට් අමාත්‍යවරයෙකු නොමැති බවය.


පත්කර ඇති 38ක් වන රාජ්‍ය අමාත්‍යවරුන්ට කැබිනට් අමාත්‍යවරුන්ට ලබාදුන් විෂයන් හා කාර්යය වෙන්කර ලබාදෙන ලෙස ජනාධිපති ලේකම් පී.බී. ජයසුන්දර අමාත්‍යාංශ ලේකම්වරුන්ට දැනුම් දුන්නේ පසුගිය දෙසැම්බර් 23 වැනිදාය. එතැන් සිට මේ දක්වා ඉබි ගමනින් වූවත් 16 දෙනෙකුගෙන් සමන්විත කැබිනට් අමාත්‍යවරුන් අතරින් බොහෝ පිරිසක් ඔවුන්ට පැවරුණු විෂයයන් හා කාර්යයන් රාජ්‍ය අමාත්‍යවරුන්ට පවරමින් සිටිති. එහෙත් කැබිනට් අමාත්‍යාංශ 29කට පැවරුණ වගකීම් රාජ්‍ය අමාත්‍යාංශ 38කට පවරන්නේ කෙසේද යන ප‍්‍රශ්නය තිබේ. ඒ අනුව සමහර රාජ්‍ය අමාත්‍යවරුන් දෙදෙනෙකුට එක් අමාත්‍යාංශයක විෂයයන් බෙදා ගන්නට සිදුවී ඇත.


එහෙත් එම ප‍්‍රශ්නය රාජ්‍ය ආරක්ෂක අමාත්‍යාංශයකට නැත. ඒ එම විෂයට ඉන්නේ එක් රාජ්‍ය අමාත්‍යවරයෙකු වන බැවින්ය. ආරක්ෂක ඇමතිවරයෙකුද රටේ නැති තත්වය තුළ සිදුවිය යුතුව තිබුණේ ආරක්ෂක රාජ්‍ය අමාත්‍යවරයාට ජනාධිපතිවරයා ආරක්ෂක අමාත්‍යාංශය යටතේ ඇති විෂයයන් හා කාර්යයන් පැවරීමය. අමාත්‍යාංශයක් සතුව ඇති වැඩිම දෙවන ආයතන සංඛ්‍යාව ඇත්තේ ආරක්ෂක අමාත්‍යාංශයටය. එය දෙවැනි වන්නේ මුදල් අමාත්‍යාංශයේ ආයතන ගණනට පමණය. චමල් රාජපක්ෂ මහතාට ආගමන හා විගමන දෙපාර්තමේන්තුව පැවරීමෙන් පසුත් ආරක්ෂක අමාත්‍යාංශය සතුව ආයතන 30ක් පවතී.


ජනාධිපතිවරයා සේනාධිනායකද වන ගෝඨාභය රාජපක්ෂ මල්ලිය. අගමැතිවරයා මහින්ද රාජපක්ෂ අයියාය. රාජ්‍ය ආරක්ෂක රාජ්‍ය ඇමතිවරයා චමල් රාජපක්ෂ අයියාය. ආරක්ෂක ඇමතිවරයෙකුත් නොමැති රටේ ආරක්ෂක අමාත්‍යාංශයේ වගකීම් අග‍්‍රාමාත්‍ය මහින්ද රාජපක්ෂ අයියාට හෝ ආරක්ෂක රාජ්‍ය අමාත්‍ය චමල් රාජපක්ෂ අයියාට හෝ පැවරීමට ජනාධිපති ගෝඨාභය රාජපක්ෂ මල්ලි බිය වන්නේ ඇයි?


හිටපු ජනාධිපති මෛත‍්‍රීපාල සිරිසේන ඔහු ආරක්ෂක අමාත්‍යධුරය දරද්දී රාජ්‍ය ආරක්ෂක රාජ්‍ය ඇමති රුවන් විජේවර්ධනට සැලකූ ආකාරයටවත් ගෝඨාභය රාජපක්ෂ ජනාධිපතිවරයා චමල් රාජපක්ෂ අයියාට මෙන්ම මහින්ද රාජපක්ෂ අයියාට සලකා නැති බව මේ අනුව පෙනේ. අයියලා මල්ලිලා අතර මේ භය කුමක් නිසාද?