පාස්කු ඉරිදා බෝම්බ ප‍්‍රහාරය සම්බන්ධයෙන් තම රජයන් යටතේ ජනාධිපති කොමිසමක් පත්කර පුළුල් පරීක්ෂණයක් සිදුකරන බව ශ‍්‍රී ලංකා පොදුජන පෙරමුණේ ජනාධිපති අපේක්ෂක ගෝඨාභය රාජපක්ෂ කියූ බව මාධ්‍ය වාර්තා කර ඇත.


එහිදී ගෝඨාභය රාජපක්ෂ වැඩිදුරටත් කියා ඇත්තේ ලොව සුරක්ෂිතම රටවල් අතර ඉහළම ස්ථානයට ශ‍්‍රී ලංකාව පැමිිණෙන පරිදි රටේ ආරක්ෂාව තහවුරු කරන බවයි.


පාස්කු ඉරිදා බෝම්බ ප‍්‍රහාරය සම්බන්ධ ජනාධිපතිවරණ කොමිෂන් කථාව කතෝලික සභාවේ කොළම අගරදගුරු කාදිනල් මැල්කම් රංජිත්ගේ සාපිපාසා නිවීම සඳහා ගෝඨාභය රාජපක්ෂ කියූවක් බව පෙනේ.


පාස්කු ප‍්‍රහාරය පිළිබඳ සිදුකෙරුණ හා සිදුකරන පරීක්ෂණ කාදිනල් හිමි තෘප්තිමත් කළේ නැත. එහිමියන් නොතේරෙන යුක්තියක් ඉල්ලමින් සිටී. සමහරවිට එම යුක්තිය ලැබෙන්නේ අනාගත රාජපක්ෂ පාලනයකින් විය යුතුය. ගෝඨාභය රාජපක්ෂගේ මේ පොරොන්දුව ඒ නිසා විය යුතුය.
පාස්කු ප‍්‍රහාරය සම්බන්ධයෙන් ජනාධිපතිවරයා පරීක්ෂණ කමිටුවක් පත්කළේය. එහි වාර්තාව ප‍්‍රසිද්ධ කළේ නැතත් නීතිපතිවරයාට යොමු කරනු ලැබීය. ඒ ආශ‍්‍රයෙන් නීතිපතිවරයා පොලීසියට දුන් උපදෙස් මත ආරක්ෂක අමාත්‍යාංශයේ හිටපු ලේකම් හේමසිරි ප‍්‍රනාන්දුව හා අනිවාර්ය නිවාඩු යැවූ පොලිස්පති පූජිත් ජයසුන්දරට නඩු පවරා ඇත.


පාස්කු ප‍්‍රහාරය සම්බන්ධ පාර්ලිමේන්තු තේරීම් කාරක සභාවේ වාර්තාවද දැන් නිකුත් වී ඇත. එහි තොරතුරු මාධ්‍යයටද විවෘතය. රාජ්‍ය බුද්ධි ප‍්‍රධානී ඇතුළු නිලධාරීන් ඊට වගකිවයුතු බව එම වාර්තාව සඳහන් කර ඇත. ඊට අමතරව ජනාධිපතිවරයා, අගමැතිවරයා, රාජ්‍ය ආරක්ෂක ඇමතිවරයාට ඒ සම්බන්ධයෙන් වගකීම ඇති බවද සඳහන් කර ඇත. තවදුරටත් එම වාර්තාව නිර්දේශ අටක්ද ඉදිරිපත් කර ඇත.


ජනාධිපති පරීක්ෂණ කමිටුවටත්, පාර්ලිමේන්තු තේරීම් කාරක සභාවටත් එහා ගොස් තවත් ජනාධිපති කොමිසමකින් එම ප‍්‍රහාරය පිළිබඳ මෙතෙක් අනාවරණය වී ඇති තොරතුරුවලට අමතර අප පුදුමයට පත්කරන විශේෂ තොරතුරක් හෙළිදරව් වේ යැයි සිතිය නොහැකිය. එවැනි අප පුදුමයට පත්කරන තොරතුරක් වෙතොත් එවැන්නක් සොයාගත හැක්කේ මෙම වාර්තා දෙකෙන්ම දැනට හෙළිකර ඇති තොරතුරු මත විමර්ශන අංශයක් සිදුකරන විමර්ශනයකදී පමණය.


මේ යථාර්තය ගෝඨාභය රාජපක්ෂ මෙන්ම කාදිනල් හිමිද නොදන්නවා නොවේ. එහෙත් ඉදිරි ජනාධිපතිවරණයේදී කතෝලික ඡුන්ද ගෝඨාභය රාජපක්ෂ වෙත ආකර්ශණය වීම සඳහා පාස්කු ප‍්‍රහාර ආතතිය නොනැසී පවත්වාගෙන යෑම අවශ්‍ය බව ඔවුන් දෙදෙනාම දනී. පරීක්ෂණ ගැන සෑහීමට පත්විය නොහැකි බව සහ තවදුරටත් කතෝලික දේවස්ථාන ඇතුළු ආගමික හා අනෙකුත් ස්ථානවලට ප‍්‍රහාරයක් එල්ලවිය හැකි බවට බුද්ධි අංශ ප‍්‍රධානියෙක් වී කාදිනල් හිමි අනතුරු හඟවන්නේ ඒ නිසාය. එම අනාරක්ෂිත බව තුරන් කර ලොව සුරක්ෂිතම රටක් බවට ශ‍්‍රී ලංකාව පත්කරන බව හා පාස්කු ප‍්‍රහාරයට ජනාධිපති කොමිෂමක් පත් කරන බව තවමත් ඇමෙරිකන් ශ‍්‍රී ලංකා ගෝඨාභය රාජපක්ෂ කියන්නේ ඒ නිසාය.