කථිකාචාර්ය සාමිනාදන් විමල්


දෙමළ ජනතාව ජනාධිපතිවරණයේදී ඡුන්දය වර්ජනය කරනු ඇතැයි කියැවෙන ප‍්‍රචාර ගැන ඔබේ අදහස මොකක්ද?


ඡුන්දය දානවාට වඩා වර්ජනය කිරීම වෙනුවෙන් සංවිධානාත්මක ක‍්‍රියාකාරීත්වයක් ඕනෑ. යම් කෙනෙක්ට ඡුන්දය දාන්න කියලා ජනතාව සංවිධානය කිරීමටත් වඩා ඡුන්ද වර්ජනයක් සඳහා ජනතාව සංවිධානය කිරීම අමාරුයි. වර්ජනය කියන එක අරගල ආයුධයක් හැටියට පාවිච්චි වෙනවානේ. වර්ජනයක් සාර්ථක වෙන්නේ ඒ පසුපස විශාල දේශපාලන බලවේගයක් තිබුණොත් පමණයි. උපවාසයක්, සත්‍යග‍්‍රහයක් වගේ තමයි ඡුන්දය වර්ජනය කිරීමත්. තවත් උදාහරණයක් කීවොත් බදු වර්ජනය කරනවා කියලා කියන්නෙ සල්ලි නැති හින්දා ආණ්ඩුවට බදු නොගෙවා ඉඳීමක් නෙවෙයිනේ. බදු වර්ජනයක් සඳහා ලොකු ක‍්‍රියාකාරීත්වයක් ඕනෑ. මේ වෙලාවේ ඡුන්දය වර්ජනය කිරීමට තරම් දේශපාලන ක‍්‍රියාකාරීත්වයක් සිද්ධවෙන්නේ නැහැ. එවැන්නක් සංවිධානය කළ හැකි ශක්තිමත් දේශපාලන බලවේගයක් තියෙන බවත් පෙනෙන්නේ නැහැ. දෙමළ ඊළාම් අරගලය ඉතාමත් ශක්තිමත් අවස්ථාවක ඇතිවුණ ඡුන්දය නොදී ඉඳීමේ තත්වය වෙනස්ම තත්වයක්. එවැනි නිෂ්ක‍්‍රීය දේශපාලන ප‍්‍රතිචාරයක් සහ ඡුන්දය වර්ජනය කිරීමක් අතරේ වෙනසක් තියෙනවා. මම හිතන්නේ දෙමළ ජනතාව බෝහෝවිට ඡුන්දය දාන්න ඉඩ තියෙනවා.


රාජපක්ෂවරු සමඟ ඉන්න දේශපාලන පක්ෂ ඡුන්ද වර්ජනයක් ගැන කතාකරනවාද?


මේ ඡුන්දයේදී දේශපාලන පක්ෂ හැසිරෙන ආකාරය උතුර හා දකුණ අතර ලොකු වෙනසක් නැහැ. හැමෝම තමන්ට පුළුවන් හැම තනි ඡුන්දයක්ම එකතු කරගන්න බලාපොරොත්තු වෙනවා. කවුරුවත් ඡුන්දය දාන්න එපා කියලා කියන්නේ නැහැ.


එහෙත් ගජේන්ද්‍රකුමාර් පොන්නම්බලම් මහතාගේ පක්ෂය ඡුන්දය වර්ජනය සඳහා ජනතාව පෙළගස්වන බව කියැවෙනවා. ඔහුගේ පක්ෂයට තිබෙන ශක්තිය මොනතරම්ද?


දේශපාලන පක්ෂයක් ගැන කතාකරද්දී එක්කෝ ඒ පක්ෂය පසුපස තියෙන දේශපාලන ශක්තිය දෙස බලන්න ඕනෑ. නැත්නම් ඒ පක්ෂයට මොනතරම් ජනතා නියෝජනයක් තියෙනවාද කියලා බලන්න ඕනෑ. නියෝජනය දෙස බැලූවාම ඔය පක්ෂවලට ලොකු වෙනසක් කරන්න අමාරුයි. මිනිස්සුන්ගෙන් ඡුන්දය දෙන්න කීවාම ඒ පක්ෂවලට යම් තරමින් ඡුන්දය දීලා තියෙනවා. එහෙත් ඔවුන් ඡුන්දය දෙන්න එපායැයි කීවොත් මොනවගේ ප‍්‍රතිචාරයක් ලැබේවිද කියලා දන්නේ නැහැ. තවම ඒ පක්ෂ එහෙම දෙයක් ප‍්‍රසිද්ධියේ කියලාත් නැහැ. සරලව කීවොත් මාධ්‍යවලින් එහෙම දැවැන්ත ප‍්‍රචාරයක් යන්නේ නැහැ.


පාස්කු ඉරිදා ත‍්‍රස්ත ප‍්‍රහාරයෙන් පස්සේ දෙමළ ඡුන්දවල හැසිරීම වෙනස් වෙලා තිබෙන බව ඇතැමුන් කියනවා. සමහරු කීවේ ඒ ප‍්‍රහාරයෙන් පස්සේ උතුරේ ජනතාව හමුදා කඳවුරු ඉල්ලපු බව..


ඒක මොන පදනමක් මත කියනවාද කියලා මම දන්නේ නැහැ. උතුරේ ජනතාව එවැන්නක් කියන බව තක්සේරු කරන්නේ කොහොමද. සමීක්ෂණයක් කරනවාද. නැත්නම් සමස්තයක් හැටියට දකිනවාද කියලා මම දන්නේ නැහැ. ඒක දේශපාලන ඉල්ලීමක් හැටියට මතුවෙලා තියෙන බවත් මම දැක්කේ නැහැ. ඔය වගේ දේවල් සාමාන්‍යයෙන් මැතිවරණ කාලයේදී කියනවා. ඡුන්දදායකයන් විතරක් නෙවෙයි කියන අයම වුණත් ඒ කාරණා බරපතළ විදියට ගණං ගන්නේ නැහැ.


උතුරේ ජනතාව දැන් භෞතික සංවර්ධනයක් වෙනුවෙන් ශක්තිමත් පාලකයෙක් ඉල්ලන බවත් ඇතැමුන් කියනවා..


සංවර්ධනය පිළිබඳ අදහසක් තියෙන බව ඇත්ත. ඒක ඕනෑම තැනක තියෙන අදහසක්. එහෙත් දැන් උතුරට අවශ්‍ය වෙලා තියෙන්නේ ප‍්‍රජාතන්ත‍්‍රවාදී පාලනයක්.


දෙමළ දේශපාලන පක්ෂ එකඟතාව දුන් ඉල්ලීම් දහතුනේ පසුබිම් කතාව මොකක්ද?


ඒ ඉල්ලීම් පසුපස ඉන්නේ දෙමළ ජාතික සන්ධානය නෙවෙයි. එය උතුරේ ක‍්‍රියාත්මක වන සිවිල් සංවිධානවල එකතුවකින් ඇති කරගත් යෝජනාවලියක්. කිසිම දේශපාලන පක්ෂයකට සහයෝගය නොදී, මේ ඉල්ලීම් ඉදිරිපත් කරලා ඒවාට කැමතිවෙන කෙනාට සහයෝගය තීරණය කරන්න කියලා ඔවුන් ඉල්ලනවා. ඒ ඉල්ලීම් 13 කවුරුන් හෝ පිළිගත්තාද නැද්ද, පිළිගන්නේ කවුද කියන එක පැහැදිලි නැහැ. මැතිවරණයට ඉදිරිපත් වූ අපේක්ෂකයන් විශාල ප‍්‍රමාණයක් ඉන්නවා. ඒ අතරින් ප‍්‍රායෝගික යථාර්ථය තුළ රටේ ජනාධිපති විය හැකි පක්ෂ දෙකක් තියෙනවා. අඩුම තරමේ තුන්දෙනෙක් ඉන්න බව හිතන්න පුළුවන්. ඒත් ඒ තුන්දෙනාගෙන් කවුරුවත් මෙය නොපිළිගන්නා තත්වයක් පේනවා. එහෙනම් ඒ අපේක්ෂකයන් තුන්දෙනාවම ප‍්‍රතික්ෂේප කරනවාද.

වෙනත් අපේක්ෂකයෙක් පිළිගත්තොත් එයාට ඡුන්දය දෙනවාද කියන එක අපැහැදිලියි. එතැන ලොකු ගැටලූවක් මතුවෙනවා. ඒක පිළිගන්නා කෙනෙකුට ඡුන්දය දෙන බව කීවොත්, එය පිළිගන්න කෙනාට ජනාධිපති වෙන්නට ශක්‍යතාවක් තිබිය යුතුද නැද්ද කියන එක ප‍්‍රශ්නයක්. එක පැත්තකින් බැලූවොත් ජනාධිපති අපේක්ෂකයෙකුට ඡුන්දය දෙනවාද කියන අදහස, ජනාධිපති වීමට හැකි කෙනෙකුට ඡුන්දය දීමක්.


මේ වෙලාවේ උතුරේ දේශපාලන බලය විවිධ කණ්ඩායම්වලට කැඞී ගිහින්ද?


මේ වෙලාවේ අයිටීඒකේ, ප්ලොට්, ටෙලෝ, ඊපීආර්එල්එෆ් පක්ෂයෝ කොටසක් ඇතුළු පක්ෂ පහක් එකට එකතුවෙලා ඉන්නවා. සැලකිය යුතු නියෝජනයක් තියෙන්නේ ඒ කණ්ඩායමේයි. ඒත් දෙමළ දේශපාලන පක්ෂවල බලය වැදගත් වෙන්නේ ඉදිරි පාර්ලිමේන්තු මැතිවරණයකදීයි.


දෙමළ ජාතික සන්ධානයේ තීන්දුව ප‍්‍රමාද වීමෙන් දෙමළ ජනතාව තනිව තීන්දුවක් ගනීවිද?


ඇත්තටම මිනිස්සු ටීඑන්ඒ එක කියන පක්ෂයට ඡුන්දය දෙන්නේ නැහැ. මේ වගේ වෙලාවක මිනිස්සුන්ගේ අදහස ගැන තක්සේරුවකට ඇවිල්ලා, ඒ අදහස ප‍්‍රකාශ කිරීමයි සාමාන්‍යයෙන් සිද්ධවෙන්නේ. උතුරේ හිටපු මහඇමතිවරයා කියලා තියෙන්නේත් තමන් කැමති අපේක්ෂකයෙකුට ඡුන්දය දෙන්න කියලායි. අප කතාකරන මොහොත වෙද්දීත් දෙමළ ජාතික සන්ධානය තීන්දුව ප‍්‍රකාශ කරලා නැහැ. ඇතැම්විට දෙමළ ජාතික සන්ධානයත් ඒ වගේම යෝජනාවක් කරන්න ඉඩ තියෙනවා. කොහොම වුණත් දෙමළ ජනතාව තමන්ගේ තක්සේරුව මත ඡුන්දය ලබාදේවි.


ජනාධිපතිවරණයේදී සිංහල ජනතාව ඡුන්දය ලබාදීමේදී සැලකිල්ලට ලක් කරන කාරණාවලට වඩා දෙමළ ජනතාවගේ ඉල්ලීම්වල වෙනසක් තියේවිද?


ඊට වඩා විශාල වෙනසක් නැහැ. බොහෝවිට ඒ වගේ තමයි. දැන් ඡුන්ද ධ‍්‍රැවීකරණය වීමක් තියෙන්නේ. කෙසේවෙතත් ලොකු ඡුන්ද ප‍්‍රමාණයක් බෙදී යන බව දකින්න බැහැ. ආකාරය උතුර හා දකුණ අතර ලොකු වෙනසක් නැහැ. හැමෝම තමන්ට පුළුවන් හැම තනි ඡුන්දයක්ම එකතු කරගන්න බලාපොරොත්තු වෙනවා. කවුරුවත් ඡුන්දය දාන්න එපා කියලා කියන්නේ නැහැ.