ජනාධිපතිවරණයේ අවසන් සතිය තුළ යම් දේශපාලන කණ්ඩායමක් බෝම්බ පිපිරුමක් කිරීමේ සැලසුමක් ඇති බවට සැකයක් ඇති බව කියමින් ලැබුණු ට්විටර් පණිවිඩයක් පිිළිබඳව අමාත්‍ය ඉරාන් වික‍්‍රමරත්න විසින් පොලිස්පතිවරයාට යොමු කරන ලද පැමිණිල්ල සම්බන්ධයෙන් මේ වන විට විමර්ශනයක් ආරම්භ කර ඇති බව පොලිස් මාධ්‍ය ප‍්‍රකාශක පොලිස් අධිකාරි රුවන් ගුණසේකර අනිද්දාට පැවසීය.

පැමිණිල්ල පොලිස් මූලස්ථානයට යොමු කර ඇති බවත් පොලිස් මූලස්ථානය මේ පිළිබඳව වාර්තා  කැඳවීමට රාජ්‍ය බුද්ධි සේවයට, පොලිස් විශේෂ කාර්යාංශය  සහ  අපරාධ පරීක්ෂණ දෙපාර්තමේන්තුවට යොමු කර ඇති බවත් ඒ මහතා පැවසීය.

ඉරාන් වික‍්‍රමරත්න මහතා නොවැම්බර් 06 වන දින පොලිස්පතිවරයාට සහ මැතිවරණ කොමිෂන් සභාවට ලිඛිතව දන්වා ඇත. තමන් එම තොරතුරුවල සත්‍ය අසත්‍යතාව නොදන්නා බව ඔහු එහි සඳහන් කර තිබේ. තමන් ඇතුළු මන්ත‍්‍රීවරුන් තිදෙනෙකු වෙත ට්විටර් පණිවුඩයත් මගින් එම තොරතුරු ලැබුණු බව ඔහු එහි සඳහන් කර ඇත.