ආගමන විගමන, පුද්ගලයන් ලියාපදිංචි කිරීම, තොරතුරු තාක්ෂණ නියෝජිතායනය, කාලගුණ විද්‍යා දෙපාර්තමේන්තුව, ජාතික ගොඩනැගිලි පර්යේෂණ ආයතනය, රාජ්‍ය නොවන සංවිධාන ඒ යටතේ.


නව ආණ්ඩුවේ අමාත්‍යවරුන් පත්කිරීමෙන් පසු මාසයකට ආසන්න කාලයක් කෙකර ගගා සිටි අමාත්‍යාංශ විෂයන්ට අදාල ජනාධිපතිවරයාගේ අතිවිශේෂ ගැසට්පත‍්‍රය දෙසැම්බර් 10 දින සහිතව නිකුත් වී තිබේ. ඊට අනුව කැබිනට් අමාත්‍යාංශ 29කට අදාලව විෂය පථයන් හා ආයතන නම්කර තිබේ.

නව ආණ්ඩුවේ කැබිනට් අමාත්‍යවරුන් සංඛ්‍යාව 16ක් වුවද මෙසේ අමාත්‍යාංශ 29කට අදාලව එම ගැසට් පත‍්‍රය නිකුත් වී ඇත්තේ සමහර අමාත්‍යවරුන්ට එකකට වඩා වැඩි අමාත්‍යාංශ ගණනක් පැවරී ඇති නිසාය.

අග‍්‍රාමාත්‍ය මහින්ද රාජපක්ෂට මුදල්, ආර්ථික හා ප‍්‍රතිපත්ති සංවර්ධන අමාත්‍යධූරයට අමතරව බුද්ධශාසන, සංස්කෘතික හා ආගමික කටයුතු අමාත්‍යාංශයද, නාගරික සංවර්ධන, ජල සම්පාදන සහ නිවාස පහසුකම් අමාත්‍යාංශයද යන අමාත්‍යාංශ 3ක් හිමිය.
දිනේෂ් ගුණවර්ධන මහතාට විදේශ සබඳතා අමාත්‍යාංශයට අමතරව නිපුණතා සංවර්ධන, රැුකීරක්ෂා හා කම්කරු සබඳතා යන අමාත්‍යාංශය හිමිය.


පවිත‍්‍රා වන්නිආරච්චි මහත්මියට කාන්තා, ළමා කටයුතු සහ සමාජ ආරක්ෂණ අමාත්‍යාංශයට අමතරව සෞඛ්‍ය හා දේශීය වෛද්‍ය සේවා යන අමාත්‍යාංශයද හිමිය. බන්දුල ගුණවර්ධන මහතාට තොරතුරු සන්නිවේදන තාක්ෂණ අමාත්‍යධූරයට අමතරව උසස් අධ්‍යාපන, තාක්ෂණ නවෝත්පාදන අමාත්‍යධූරයද හිමිය. චමල් රාජපක්ෂ මහතාට මහවැලි, කෘෂිකර්ම, වාරිමාර්ග හා ග‍්‍රාමීය සංවර්ධන අමාත්‍යධූරයට අමතරව අභ්‍යන්තර වෙළඳ, ආහාර සුරක්ෂිතභාවය හා පාරිභෝගික සුබසාධන අමාත්‍යධූරයද හිමිය.

ඩලස් අලහප්පෙරුම මහතාට අධ්‍යාපන අමාත්‍යධූරයට අමතරව ක‍්‍රීඩා හා තරුණ කටයුතු අමාත්‍යධූරයද හිමිය. ජොන්ස්ටන් ප‍්‍රනාන්දු මහතාට මාර්ග මහාමාර්ග අමාත්‍යධූරයට අමතරව වරාය හා නාවික කටයුතු අමාත්‍යධූරයද හිමිය. විමල් වීරවංශ මහතාට කුඩා හා මධ්‍ය පරිමාණ ව්‍යාපාර හා ව්‍යවසාය සංවර්ධන අමාත්‍යධූරයට අමතරව කර්මාන්ත හා සැපයුම් කළමණාකරණ අමාත්‍යධූරයද හිමිය. මහින්ද අමරවීර මහතාට ප‍්‍රවාහන සේවා කළමණාකරණ අමාත්‍යධූරයට අමතරව විදුලිබල හා බලශක්ති අමාත්‍යධූරයද හිමිය. එස්.එම්. චන්ද්‍රසේන මහතාට පරිසර හා වනජීවි සම්පත් අමාත්‍යධූරයට අමතරව ඉඩම් හා ඉඩම් සංවර්ධන අමාත්‍යධූරයද හිමිය. ප‍්‍රසන්න රණතුංග මහතාට කාර්මික අපනයන සහ ආයෝජන ප‍්‍රවර්ධන අමාත්‍යධූරයට අමතරව සංචාරක හා ගුවන් සේවා අමාත්‍යධූරයද හිමිය.

ඒ අනුව මෙම 16 දෙනෙකුගෙන් සමන්විත යැයි කියනු ලැබූ අමාත්‍ය මණ්ඩලයේ 11 දෙනෙකුම අමාත්‍යාංශ කිහිපයක් දරන්නෝ වෙති. මෙම කැබිනට් මණ්ඩලයේ තනි අමාත්‍යාංශයක් පමණක් දරන්නන් වන්නේ නිමල් සිරිපාල ද සිල්වා, ආරුමුගම් තොණ්ඩමාන්, ඩග්ලස් දේවානන්දා, ජනක බණ්ඩාර තෙන්නකෝන් හා රමේෂ් පතිරණ යන අමාත්‍යවරු පමණය.

ඒ අනුව අප තේරුම්ගත යුත්තේ අමාත්‍ය මණ්ඩලය 16ක් යැයි කීවාට අමාත්‍යාශ 29ක් ඇති හෙයින් අමාත්‍යාංශ ලේකම්වරු 29ක්ද ඒවාට අයත් අතිරේක ලේකම්වරු ඇතුළු අනෙකුත් කාර්ය මණ්ඩලද ඔළු ගණනින් කුඩා යැයි කියූ අමාත්‍ය මණ්ඩලය තුළ සැබෑ ලෙසම ක‍්‍රියාත්මක වන බවය. ත‍්‍රිත්ව හා ද්විත්ව අමාත්‍යාංශ හිමි අමාත්‍යවරුන්ට ඒ හැම අමාත්‍යාංශයන්ට වෙන වෙනම නඩත්තු කළ යුතු බව හා පහසුකම් සැපයිය යුතු බව ඒ අනුව පෙනීයයි.
ඒ අතරම තවදුරටත් අප අමතක කළ යුතු නැති කාරණය වන්නේ මෙම කැබිනට් අමාත්‍යවරුන්ට අමතරව රාජ්‍ය අමාත්‍යවරුන් 38ක්ද රාජ්‍ය අමාත්‍යාංශවලට අයත් ලේකම්වරුන්ද කාර්ය මණ්ඩලද ක‍්‍රියාත්මක වන බවය. ඒ අනුව රට තුළ ක‍්‍රියාත්මක වන මුළු අමාත්‍යාංශ සංඛ්‍යාව ඇත්ත වශයෙන්ම 67ක් බව අප තේරුම්ගත යුතුය. ‍

ජනාධිපතිවරණයේ මෙම අමාත්‍යාංශ විෂයන් පැවරීමේ ගැසට් නිවේදනය අනුව කැපීපෙනෙන අමාත්‍යාංශය වන්නේ ආරක්ෂක අමාත්‍යාංශයයි. පසුගිය යහපාලන ආණ්ඩු සමයේ ආරක්ෂක අමාත්‍යාංශ විෂයට අයත් නොවූ ආගමන හා විගමන දෙපාර්තමේන්තුව, පුද්ගලයන් ලියාපදිංචි කිරීමේ දෙපාර්තමේන්තුව, ජාතික මාධ්‍ය මධ්‍යස්ථානය, රාජ්‍ය නොවන සංවිධාන සඳහා වන මහාලේකම් කාර්යාලය, ශ‍්‍රී ලංකා තොරතුරු තාක්ෂණ නියෝජිතායනය හා ඒ යටතේ ඇති ආයතන, ශ‍්‍රී ලංකා පරිගණක හදිසි ප‍්‍රතිචාර සංසදය, කාලගුණ විද්‍යා දෙපාර්තමේන්තුව හා ජාතික ගොඩනැගිලි පර්යේෂණ ආයතනය මෙම ගැසට් පත‍්‍රය අනුව ආරක්ෂක අමාත්‍යාංශ විෂය පථය යටතට ගෙන ඇත.
එමෙන්ම අග‍්‍රාමාත්‍ය මහින්ද රාජපක්ෂගේ මුදල්, ආර්ථික හා ප‍්‍රතිපත්ති සංවර්ධන අමාත්‍යාංශය යටතට ශ‍්‍රී ලංකා මහජන උපයෝගිතා කොමිෂන් සභාව, සේවක භාරකාර අරමුදල ( ඊටීඑෆ්* ගෙන ඇත. සේවක භාරකාර අරමුදල මෙතෙක් ක‍්‍රියාත්මක වූයේ කම්කරු අමාත්‍යාංශය යටතේය.


ශ‍්‍රී ලංකා මහජන උපයෝගිතා කොමිසම යනු විදුලිබල ක්ෂේත‍්‍රයේ නියාමක ආයතනය වන අතර මීට දින කිහිපයකට පෙර විදුලිබල හා බලශක්ති අමාත්‍ය මහින්ද අමරවීර මහජන උපයෝගිතා කොමිසමට උපදෙස් දී තිබුණේ එම කොමිසම ලංකා විදුලිබල මණ්ඩලයට එරෙහිව පවරා ඇති නඩුව ඉල්ලා අස්කරගන්නා ලෙසය. එකම අමාත්‍යාංශය යටතේ ඇති ආයතන දෙකක් නඩු කිවයුතු නැති බව එහිදී අමරවීර අමාත්‍යවරයා කියා තිබුණි.


මෙම ගැසට් පත‍්‍රය අනුව අමරවීර අමාත්‍යවරයාට ඔහුගේ එම උපදෙස් ඉල්ලා අස්කරගැනීමට සිදුවනවා ඇත. මහජන උපයෝගිතා කොමිසම ලංකා විදුලිබල මණ්ඩලයට එරෙහිව නඩුකීම අග‍්‍රාමාත්‍ය මහින්ද රාජපක්ෂගේ මුදල්, ආර්ථික හා ප‍්‍රතිපත්ති සංවර්ධන අමාත්‍යාංශය විදුලිබල හා බලශක්ති අමාත්‍යාංශයට එරෙහිව කියන නඩුවක් ලෙස සලකන්නට සිදුවනු ඇත.


එමෙන්ම අග‍්‍රාමාත්‍ය මහින්ද රාජපක්ෂ යටතේ ඇති බුද්ධශාසන, සංස්කෘතික හා ආගමික කටයුතු අමාත්‍යාංශය යටතට එස්.ඩබ්.ආර්.ඞී. බණ්ඩාරණායක ජාතික අනුස්මරණ පදනමත්, ජේ.ආර්. ජයවර්ධන කේන්ද්‍රයත් පවරාගෙන ඇත. මීට පෙර මෙම පදනම හා කේන්ද්‍රය අමාත්‍යාංශ විෂයන් යටතේ ගැසට් කර තිබූ ආයතන දෙකක් නොවීය.


ජනාධිපතිවරයා නිකුත් කර ඇති අමාත්‍යාංශ විෂයන්ට අදාල ගැසට්පත‍්‍රයේ ඇති බරපතලම කාරණය වන්නේ ආරක්ෂක අමාත්‍යාංශය යන විෂයය. ජනාධිපතිවරයාම ගැසට් මගින් ප‍්‍රකාශයට පත්කර ඇති 16 දෙනෙකුගෙන් සමන්විත අමාත්‍ය මණ්ඩලය තුළ ආරක්ෂක විෂයභාර අමාත්‍යවරයෙක් නැත. ඉන්නේ ආරක්ෂක විෂයට අයත් ආරක්ෂක රාජ්‍ය අමාත්‍යවරයෙක්ය. එම රාජ්‍ය ඇමතිවරයා චමල් රාජපක්ෂය. මෙම ගැසට්ටුව තුළ සඳහන් ආරක්ෂක අමාත්‍ය යන්න ඒ අනුව චමල් රාජපක්ෂ මහතා නොවේ. තවම කිසිදු රාජ්‍ය ඇමතිවරයෙකුට කැබිනට් අමාත්‍යාංශ සතු කාර්යයන් හා ආයතන රජයේ ගැසට් පත‍්‍ර මගින් ප‍්‍රකාශයට පත්කර ලබාදී නැත.


ජනාධිපති ගෝඨාභය රාජපක්ෂගේ නව ආණ්ඩුවේ කැබිනට් මණ්ඩලය පත්කළදා සිටම මෙම ප‍්‍රශ්නය තිබුණි. එම කැබිනට් මණ්ඩලයේ ආරක්ෂක ඇමතිවරයෙක් සිටියේ නැත. ශ‍්‍රී ලංකා ප‍්‍රජාතාන්ත‍්‍රික සමාජවාදී ජනරජයේ ආණ්ඩුක‍්‍රම ව්‍යවස්ථාව අනුව වත්මන් ශ‍්‍රී ලංකා ජනාධිපති ගෝඨාභය රාජපක්ෂ රාජ්‍යයේ ප‍්‍රධානියා, කැබිනට් මණ්ඩලයේ ප‍්‍රධානියා හා සේනාධිනායකවරයා පමණය. ඔහුට කිසිදු අමාත්‍යාංශයක් දැරීමේ අයිතිය නැත. 19 වැනි ආණ්ඩුක‍්‍රම ව්‍යවස්ථා සංශෝධනය අනුව ආරක්ෂක, මහවැලි සංවර්ධන හා පරිසර යන අමාත්‍යාංශ තුන දැරීමේ හැකියාව හිටපු ජනාධිපති මෛත‍්‍රීපාල සිරිසේනට තිබුණි. ඒ එම සංශෝධනය සම්මත කිරීමේදී ඇතිකර තිබූ ව්‍යතිරේඛයක් මතය. හිටපු ජනාධිපතිවරයාගේ ධුර කාලයෙන් පසු එය අහෝසිවී ඇත. ඒ අනුව වත්මන් ජනාධිපති ගෝඨාභය රාජපක්ෂට කිසිදු අමාත්‍යාංශයක් දැරීමේ හැකියාව නැත.


කරුණු එසේ වුවද ජනාධිපති ගෝඨාභය රාජපක්ෂගේ අමාත්‍යාංශ විෂයන්ට අදාල ගැසට්පත‍්‍රය තුළ අමාත්‍යවරයෙකු නැති ආරක්ෂක අමාත්‍යාංශය නම් අමාත්‍යාංශයක් අපට තිබේ. අමාත්‍යවරයෙකු නැතිවූවාට ආරක්ෂක අමාත්‍යාංශය නම් වූ භෞතික ආයතනයක්ද, ආයතනික ව්‍යූහයක්ද, විශ‍්‍රාමික මේජර් ජෙනරාල් කමල් ගුණරත්න අමාත්‍යධූරය දරණ අමාත්‍යාංශයක්ද රටේ තිබේ.


මෙම ගැසට් නිවේදනය අනුව ආරක්ෂක අමාත්‍යාංශය යටතට පත්කර ඇති ආයතන සංඛ්‍යාව 31කි. එය මෙම ගැසට් පත‍්‍රය යටතේ අමාත්‍යාංශයක් යටතට පත්කර ඇති දෙවන වැඩිම ආයතන ප‍්‍රමාණයය. වැඩිම ආයතන ප‍්‍රමාණයක් ඇත්තේ අග‍්‍රාමාත්‍ය මහින්ද රාජපක්ෂගේ මුදල්, ආර්ථික හා ප‍්‍රතිපත්ති සංවර්ධන අමාත්‍යාංශය යටතේය.


එමෙන්ම ගැසට්පත‍්‍රය අනුව ආරක්ෂක අමාත්‍යාංශය ක‍්‍රියාත්මක කළයුතු නීති හා අණපනත් සංඛ්‍යාව 37කි. බරපතලම ප‍්‍රශ්නය වන්නේ මෙම අණපනත් ක‍්‍රියාත්මක කිරීමේ ආයතන අයත් ආරක්ෂක අමාත්‍යාංශයේ අමාත්‍යවරයා කවුද යන්නය. ආරක්ෂක අමාත්‍යාංශ ලේකම් විශ‍්‍රාමික මේජර් ජෙනරාල් කමල් ගුණරත්න එම අමාත්‍යාංශයේ කටයුතු පවත්වාගෙන යෑම සඳහා උපදෙස් ලබාගන්නේ කාගෙන්ද යන්න හා ඔහුට එම කටයුතු සඳහා උපදෙස් ලබාදෙන්නේ කවුද යන්නය.