අනුරංග ජයසිංහ


ඔක්තෝබර් 23 වැනිදා පාර්ලිමේන්තුවට ඉදිරිපත් කළ කෝප් කමිටු වාර්තාවෙහි ආයතන 23ක් ගැන කරුණු ඇත. විවිධාකාර ගණුදෙනු ආදිය පිළිබඳ එහි සඳහන්ය. ඒ අතර ජනාධිපතිවරයා යටතේ තිබුණු මහවැලි සංවර්ධන අධිකාරියද තිබේ. අනුන්ගේ වංචා ¥ෂණ හා නාස්තිය ගැන හඬ නඟමින්, තමන් නිවැරදි බව පෙන්වන්නට උත්සාහ කරන ජනාධිපතිවරයා යටතේ තිබුණු ආයතනවලම විශාල පාඩු ගෙනදෙන ගණුදෙනු සිදුවී ඇති බව කෝප් වාර්තාව නිරීක්ෂණය කරද්දී පෙනී යයි.


බිලියන ගණනක පාඩුවක් නොවන මිලියන ගණනක පාඩුවක් වුවත් අප මේ කියන ගණුදෙනුව ලංකාවේ විගණන වාර්තා ආදිය නිරීක්ෂණය කරද්දී නිතර දකින්නට ලැබෙන ප‍්‍රවණතාවයකට අයත් වෙයි. ( ලංකාවේ ආයතනවල හැටියට මිලියන ගණන් පාඩු සිදුවීම් පුංචි පහේ ඒවාය. කම්පනයක් ඇතිවන්නේ බිලියන ගණනක පාඩු සිද්ධවුණොත්ය.*


දක්ෂිණ අධිවේගී මාර්ගයේ මාර්ග සංවර්ධන ව්‍යාපෘතිය සඳහා මහවැලි කලාපවලින් පස් කපා ඉවත් කිරීම සඳහා බලපත‍්‍ර ලබාදීමේදී පස් කියුබ් 500,000 ක් සැපයීමට වලව බල ප‍්‍රදේශයේ මයුරපුර කොට්ඨාශයේ මහවැලි අධිකාරිය සතු ඉඩම් අක්කර 671ක් පුද්ගලයන් 29 දෙනෙකුට පමණක් ලබාදීමට තීන්දු කර ඇත. කෙසේවෙතත් එය ලබාදී ඇත්තේ කොන්ත‍්‍රාත්කරුවන් දෙදෙනෙකුට පමණි. එම කොන්ත‍්‍රාත්කරුවන් කටයුතු කළ ආකාරය ගැන කෝප් කමිටුවට ලැබුණු වාර්තාවක මෙසේ සඳහන් වෙයි.


‘දක්ෂිණ අධිවේගී මාර්ග ව්‍යාපෘතිය සඳහා ඇතිවූ පස් අවශ්‍යතාවය මත කඩිනමින් පස් සැපයීම් සිදුකළ යුතු වූ බැවින්, ශ‍්‍රී ලංකා මහවැලි අධිකාරියේ වලව කලාපයේ ඉඩම් අක්කර 671ක් ඉල්ලූ‍ම් ලාභීන් 29 දෙනෙකු අතර බෙදාදීමට සැලසුම් කර තිබුණි. එහෙත් ටී.ඞී. ගුණරත්න පුද්ගලික සමාගම හා ග්ලෝබල් ලංකා ටෙක්නොලොජි පුද්ගලික සමාගම යන ඉල්ලූ‍ම්කරුවන් දෙදෙනා සඳහා පමණක් 2016 ඔක්තෝබර් මස 10 වන දින ඇඹිලිපිටියේදී ඇති කරගන්නා ලද බදු ගිවිසුම් ප‍්‍රකාරව පිළිවෙලින් සැලසුම් අංක අ.භු.පි. 04 කැ.අ.බි. 8726 වශයෙන් දක්වා ඇති ශේෂ ප‍්‍රදේශයෙන් හෙක්ටෙයාර් 3.2375ක් හා හෙක්ටෙයාර් 16.9968 ක් වන ඉඩම් ප‍්‍රමාණයක් පස් කැපීම සඳහා ලබාදී ඇත.


පස් කැපීමට යෝජනා වී ඇති ඉඩම්වල ස්ථානය හඳුනාගැනීමට විධිමත් සැලසුමක් නොතිබූ බැවින් ඉල්ලූ‍ම්කරුවන් ඉල්ලූ‍ම් කරනු ලබන ස්ථානය හඳුනා ගැනීමට ඉල්ලූ‍ම්කරුවන් මගින්ම අදාල ස්ථාන මැන සැලසුම් සකස් කර ඇත. එම අනුරේඛන පාදක කරගනිමින් අනෙකුත් රේඛීය ආයතනවල නිර්දේශය ලබාගැනීම සඳහා යොමු කර ඇත.‘


පස් කැණීම සඳහා නිර්දේශ ලබාදුන් ටී.ඞී. ගුණරත්න පුද්ගලික සමාගම හා ග්ලෝබල් ලංකා ටෙක්නොලොජි පුද්ගලික සමාගම යන අය විසින් කපා ඉවත් කරන ලද පස් වෙනුවෙන් ශ‍්‍රී ලංකා මහවැලි අධිකාරියට රුපියල් 3,640,000 ක් හා රුපියල් 2,680,000 ක් ගෙවා ඇත. එහෙත් කැණීම් කළ පස් ප‍්‍රමාණය ගැන මැනුමක් නොතිබුණූ බැවින් නිශ්චිතව කපන ලද පස් කියුබ් ප‍්‍රමාණය හඳුනාගැනීමට නොහැකි වූ බව මහවැලි අධිකාරිය පවසයි. ඇත්තෙන්ම කැපූ පස් ප‍්‍රමාණය අනුව අය කරගත යුතු මුදල මීට වඩා බොහෝ වැඩි විය හැකිය. මහවැලි අධිකාරිය ඉහත ලිපියෙන් දන්වා ඇත්තේ එම පාඩුව අය කරගැනීමට කටයුතු කරමින් පවතින බවය.


‘කැණීම් කරන ලද පස් කියුබ් ප‍්‍රමාණය කොතෙක්ද යන්න ගණනය කිරීම පිළිබඳව නිසි ක‍්‍රමවේදයක් නොතිබුණු බැවින්, මිනුම් දෙපාර්තමේන්තුව විසින් සිදුකරනු ලබන ඒකාබද්ධ මිනුම් පරීක්ෂණයෙන් අනාවරණ්‍ය වී ඇති පරිදි කියුබ් 3000 ඉක්මවා කපන ලද පස් කියුබ් ප‍්‍රමාණය සඳහා ගාස්තු අයකිරීමට මේ වන විට නීති මගින් කටයුතු කර ඇති අතර, එහි ආරම්භක පියවරක් වශයෙන් ටී.ඞී. ගුණරත්න යන අය වෙත අධ්‍යක්ෂ ජෙනරාල් රුපියල් 66,959,200 ක මුදල ගෙවන ලෙසට දැනුම් දී ඇත. අනවසරයෙන් කරන ලද පස් කියුබ් 25,338 ප‍්‍රමාණයට අදාල මුදලද ඉහත මුදල තුල ඇතුලත්ව ඇත.


ග්ලෝබල් ලංකා ටෙක්නොලොජි පුද්ගලික සමාගම වෙතක ඉහත ඒකාබද්ධ මිනුම් පරීක්ෂණයෙන් අනාවරණය වී ඇති ඉවත් කරන ලද පස් කියුබ් ප‍්‍රමාණයට අනුව ඉඩම් පරිහරණ ගාස්තු නොගෙවා ඇති පස් කියුබ් 58,487 ක් සඳහා රුපියල් 32,752,720 ගෙවන ලෙස දැනුම් දී ඇත.‘


බලපත‍්‍රයට අනුව පමණක් ගෙවීම් කිරීමට තීරණය කර ඇති බවත් ඒ සඳහා අදාල සැපයුම්කරුවන් එකඟ නොවූ නිසා ඒ සම්බන්ධයෙන් නීතිමය පියවර ගෙන ඇති බවත් එම සිදුවීමට අදාල නිලධාරීන්ගේ සේවය අත්හිටුවා ඇති බවත් මහවැලි සංවර්ධන අධිකාරියේ සභාපතිවරයා පෙන්වාදී තිබේ. ඔවුන්ට විරුද්ධව සූරියවැව පොලිස් ස්ථානයේ පැමිණිලි ගොනු කළත් ඒවා විභාග කිරීමට ඒ පාර්ශ්වයන් පැමිණ නැත.


ඉහත කරුණු අනුව ආණ්ඩුවට ලැබිය යුතු මිලියන ගණනක ගෙවීම් සිදු නොකර, එම පෞද්ගලික සමාගම් දෙක පස් කැපීම් සිදුකර තිබෙන බව පෙනී යයි. සමාගම් දෙකම අඩුවෙන් ගෙවා ඇති මුදල මිලියන 99.7ක් හෙවත් මිලියන 100කට ආසන්න මුදලකි. කෝප් කමිටුව මෙලෙස පෙන්වාදී ඇත්තේ එක් පෞද්ගලික සමාගමකින් අය විය යුතු මුදලය. මෙවැනි අවස්ථාවලදී පෞද්ගලික සමාගම්වලින් රජයට අයවිය යුතු මුදල් ලබා නොදී මඟහරින අවස්ථා බොහොමයක් පසුගිය වසරවල විගණකාධිපති වාර්තා සහ කෝප් කමිටු වාර්තාවල සඳහන් වෙයි. ඒ සියල්ලෙන් සිදුවන පාඩුව අතිමහත්ය. මෙයාකාරයෙන් ආණ්ඩුව සමඟ ගණුදෙනු කිරිමට හුරුවූ ආයතන සිටී. බෝහෝවිට ඒවායේ හිමිකරුවන් ආණ්ඩු බලය හොබවන දේශපාලන බලාධිකාරයේ හිතමිතුරන්ද වෙයි. ඒ නිසාම ඔවුන් ආණ්ඩුවේ නීතිරීති හා කළ යුතු ගෙවීම් පැහැරහරියි. ජනාධිපතිවරයා යටතේ තිබෙන ආයතනවලද ඒ තත්වයෙහි වෙනසක් නැත.