මැතිවරණ කොමිෂන් සභාවේ නියෝග නොතකා ආණ්ඩුකාරවරුන් තිදෙනෙකු ශ‍්‍රී ලංකා පොදුජන පෙරමුණේ බලයලත් දිස්ත‍්‍රික් නියෝජිතයන් ලෙස පත්කර ඇති බව මැතිවරණ කොමිෂන් සභාවේ ආරංචිමාර්ග පැවසීය.

නැගෙනහිර පළාත් ආණ්ඩුකාර ශාන් විජයලාල් ද සිල්වාගාල්ල දිස්ත‍්‍රික්කයේ බලයලත් නියෝජිතයා ලෙසද, උතුරුමැද පළාත් ආණ්ඩුකාර සරත් ඒකනායක මහනුවර දිස්ත‍්‍රික්කයේ බලයලත් නියෝජිතයා ලෙසද, වයඹ පළාත් ආණ්ඩුකාර පේෂල ජයරත්න පොළොන්නරුව දිස්ත‍්‍රික්කයේ බලයලත් නියෝජිතයා ලෙසද පත්කර ඇත.

මේ පිළිබඳව මැතිවරණ කොමිෂන් සභාව ජනාධිපතිවරයාට හා අදාල දේශපාලන පක්ෂවලට අවවාද කර ඇති බව එම ආරංචි මාර්ග පවසයි.

ඊට අමතරව බස්නාහිර පළාත් ආණ්ඩුකාර ඒ.ජේ.එම්. මුසම්මිල් ප‍්‍රසිද්ධියේ ශ‍්‍රී ලංකා පොදුජන පෙරමුණේ දේශපාලන වේදිකාවට ගොඩවී කටයුතු කිරීම පිළිබඳවද මැතිවරණ කොමිෂන් සභාව අවවාද කර ඇත. කොමිසම දැනුම් දී ඇත්තේ මැතිවරණයට ඍජුව සම්බන්ධ වී කටයුතු කරන්නේ නම් ආණ්ඩුකාර ධුරවලින් තාවකාලිකව නිවාඩු ලබාගන්නා ලෙසය. කෙසේ වෙතත් එම නියෝග නොතකා ආණ්ඩුකාරවරුන් තම ධූරයේ රැුඳී සිටිමින් දේශපාලන කටයුතුවල යෙදෙන බව වාර්තා වෙයි.