ඉඳුවර බණ්ඩාර

කොළඹ මහ නගර සභාවට පසුගිය ජනවාරියේදී තේරී පත්වූ කි‍්‍රෂ්ණපිල්ලේ තිරුබනන්දන් හෙවත් ‘‘කි‍්‍රෂ්ණා’’ වෙඩි තබා ඝාතනය කරනු ලබන්නේ ජුලි 9 වැනිදා උදැසනය. ඒ ඔහුට අයත් කොළඹ, කොච්චිකඬේ, හෙට්ටිවීදිය අසල පිහිටි කඩය තුළදීය.

ඔහුව ඝාතනය කළේ ඇයි හා කවුද යන්න සෙවීම ශී‍්‍ර ලංකා පොලීසියේ විමර්ශන අංශවලට භාර කටයුත්තක්ය. එමෙන්ම එම අපරාධකරුවන් කවුරුන්දැයි සොයා නීතිය හමුවට පමුණුවා අධිකරණයෙන් දඬුවම් ලබාදීමද පොලිසියට අයත් කාර්යයක්ය. නොඑසේව එම අපරාධය සඳහා යොදාගත් ගිනි අවි හෝ ඒවාහි කොටස් පෙන්නීමට කැළෑබද පෙදෙස් හෝ වෙනත් ස්ථානවලට ගෙන ගොස් අපරාධකරුගේ ප‍්‍රහාරයෙන් බේරීම සඳහා ආත්මාරක්ෂාවට වෙඩි තබා සැකකරු ඝාතනය කිරීම පොලිසියේ රාජකාරිය නොවේ.

ඝාතනයට ලක්වූ කොළඹ නාගරික මන්තී‍්‍රවරයා සම්බන්ධයෙන් නිල වශයෙන් නොවුවත් මාධ්‍යයට යම් චරිත සහතිකයක් පොලිසිය විසින් මේ වන විට නිකුත් කර තිබේ. ඒ මඟින් කියවෙන්නේ කේරල ගංජා ජාවාරමට මොහුගේ සම්බන්ධයක් ඇති බවට, විශ්වාසය පළකරන බවය. ඔහු මීට පෙර ගංජා සම්බන්ධයෙන් රිමාන්ඞ් බන්ධනාගාර ගතව සිටි අයෙකු බවය.

ශී‍්‍ර ලංකා පොලිසියේ එම චරිත සහතිකය පසෙක තැබූ විට කි‍්‍රෂ්ණපිල්ලේ කිරුබනන්දන් හෙවත් මේ කි‍්‍රෂ්ණා කවුද? එම ප‍්‍රදේශයේ තතු දත් අයට නම් ඔහු මඩකළපුව ප‍්‍රදේශයේ පුද්ගලයෙක්ය. එල්ටීටීඊ සංවිධානයේ සන්නද්ධ අංශයේ නායකයාව සිට පසුව ශී‍්‍ර ලංකා නිදහස් පක්ෂයේ උපසභාපතිවරයෙකු ලෙස පිදුම් ලබා නියෝජ්‍ය ඇමතිවරයෙකු දක්වා ගිය කරුණා අම්මාන් සමග සබඳතා පැවති පුද්ගලයෙක්ය.
දේශපාලනය ගැන උනන්දුවක්, මෙවර කොළඹ නගර සභාවට තේරී පත්වීමට පෙරම ඔහු තුළ තිබුණේය. පසුගිය වරද ඔහු ස්වාධීන කණ්ඩායමකින් කොළඹ නගර සභාවට තරග කළේය. එහෙත් ආසනයක්වත් දිනා ගැනීමට හැකියාව ලැබුණේ නැත. එහෙත් ඔහු ‘නවෝද්‍යා තරුණ පදනම’ හා ‘නවෝද්‍යා ජනතා පදනම’ යනුවෙන් නම් හදාගෙන පසුගිය අවුරුදු කිහිපය පුරා අත දිග හැර වියදම් කළේය.

ඉන්දියාවෙන් ගායක ගායිකාවන් ඇතුළු තරු ගෙන්වා සංගීත සංදර්ශන අවුරුදු උත්සව ආදිය කළේය. මාස් පතා වියළි ආහාර බෙදා දුන්නේය. සමහරුන්ට මාසික මුදල් දීමනා ලබාදුන්නේය. පාසල් දරුවන්ට පොත්පත් බෙදා දුන්නේය. බොහෝ සුභසාධන වැඩ ඔහු කළේය.
ඒවා සඳහා වියදම් කරනවා යැයි පෙනුණ මුදල අතිවිශාලය. එහෙත් ඒ සඳහා ඔහුට මුදල් ලැබෙන්නේ කොයින්ද යන පැනය සාමාන්‍ය මිනිසුන්ට පවා තිබුණේය. මන්ද බැලූබැල්මට ඔහුට තිබුණේ ඔහුව වෙඩි තබා ඝාතනය කරන අවස්ථාවේ සිටි කුඩා කඩය පමණය. එහෙත් එම පැනය ශී‍්‍ර ලංකාවේ පොලිසියට පැන නැගී නොතිබුණ බව නම් සහතිකය. නොඑසේ නම් ඔහුට මුදල් එන ආකාරය පිළිබඳ පොලීසිය විමර්ශන කරන්නට තිබුණේ මීට කාලයකට පෙරය.

කෙසේ වෙතත් ස්වාධීන කණ්ඩායම් අංක දෙක යටතේ මෙවර කොළඹ මහ නගර සභාවට තේරී පත්වන්නට ඔහුට හැකිවිය. එම ස්වාධීන කණ්ඩායමට ඔහුට අමතරව තවත් එක් මන්තී‍්‍රධුරයක්ද ලැබිණි. එයට තේරී පත්වූයේ එස්. ධනංජය පීරිස් නැමැති සූප‍්‍රකට ‘කුඩුලාල්’ යනුවෙන් හදුන්වන ලාල් පීරිස්ගේ පුත‍්‍රයාය.

මේ ලාල් පීරිස්ගේ පුත‍්‍රයාගේ නම කොළඹ මහනගර සභාවට නාමයෝජනා බාරදෙන දින උදෑසන දක්වාම තිබුණේ එක්සත් ජාතික පක්ෂයේ උතුරු කොළඹ ලැයිස්තුවේය. අවසන් මොහොත වන තෙක් ඔහුගේ නම ඉවත් කිරීමට උතුරු කොළඹ එක්සත් ජාතික පක්ෂ සංවිධායක රවී කරුණානායක පක්ෂයේ මහලේකම් ඇතුළු නාම යෝජනා කමිටුවලට ඉඩදී තිබුණේ නැත. පසුව එම නම ඉවත් වී තිබුණේ පක්ෂ නායක රනිල් වික‍්‍රමසිංහගේ මැදිහත්වීමෙනි.

ඒ ආකාරයට නාමයෝජනා දින උදෑසනම ඉවත්වෙන නම සඳහා අවස්ථාව ඝාතනයට ලක්වූ කි‍්‍රෂ්ණාගේ ස්වාධීන කණ්ඩායමෙන් ලැබී තිබුණි. සම්බන්ධකම් අතර සම්බන්ධතාව ගොඩනැ`ගී තිබුණේ එයාකාරයටය.

කි‍්‍රෂ්ණාට නම් දිගු දේශපාලන ගමනකට සිහින තිබූ බව මෙවර මැයි දිනයෙන්ද ඔහු පෙන්නුම් කර තිබුණේය. ඒ විශාල පිරිසක් සම`ගින් කොළඹ මට්ටක්කුලිය විස්ට්වයික් පිටියේ සිට කොච්චිකඬේ ජිත්තුපිටිය වීදිය දක්වා පෙළපාළියකින් ගොස් මැයි දින සැමරුමක් පැවැත්වීම මගින්ය. ඊට තිත තැබුවේ දේශපාලන විරුද්ධවාදීන් නම් නොවන බව පැහැදිලිය.