පි‍්‍රයදර්ශනි ආරියරත්න

පසුගිය ශතකයේ අග භාගයේ භාවනාව, ව්‍යායාම හා ආධ්‍යාත්මික දියුණුව එකට සංකලනය කරන ලද ෆලූ‍ං ගොං නොහොත් ෆලූ‍ං ඩාෆා නමැති සම්ප‍්‍රදායයක් චීනයේ ජනප‍්‍රිය වන්නට විය. එය බෞද්ධ දර්ශනයේ සාරයන්ද කැටිකර ගත් අහිංසාවාදී ව්‍යාපාරයක් වූ අතර ශීඝ‍්‍රයෙන් ව්‍යාප්ත විය. එහි පදනම වූයේ සත්‍යවාදී බව, දයානුකම්පාව හා ඉවසා දරාසිටීමයි. එය තරමක් දුරට යෝග ව්‍යායාම හා සමානත්වයක් ගන්නා අතර තම තමාගේ ආධ්‍යාත්මික දියුණුව හා ශරීර සුවතාවද සලසා ගත හැකි මාර්ගයකි. 1999 වසරේදී ෆලූ‍ං ඩාෆා චීනයේ තහනම් කරන ලද අතර ඉන් පසුව එය අනුගමනය කරනු ලැබූවෝ දහස් ගණනක් සිරගත කරන ලදහ. සමහර අවස්ථාවල අවයව ලබාගැනීම වැනි ක‍්‍රෑර වදබන්ධනවලට ලක් කර මරා දමා ඇත. (ලොව පුරා මේ වන විට ලක්ෂ ගණනක පිරිසක් ෆලූ‍ං ඩාෆා අනුගමනය කරති.)
චීනයේ පවතින හා පැවතිය හැකි එකම ව්‍යාපාරය චීන මාදිලියේ කොමියුනිස්ට්වාදය පමණි. ඒ එහි අභ්‍යන්තර ප‍්‍රජාතන්ත‍්‍රවාදයේ තරමය.
ලෝක බෞද්ධ නායකයෙකු වන දලයි ලාමා යහපාලන රජය බලයට පත් වීමෙන් පසුව ශ‍්‍රී ලාංකික බෞද්ධ ජනතාවගේ හා සංඝ‍යා වන්සේලාගේ ඉල්ලීම මත සංචාරය සඳහා ලංකාවට වැඩමවන්නට උත්සාහ කෙරිණි. ජනාධිපතිතුමාටද සිය ජයග‍්‍රහණයෙන් පසුව එතුමා ලංකාවට වැඩම කරවීමට අවශ්‍යතාවක් තිබුණු බව පෙනේ. චීනය එයට විරුද්ධ විය. ඒ අප වැනි රටවල රාජ්‍යතාන්ත‍්‍රික නිදහසට චණ්ඩි පාට් දමන ආකාරයයි. එහෙත් එම කාලයේම පාප් වහන්සේගේ ශ‍්‍රී ලංකා සංචාරයට ඔවුන් විරුද්ධ නොවූ අතර එතුමා ලංකාවට වැඩියේය.
චීනයේ ප‍්‍රධාන වෙළෙඳ සහකරුවන් වන බටහිර රටවලට වත් ඉන්දියාව වැනි බලවත් රටවල්වලට වත් චීනය එවැනි තහනම් පනවන්නේ නැත. දැසිදස්සන් බැලයන් වහලූන් ලෙස අප රටද හවුලට තරහ විය යුතුය. එයින් කියවෙන්නේ ඔවුන් කොතරම් දුරට රටවල අභ්‍යන්තර ප‍්‍රජාතන්ත‍්‍රවාදයට, ආගමික නිදහසට පවා ඇඟිලි ගසනවාද යන්නයි.

චීන ජනතා පක්ෂය යයිද කියනු ලබන චීන ආරයේ කොමියුනිස්ට් පක්ෂයේ නායකයෝ චීනයේ උත්තරීතර හා පූජනීය නායකයෝය. ඔවුන් තම පැවැත්මට හා තම මතවාදයට අල්පමාත‍්‍රව හෝ වෙනස් යමක් තම රට තුළ සමාජගත වන්නට ඉඩ නොදෙති. එයින් නොනැවතී එම බලපෑම අප වැනි රටවලටද කරති.

මැද පෙරදිග සිට තම වෙළෙඳ ප‍්‍රවාහනය පහසු හා ලාභදායී කර ගනු වස් තම වරාය ජාලයේ වූ අඩුව සපුරා ගන්නට හා ඉන්දියානු සාගර කලාපයේ තම ආධිපත්‍යය තහවුරු කරගන්නට, කොටින්ම කියතොත් රාජපක්ෂලා හරහා චීන කොලනියක් ඉන්දියානු සාගරයේ ඇතිකර ගන්නට චීනයට හැකි විය. හම්බන්තොට වරාය හා මත්තල ගුවන් තොටුපල, වරාය නගරය වැනි මහා පරිමාණ ඉදිකිරීම් ව්‍යාපෘති යනාදිය සඳහා ඔරොත්තු නොදෙන ලෙස ලෙස අධික පොලියට ණය දෙනු ලැබිනි. අභ්‍යන්තර යුද්ධය හා එල්ටීටීඊය ඔවුන්ගේ බල ව්‍යාපෘතියට බාධාවක් හෙයින් යුද මර්දනයට ද ආධාර කරනු ලැබිණි. ඓතිහාසිකව යථාර්ථවාදීව හා භූ-දේශපාලනික කාරණා අනුව බලන විට අපගේ හොඳම මිතුරා විය යුත්තේ ලෝකයේ විශාලම ප‍්‍රජාතන්ත‍්‍රවාදී රාජ්‍යය වන ඉන්දියාවය. එහෙත් තම පවුලේ උපරිම සුභසිද්ධිය පමණක්ම අරමුණු කරගත් රාජපක්ෂලා විසින් චීනයට ම වුවමනා අයුරින් ශ‍්‍රී ලංකාව හා එහි විදේශ සම්බන්ධතා කළමනාකරණය කරනු ලැබිණි. ඉන්දියාවට හා ප‍්‍රජාතන්ත‍්‍රවාදී ලෝකයට අප හා එකඟ වන්නට නොහැකි විය. එම තත්වය යටතේ 2015 ආණ්ඩු පෙරළිය සඳහා පොදු බලවේගවලට ඉන්දියාවේ ඇතුළු ජාත්‍යන්තර සහයෝගය ලැබිණි.

එනිසා කෙසේ හෝ රාජපක්ෂලා බලයේ තබාගන්නට චීනයට අවශ්‍ය විය. ඔවුන්ගේ ඡුන්ද ව්‍යාපාරයට ද නිර්ලෝභීව චීනය ආයෝජනය කරන්නේ මෙනිසාය.

බල පෙරළියෙන් පසුව වුවද තත්වය එතරම් වෙනස් නොවූ බවට හොඳම සාධකය දලයි ලාමාගේ ලංකා සංචාරය වැළැක්වීමයි. එහෙත් රාජපක්ෂලා තරම්ම මෙම රජය චීනයට ගැති නොවන අතර චීනය සමඟද ගනුදෙනු කරමින් ඉන්දියාව හා ප‍්‍රජාන්ත‍්‍රවාදී ලෝකය සමඟ ඉදිරියට යන්නට උත්සාහ කරමින් සිටී.

මෙම තත්වය යටතේ රාජපක්ෂලාට නැවත බලයට ඒම අපහසු බව පෙනෙන නිසා ඔවුන් චීන උපකාරද ලබමින් උප්පරවැට්ටි දේශපාලනයේ නිරතව සිටිති. රාජපක්ෂ කල්ලිය හා ගැත්තන් වෙනුවෙන් ප‍්‍රචාරණ ව්‍යාපාර, සුඛෝපභෝගී චීන සංචාර, චීනයට අයිති ව්‍යාපාරික ස්ථානවල නොමිලයේ හෝ අඩු මිලට ඉඩප‍්‍රස්ථා ලැබෙනුයේ මේ නිසාය. ඉදිරි මැතිවරණවලදීද ඔවුන් විශාල වශයෙන් මුදල් හා ආධාර චීනයෙන් ඉල්ලනු ඇත. එසේ කරනුයේ ශ‍්‍රී ලංකාව ඉන්දියන් සාගරයේ චීන කොලනිය බවට පත් කරන්නටමය. 75% ක් බෞද්ධයන් සිටින ශ‍්‍රී ලංකාවට දලයි ලාමා වැඩම කරවන්නට නොදුන් තම රටේ ෆලූ‍ං ඩාෆා අනුගාමිකයන් මර්දනය කරන තනි පක්ෂයක ආධිපත්‍යය පවතින චීන කොලනියක් කරන්නට රාජපක්ෂලා සමඟ සැදී පැහැදී සිටින බහුතරය බෞද්ධයන් හා බෞද්ධ භික්ෂූන් වීම කනගාටුදායකය.