කුණු රස බෙදන  ආණ්ඩුව කුණු රස විඳින සමාජය

පාර්ලිමේන්තු මන්ත‍්‍රී රංජන් රාමනායකගේ හඬ පට මේ දිනවල යහමින් බෙදා හැරීම අලූත් ආණ්ඩුවේ ‘මහජන වගකීම’ බවට පත් කර ගෙන තිබේ. ආණ්ඩුව කරන හැටි ගැන, වියත් මගේ සිට ඇඟ පුරා තවරා ගත් දහසක් විදග්ධ න්‍යාය කුණු බක්කියට දමා, දේශපාලන පළිගැනීම් කිරීමත්, කුණු රස බෙදීමත් ආණ්ඩුව තමන් වෙත පවරා ගෙන තිබේ.

මේ නම් අලූත් ජනාධිපතිවරයාත්, ආණ්ඩුවත් බලයට එන්නට පෙර ජනතාවට මැවූ ප‍්‍රතිරූපයට මුළුමනින් ම පරස්පර, සිල්ලර ගණයේ හැඩයෙකි.

රංජන් රාමනායක මහතාගේ හඬ පට මේ මොහොතේ මහත් ආන්දෝලනයක් ඇති කර තිබෙන බව ඇත්ත ය. එහෙත් ඒ ආන්දෝලනයට යටින් ඉහවහා යන කුණු ගඳක්, කුණු රසයක් මුළු සමාජය පුරා ම ඒ හරහා පැතිරෙමින් තිබේ.

¥රකථන කතාබහක් යනු සාමාන්‍යයෙන් පුද්ගලයන් දෙදෙනකු අතර සිදුවන පෞද්ගලික සංවාදයකි. එවැනි පෞද්ගලික සංවාද ඒ දෙදෙනා අතරත්, ඒ මොහොතේත් පවතින සන්දර්භයට හැම අතින් ම අනුකූල වෙයි. එහෙත් එහි එක් පාර්ශ්වයක් විසින්, අනෙක් පාර්ශ්වයට නොදන්වා එම සංවාද පටිගත කිරීම වනාහි මුළුමනින් ම සදාචාර විරෝධී, ඉතා ම පහත් පෙළේ හැසිරීමකි. රංජන් රාමනායක මන්ත‍්‍රීවරයා ඒ පහත් පෙළේ කාරියෙහි නිරත වී තිබේ. තමා සංවාද පටිගත කරන බව අනෙක් පාර්ශ්වයට දැන්වූයේ නම්, ඒ පාර්ශ්වය කියන දේ දැනට පටිගත වී ඇති ආකාරයට වඩා මුළුමනින් ම වෙනස් වන්නට ඉඩ තිබෙන බව අමුතුවෙන් කිව යුතු නැත.

එහෙත්, දැන් සිදු වී ඇත්තේ රාමනායක මහතා කුමන හේතුවක් සඳහා හෝ පටිගත කරන ලද එම සංවාද, ආණ්ඩුවේ ද අනුදැනුමෙන්. ආණ්ඩුවට හිතවත් මාධ්‍යවලින් හා සමාජ මාධ්‍යවලින් ‘සීරියල් කරමින්’ වරින් වර නිකුත් කිරීම ය. ආණ්ඩුවේ අරමුණ පැහැදිලි ය. තමන්ට විරුද්ධ දේශපාලන ක‍්‍රියාකාරිකයන්ගෙන් පළි ගැනීමත්, ඔවුන් නීතිමය වශයෙන් දංගෙඩියට ගෙනගොස් තමන්ට එල්ල වන විවේචන වළක්වා ගැනීමත් ය. ආණ්ඩුවේ මාසයක ආයු කාලයේ දුර්වල ක‍්‍රියාකාරිත්වය සම්බන්ධයෙන් සමාජයේ පවතින කතාබහ වෙනතකට හැරවීමත් ය.

හැබැයි, ඒ සියල්ලටමත් වඩා කැපී පෙනෙන්නේ, මිනිසුන් දෙදෙනකු අතර විවිධ තත්ත්වයන් යටතේ හා විවිධ අවශ්‍යතාවන් යටතේ සිදු වූ, සමහර විට ඉතාමත් පෞද්ගලික ස්වභාවයේ ¥රකථන සංවාද, සමාජයේ හැම තරාතිරමක ම ගෞරවනීය සාමාජිකයන් විසින් කුණු රස විඳිමින් ප‍්‍රසිද්ධියේ අසමින් සිටීම ය. කාර්යාලවලත්, වෙළඳපොලේදීත්, ගෙදරදීත්, මගතොටේදීත් ශ‍්‍රී ලාංකික විනයගත ජනතාව ඒ කුණු රස විඳිති. ඒ ගැන මහත් අභිරුචියෙන් අදහස් හුවමාරු කර ගනිති. අහස උසට නැග ඇති පාරිභෝගික භාණ්ඩවලින් ඇතිවන පීඩනය, රංජන් රාමනායකගේ සීඞී තැටිවල කුණු රසයෙන් සමනය කර ගනිති.

දෙදෙනකු අතර පෞද්ගලික ව සිදු වන සංවාදයක්, හෝ හැසිරීමක්, එම සන්දර්භයෙන් ගලවා පිටතට ගෙන ප‍්‍රසිද්ධියට පත් කළ විට සම්පූර්ණයෙන් ම වෙනස් ආකාරයක් ගනියි. එවැන්නක් සිදුවන්නේ ඒ පාත‍්‍රයන්ගේ කැමැත්ත නැති ව නම් එමගින් ඔවුන්ගේ පෞද්ගලිකත්වයට ද හානි සිදු වෙයි. පෞද්ගලික සංවාද මහජන අවකාශයට ගෙන ආ නොහැකි යැයි නියමයක් නැත. එහෙත් මාධ්‍යවලට එවැනි අවස්ථාවක සලකා බැලීම සඳහා බලවත් මිනුම් දණ්ඩක් තිබේ. එනම්, ‘මහජන යහපත’ යි. වෙනත් විදියකට කියනවා නම්, කෙනකුගේ පෞද්ගලිකත්වයේ සීමාව විනිවිද යන්නට මාධ්‍යයකට ඉඩක් ලැබෙන්නේ, එය මහජන යහපත සඳහා ම වන්නේ නම් පමණකි.

රංජන් රාමනායක පටිගත කොට ඇති සමහර සංවාද ප‍්‍රසිද්ධියට පත් කිරීම මහජන යහපතට හේතු වන්නේ යැයි කෙනකුට තර්ක කළ හැකි ය. එහෙත්, මේ දක්වා මාධ්‍යවලින් ප‍්‍රසිද්ධ වී ඇති සංවාද සියල්ලක් ම පාහේ එම මිනුම් දණ්ඩෙන් සලකා බලද්දී නම්, අසමත් බව කිව යුතු ය. අධිකරණය ගැනවත්, අපරාධ විමර්ශන ගැනවත්, වෙනත් දෙයක් ගැනවත්, සඳහන් වුණාට, එවැනි පෞද්ගලික ව සිදුවන සංවාදයක් අපරාධයකට හෝ වෙනත් වැදගත් අක‍්‍රමිකතාවකට හෝ හේතුවක් නොවන තාක් කල් ඒවායෙහි මහජන වැදගත්කමක් නැත. මේ සියලූ ම පාහේ සංවාද පවතින්නේ එම තත්ත්වයේ ය. එහෙත්, බල අධිකාරියකට හෙවත් ආණ්ඩුවකට. ඒවා තමන්ගේ දේශපාලන වුවමනා වෙනුවෙන් අර්ථ දක්වා ගත හැකි ය. හොඳ ම උදාහරණය, තමා ඝාතනය කිරීමට රංජන් රාමනායක හා රනිල් වික‍්‍රමසිංහ දෙදෙනා අතර කුමන්ත‍්‍රණයක් තිබුණා යැයි මහින්දානන්ද අලූත්ගමගේ මහතා නිර්මාණය කර ඇති කතාවයි.

එනයින් රංජන් රාමනායකගේ හඬපට ආණ්ඩුව ද, දේශපාලකයන් ද මතු නොව මහජනතාව ද මොනවට නිරුවත් කර තිබේ. අධිකරණයත් රජයේ නිලධාරි සමහර දෙනාත් එහි වින්දිතයෝ ය.x