රගර් ක්‍රීඩක වසීම් තාජුඩීන් ඝාතනය පිළිබඳ 2015 යහපාලන ආණ්ඩු සමයේදී ආරම්භ වී යටගිය පරීක්ෂණ වත්මන් ජාතික ජන බලවේග ආණ්ඩුව යටතේ යළි ආරම්භ වීම සලකුණු කර තිබේ. ඒ මෙම වසරේ පෙබරවාරි මාසයේදී දකුණු පළාතේ මිද්දෙනියේදී ඝාතනයට ලක්වූ අනුර විදානගමගේ හෙවත් කජ්ජාගේ බිරිඳගෙන් අපරාධ පරීක්ෂණ දෙපාර්තමේන්තුව හෙවත් සීඅයිඩීය කළ ප්‍රශ්න කිරීමකදී තාජුඩීන් ඝාතනය සම්බන්ධයෙන් අලුත් තොරතුරක් අනාවරණය කර ගැනීමත් සමඟය. තාජුඩීන් ඝාතන අවස්ථාවේදී ඔහුගේ මෝටර් රථය පසුපසින් ගොස් ඇති ඩිපෙන්ඩර් වර්ගයේ රථයට අතරමඟදී ගොඩවන පුද්ගලයකු සීසීටීවී දර්ශන ආශ්‍රයෙන් හඳුනාගෙන තිබී ඇති ඒ සම්බන්ධයෙන් කළ විමසීමකදී කජ්ජාගේ බිරිඳ කියා තිබුණේ එම දර්ශනවල සිටින පුද්ගලයා සිය සැමියා වන අනුර විදානගමගේ හෙවත් මීගස්ආරේ කජ්ජා බවය.
එම හඳුනා ගැනීමට අදාළ වැඩිදුර තොරතුරු කජ්ජාගේ බිරිඳ ඉන්පසු මාධ්‍යයට ප්‍රකාශ කර තිබූ අතර කජ්ජාවට කොන්දේ අමාරුවක් තිබුණ බවත්, ඒ නිසාම ඔහු ඉනට අත්දෙක තබාගෙන සිටීම කරන බවත් පවසා තිබුණිග තමා සමඟ අවුරුදු 17ක කාලයක් එකට සිටි සැමියා මොන ආකාරයට සිටියත් හඳුනා ගැනීමට හැකි බවත් ඇය වැඩිදුරටත් පවසා තිබුණි.
කජ්ජාගේ බිරිඳට එරෙහිව පුතා හා පවුලේ අය
මෙම කරුණු මාධ්‍ය මගින් වාර්තා කිරීමත් සමඟ කරළියට පැමිණියේ කජ්ජාගේ වැඩිමහල් පුතු වන ඉඳුවර විදානගමගේ ය. ඔහු පිටපතකට අනුව යැයි සිතෙන ප්‍රකාශයක් ලබාදෙමින් මාධ්‍යයට කීවේ සිය මව, පියා සම්බන්ධයෙන් කියන තොරතුරු අසත්‍ය බවයි. සිය පියාගේ ඝාතනයට සිය මව සම්බන්ධ බවයි. ඒ වනවිටත් ඇය සිටියේ අනියම් සැමියකු සමඟ විදේශගතව බවයි. සිය පියා මැරීමේ වුවමනාවක් තිබුණේ සිය මවට බවයි. වසීම් තාජුඩීන් ඝාතනය වන අවස්ථාවේ සිය පියා අංක 120 කොළඹ හොරණ බස් රථයක සේවය කළ බවත්, ඒ වනවිට තමාට අවුරුදු තුනක් බවත් කියා තිබුණි. පියාගේ ඝාතනයෙන් පසු මවගේ ගිණුමට ජේසීබී සමන් නැමැත්තෙකුගෙන් මුදල් බැරවීමක් සිදුවී ඇති බවද ඒ පිළිබඳව එම පුද්ගලයා ඔහුට කියූ බවද කියා තිබුණි. එමෙන්ම එම මුදල් බැරවීම පිළිබඳව විමසූ අවස්ථාවේ මව එය මුලින් ප්‍රතික්ෂේප කළ බවද ඔහු කියා තිබුණි.
පොලිසිය එම සීසීටීවී දර්ශන පිළිබඳව පිළිබඳව පියාගේ හිටපු බිරිඳගෙන් විමසා ඇතත්, පියාගේ සහෝදර සහෝදරියන්ගෙන් විමසීමක් නොකරන්නේ ඇයිදැයි ඔහු ප්‍රශ්න කර තිබුණි.
ඊට ප්‍රතිචාර දක්වමින් කජ්ජාගේ බිරිඳ යූටියුබ් නාලිකාවක සාකච්ඡාවට එක්වෙමින් කියා තිබුණේ කපිල දිසානායක හෝ රාජපක්ෂලා යන අයගෙන් කවුරුන් විසින් හෝ පුත්‍රයා මෙහෙයවමින් කටයුතු කරන බවයි. අඩු අධ්‍යාපන මට්ටමක් ඇති අවුරුදු දහසයක් වන පුත්‍රයා එවැනි ෆේස්බුක් සටහනක් ලියා නැති බවත්, වෙනත් කෙනෙකු ලියා දුන් දෙයක් ඔහු සමාජගත කර ඇති බව ඇය විශ්වාස කරන බවත් කියා තිබුණි.
තම පුත්‍රයාට කපිල දිසානායකගේ දියණිය සමඟ ප්‍රේම සම්බන්ධයක් ඇති බව කියා ඇති ඇය මෙම ප්‍රේම සම්බන්ධය නිසා දරුවන් සමඟ මරා දමන බවට තර්ජනය කර ඇති බව තමාට ආරංචි වූ බවත් පවසා තිබුණි.
එමෙන්ම කජ්ජා කරගම්පිටියේ බස් රියැදුරෙකු ලෙස අවසන් වරට සේවය කළේ 2009 වසරේදී බවත්, ඔවුන්ගේ පළමු දරුවා වන ඉඳුවර 2010 ජනවාරි 03 දින ඉපදීමෙන් පසු ඔවුන් ගමට ගිය බවත්, ඉන්පසු ඔහු සිංහගිරි සමූහ ව්‍යාපාරයට අයත් වළස්මුල්ල යාපනය බස් රථයක සේවය කළ බවත්, එම බස් රථයේ ගංජා ගෙනයෑමේ චෝදනාවට ඔහු සිරගත වීමෙන් පසු ඇයගේ පියා හා කපිල දිසානායක ඔහු බේරාගත් බවත් පවසා තිබුණි. මහින්ද රාජපක්ෂ හිටපු ජනාධිපති හා කපිල දිසානායක ආරක්ෂක අමාත්‍යාංශයේ රියැදුරු රැකියාවකට ඔහුව දැමූ බවත්, එම රියැදුරු රැකියාව කජ්ජා 2011 සිට 2013 මුල දක්වා කළ බවත් ඇය කියයි.
එමෙන්ම අපරාධ පරීක්ෂණ දෙපාර්තමේන්තුව එම සීටීටීවී දර්ශන ඔවුන්ට පෙන්වූයේ එම දෙපාර්තමේන්තුවට සිය පුත්‍රයා සමඟ ගෙන්වා කළ ප්‍රශ්න කිරීමකදී බවත්, එම දර්ශනවල කජ්ජා දුටු විට මේ කොහේද කාල්ටන් එක ළඟද යනුවෙන් නිලධාරීන්ගෙන් ඇය විමසූ බවත්, ඊට හේතුව එම ස්ථානයේ කම්බි වැටක් තිබීම නිසා බවත්, එම ස්ථානය කාල්ටන් නොව කොළඹ වසීම් තාජුඩීන් ඝාතනය කළ ස්ථානය බව නිලධාරීන් පැවසූ බවත්, එම දර්ශන වසීම් තාජුඩීන් ඝාතන සිදුවීමට අදාළ දර්ශන බව තමා දැන ගත්තේ එම අවස්ථාවේදී බවත් ඇය කියා තිබුණි.
පුතාගෙන් ඒ පිළිබඳව විමසුවේද හා දුන් පිළිතුර කුමක්ද යන්න නොදන්නා බවත්, ඊට අමතරව කජ්ජාගේ සහෝදර සහෝදරියන් සිටින ස්ථාන ඇය ගොස් පෙන්නූ බවත්, ඔවුන්ගෙන් සීඅයිඩීය ප්‍රකාශ සටහන් කරගත් බවත්, ඒවාට අදාළ කරුණු නොදන්නා බවත්, එහෙත් කජ්ජාගේ අක්කා කෙනෙකු කතාකර කජ්ජා දැන් මැරිලා ඉවරයි, අපිට පොලිසි උසාවි ගානේ රස්තියාදු වෙන්න බැහැ කියා කියූ බවත් ඇය කියා තිබුණි. කජ්ජාගේ අක්කා එසේ කීම සඳහා කපිල දිසානායක හා රාජපක්ෂලාගේ බලපෑමක් ඇති බව විශ්වාස කරන බවත්, ඇය, දරුවා හා සම්පත් රාමනායක මැරුවොත් එයට කපිල දිසානායක හා තාජුඩීන් ඝාතනයට සම්බන්ධ සියලු දෙනා වගකිව යුතු බවත් ඇය කියා තිබුණි.
සිය සැමියා වන කජ්ජා ඝාතනය කළේ දේශපාලන වුවමනාවට බවද, එය සිදුකළේ කපිල දිසානායක ඇතුළු රාජපක්ෂවරුන්ගේ වුවමනාවට බවද ඇය වැඩිදුරටත් කියා තිබුණි.
මෙම ප්‍රතිචාරයෙන් පසු චමුදිත සමරවික්‍රම සමඟ කජ්ජාගේ මව හා සහෝදර සහෝදරියන් සිදුකරන සාකච්ඡාවක් ප්‍රචාරය වූ අතර එහි ඔවුන් ප්‍රකාශ කරන්නේ එම සීසීටීවී දර්ශනවල සිටින්නේ කජ්ජා නොවන බව ඔවුන් අපරාධ පරීක්ෂණ දෙපාර්තමේන්තුවේ නිලධාරීන්ට පැවසූ බවයි. එම දර්ශනවල සිටින පුද්ගලයා හැද සිටින්නේ ටී ෂර්ටයක් බවත්, තම සහෝදරයා කිසි දිනෙක ටී ෂර්ට් අඳින්නේ නැති බවත් ඔවුහු කියති.
කජ්ජාගේ බිරිඳට රියැදුරු සමඟ අනියම් සම්බන්ධතාවක් තිබූ බවත්,තම සහෝදරයාගේ ඝාතනයට සම්පූර්ණයෙන්ම වගකිව යුත්තේ ඔහුගේ බිරිඳ බවත් ඔවුහු කියති. ඒ සඳහා කපිල දිසානායක සම්බන්ධ බව විශ්වාස කළද රාජපක්ෂලාගේ සම්බන්ධයක් ඇත්ද යන්න නොදන්නා බවද ඔවුහු වැඩිදුරටත් කියති.
ඝාතනය වීමට ප්‍රථම අනුර විදානගමගේ නොහොත් කජ්ජා චමුදිත සමරවික්‍රම සමඟ සාකච්ඡාවකට එක්වෙමින් ආන්දෝලනාත්මක ප්‍රකාශ රැසක් සිදුකළ අතර ඔහු එහිදී කීවේ ඔහු දන්නා තොරතුරු හෙළිදරව් කළහොත් රාජපක්ෂලාට පාරේ යන්නවත් බැරි තත්වයක් උදාවන බවයි. එම තොරතුරු හෙළි කිරීම නිසා ඔහුගේ ජීවිතය ඒ මොහොතේ අනතුරේ තිබෙන බවයි. එමෙන්ම ඔහුව ඝාතනය කළහොත් එසේ කරන්නේ රාජපක්ෂලා බවයි.
බැකෝ සමන් කජ්ජා ඝාතනය පිළිගෙන
මේ වනවිට කජ්ජා ඝාතනය තමන් සිදුකළ බව ඉන්දුනීසියාවේදී අත්අඩංගුවට ගෙන මෙරටට රැගෙන ආ අපරාධ කල්ලි නායක නිර්මල ප්‍රසංග හෙවත් බැකෝ සමන් අපරාධ පරීක්ෂණ දෙපාර්තමේන්තුව හමුවේ ප්‍රකාශ කර ඇති අතර ඒ සඳහා හේතු වූයේ ඔවුන්ගේ මත්ද්‍රව්‍ය ජාලය කජ්ජා හෙළිදරව් කිරීම බවද කියා ඇත. එම ඝාතනය සඳහා පිස්තෝලය ලබාදුන්නේ තමන් බව මිද්දෙණියේදී සොයාගත් අයිස් මත්ද්‍රව්‍ය සම්බන්ධයෙන් අත්අඩංගුවේ පසුවන ශ්‍රී ලංකා පොදු ජන පෙරමුණේ පළාත් පාලන අපේක්ෂක සම්පත් මනම්පේරි අපරාධ පරීක්ෂණ දෙපාර්තමේන්තුවට පවසා තිබේ. සම්පත් මනම්පේරි හිටපු ජනාධිපති මහින්ද රාජපක්ෂගේ ආරක්ෂකයෙකු වශයෙන් කටයුතු කර ඇති අතර එල්ටීටීඊ සංවිධානයේ නැගෙනහිර පළාත් නායක වූ කරුණා අම්මාන්ගේ අතුරු සන්නද්ධ කණ්ඩායමේ සාමාජිකයකු ලෙසද කටයුතු කර ඇත. එමෙන්ම ඔහු හිටපු පාර්ලිමේන්තු මන්ත්‍රී නඩරාජා රවිරාජ් ඝාතනයේ සැකකරුවෙකුද වන අතර හිටපු ජනාාධිපති මහින්ද රාජපක්ෂ ඔහු සිය ආරක්ෂකයෙකු ලෙස බඳවාගෙන තිබුණේද එම අපරාධකාරි පසුබිම පිළිබඳව හෙළිදරව් වී තිබියදීමය.
එදා අනාවරණය කරගත දේ
වසීම් තාජුඩීන් ඝාතනයට අලුතින් අනාවරණය කරගත් කජ්ජාගේ මෙම තොරතුරට අමතරව පසුගිය යහපාලන ආණ්ඩු සමයේදී තාජුඩීන් ඝාතනය සඳහා පැහැර ගැනීමට සිරිලිය සවිය පදනමට අයත් උඡ ණ් 0642 දරන ඩිපෙන්ඩර් රථයක් භාවිත කර ඇති බව සීඅයිඩීය අධිකරණයට කරුණු වාර්තා කර තිබුණි. ජාත්‍යන්තර රතු කුරුස සංවිධානයෙන් මෙරටට ලැබී ඇති එම ඩිපෙන්ඩර් රථය 2011 වර්ෂයේ සිට 2015 ජනවාරි 20 දක්වා සිරිලිය සවිය පදනම භාවිත කර තිබේ. එමෙන්ම අවස්ථා දෙකකදී එම ඩිපෙන්ඩර් රථයේ පාට වෙනස් කිරීමද සිදුකර තිබේ.
තාජුඩීන් රිය අනතුරකට ලක්වී මියගිය බව ඒ පිළිබඳ මුල් පොලිස් වාර්තා අනුව පැවසූ අතර පසුව සීඅයිඩීය සිදුකළ විමර්ශනයේදී හෙළිදරව් කරන ලද්දේ ඔහු පැහැරගෙන ගොස් පහර දී පසුව වාහනයට දමා ගිනි තබා ඇති බවයි. එසේ ගිනි තබන අවස්ථාව වනවිටත් ඔහු මියගොස් සිට නැති බව අධිකරණ වෛද්‍ය පරීක්ෂණවලදී අනාවරණය විය. එමෙන්ම භාගෙට පිළිස්සෙමින් සිටි ඔහුගේ සිරුර සොයා ගන්නා අවස්ථාවේදී එය වාහනයේ තිබුණේ රියැදුරු අසුනේ නොව ඊට යාබද අසුනේය. ඒ සම්බන්ධයෙන් වන සාක්ෂි වසන් කිරීමේ සැකකරුවන් එවක නාරාහේන්පිට පොලිසියේ අපරාධ විමර්ශන අංශයේ ස්ථානාධිපති සුමිත් පෙරේරා, හිටපු නියෝජ්‍ය පොලිස්පති අනුර සේනානායක හා එවක කොළඹ ප්‍රධාන අධිකරණ වෛද්‍ය නිලධාරි මහාචාර්ය ආනන්ද සමරසේකරට එරෙහිව නඩු පවරනු ලැබීය. මහාචාර්යවරයාට එරෙහි චෝදනාව වූයේ තාජුඩීන්ගේ පහරදීම් හා පිහි ඇනුම් සලකුණු තිබුණ තාජුඩීන්ගේ කලවා අස්ථි කොටස් අතුරුදහන් කිරීමය.
තාජුඩීන් ඝාතනයේ හේතුව
රගර් ක්‍රීඩක වසීම් තාජුඩීන් ඝාතනයට හේතු වන්නේ තාජුඩීන් නියෝජනය කළ හැව්ලොක්ස් ක්‍රීඩා සමාජය රාජපක්ෂ පුතුන් අත්පත්කර ගැනීමට කළ උත්සාහයකදී එම ක්‍රීඩා සමාජය නියෝජනය කළ වසීම් තාජුඩීන් එයට විරුද්ධත්වය පළ කරමින් කටයුතු කිරීම නිසා ඇති වූ ආරවුලක් බව කියවෙයි. එවක රාජපක්ෂ පුතුන් නියෝජනය කළ නාවික හමුදා කණ්ඩායම සමඟ හැව්ලොක්ස් කණ්ඩායම අතර පැවති තරගයක් හැව්ලොක්ස් කණ්ඩායම ජයග්‍රහණය කිරීමෙන් පසු ඇතිවූ සිදුවීමක් තවදුරටත් ඒ සඳහා හේතු වී ඇතැයිද කියවේ.
නාවික හමුදා කණ්ඩායම නාවික හමුදාවේ සේවය කළ යෝෂිත රාජපක්ෂ නියෝජනය කිරීම පිළිගත හැකි වුවද, නාමල් රාජපක්ෂ හා රෝහිත රාජපක්ෂ එම කණ්ඩායමට ක්‍රීඩා කළේ කෙසේද යන්න ප්‍රශ්නාර්ථයක් විය. ත්‍රිවිධ හමුදා හෝ පොලිස් ක්‍රීඩා කණ්ඩායමකට එම සේවාවේ නොවන පිරිස් ක්‍රීඩා කිරීම එම කාලයේ දක්නට ලැබුණ අතර ඒ ත්‍රිවිධ හමුදාවල නම් ස්වෙච්ඡා බලසේනාවට එක්වීමෙන්, පොලීසියේ නම් උප සේවයට එක්වීමෙන් හෝ කොන්ත්‍රාත් ගිවිසුම් මත ක්‍රීඩා කිරීම මගින්ය. ඒ අනුව නාමල් හා රෝහිත යන රාජපක්ෂ පුතුන්ට නාවික හමුදාව නියෝජනය කළ හැකිව තිබුනේ ඒ ආකාරවලින් පමණය. එහෙත් ඔවුන් ස්වෙච්ඡා බල සේනාවට බැඳී නොතිබුණ අතර කොන්ත්‍රාත් ගිවිසුම්ද අත්සන් කර තිබුණේ නැත. නාමල් අරාජපක්ෂ එම කාලයේ පාර්ලිමේන්තු මන්ත්‍රීවරයකු ලෙස කටයුතු කළ අතර පාර්ලිමේන්තු මන්ත්‍රීවරයකු වීම සඳහා ආණ්ඩුක්‍රම ව්‍යවස්ථාව අනුව නුසුදුසුකමක් වූයේ රජය සමඟ හෝ රාජ්‍ය ආයතනයක් සමඟ යම් ගිවිසුමකට එළඹීමය. ඒ අනුව නාවික හමුදාව කොන්ත්‍රාත් ගිවිසුමක් යටතේ නියෝජනය කිරීමද (ස්වෙච්ඡා බල සේනාවේ නම් දේශපාලනය කිරීමට නොහැකිය) ඔහුගේ පාර්ලිමේන්තු මන්ත්‍රී ධුරය අහිමි වීමට එය හේතුවක් විය.
ඒ පිළිබඳව එවක ලියුම්කරු දිගින් දිගටම නාවික හමුදා මාධ්‍ය ප්‍රකාශකගෙන් විමසු විට ලැබුණ පිළිතුර වූයේ නාවික හමුදා ක්‍රීඩා අධ්‍යක්ෂගෙන් විමසන ලෙසය. ක්‍රීඩා අධ්‍යක්ෂටද ඒ සම්බන්ධයෙන් පිළිතුරක් ලබාදීමට නොහැකි වූ අතර නාවික හමුදාපතිවරයාගෙන් විමසන ලෙස දැනුම් දුන්නේය. ඒ අනුව එවක නාවික හමුදාපති වසන්ත කරන්නාගොඩගෙන් ඒ පිළිබඳ විමසීමේදී ඔහු පිළිතුරක් ලබාදීම වෙනුවට කළේ ඒ පිළිබඳව නොලියා සිටියහොත් හොඳ යැයි ලියුම්කරුට අනතුරු ඇඟවීමක් සිදු කිරීමය.
රාජපක්ෂ පුතුන් ක්‍රීඩා සමාජ මිලදී ගැනීම
හැව්ලොක්ස් කණ්ඩායම අත්පත් කර ගැනීමට නොහැකි වීම හේතුවෙන් පසුව රාජපක්ෂ පුතුන් විසින් කොළඹ සීඑච් ඇන්ඩ් එෆ්සී රගර් කණ්ඩායම අත්පත් කර ගත් අතර එම කණ්ඩායමට අදාළ ක්‍රීඩා පිටිය වන කොළඹ සීසීසී පිටියේ රගර් පුහුණුවීම් වෙනුවට එම පුහුණුවීම් කොළඹ තුරඟ තරග පිටිය අත්පත් කරගනිමින් එහි (රේස් කෝස් පිටිය) ගෙනයෑමද සිදුකරනු ලැබීය. එමෙන්ම තුරඟ තරග පිටිය රගර් ක්‍රීඩාව සඳහා අවශ්‍ය ලෙස සකස් කිරීමද සිදුකරනු ලැබීය.
මේ ආකාරයට ක්‍රීඩා සහ ක්‍රීඩා සමාජ අත්පත්කර ගැනීම් යටතේ බාස්කට් බෝල් හෙවත් පැසිපන්දු ක්‍රීඩාවටද රාජපක්ෂවරුන් යොමු වෙමින් හම්බන්තොට බ්ලූස් හා බ්ලැක්ස් යනුවෙන් කණ්ඩායම් දෙකක් නිර්මාණය කළ අතර ඒ සඳහා ඒ වනවිටත් වෙනත් කණ්ඩායම්වල ක්‍රීඩා කරමින් සිටි ජාතික මට්ටමේ ක්‍රීඩකයන් මිලදී ගැනීම සිදුකරනු ලැබීය. එහෙත් හම්බන්තොට කණ්ඩායමට බාස්කට් බෝල් ජාතික ශූරතාවේ අවසන් තරගයට පැමිණියද, එහි ශූරයන් වීමට නොහැකි වූයේ මුදලට ගත නොහැකි ජාතික මටටමේ තවත් ක්‍රීඩකයන් පිරිසක් කොළඹ බාස්කට් බෝල් කණ්ඩායමේ රැඳී සිටිමින් ක්‍රීඩා කර අවසන් මහ තරගයේ ජයග්‍රහණය ලබාගත් බැවින්ය. ඉන්ද නොනැවතී සිය කණ්ඩායම සඳහා කොළඹ හැව්ලොක් ටවුන්හි හෙන්රි පේද්‍රිස් ක්‍රීඩාංගණයේ පැසිපන්දු පිටිය රාජපක්ෂ පුතුන් ලබාගත් අතර එය තවම ඔවුන්ගේ පාලනයේ පවතී.
මෝටර් රථ ධාවන තරගවලදීත් මේ ආකාරයටම ජයග්‍රහකයින් වීමට ඔවුන් උත්සාහ කළ අතර අධික තදබදයක් ඇති කොළඹ නගරයේ පාරවල් වසා රේස් පැදීය. එමෙන්ම වාහන ගමනාගමනය නිසා මහනුවර දළදා මාලිගාවට හානිවේ යැයි වසා තිබූ මහනුවර මහියංගණ පාර අවට දළදා මාලිගාව අවට ඇති පාරවල් වසාද රේස් පැදීම සිදුකළේය.
කෙසේ වෙතත් මේ වනවිට අපරාධ පරීක්ෂණ දෙපාර්තමේන්තුව අධිකරණයට වාර්තා කර ඇත්තේ කජ්ජා, වසීම් තාජුඩීන් ඝාතන අවස්ථාවේදී ආරක්ෂක අමාත්‍යාංශයෙය් සේවය කර ඇති බවයි. එමෙන්ම කජ්ජාගේ දූරකතන ඇමතුම් සම්බන්ධයෙන් වැඩිදුරටත් සීඅයිඩීය විමර්ශන සිදුකරන බවද වාර්තාවේ. ඒ අනුව එළඹිය හැකි නිගමනය වන්නේ කජ්ජාගේ බිරිඳ පවසන කරුණු ඔහුගේ පුතා පවසන කරුණුවලට වඩා විශ්වසනීය හා සිදුකරමින් තිබෙන පරීක්ෂණවලදී තහවුරු වී ඇති බවයි. ඒ ඔස්සේ වසීම් තාජුඩීන් ඝාතනය පිළිබඳ බොහෝ තොරතුරු ඉදිරියේදී හෙළිවිය හැකිය.
