පාස්කු ඉරිදා ප්‍රහාරය අලුත් කරුණු හෙළිවේ.. සාරා ගෙනගොස් ඇත්තේ හමුදා මේජර්වරයෙක්

හාදියාට කතාකළ සහරාන්ගේ සහෝදරයාට වෙඩි තියලා
සයින්දමරුදු ගේ හොයාදුන් කාන්තාවත් මරලා
පරීක්ෂණවලදී ආණ්ඩුවේ අය හෙළිවේදැයි බියක්

පාස්කු ඉරුදින මරාගෙන මැරෙන ත්‍රස්තවාදී ප්‍රහාරය සම්බන්ධයෙන් ජුලි 09 වැනිදා පාර්ලිමේන්තුවේ පැවති විවාදයේදී ඒ සම්බන්ධයෙන් මෙතෙක් අනාවරණය නොවූ අලුත් කරුණු රැසක් විවාදයට එක්වූ මන්ත්‍රීවරුන් විසින් හෙළිදරව් කරනු ලැබීය.
එහිදී සමගි ජන බලවේග පාර්ලිමේන්තු මන්ත්‍රී මුජිබර් රහුමාන් පාර්ලිමේන්තු විවාදයට එක්වෙමින් ප්‍රකාශ කළේ පාස්කු ඉරිදා දින මරාගෙන මැරෙන බෝම්බ ප්‍රහාරයෙන් පසු සහරාන් හසීම් ඇතුළු පිරිසේ පවුල්වල සාමාජිකයන් 14 දෙනෙකු සයින්දමරුදු නිවසේ බෝම්බ ප්‍රහාරයෙන් මරණයට පත්වූ බව ප්‍රකාශ කළත්, සහරාන්ගේ සහෝදරයකු වන ෂයිනි නැමැත්තා එම බෝම්බ පිපිරීමෙන් මරණයට පත්වී නැති බවයි.

සහරාන් හෂීම්ගේ බිරිඳ වන හාදියා ජනාධිපති කොමිසමේ ලබාදී ඇති සාක්ෂි අනුව සයයින්දමරුදු නිවසේ බෝම්බ පිපිරීමෙන් පසු ඇයට සිහිය ආ අවස්ථාවේදී ඇය වැටී සිටි ස්ථානය අසලවූ ජනේලයෙන් පිටත සිට නෑනා නෑනා එළියට එන්න යැයි කියමින් සහරාන්ගේ සහෝදරයා වන ෂයිනි කතා කර ඇති බවත්, ඉන්පසු පිටත වෙඩි ශබ්දයක් ඇසුණු බවත් හාදියා සිය සාක්ෂි මගින් කියා ඇතැයි රහුමාන් මන්ත්‍රීවරයා පාර්ලිමේන්තු විවාදයේදී කීවේය.

එමෙන්ම හාදියාට දෙමළ භබාෂාවෙන් කවුරුන් හෝ කතා කරන බවක් ඇසී ඇති බවත්, ඒ සයින්දමරුදු බෝම්බ පිපිරීමෙන් මරණයට පත්වී ඇති බව මෙතෙක් හඳුනාගෙන නැති සහරා ජෙස්මින් බවත්, ඉන්පසු ලේ පෙරෙමින් සිටි සහරා ජෙස්මින්ව යම් පිරිසක් රැගෙන යන බව තමා දුටු බවත් හාදියා කියා ඇතැයි රහුමාන් මන්ත්‍රීවරයා විවාදයේදී කීවේය.

එසේ සාරා ජෙස්මින්ව රැගෙන ගියේ මේජර් සුබසිංහ බවත්, ඒ ගැන ඔහුගෙන් අසන ලෙසත්, එවකට නැගෙනහිර පළාත භාර යුද හමුදා අණ දෙන නිලධාරියා ලෙස සිටියේ වත්මන් ආණ්ඩුවේ ආරක්ෂක නියෝජ්‍ය ඇමති විශ්‍රාමික මේජර් ජෙනරාල් අරුණ ජයසේකර බවත් රහුමාන් මන්ත්‍රීවරයා කීවේය. එමෙන්ම සාරා ජෙස්මින් මියගොස් නැති බවත් ඇය ඉන්නා බවත් ඔහු කීවේය. එමෙන්ම ඩීඑන්ඒ මගින් මියගිය බවට කියා ඇති සාරා ජෙස්මින්ගේ නමින් 2020.04.01 දින මොබිටෙල් සිම් කාඩ් පතක් ලබාගෙන ඇති බව කියූ මන්ත්‍රීවරයා ඊට අදාළ වාර්තාවද පාර්ලිමේන්තුවට ඉදිරිපත් කළේය.

එමෙන්ම මුජිබර් රහුමාන් මන්ත්‍රීවරයා කීවේ සාරා ජෙස්මින් මියගිය බවට වන තුන්වන හොර ඩීඑන්ඒ වාර්තාව ලබා ගැනීම සඳහා ගොස් තිබුණේ වර්තමාන පොලිස්පතිවරයා සමග බවයි.

කාදිනල් හිමිගේ පූජක දිවියේ සංවත්සර උත්සවයේදී පාස්කු ප්‍රහාරය සම්බන්ධයෙන් අදහස් දක්වමින් ජනාධිපතිවරයා රජය විසින් රජය පරීක්ෂාවට ලක්විය යුතුව තිබෙනවා හා ඒ නිසා දුෂ්කර අභියෝගයකට මුහුණ දීමට සිදුවී ඇතැයි කියූ බවත්, එසේ කියමින් මෙය මඟ හැරිය නොහැකි බවත්, රජය මෙයට සම්බන්ධ බවට ජනාධිපතිවරණයට පෙර සිට ජනාධිපතිවරයා මෙන්ම තමන් ද දන්නා කරුණක් බවත් ඔහු කීවේය.

මෙම විවාදයේදීි සයින්දමරුදු බෝම්බ පිපිරීම සිදුවූ අවධියේ නැගෙහිර පළාත භාර යුද හමුදා අණදෙන නිලධාරියා ලෙස තමා කටයුතු කළ බව ආරක්ෂක නියෝජ්‍ය ඇමති විශ්‍රාමික මේජර් ජෙනරාල් අරුණ ජයසේකර පිළිගත් අතර ඔහුට පිටින් කටයුතු කළ හමුදා බුද්ධි අංශ සාමාජිකයන් පිරිසක් සිටි බවද ඔහු පිළිගත්තේය.

එමෙන්ම එම විවාදයට එක්වෙමින් මහජන ආරක්ෂක ඇමති ආනන්ද විජේපාල කීවේ පාස්කු ඉරුදින ප්‍රහාරය සම්බන්ධයෙන් බන්ධනාගාරගතව සිටි පිල්ලෙයාන්ද දැන සිට ඇති බවයි. එමෙන්ම ටාජ් සමුද්‍රා හෝටලයේ මරාගෙන මැරෙන ප්‍රහාරය සඳහා ගිය බුද්ධි අංශ ලැයිස්තුවේ සිටි අබ්දූල් ජමීල් එම හෝටලයට පැමිණි බව හෝටලයෙන් රාජ්‍ය බුද්ධි සේවයට කරුණු වාර්තා කර තිබියදීත් කිසිවක් කර නැති බවයි.

මේ සම්බන්ධයෙන් වැඩිදුරටත් කළ විමසීමේදී මුජිබර් රහුමාන් මන්ත්‍රීවරයා පැවසුවේ සයින්දමරුදු බෝම්බ පිපිරීමෙන් පසු සාරා ජෙස්මින් රැගෙන ගිය හමුදා නිලධාරියා ඇතුළු කණ්ඩායම පිළිබඳව ආරක්ෂක නියෝජ්‍ය ඇමති අරුණ ජයසේකර දැන සිටිය යුතු බවයි.

ඔහු වැඩිදුරටත් කීවේ සයින්දමරුදු නිවස, සහරාන් හෂීම්ගේ පවුලේ සාමාජිකයන්ට කුලියට ගැනීම සඳහා කටයුතු කළ කාන්තාවද එම බෝම්බ පිපිරීමෙන් පසු ත්‍රීවීල් රථයක ගමන් කරමින් සිටියදී සෝදිසි ස්ථානයක නොනවත්වා ධාවනය කළා යැයි කියමින් මරා දමා ඇති බවයි.

පාස්කු පරීක්ෂණ මෙහෙයවූ ශානි අබේසේකර, රවී සෙනෙවිරත්න වැනි පිරිස් ආණ්ඩුවේ සිටියදී එම පරීක්ෂණ ඉදිරියට නොයන්නේ එයට සම්බන්ධ මෙම ආණ්ඩුවේ පිරිස් ගැන හෙළිවේදැයි යන බිය නිසාදැයි මුජිබර් රහුමාන් මන්ත්‍රීවරයා ප්‍රශ්න කළේය.