කර්මාන්ත හා ව්‍යවසායකත්ව සංවර්ධන ඇමති සුනිල් හඳුන්නෙත්ති ලංකා මිනරල් සෑන්ඩ්ස් සමාගමේ සභාපති තනතුරෙන් ටී අශෝක පීරිස් මහතා ඉවත්කර එම තනතුර සඳහා ලුණු සංස්ථාවේ සභාපති ගයාන් වෙල්ලාල පත් කිරීම මේ වනවිට සමාජ මාධ්‍ය අවකාශයේ මාතෘකාවක් බවට පත්වී තිබේ.
අශෝක පීරිස් මහතා සමඟ කටයුතු කළ හා ඔහු සම්බන්ධයෙන් දන්නා පිරිස් සමාජ මාධ්‍ය වේදිකාවල සිය අත්දැකීම් විස්තර කරමින් සඳහන් කර තිබුණේ ඔහු විවිධ රාජ්‍ය ආයතන තනතුරු හා අමාත්‍යාංශ ලේකම් තනතුරු දරද්දී වැරදි දේශපාලන නියෝග ඉටුනොකරමින් කටයුතු කළ පුද්ගලයකු බවයි.
යහපාලන ආණ්ඩු කාලයේද ලංකා මිනරල් සෑන්ඩ්ස් ආයතනයේ ප්‍රධානියා ලෙස කටයුතු කළ අතර එම ආයතනය ලාභ ලබන තත්වයටද පත්කළේය. එහෙත් ඔහු ඉන් ඉවත් කෙරුණේ පළාත් පාලන ආයතන සීමා නිර්ණය සමාලෝචන කමිටු වාර්තාව එහි ප්‍රධානියා ලෙස ආණ්ඩුවේ විරුද්ධත්වය මත ඔහු ඉදිරිපත් කළ නිසාය. මන්ද එම අවස්ථාවේ ආණ්ඩුවේ වුවමනාව වූයේ එම වාර්තාව තවත් කාලයක් ඉදිරිපත් නොකර තබාගෙන ඡන්ද කල් දැමීම වූ නිසාය.
ලංකා මිනරල් සෑන්ඩ් ආයතනය තුළ මෙම ආණ්ඩුව හෝ විෂයභාර ඇමතිවරයා නුරුස්සන දෙයක් අශෝක පීරිස් මහතා කර තිබුණේද? මෙහිදී විමසා බලන්නට උත්සාහ කරන්නේ එයයි. නැත්නම් අශෝක පීරිස් මහතා ඒ ආකාරයට ඉවත් කරන්නට හේතුවක් නැති නිසාය.
අල්ලස් හෝ දූෂණ චෝදනා විමර්ශන කොමිසමට ලංකා මිනරල් සෑන්ඩ්ස් ආයතනය සම්බන්ධයෙන් මේ වනවිට පැමිණිල්ලක් ඉදිරිපත් වී ඇති අතර එම පැමිණිල්ලේ ඇති කරුණු හා එම පැමිණිල්ලට අදාළව ලංකා මිනරල් සෑන්ඩ්ස් ආයතනයෙන් අපට වාර්තා වන කරුණු අනුව අශෝක පීරිස් ඉවත් කිරීම සම්බන්ධයෙන් යම් අදහසක් අපට ඇති කර ගත හැකිය.
අශෝක පීරිස් මහතා මෙම ආණ්ඩුව යටතේ ලංකා මිනරල් සෑන්ඩ්ස් ආයතනයේ සභාපතිවරයා ලෙස පත්වී ඇත්තේ 2024 දෙසැම්බර් 23 වැනිදාය. එහිදී ඔහුට දැනගන්නට ලැබී ඇත්තේ එම ආයතනයේ මිලදී ගැනීමක් සම්බන්ධයෙන් වැරදි ආකාරයට ටෙන්ඩරයක් පිරිනමා ඇති බව හා ඒ වෙනුවෙන් ලංකා මිනරල් සෑන්ඩ්ස් ආයතනය ලංකා බැංකුවේ ණයවර ලිපියක් විවෘත කර ඇති බවයි. ඒ අනුව පීරිස් මහතා මුලින්ම සිදුකර ඇත්තේ විවෘත කරන ලද ණයවර ලිපිය තාවකාලිකව නතර කරන ලෙස බැංකුවට උපදෙස් ලබා දීමයි. ඉන්පසු සිදුකර ඇත්තේ එම ණයවර ලිපියට අදාළ ගනුදෙනුව හෙවත් මිලදී ගැනීම ගැන විමර්ශනයක් ආරම්භ කිරීමයි.
එහිදී අනාවරණය වී ඇත්තේ පීරිස් මහතා පත්වීමට දිනකට පෙර වැඩ බලන සභාපතිවරයා ලෙස කටයුතු කළ පුද්ගලයා එම ණයවර ලිපිය විවෘත කිරීමේ අයැදුම්පත්‍රයට අත්සන් කර ඇති බවයි. එහෙත් සොයා බැලීමේදී දැන ගන්නට ලැබී ඇත්තේ බැංකුව වෙත 2024 සැප්තැම්බර් 30 දින ඉදිරිපත් කරන ලද ණයවර ලිපිය විවෘත කිරීම සඳහා එහි නිලධාරීන් පසුගිය කාලයේ උත්සාහ ගෙන ඇතත් වැඩබලන සභාපතිවරයා මහ මැතිවරණයෙන් පසුව එය සිදුකිරීම සුදුසු බව කියා ඒ සඳහා සිය අනුමැතිය ලබාදී නැති බවයි.
මෙම ණයවර ලිපිය සඳහා හේතු වී තිබුණේ ලංකා මිනරල් සෑන්ඩ්ස් ආයතනයට ෆ්‍රන්ට් එන්ඩ් ලෝඩර් දෙකක් මිලදී ගැනීම සඳහා වන ටෙන්ඩරයකි. ඒ සඳහා 2024 ජුලි 16 වන දින පුවත්පත් දැන්වීම් පළකර ඇති අතර ටෙන්ඩර් පත්‍ර ලබාගත් 8 දෙනෙකුගෙන් 7 දෙනෙකුම ඒ සඳහා ටෙන්ඩර් ඉදිරිපත් කර ඇත. ටෙන්ඩර් පත් විවෘත කිරීම 2024 අගෝස්තු 08 වැනිදා සිදුකර තිබේ.
එම ටෙන්ඩරයේ කොන්දේසි අනුව සැපයුම්කරු විසින් සියලු බදු මුදල් ගෙවිය යුතුව තිබී ඇති අතර එම ලෝඩර් යන්ත්‍ර දෙක පුල්මුඩේ පිහිටි ලංකා මිනරල් සෑන්ඩ් ආයතනයේ යන්ත්‍රාගාරය වෙත ප්‍රවාහනය කර හා ක්‍රියාත්මක කර අවශ්‍ය අනුමැතිය ලංකා මිනරල් සෑන්ඩ්ස් ආයතනයෙන් ලබාගත යුතුව තිබී ඇත.
ඒ සඳහා ගෙවීම් කිරීමේදී ටෙන්ඩර් පත්‍රිකාවල සඳහන් ක්‍රම දෙකෙන් එක් ක්‍රමයකට ගෙවීම් සිදුකරන බව දන්වා ඇති අතර ගෙවීම් සිදු කිරීමේදී ලංකා මිනරල් සෑන්ඩ්ස් ආයතනය ණයවර ලිපි විවෘත කරන බවක් සඳහන් කර නැත.
එසේම ටෙන්ඩරය සඳහා විදේශ මුදල්වලින් මිල ගණන් ඉදිරිපත් කිරීමට අවශ්‍ය නම් ඒ සඳහා අවස්ථාව ලබාදී ඇතත්, සියලුම විදේශ මුදල්වල ශ්‍රී ලංකා රුපියල් අගය දැක්විය යුතු බව සඳහන් කර ඇත. තවද කාර්ය සාධන බැඳුම්කරයක් ඒ සඳහා අමුණා තිබිය යුතු බවද සඳහන් කර තිබී ඇත.
එහිදී ටෙන්ඩර් ඉදිරිපත් කළ අය අතරින් තුන්දෙනෙකු විදේශීය මුදල්වලින් යන්ත්‍ර 2 සඳහා මිල ගණන් ඉදිරිපත් කර තිබී ඇති අතර ඒ අතරින් දෙදෙනෙකු පමණක් විදේශ මුදල් සඳහා ශ්‍රී ලංකා රුපියල් අනුපාතය සඳහන් කර තිබේ. ඔවුන් දේශීය වියදම් ශ්‍රී ලංකා රුපියල්වලින් සඳහන් කර තිබෙන අතර සියලු බදු මුදල්ද එම මිල ගණන්වලට ඇතුළත් කර තිබී ඇත.
යන්ත්‍ර දෙක සඳහා ඇමරිකානු ඩොලර්වලින් සීඅයිඑෆ් මිල හෙවත් නැව් ගාස්තු හා රක්ෂණයද ඇතුළත් මිල සඳහන් කර හා දේශීය වියදම්ද ඇමරිකානු ඩොලර්වලින් සඳහන් කර එක් ටෙන්ඩර්කරුවෙකු සිය මිල ඉදිරිපත් කර ඇති අතර එහි කිසිදු බදු මුදලක්ද ඇතුළත්ව තිබී නැත. එමෙන්ම ඇමරිකානු ඩොලර් සඳහා වන ශ්‍රී ලංකා රුපියල් අනුපාතයද ඔහු සඳහන් කර තිබී නැත. එම ආයතනය ටෙන්ඩරය ලබාදුන් ඩැක්ස් ඉංජිනියරින් ප්‍රයිවට් ලිමිටඩ් වන අතර ඔවුන් ටෙන්ඩර්කරු විසින් සියලු බදු මුදල් ගෙවිය යුතු යන කොන්දේසිය එහිදී උල්ලංඝනය කර තිබී ඇත.
ඩැක්ස් ඉංජිනියරින් ප්‍රයිවට් ලිමිටඩ් ආයතනයේ ලිපි ශීර්ෂය සහිත ටෙන්ඩරය විවෘත කළ දිනය යෙදූ ලිපියක් ටෙන්ඩරය පිළිබඳ වන ප්‍රධාන ගොනුවේ තිබී සොයාගෙන ඇති අතර එහි සඳහන් කර තිබී ඇත්තේ එම ආයතනය මිල ගණන් ඉදිරිපත් කර ඇත්තේ ලෝඩර් යන්ත්‍ර ගෙන්වීමට අදාළ ණයවර ලිපිය ලංකා මිනරල් සෑන්ඩ් ආයතනය විවෘත කිරීමේ පදනමින් වන බවයි. එමෙන්ම ඒ සඳහා යන සියලු වියදම් සහ ආනයනය වෙනුවෙන් ගෙවිය යුතු සියලු බදු මුදල් ලංකා මිනරල් සෑන්ඩ් ආයතනය ගෙවන පදනමින් වන බවයි.
එහෙත් එම ලිපිය සම්බන්ධයෙන් වන කිසිදු සඳහනක් ටෙන්ඩරය විවෘත කළ කමිටු වාර්තාවේ සඳහන්ව තිබී නැති අතර ටෙන්ඩරය විවෘත කළ අවස්ථාවේ එම ස්ථානයේ සිටි ඩැක්ස් ඉංජිනියරින් ප්‍රයිවට් ලිමිටඩ් ආයතනයේ නියෝජිතයාද ඒ පිළිබඳ කිසිවක් ප්‍රකාශ කර නැත. එසේම විවෘත කරන ලද සියලු ටෙන්ඩර්වලට අදාළ පිටුවලට තබා තිබූ 2024.08.06 දින සහිත ලංකා මිනරල් සෑන්ඩ්ස් ආයතනයේ මුද්‍රාවද එම ලිපියේ සඳහන්ව තිබී නැත. ඒ අනුව එම ලිපිය පසුව ඇතුළත් කරන ලද ලිපියක් බවට සැක කෙරෙන අතර ඊට හේතුව වන්නේ එහි සඳහන් කොන්දේසි සියල්ලම ටෙන්ඩර් පත්‍රිකාවේ සඳහන් කර ඇති ටෙන්ඩර්කරුවන් විසින් සපුරාලිය යුතු අත්‍යවශ්‍යම කොන්දේසිවලට සපුරාම පටහැනි වීමයි.
ලැබුන මිල ගණන් 7 ඇගැයීම සඳහා පත්කරන ලද පස් දෙනෙකුගෙන් සමන්විත තාක්ෂණික ඇගැයීම් කමිටුව එම ලිපිය පිළිබඳව කිසිදු අවධානයක් හෝ සැලකිල්ලක් යොමුකර නැති අතර එම තාක්ෂණික කමිටු සාමාජිකයන් 2025.01.06 දින සහිතව අත්සන් කරන ලද ලිපියක් මගින් කියා ඇත්තේ එම ලිපිය ඔවුන්ගේ ඇගැයීමෙන් මඟහැරී ඇති එකක් බවයි.
කෙසේ වෙතත් මෙම ඩැක්ස් ඉංජිනියරින් ප්‍රයිවට් ලිමිටඩ් ආයතනයට තාක්ෂණික කමිටුව විසින් ටෙන්ඩරය ලබාදීම සඳහා නිර්දේශ කර ඇති අතර ඒ මිල ගණන් ඉදිරිපත් කළ ආයතන අතර එම ආයතනය අවම මිලෙන් පස්වන ස්ථානයේ සිටියදීය. ඔවුන්ට වඩා අඩුම මිල ගණන් ඉදිරිපත් කරන ලද ආයතන 4ක් තාක්ෂණික ඇගැයීම් කමිටුව ඉවත් කර ඇත. ඒ එම සමාගම් ඉදිරිපතත් කළ ලෝඩර් යන්ත්‍ර වර්ග ප්‍රතික්ෂේප කරමින්ය. ඒ අනුව ඉතිරි වී ඇත්තේ ඩැක්ස් සමාගම සහ ඔවුන්ට වඩා වැඩි මිල ගණන් ඉදිරිපත් කළ සමාගම් දෙකක් පමණය. එයින්ද වැඩිම මිල ගණන් ඉදිරිපත් කර තිබූ බ්‍රවුන් ඇන්ඩ් කම්පැණි සමාගම ඉවත්කර ඇත.
යුනයිටඩ් මර්කරි ගෲප් ලංකා ප්‍රයිවට් ලිමිටඩ් අඩුම මිල ගණන ඉදිරිපත් කර ඇති අතර ඒ බදු සමඟ රුපියල් 54,280,0000ක් ලෙසය. ඊලඟට යුනිමෝ එන්ටර්ප්‍රයිසස් ලිමිටඩ් බදු සමඟ රුපියල් 71,474,547ක් ඉදිරිපත් කර ඇත. වෝකර් ඇන්ඩ් ග්‍රිජ් මෙෂනරි ප්‍රයිවට් ලිමිටඩ් ඇමරිකානු ඩොලර් 178,000ක මිලක් ඉදිරිපත් කර ඇති අතර එහි ඇමරිකානු ඩොලරයක රුපියල් අනුපාතය 310ක් ලෙස සඳහන් කර තිබී ඇත. එහි රුපියල් අගය 55,180,000ක් වී ඇත. ඊට අමතරව බදු වශයෙන් රුපියල් 18,397,052ක් පෙන්වා තිබී ඇත. ඒ අනුව මුළු මිල රුපියල් 73,577,052ක් වී ඇත. ඩීසල් ඇන්ඩ් මෝටර් ඉංජිනියරින් (ඩිමෝ) සමාගම බදු ඇතුළත්ව රුපියල් 117,174,000ක මිලක් ඉදිරිපත් කර ඇත.
ඉන්පසු සිට ඇත්තේ ඩැක්ස් ඉංජිනියරින් ප්‍රයිවට් ලිමිටඩ් සමාගම වන අතර ඩැක්ස් සමාගම ඔවුන්ගේ මිල ගණන් ඉදිරිපත් කර ඇත්තේ ලෝඩර් යන්ත්‍ර 2 සඳහා සීඅයිඑෆ් හෙවත් නැව් සහ රක්ෂණය ඇතුළු මිල ඇමරිකානු ඩොලර් 370,820ක්, දේශීය වියදම් ඇමරිකානු ඩොලර් 28,124ක්, දේශීය ඒජන්ත කොමිස් ඇමරිකානු ඩොලර් 11,120ක් හා පුල්මුඩේ සඳහා ප්‍රවාහනය ඇමරිකානු ඩොලර් 2156ක් වශයෙනි. ඒ අනුව ඔවුන්ගේ මුළු මිල ගණන ඇමරිකානු ඩොලර් 412,220ක් වී ඇත. එහෙත් එහි විනිමය අනුපාතයක් සඳහන් කර තිබී නැති අතර බදු පිළිබඳවද කිසිවක් සඳහන් කර තිබී නැත.
ඊලඟට යුනයිටඩ් ට්‍රැක්ටර් ඇන්ඩ් ඉක්වික්මන්ට් ප්‍රයිවට් ලිමිටඩ් මිල ගණන් ඉදිරිපත් කර ඇති අතර ඒ බදු ඇතුළත්ව රුපියල් 141,700,000ක් ලෙසය. බ්‍රවුන් ඇන්ඩ් කම්පැණි ජපන් යෙන් මිලියන 69.400ක් යන්ත්‍ර ආනයනය සඳහා ඉදිරිපත් කර ඇති අතර එහි රුපියල් අනුපාතය 2ක් වශයෙන් සඳහන් කර තිබී ඇත. එහි දේශීය වියදම් රුපියල් 17,010,000ක් හා වැට් බදු රුපියල් 28,045,800ක් ලෙස දක්වා තිබී ඇත.
මේ ආකාරයට වූ අඩුම මිල ගණන් ඉදිරිපත් කළ ලංසුකරුවන් නිර්දේශ නොකර තාක්ෂණික ඇගැයීම් කමිටුව මිල ගණන් අනුව 5 වන ස්ථානයේ සිටි ඩැක්ස් සමාගම තෝරාගෙන ඇති අතර ලංසු විවෘත කළ දිනය වූ 2024.08.06 දිනට දින 28කට පෙර ඇමරිකානු ඩොලර් එකකට ශ්‍රී ලංකා රුපියල් අනුපාතය වී ඇත්තේ 308.5052කි.
ඇමරිකානු ඩොලරයක් සඳහා වන එම රුපියල් අනුපාතය අනුව ඩැක්ස් සමාගමේ වැට් රහිත මිල රුපියල් 140,970,502.20ක් වී ඇති අතර වැට් බදු සහිත මිල රුපියල් 165,166,080.69ක් වී ඇත. තාක්ෂණික ඇගැයීම් කමිටුව ඩැක්ස් සමාගම සමඟ අවසන් වශයෙන් තෝරාගත් යුනයිටඩ් ට්‍රැක්ටර් ඇන්ඩ් ඉක්වික්මන්ට් සමාගමේ වැට් රහිත මිලට වඩා ඩැක්ස් සමාගමේ මිල රුපියල් 10,970,520.20ක් හෙවත් ආසන්න වශයෙන් රුපියල් කෝටියකින් වැඩි බව පෙනී ගොස් ඇත. එමෙන්ම බදු සහිතව යුනයිටඩ් ට්‍රැක්ටර් ඇන්ඩ් ඉක්වික්මන්ට් ඉදිරිපත් කළ මිලට වඩා ඩැක්ස් සමාගම ඉදිරිපත් කළ මිල රුපියල් 23,466,081 කින් හෙවත් ආසන්න වශයෙන් 2 කෝටි 34 ලක්ෂයකින් පමණ වැඩි බව අල්ලස් හෝ දූෂණ චෝදනා විමර්ශන කොමිසමට ඉදිරිපත් කර ඇති පැමිණිල්ලේ සඳහන් වේ.
ඒ අනුව 5වන ස්ථානයට අඩුම මිල ඉදිරිපත් කළ ලංසුකරු වශයෙන් සැලකිය හැක්කේ ඩැක්ස් සමාගම නොව යුනයිටඩ් ට්‍රැක්ටර් ඇන්ඩ් ඉක්විප්මන්ට් සමාගම බව ඒ සම්බන්ධයෙන් වන විමර්ශන වාර්තාවේ සඳහන් කර ඇත.
එමෙන්ම මීට පෙර යුනයිටඩ් ට්‍රැක්ටර් ඇන්ඩ් ඉක්විප්මන්ට් සැපයූ කැටිපිලර් වර්ගයේ ලොඩර් යන්ත්‍ර 5ක් හොඳ තත්වයේ පුල්මුඩේ යන්ත්‍රාගාරයේ තිබෙන බව තාක්ෂණික ඇගැයීම් කමිටුව සඳහන් කර තිබී ඇත. එහෙත් කැටිපිලර් වර්ගයේ ලෝඩර්වල ඒකාධිකාරිත්වයක් වළක්වා ගැනීම සඳහා ඩැක්ස් සමාගමේ යන්ත්‍ර මිලදී ගැණීමට නිර්දේශ කළ බවට අපූරු පිළිතුරක්ද තාක්ෂණික ඇගැයීම් කමිටුව ඔවුන්ගේ නිර්දේශ සාධාරණීකරණය කිරීම වෙනුවෙන් ලබාදී තිබේ.
මීට අමතරව තාක්ෂණික ඇගැයීම් කමිටුව සිය වාර්තාව මගින් ඩැක්ස් සමාගමෙන් පමණක් වට්ටම් ලබා ගන්නා ලෙස හා බැඳුම්කර කාලය දීර්ඝ කරගන්නා ලෙස ලංකා මිනරල් සෑන්ඩ්ස් ආයතනයට උපදෙස් ලබාදී ඇත. ඒ අනුව ඩැක්ස් සමාගම ලබාදී ඇති ඩොලර් 4000ක වට්ටම මෙම සැසැදීම සඳහා අදාළ කරගත යුතු නැති බව පැමිණිල්ලේ පෙන්වා දෙයි. ඒ අනෙකුත් සමාගම්වලින් එවැනි ඉල්ලීමක් සිදුකරන ලෙස තාක්ෂණික කමිටුව උපදෙස් ලබාදී නැති නිසාය. එසේම ඩැක්ස් සමාගම වැට් ලියාපදිංචිය අවලංගු වී ඇති සමාගමක් බවද එහි සඳහන් කරයි.
එහෙත් තාක්ෂණික ඇගැයීම් කමිටුව වැරදි සහගත හා වංචාකාරි ලෙස ලංකා මිනරල් සෑන්ඩ් සමාගමේ ප්‍රසම්පාදන කමිටුව වෙත කර ඇති නිර්දේශය අනුව ඉතා අධික මිලක් ඉදිරිපත් කර තිබූ ඩැක්ස් සමාගමට ටෙන්ඩරය පිරිනැමීමට එම කමිටුව තීරණය කර ඇති බවද එම පැමිණිල්ලේ සඳහන් කරයි.
මෙසේ ණයවර ලිපිය අත්හිටුවීමෙන් පසු ලංකා මිනරල් සෑන්ඩ් ආයතනය ඒ සම්බන්ධයෙන් ගන්නා ඉදිරි ක්‍රියාමාර්ග පිළිබඳව නීතිපතිවරයාගෙන් උපදෙස් විමසා තිබේ. ඩැක්ස් සමාගම ඒ සම්බන්ධයෙන් කර්මාන්ත හා ව්‍යවසායකත්ව සංවර්ධන අමාත්‍යාංශයට මෙන්ම ජාතික ප්‍රසම්පාදන කොමිසමටද පැමිණිලි ඉදිරිපත් කර තිබේ. එම පැමිණිලි සම්බන්ධයෙන් කළ විමසීම්වලදී ප්‍රසම්පාදන කොමිසමට මෙන්ම කර්මාන්ත හා ව්‍යවසායකත්ව සංවර්ධන අමාත්‍යාංශයට ලංකා මිනරල් සෑන්ඩ්ස් ආයතනය කරුණු ඉදිරිපත් කර තිබේ.
මෙම කාලයේදී එම ප්‍රසම්පාදනය ලබාදෙන ලෙස කර්මාන්ත හා ව්‍යවසායකත්ව සංවර්ධන අමාත්‍යාංශය තුළ කටයුතු කරන මෙම ආණ්ඩුවේ දේශපාලන පත්වීම්ධාරීන්ගෙන් දිගින් දිගටම ලංකා මිනරල් සෑන්ඩ් ආයතනයට බලපෑම් එල්ල වී ඇත.
පසුව අප්‍රේල් 30 වැනිදා අමාත්‍යාංශ ලේකම්වරිය මිනරල් සෑන්ඩ්ස් බලධාරීන් ගෙන්වා මේ පිළිබඳව සාකච්ඡා කර තිබෙන අතර එම ප්‍රසම්පාදනය ලබාදෙන ලෙස ඉල්ලීමක් කර ඇත. එහෙත් මිනරල් සෑන්ඩ්ස් බලධාරීන් ප්‍රකාශ කර ඇත්තේ අමාත්‍යාංශ ලේකම්වරිය ඒ සම්බන්ධයෙන් උපදෙස් ලබාදෙන්නේ නම් එසේ කළ හැකි බවයි. එහෙත් ඇය කියා ඇත්තේ එසේ උපදෙස් ලබාදී ඇයට නඩුවලට මුහුණ දීමට නොහැකි බවයි. අවසාන උපදෙස වී ඇත්තේ මිනරල් සෑන්ඩ්ස් අධ්‍යක්ෂ මණ්ඩලය රැස්වී ඒ පිළිබඳ තීරණයක් ගන්නා ලෙසයි. ඒ අනුව රැස්වූ මිනරල් සෑන්ඩ්ස් අධ්‍යක්ෂ මණ්ඩලය තීරණය කර ඇත්තේ ප්‍රසම්පාදන කොමිසමේ පිළිතුර අනුව ඉදිරි කටයුතු සිදුකිරීමටය.
අවසානයේ ප්‍රසම්පාදන කොමිසම ඹීනරල් සෑන්ඩ්ස් ආයතනයට ලබාදී ඇති පිළිතුර වී ඇත්තේ නීතිපතිවරයාගේ උපදෙස් අනුව හා ටෙන්ඩර් ගිවිසුම් අනුව කටයුතු කරන ලෙසයි.
ඒ අනුව අශෝක පීරිස් මහතා ඉවත් කිරීම සඳහා ආසන්නම හේතුව වශයෙන් අපට හඳුනාගත හැක්කේ රජයට රුපියල් කෝටි 2කට වඩා පාඩුවක් සිදුකරමින් සිදුවන්නට ගිය එම ගනුදෙනුව නැවැත්වීම බව පෙනේ. මන්ද එම ටෙන්ඩරය ලබාදෙන ලෙසට ඔහුට අමාත්‍යාංශයෙන් බලපෑම් එල්ල වී තිබියදී ඔහු එය සිදුකර නැති හෙයිනි. මේ අනුව අලුත් සභාපතිවරයා යටතේ වැරදි ලෙස සිදුවී ඇති එම ගනුදෙනුව සිදුවිය හැකි බව අනුමාන කළ හැකිය.
ඉන්දියාවේ අදානි සමග ඇතිකරගත් සුළං බලාගාර ගිවිසුම අත්හිටු වීමට සිදුවූයේ ඒ සඳහා වැඩි මිලක් ගෙවීමට සිදුවන නිසා බව ජනාධිපතිවරයා රටට කී කතාව මෙහිදී සිහිවේ. ඒ අර්ථයෙන් ගත් කල අශෝක පීරිස් මහතා සිදුකර ඇත්තේ ඔහුට බාරදුන් ආයතනයේ වැඩි මිල වැරදි ලෙස ලබාදුන් ටෙන්ඩරයක ණයවර ලිපි අත්හිටුවා විමර්ශනයක් ආරම්භ කර ඒ සම්බන්ධයෙන් ප්‍රසම්පාදන කොමිසමේ හා නීතිපතිවරයාගේ උපදෙස් පැතීමය. එහෙත් ඔහුව එම තනතුරෙන් ඉවත් කිරීම සඳහා එම කටයුතු වරදක් වී ඇති බව මෙම ඉවත් කිරීමෙන් පෙන්නුම් කරයි. ඉන් ගම්‍ය වන දෙය වන්නේ වත්මන් ආණ්ඩුව ඔවුන්ගේ දූෂණ විරෝධී ක්‍රියාකාරිත්වයෙන් දැන් ඉවත් වී ඇති බවද?
