අවුරුදු උත්සව, තරුණ වෙසක් උලෙළ, පොසොන් කලාපය, තරුණ හමුව, 31දා රෑ සැණකෙළි, ප්‍රදර්ශන හා සංගීත ප්‍රසංග වාර්ෂික සැලැස්මේ තිබුණු ඒවා නොවෙයි
වියදම් කර ඇත්තේ තරුණ සේවා සභාවේ හා ජනාධිපති කාර්යාලයේ මුදල්
ඊළඟට හිටපු ඇමති හරීන්ගේ වාරයද?
‘2024 පූර්ව ජනාධිපති මැතිවරණ කාලපරිච්ඡේදය වූ 2024 ජනවාරි සිට අගෝස්තු දක්වා මාස 08ක කාලය තුළදී තාරුණ්‍යය පීඩාවෙන් මුදවා ගැනීම සඳහා වූ වැඩසටහන් 06ක් ලෙස ීප්රඑ ශදමඑය අවුරුදු උත්සවය, ජාතික තරුණ වෙසක් උළෙල, ජාතික තුරුණු පොසොන් කලාපය, තරුණ හමුව වැඩසටහන, එය ප්‍රදර්ශන හා සංගීත ප්‍රසංග පවත්වා තිබුණි. ඒ වෙනුවෙන් රු. මිලියන 538.79ක් වැයකර තිබූ අතර එයින් තවදුරටත් ගෙවිය යුතු වූ මුදල රු. මිලියන 45.29ක් වී තිබුණි. එම වැඩසටහන් කිසිවක් සභාවේ ප්‍රමුඛතා කාර්යයන්වලට අදාළ වැඩසටහන් වී නොතිබුණ අතර, ඒවා වාර්ෂික ක්‍රියාකාරී සැලැස්මේද ඇතුළත් වී නොතිබුණි. මෙම වැඩසටහන් සඳහා ජනාධිපති ලේකම් කාර්යාලයෙන් ලබාදීමට අනුමත කර තිබූ රු. මිලියන 493.25 කින් රු. මිලියන 74.20ක් පමණක් සභාව වෙත ලැබී තිබුණි. එබැවින් ඉතිරි වියදම වන රු. මිලියන 464.59ක් සභාවේ වාර්ෂික ප්‍රාග්ධන ප්‍රතිපාදන උපයෝගී කර ගනිමින් වැය කර තිබුණි.’
එසේ සඳහන් වන්නේ, 2024 ජනවාරි සිට අගෝස්තු දක්වා කාල පරිච්ඡේදය තුළදී ජාතික තරුණ සේවා සභාව විසින් තාරුණ්‍යය පීඩාවෙන් මුදවා ගැනීම යන තේමාව යටතේ සිදුකරන ලද වැඩසටහන් 6ක විධිමත්භාවය, ඵලදායීත්වය සභාවේ අරමුණුවලට අනුකූලතාව පිළිබඳව සිදුකරන ලද විශේෂ විගණන වාර්තාවේය.
ඉන් හොඳටම පෙන්නුම් කරන දෙය වන්නේ ශ්‍රී ලංකා නැමැති දරුවා ආර්ථික අර්බුදයෙන් ගොඩ ගැනීම සඳහා හිටපු ජනාධිපති රනිල් වික්‍රමසිංහ වැල් පාලමේ ගියේ යැයි කියන අසීරු ගමන නොව ඔහුගේ ජනාධිපතිවරණ ජයග්‍රහණය වෙනුවෙන් රාජ්‍ය මුදල් අවභාවිත කරමින් හැසීරී ඇති නිර්ලජ්ජිත ආකාරයයි.
මෙම රාජ්‍ය මුදල් වැය කිරීම සම්බන්ධයෙන් හිටපු තරුණ කටයුතු හා ක්‍රීඩා ඇමති හරීන් ප්‍රනාන්දු අත්අඩංගුවට ගැනීමේ තත්වයක් පවතින බවට මේ වනවිට අන්තර්ජාලය මත පදනම් වූ මාධ්‍ය වාර්තා කරමින් පවතී. ඒ කෙසේ වෙතත් මෙහිදී වැදගත් වන්නේ එම රාජ්‍ය මුදල් අවභාවිතය සිදුකර ඇත්තේ කෙසේද යන්න පැහැදිලි කර ගැනීමයි.
හිටපු ක්‍රීඩා හා යෞවන කටයුතු ඇමති හරීන් ප්‍රනාන්දු විසින් 2024 මැයි 27 දින අංක 2024/18 දරන අමාත්‍ය මණ්ඩල සංදේශයෙන් ඒ සඳහා රු. මිලියන 400ක ප්‍රතිපාදන ඉල්ලා ඇති අතර ඒ සඳහා අමාත්‍ය මණ්ඩලය 2024 ජුලි 10 දින අනුමැතිය ලබාදී තිබේ. නැවතත් 2024 ජුලි 09 දින අංක 2024/22 දරන අමාත්‍ය මණ්ඩල සංදේශයෙන් රු. මිලියන 398.25ක ප්‍රතිපාදන හරීන් ප්‍රනාන්දු හිටපු ඇමතිවරයා ඉල්ලා ඇති අතර ඒ සඳහා අමාත්‍ය මණ්ඩලය 2024 ජුලි 15 දින අනුමැතිය ලබාදී තිබේ. එසේ වුවද අංක අමප/24/1339/624/021 හා 2024 ජුලි 15 දිනැති අමාත්‍ය මණ්ඩල තීරණය පමණක් ක්‍රියාත්මක කර ඇත. මෙම අමාත්‍ය මණ්ඩල සංදේශ සඳහා මුදල් ඇමතිවරයා ලෙස හිටපු ජනාධිපති රනිල් වික්‍රමසිංහ සිය නිරීක්ෂණ ලබාදෙමින් ඒ සඳහා වැඩිදුරටත් සහයෝගය ලබාදී තිබේ. ඒ ඔහුගේ ජනාධිපතිවරණ ප්‍රචාරණය ආර්ථික අර්බුදයෙන් රට ගලවා ගැනීමේ ව්‍යායාමයක් වශයෙන් සිතුව නිසාද විය හැකිය.
එම වැඩසටහන් 06 ක්‍රියාත්මක කිරීම සඳහා රු. මිලියන 538.08ක් ඇස්තමේන්තු කර තිබුණද, රු. මිලියන 538.79ක් වැයකර තිබී ඇත. එයින් රු. මිලියන 493.5ක් ගෙවා තිබී ඇති අතර 2024 දෙසැම්බර් 31 දිනට හිඟය රු. මිලියන 45.29ක් වී ඇත.
එම වියදම්වලින් රු. මිලියන 74.20ක් ජනාධිපති ලේකම් කාර්යාලයේ ප්‍රතිපාදනවලින් වැයකර තිබෙන අතර ඉතිරි රු. මිලියන 464.59ක් තරුණ ධාරිතා වැඩසටහන් වෙනුවෙන් වෙන්කර තිබූ ප්‍රතිපාදනවලින් වැයකර තිබේ. එම වියදම්වලින් රු. මිලියන 100ක් ගෙවීම සඳහා වවුචර් 33කට අදාළ චෙක්පත් 13ක් 2024 සැප්තැම්බර් 20 දින එනම් 2024 ජනාධිපතිවරණයට පෙර දින ලියා අත්සන් කර ඇති බවද විගණනය නිරීක්ෂණය කර ඇත.
එම මුළු වැයෙන් එක් වැඩසටහනක් වූ සංගීත ප්‍රසංග සමග පවත්වන ස්මාර්ට් යූත් ප්‍රදර්ශන 03ක් සහ සංගීත ප්‍රසංග 11ක් පැවැත්වීම සඳහා රු. මිලියන 323.39ක් හෙවත් මුළු වියදමෙන් 60%ක් වැය කර තිබී ඇත. එමෙන්ම ඒ සඳහා ඇමති මණ්ඩල අනුමැතිය ලැබීමටත් පෙර සංගීත ප්‍රසංග සමග පවත්වන ස්මාර්ට් යූත් ප්‍රදර්ශන 03ක් හා සංගීත ප්‍රසංග 05ක් පවත්වා රු. මිලියන 259.83ක් වැයකර තිබී ඇත. ඒ සම්බන්ධයෙන් විගණනය විශේෂයෙන් සඳහන් කරන්නේ එම ප්‍රදර්ශන හා සංගීත ප්‍රසංග 2024 අගෝස්තු මස ජනාධිපතිවරණයේ නාම යෝජනා ඉදිරිපත් වීම හේතුවෙන් නොපවත්වන ලෙස මැතිවරණ කොමසාරිස් විසින් දැනුම් දී තිබියදීත්, එය නොසලකා සංගීත ප්‍රසංග පවත්වා තිබූ බවයි. එමෙන්ම එම වැඩසටහන්වලට අදාළ ලිපිගොනුවක්ද අස්ථාන ගතවී තිබූ බවයි. තවද ස්මාර්ට් යූත් ප්‍රදර්ශන හා සංගීත ප්‍රසංග පටිගත කිරීම වෙනුවෙන් රු. මිලියන 12ක වියදමක් දරා තිබුණද, එම වීඩියෝ පට තරුණ සේවා සභාවේ ඉන්වෙන්ටි්‍ර ලේඛනයේ ඇතුළත් කර නොතිබූ බවයි. ඒවා 2025 පෙබරවාරි 28 දින තෙක් විගණය වෙත ඉදිරිපත් කිරීමටද අපොහොසත් වී තිබුණ බවයි.
ීප්රඑ ශදමඑය අවුරුදු උත්සවය, ජාතික තරුණ වෙසක් උළෙල, ජාතික තුරුණු පොසොන් කලාපය (මහරගම), පොසොන් වැඩසටහන (අම්පාර), තරුණ හමුව වැඩසටහන (අම්පාර), තරුණ හමුව වැඩසටහන (යාපනය),එය ප්‍රදර්ශන හා සංගීත ප්‍රසංග යන වැඩසටහන් 06 ඒ යටතේ පවත්වා ඇත. එම ප්‍රදර්ශන හා සංගීත ප්‍රසංග පවත්වා ඇත්තේ මහරගම ජාතික තරුණ සේවා සභාව, ගාල්ල සමනළ ක්‍රීඩාංගණය, අම්පාර වීරසිංහ ක්‍රීඩාංගණය, කුලියාපිටිය කාර්මික විද්‍යාලය, පුත්තලම වෙරළ තීර ක්‍රීඩාංගණය, දඹුල්ල රංගිරි දඹුලු ජාත්‍යන්තර ක්‍රීඩාංගණය අසල, හැටන්, යාපනය මුත්තවේලී ක්‍රීඩාංගණය, මහියංගණය පොදු ක්‍රීඩාංගණය, හිඟුරක්ගොඩ මහජන ක්‍රීඩාංගණය, බණ්ඩාරවෙල නගර සභා ක්‍රීඩාංගණය, කොළඹ ඛෙත්තාරාම ක්‍රීඩාංගණය, වැලිසර, කොළඹ තුරග තරග පිටිය යන ස්ථානවලය. ඒ අතරින් 15 වන වැඩසටහන පැවැත්වූයේ කොහේද යන්න පිළිබඳ තොරතුරක් විගණනයට ඉදිරිපත් නොවූ බව එම වාර්තාවේ සඳහන් කරයි.
එම වැඩසටහන් 06 ක්‍රියාත්මක කිරීමේදී සමස්තයක් වශයෙන් රජයේ ප්‍රසම්පාදන මාර්ගෝපදේශ අනුගමනය නොකරමින් ප්‍රසම්පාදන කටයුතු සිදුකර තිබූ අවස්ථා විගණනය නිරීක්ෂණය කර ඇත. තරුණ සේවා සභාවේ ලියාපදිංචි වි නොතිබුණ, එහෙත් එහි අධ්‍යක්ෂ ජනරාල්වරයා විසින් නම් කරන ලද ආයතනවලින් පමණක් ටී ෂර්ට් හා ස්කිනීස්, රූකඩ සංදර්ශන, තොරණ සැකිලි, කොඩි කණු වැනි දෑ ප්‍රසම්පාදනය කර තිබේ. සමහරක් ගොඩනැගිලි ද්‍රව්‍ය සැපයුම්කරුවෙකුගෙන් මිලදී ගෙන තිබූ අවස්ථාද තිබී ඇත. ඒ සම්බන්ධයෙන් සභාවේ අභ්‍යන්තර විගණන අංශය විසින් සිදුකරන ලද ස්ථානීය පරීක්ෂා කිරීමේදී සැපයුම් කරන ලද ආයතන නොතිබෙන බව සනාථ කර තිබියදීත් ගෙවීම් සිදුකර තිබේ. එමෙන්ම එකම කාර්යයට දෙවරක් හා අමතර ගෙවීම් කළ අවස්ථාද, ඉටු නොකළ කාර්යයන් සඳහා ගෙවීම් කර තිබූ අවස්ථාද විගණනය නිරීක්ෂණය කර ඇත.
යාපනය හා අම්පාර නගරවල තරුණ හමුව නමින් අරමුණක් නිශ්චය කර නොගත් වැඩසටහන් දෙකක් රු. මිලියන 29.31ක් වැය කරමින් හිටපු ජනාධිපති රනිල් වික්‍රමසිංහගේ ප්‍රධානත්වයෙන් පවත්වා ඇති අතර ඒ සඳහා ප්‍රතිපාදනයක් වෙන්කර තිබී නැත. ඊට අමතරව අම්පාර පොසොන් කලාප වැඩ සටහන යටතේ බාහිර පාර්ශ්වයක් විසින් සංවිධානය කළ වැඩසටහනක් සඳහා තරුණ සේවා සභාව විසින් රු. මිලියන 14.91ක් වැයකර තිබෙන බවද විගණකාධිපතිවරයා සඳහන් කර තිබේ.
එම වැඩසටහන් අතර වූ 31 ිඑ භසටයඑ ශදමඑය ක්‍ැකැඉර්එසදබ වැඩ සටහන සඳහා අධ්‍යක්ෂ මණ්ඩල අනුමැතියක් නොමැතිව රු. මිලියන 10.29ක් තරුණ සේවා සභාව විසින් වැයකර තිබෙන අතර ඒ වෙනුවෙන් වියදම් දැරීම සඳහා රු. මිලියන 5ක් ආපසු ගෙවීමේ පදනම මත යෞවන සමාජ සම්මේලනය වෙත ලබාදී තිබේ. එසේ වුවද එම වැඩසටහන මගින් ටිකට් පත් අලෙවියෙන් ලද රු. මිලියන 6.86ක ආදායම, බියර් අලෙවි සැල් 02ක් පවත්වා ලද ආදායම සහ වැඩසටහන සඳහා අනුග්‍රහ මගින් ලද මුදල් තරුණ සේවා සභාවට ලැබී නොමැත.
ජාතික වෙසක් උළෙල නමින් ප්‍රතිපාදනයක් වෙන්කර නොතිබියදී ජාතික තරුණ මානසික සුවතා වැඩසටහන වෙනුවෙන් ජනාධිපති ලේකම් කාර්යාලයෙන් වෙන්කර තිබූ රු. මිලියන 61ක් උපයෝජනය කරමින් එම වැඩසටහන පවත්වා තිබේ.
මෙහිදී වැදගත් පොදු නිරීක්ෂණ කිහිපයක් විගණනය විසින් කර තිබේ. ඒ එම වැඩසටහන් ක්‍රියාත්මක කිරීමේ අරමුණු පිළිබඳවයි.
ජාතික තරුණ සේවා සභාව මගින් තරුණ ප්‍රජාවගේ දැනුම, කුසලතා හා ආකල්ප මගින් හරවත්, ගූණවත් හා නැණවත් බවට තරුණ පරපුර පත් කිරීම, යෞවනයන්හට පීඩනයට ඔරොත්තු දීමේ හැකියාව ආත්ම අභිමානය ඇති කිරීම මගින් ජීවිත අභියෝගවලට සාර්ථකව මුහුණ දීමට ශක්තිය ඇති කිරීම ප්‍රධාන අරමුණු කරගෙන එම වැඩසටහන් 15ක් සකස් කළ යුතු ව තිබී ඇත. ඒ වෙනුවට විනෝදාස්වාදය, රස වින්දනය පෙරදැරි කරගෙන එම වැඩසටහන් පවත්වා තිබූ බව විගණනය සඳහන් කරයි.
එම වැඩසටහන සම්බන්ධයෙන් ජාතික ක්‍රමසම්පාදන දෙපාර්තමේන්තුව විසින් අයවැය දෙපාර්තමේන්තුව වෙත යොමුකර ඇති ලිපිය අනුව, ජාතික තරුණ සේවා සභාව විසින් ක්‍රියාත්මක කරන ප්‍රදර්ශන සහ සැණකෙළිය තුළින් 2030 වන විට තරුණයන්ගේ ශාරීරික සෞඛ්‍ය හා මානසික සෞඛ්‍ය මෙන්ම බෝ නොවන රෝග වැළඳීමේ අවස්ථා 1/3ක් දක්වා අඩුකර ගත හැකි බව දක්වා තිබී ඇත. එහෙත් විගණනය සඳහන් කරන්නේ එසේ අඩුකර ගත හැකි බවට විද්‍යාත්මකව සනාථ කර ගැනීමට කරුණු දක්වා නොතිබුණ බවයි.
ව්‍යාපෘතිය නියාමන සැලැස්මෙහි තරුණ කොටස්වල සමාජීය අනිසි හැසිරීමේ අවදානම නැති කිරීම සඳහා දර්ශක ලෙස සංගීත ප්‍රසංගවලට සහභාගි වන තරුණයන් සංඛ්‍යාව පිළිබඳව වාර්තා තබා ගැනීම, ලියාපදිංචි කිරීම සිදු කරන බව දක්වා තිබුණද, එවැනි කිසි ලියාපදිංචි කිරීමක් හෝ ව්‍යාපෘතිය අවසානයේදී වාර්තා තබා ගැනීමක් සිදුකර නොතිබුණ බවද සඳහන් කරයි.
ඒ මගින් පෙනෙන්නේ සිය ඡන්ද ප්‍රචාරක ව්‍යාපෘතිය වෙනුවෙන් කොතරම් බොරු ප්‍රමාණයක් එම රාජ්‍ය මුදල් වැය කිරීම වෙනුවෙන් සාධාරණීකරණය සඳහා ඉදිරිපත් කර ඇතිද යන්නයි.
එමෙන්ම, 2024 ජනවාරි 10 දිනැති 2024/01 ජාතික අයවැය චක්‍රලේඛයට අනුව වර්තමාන අභියෝගාත්මක ආර්ථික වාතාවරණය තුළ රාජ්‍ය වියදම ඉහළ යෑම සහ රාජ්‍ය ආදායම සීමාසහිත වීම හේතුවෙන් රාජ්‍ය මූල්‍ය අවකාශය අතිශයින් සීමාකාරී වී ඇති බැවින් ආර්ථිකය යථාවත් කිරීමේ කාර්යයයේදී වියදම් අඩු කිරීම කෙටිකාලීන සැලසුම් තුළ ප්‍රමුඛතාවයක් ලෙස හඳුනාගෙන ඇති බැවින් අරපිරිමැසුම්දායී ලෙස රජයේ වියදම් දැරීමත්, වියදම් අවම කිරීම සඳහා වන රෙගුලාසි සහ චක්‍රලේඛ දැඩිව පිළිපැදීමත් ඒ ඒ ආයතනවල ස්වභාවය අනුව ගැලපෙන පරිදි වියදම් පාලන උපක්‍රම භාවිතා කිරීමත් කළ යුතු බව පැහැදිලිව දක්වා තිබුණද, ජාතික තරුණ සේවා සභාව විසින් පවත්වන ලද වැඩසටහන්වලදී එම චක්‍රලේඛය උල්ලංඝනය කරමින් ඉහත වියදම් දරා තිබුණු බව විගණනය වැඩිදුරටත් නිරීක්ෂණය කර ඇත.
ඒ මගින් තවදුරටත් පෙන්නුම් කරන්නේ ආර්ථික අර්බුදය හමුවේ වියදම් සීමා කරන ලෙස හා අත්‍යවශ්‍ය වියදම් පමණක් සිදුකරන ලෙස හිටපු ජනාධිපති රනිල් වික්‍රමසිංහ චක්‍රලේඛ පවා නිකුත් කරමින් අන්‍යයන්ට ලබාදුන් උපදෙස් ඔහුම ක්‍රියාත්මක කර නැති බවයි. පළාත් පාලන ඡන්දයට මුදල් නැහැ යැයි කීවාට ඉන් භාගයක් පමණ වන වියදමක් ඔහුගේ එම ප්‍රචාරක ව්‍යාපෘතිය වෙනුවෙන් වැයකර ඇති බවයි.
දක්වා ඇති ප්‍රධාන හා වැදගත් විගණන නිරීක්ෂණයන් හේතුකොටගෙන රජයට සිදුවී ඇති පාඩුව අදාළ නිලධාරීන්ගෙන් අයකර ගැනීමටත්, රජයේ ප්‍රසම්පාදන මාර්ගෝපදේශ, නීති රීති රෙගුලාසි උල්ලංඝනය කරමින් කටයුතු කළ නිලධාරීන්ට විරුද්ධව විනයානුකූලව හා නීතිමය කටයුතු සිදුකිරීම ඇතුළු නිර්දේශද එම වාර්තාව මගින් විගණකාධිපතිවරයා ලබාදී ඇත. එය හරීන් ප්‍රනාන්දු හිටපු ඇමතිවරයා ඇතුළු නිලධාරීන් සම්බන්ධයෙන් ඉදිරියේදී කෙසේ සිදුවෙනු ඇත්ද?
