ජනාධිපති අනුර කුමාර දිසානායකට අවමානයක් ඇතිවන පරිදි ප්‍රකාශයක් කළැයි කියන, ජාතික ලොතරැයි මණ්ඩලයේ හිටපු වැඩබලන ක්‍රියාකාරී අධ්‍යක්ෂ තුසිත හල්ලොලුව මහතාට විරුද්ධව ක්‍රියාකරන්නැයි ඉල්ලමින් මැයි 4 වැනිදා අපරාධ පරීක්ෂණ දෙපාර්තමේන්තුවට පැමිණිල්ලක් ඉදිරිපත් කළේ (2021 අංක 5 දරන පනතෙන් සංශෝධිත) දණ්ඩ නීති සංග්‍රහයේ 120 වැනි වගන්තිය අනුව බව නීතිඥ අමිල එගොඩමහවත්ත කියයි. ඔහු මේ බව පැවසුවේ, සිය යූටියුබ් නාලිකාවට කරන ප්‍රකාශයක් හරහාය.
දණ්ඩ නීති සංග්‍රහයේ 120 වැනි වගන්තිය යනු, ලංකාව ඉංග්‍රීසි යටත්විජිතයක්ව තිබුණු කාලයේ ඊට ඇතුළත් කරන ලදුව, තවමත් පවත්වාගෙන එන දණ්ඩන වගන්තියකි. එයින් කියැවෙන්නේ, වචනයෙන් හෝ සංඥාවලින් හෝ නිරූපණවලින් ලංකාණ්ඩුවට විරුද්ධත්වය දක්වන හැඟීම් ඇවිස්සීම, ඇවිස්සීමට තැත් කිරීම, නීතිය ක්‍රියාත්මක කිරීමේදී වෛරයක් හෝ අගෞරවයක් ඇති කරවීම, ඇතිකරවීමට තැත් කිරීම, නීතියෙන් නොවන අන් ක්‍රමවලින්, පිහිටුවනු ලැබූ යමක් වෙනස්කරවීමට ලංකාණ්ඩුවේ වැසියන් උනන්දු කරවීම, ලංකාණ්ඩුවේ වැසියන් අතර අසන්තෝෂය හෝ විරුද්ධත්වය ඇතිකරවීම, වැසියන් අතර සතුරු- අසමගි හැඟීම් වැඩිදියුණු කිරීමට තැත් කරවීම යනාදි වරදක් කිසිවකු කළොත් අවුරුදු දෙකක් දක්වා කාලයක් ලිහිල් වැඩ ඇති සිරදඬුවමක් දිය හැකි බවයි.
දණ්ඩ නීති සංග්‍රහයේ 120 වැනි වගන්තිය පසුගිය කාලය පුරාම පැවති ආණ්ඩු විසින් යොදාගන්නා ලද්දේ විරුද්ධ පක්ෂයේ අදහස් ප්‍රකාශනය මර්දනය කිරීම සඳහා බවට දැඩි විවේචනයට ලක්වූවකි. ඒ ඒ ආණ්ඩු විවේචනය කෙරෙන පෝස්ටර් ඇලවූ අවස්ථා කිහිපයකදීම පොලිසිය දණ්ඩ නීති සංග්‍රහයේ 120 යටතේ සරසවි සිසුන්, දේශපාලන පක්ෂ ක්‍රියාකාරීන් අත්අඩංගුවට ගැනීම පසුගිය කාලයේ සුලබව දකින්නට ලැබිණ.
2012 පෙබරවාරි මාසයේදී පාර්ලිමේන්තුව ඇමතූ ජනතා විමුක්ති පෙරමුණේ පාර්ලිමේන්තු කණ්ඩායම් නායක මන්ත්‍රී අනුර කුමාර දිසානායක, එවකට පැවැති රාජපක්ෂ ආණ්ඩුවට විරුද්ධව කටුනායක සහ හලාවත පැවැති වීදි විරෝධතාවලදී පොලිසිය දණ්ඩ නීති සංග්‍රහයේ 120 වන වගන්තිය යටතේ රජය විවේචනය කිරීම යන චෝදනාව යටතේ බොහෝ පුද්ගලයින් අත්අඩංගුවට ගෙන ඇති බවට චෝදනා කළේය. 120 වන වගන්තිය මගින්, රජයට විරුද්ධ වීම තහනම් නොකෙරෙන බවද ඔහු එහිදී පවසා තිබිණි. රජය විවේචනය කරන අය අත්අඩංගුවට ගැනීම සඳහා දණ්ඩ නීති සංග්‍රහය වංචනික ලෙස භාවිත කරන නමුත්, ඒ සඳහා එහි විධිවිධාන නොමැති බවද ඔහු කීය.
තුසිත හල්ලොලුව මහතා ජනාධිපතිවරයා සම්බන්ධ ඉහත ප්‍රකාශය කළේ රුපියල් 470,000ක් වටිනා ජාතික ලොතරැයි මණ්ඩලයේ ලැප්ටොප් පරිගණකයක් හා ජංගම දූරකථනයක්, නැවත භාරනොදී සන්තකයේ තබාගත්තේයැයි කියමින් අපරාධ පරීක්ෂණ දෙපාර්තමේන්තුව ඔහුට විරුද්ධව කර ඇති පැමිණිල්ල මත මැයි 2 වැනිදා කොළඹ මහේස්ත්‍රාත් අධිකරණයට ඉදිරිපත්ව, ඇප නියම කරනු ලැබ, අධිකරණයෙන් පිටතට ආ අවස්ථාවේදීය. ‘මේ රටේ දේශපාලකයෙක් වැඩියෙන්ම දූෂණය කරලා තියෙනවා නම්, වැඩියෙන්ම හොරකම් කරලා තියෙනවා නම්, වැඩියෙන්ම සල්ලි තියනෙවා නම් ඒ අනුර කුමාර දිසානායකට. පෞද්ගලික සල්ලි. පක්ෂ සල්ලි නෙවෙයි. එල්ටීටීඊ ඩයස්පෝරා එකත් එක්ක සම්බන්ධ ග්‍රීසියේ නැව් සමාගමකට අනුර කුමාර දිසානායක බිලියන හතරකට, ලක්ෂ හතළිස්දාහකට වැඩිය වැඩිය ආයෝජනය කර තිබෙනවා’ යැයි ඔහු ඒ අවස්ථාවේදී මාධ්‍ය අමතමින් පැවසීය.
ජනාධිපතිවරයා වියට්නාමයේ සංචාරයක යෙදී සිටි අවස්ථාවේදී ඔහුගේ උපදෙස් පරිදි මේ පැමිණිල්ල සීඅයිඩීයට කළේ ජාතික ජනබලවේගයේ නීතිඥ එකතුවේ නීතිඥ අකලංක උක්වත්ත විසිනි. මැයි 4 වැනිදා උදේ ඔහු සිය පැමිණිල්ල කර තිබූ අතර, වහාම ඒ ගැන ලිඛිත ප්‍රකාශයක් දෙන්නැයි සීඅයිඩීයෙන් කරන ලද ඉල්ලීමකට අනුව, එම ලිඛිත ප්‍රකාශය 4 වැනිදා මධ්‍යම රාත්‍රියේදීම බාරදීමට ඔහු පියවර ගෙන තිබිණි.
