පාස්කු ඉරිදා ප්‍රහාරය: සය වසරක අගතිය – සුනන්ද දේශප්‍රිය

පාස්කු ඉරිදා ප්‍රහාරයට සය වසරක් ගෙවුණ පසුගිය සති අන්තයෙහි එම අපරාධයේ දේශපාලන හවුල්කරුවන් බේරා ගැනීමේ නව දුෂ්-තොරතුරු ප්‍රබන්ධයන් බෙදා හැරුණි.

මෙම දුෂ්-තොරතුරුකරුවන් කියා සිටින්නේ, පාස්කු ඉරිදා ප්‍රහාරය ඉස්ලාමීය රාජ්‍ය ව්‍යාපාරය වූ අයිඑස්අයිඑස් මගින් මෙහෙයවන ලද්දක් බව, ඇමෙරිකානු පෙඩරල් විමර්ශන බියුරෝව විසින් තීරණය කරන ලද බවයි. එසේ තිබියදීත් වර්තමාන විමර්ශනය එම ප්‍රහාරය පසුපස සිටි බවට සැක කැරෙන දේශපාලනඥයින් හෝ දේශපාලන බලවේග සෙවීමට දරන වෑයම වැඩකට නැති බවයි.

මෙම දුෂ්-තොරතුරුකරුවන් අතර කුප්‍රසිද්ධ මහාචාර්යවරයෙක් ද දුෂ්-තොරතුරු දේශපාලන ලියුම්කරුවෙක් ද සිටී. එමෙන්ම ඝාතන දේශපාලනයේ කෙළපැමිණයකු වන නැගෙනහිර රාජපක්ෂවරුන්ගේ මහ ඇමති වූ සිවනේසතුරෙයි චන්ද්‍රකාන්තන් හෙවත් පිල්ලෙයාන් ද සිටී.

පිල්ලෙයාන් පාස්කු ප්‍රහාරය පිළිබඳව මහ පොතක් ලියා පළ කළේය. ඔහු එහි දී ඉදිරිපත් කළ නිගමනය වූයේ ද පාස්කු ඉරිදා ප්‍රහාර අයිඑස්අයිඑස් සංවිධානය විසින් සිදුකරවන ලද්දක් බවයි. එවැනි නිගමනයකට ඒමට පිල්ලෙයාන් කළ ගවේෂණයක් නැත. තවද වයස 14 දී එල්ටීටීටීඊ සංවිධානයට බැඳුණ ඔහුට කෘතියක් සම්පාදනය කිරීමට තරම් භාෂා දැනුමක් නැත. ඔහුගේ නමින් එම පොත සම්පාදනය කරන ලද්දේ කවරකු විසින්ද යන්න, පාස්කු ප්‍රහාරය සම්බන්ධයෙන් නොවිසඳුණ අබිරහස් අතරට එක් වූ අලු‍ත්ම එකය.
මෙම නවතම දුෂ්-තොරතුරු ව්‍යාපාරය, පසුගිය සය වසර පුරාම පාස්කු ඉරිදා ප්‍රහාරයන් පසුපස සිටි දේශපාලන බලවේග වසං කිරීමට දරන ලද ප්‍රයත්නයන්හි අලු‍ත් වෙස් මුහුණය.

ඇමෙරිකාවෙහි ලොස් ඇන්ජලීස් අධිකරණයක් මගින් මොහොමඩ් නවුෆර්, මොහොමඩ් අන්සර්, මොහොමඩ් රිස්කාන් සහ අහමඩ් මිල්හාන් හයාතු මොහොමඩ් යන සිව් දෙනාට පාස්කු ප්‍රහාරයහි දී මිය ගිය ඇමෙරිකානුවන් සම්බන්ධයෙන් නඩුවක් පවරා දඬුවම් කරන ලද්දේ මෙයට සිව් වසරකට පෙරය. දැන් හදිසියේම එම නඩු තීන්දුව ද උපුටා දක්වමින්, ජාතික ජන බලවේග රජය යටතෙහි කෙරී ගෙන යන පරීක්ෂණ වැඩකට නැතැයි ආඩපාලි නැගීමට පටන් ගෙන තිබේ.

2001 වසරෙහි සිදු වූ 9-11 ප්‍රහාරයන් සම්බන්ධයෙන් අලිකයිඩා නායක බින් ලාඩන්ට නඩු පැවරුණි. ඉන්දීය අගමැති රජීව් ගාන්ධි ඝාතන නඩුවෙහි දී එල්ටීටීඊ නායක ප්‍රභාකරන් සහ එහි බුද්ධි ප්‍රධානී පොට්ටු අම්මාන්ට නඩු පැවරුණි.

එසේ නමුත් පාස්කු ප්‍රහාරය සම්බන්ධ ඇමෙරිකානු නඩුවෙහි දී සැකකරුවන් ලෙස අයිඑස්අයිඑස් සංවිධානයේ ප්‍රධානීන් නම් කළේ නැත. ඒ පාස්කු ප්‍රහාරයට ඍජු විදේශීය සබඳතාවක් නොතිබූ නිසාය.

කරුණු එසේ තිබියදීත් ඇමෙරිකානු පෙඩරල් විමර්ශන බියුරෝව අනුව යමින් පාස්කු ප්‍රහාරය පිටුපස වූ බලවේග සෙවීම වැඩකට නැතැයි යන දුෂ්-තොරතුරු ප්‍රහාරය ආරම්භ කර ඇත්තේ වත්මන් පරීක්ෂණය නිසි මඟට වැටීමට පටන් ගෙන ඇති බැවින් බියට පත් පිරිස්ය.

2019 නොවැම්බර් 30 දා වව්නතිව් පොලිස් මුරපොලට සහරාන් කණ්ඩායම විසින් කරන ලද ප්‍රහාරය, එල්ටීටීඊය පිටින් යැවීමට කූටෝපාය සකස්කළ පිරිස් දැන් පරීක්ෂණ දැලට හසු වෙමින් තිබේ. දැන් කඩිගාය සෑදී ඇත්තේ, පාස්කු ප්‍රහාරයට දේශපාලන වාසි කතා ඉඩ සැලසූ පිරිස් ද හසුවනු ඇතයි යන බිය නිසාය.

එම පොලිස් මුර පොළට සිදුකළ ප්‍රහාරයෙහි, එල්ටීටීඊය යළි නැගිටීමේ ක්‍රමෝපායක ලකුණු නැති බවට ජනාධිපති සිරිසේනට රහස්‍ය වාර්තාවක් දුන් අසංග අබේගුණසේකරට මහාචර්යවරයකු “නොදන්නා දේ ගැන කතා නොකරන්නැයි” කී බව පසුගිය සතියෙහි වාර්තා විය. අසංග අබේගුණසේකර එවකට මෙරට ජාතික ආරක්ෂක අධ්‍යයන ආයතනයේ (ෂභී) ආරක්ෂක පර්යේෂණ ආයතනයේ ප්‍රධානියා විය. මෙම මහාචාර්යවරයා වත්මන් දුෂ්-තොරතුරු ප්‍රහාරයේ බල කණුවකි.

සහරාන් හෂීම් නායකත්වය දුන් ස්වයං ඝාතක ප්‍රහාරකයනට කිසිදු විදේශයකින් මුදල් හෝ අවි පුහුණුවක් නොලැබුණි. මේ බව එවකට සිටි මෙරට බුද්ධි අංශ ප්‍රධානීන් විසින් තහවුරු කර තිබේ. සහරාන් කණ්ඩායම ඉස්ලාමීය රාජ්‍ය සංවිධානයේ ආන්තික මතවාදයන්ගෙන් පෝෂණය වූ බව සැබෑය. එය 1971 ජවිපෙ කැරලිකරුවන් චේ ගුවේරා යනාදි තත්කාලීන විප්ලවවාදීන්ගේ අදහස් වලින් පෝෂණය වූ පරිදිය.

පාස්කු ඉරිදා ප්‍රහාරය ද එවැනිය. වඩා භයානකය. පාර රාජ්‍යමය සැලැස්මකි. ප්‍රහාරය පිළිබඳ තොරතුරු ඕනෑවටත් වඩා රාජ්‍ය බුද්ධි සේවය සහ යුද හමුදා බුද්ධි අංශය සතුව තිබුණි. දැන දැනම ප්‍රහාරය සිදු වීමට ඉඩ හැරීම සම්බන්ධයෙන් මෙරට ඉහළම අධිකරණය ජනාධිපති සිරිසේන, ආරක්ෂක ලේකම් හේමසිරි ප්‍රනාන්දු, නියෝජ්‍ය පොලිස්පතිවරුන් වූ රාජ්‍ය බුද්ධි සේවා ප්‍රධානී නිලන්ත ජයවර්ධන සහ ජාතික බුද්ධි ප්‍රධානී සිසිර මෙන්ඩිස් වරදකරුවන් කර මිලියන ගණනින් දඩ නියම කරන ලද්දේ එනිසාය.

පාස්කු ඉරිදා ප්‍රහාරය සම්බන්ධයෙන් නොවිසඳුණ ප්‍රධානතම අබිරහස වන්නේ රාජ්‍ය බුද්ධි සේවා ප්‍රධානී නිලන්ත ජයවර්ධන සහ ජනාධිපති සිරිසේන අතර වූ රහස් ගිවිසුමයි. තමා 2019 අප්‍රේල් 21 වන දින සිදුවීමට නියමිත වූ ප්‍රහාරය පිළිබඳව කිසිදු තොරතුරක් ජනාධිපති සිරිසේනට නොකී බව නිලන්ත ජයවර්ධන පුන පුනා කී කාරණය විය. එය ශ්‍රේෂ්ඨාධිකරණය හෝ මහාධිකරණය හෝ පිළිගත්තේ නැත.

නිලන්ත ජයවර්ධන, මෙම බුද්ධි තොරතුර ජනාධිපති සිරිසේනට කියන්නට ඇති බව අවශේෂ බුද්ධි සේවා ප්‍රධානීන් මෙන්ම ආරක්ෂක ලේකම් ව සිටි හේමසිරි ප්‍රනාන්දු ද සිය සාක්ෂිවලදී සඳහන් කළහ.

මේ අනුව අපට බැස ගත හැකි නිගමනය වන්නේ ජනාධිපති සිරිසේන, ඉන්දියාවට ගොස් පුද්ගලික සංචාරයක් යැයි කියා සිංගප්පූරුවට ගියේත් නිසි කල ආපසු නොපැමිණියේත් මෙම ප්‍රහාරය සිදුවීමට ඉඩ සැලසීමට බවයි.

මෙම ව්‍යාජ කතාව නිර්මාණය කිරීමෙන් නිලන්ත ජයවර්ධනට අත් වූ වාසිය කුමක්ද යන ප්‍රශ්නය ගැඹුරට විමසා බැලිය යුතුය.

නිලන්ත ජයවර්ධන

පාස්කු ප්‍රහාරය සිදුවීමට ඉඩ සැලසූ බව සනාථ වන කරුණු බොහෝ තිබේ. එමෙන්ම ප්‍රහාරය සිදුවීමෙන් පසු ඒ පිළිබඳ සත්‍යය හෙළිදරව්වීම වැළැක්වීමටත් ඔහු කූටෝපා ඇටෙව්වේය.
සහරාන් කණ්ඩායම තුළට යවා සිටි බුද්ධි නිලධාරීන්ගෙන් ප්‍රශ්න කිරීම ඔහු නැවැත්වීය. ප්‍රහාරයේ වගකීම පිළිගන්නා ලෙස ඉස්ලාමීය රාජ්‍ය සංවිධානයට දැනුම් දීමට මූලික වූ බණ්ඩාර නම් එවැනි එක් ඒජන්තයකුගෙන් ප්‍රශ්න කිරීම වැළැක්වූයේ ඔහුය. තවමත් ඔහුගෙන් ප්‍රශ්න කිරීමට අවස්ථාව ලැබී නැත.

නිලන්ත ජයවර්ධන, පාර්ලිමේන්තු මංත්‍රී රවිරාජ් ඝාතන නඩුවෙහි දී පැමිණිල්ලට විරුද්ධව විත්තිය වෙනුවෙන් සාක්ෂි දුන්නේ ගෝඨාභය රාජපක්ෂ එම නඩුවෙහි වක්‍ර ලෙස චෝදනා ලබා සිටි නිසාය. එනයින් ඔහු ගෝඨාභය වෙනුවෙන් සිය රැකියාව පවා පරදු තැබූ අයෙකි.
එවැනි අයකු පාස්කු ප්‍රහාර පිළිබඳ ලද බුද්ධි තොරතුරු ගෝඨාභයට දුනුම් දුන් බව සහතිකය. නිලන්ත ජයවර්ධන සිය ජංගම දූරකථනයේ වූ සියලු‍ දත්ත මකා දැමුවේ, පාස්කු ප්‍රහරයන් පිළිබඳ රාජ්‍ය බුද්ධි සේවා ප්‍රධානියා සතු වූ දැවැන්ත තොරතුරු ප්‍රමාණයක් සමඟය. බුද්ධි අංශ ප්‍රධානියකු සිය ජංගම දූරකථනයේ දත්ත, දැවැන්ත ඛේදවාචකයක සාක්ෂි සමඟ මකා දැමුවේ ඔහු සිරිසේන සහ ගෝඨාභය සමඟ කළ කතා බහ සදාකාලිකව විනාශ කිරීමට බවට චෝදනා කිරීමට අපට අයිතියක් තිබේ.

පාස්කු ප්‍රහාරය පිටුපස සිටි බියකරු ත්‍රිකෝණ සම්බන්ධය නිලන්ත, සිරිසේන සහ ගෝටා නොවී නම් එම දත්ත විනාශ කළේ මන්ද? මහ මොළකාර ත්‍රිත්වය එයද?
(බුද්ධි අංශ සහ සහරාන් කණ්ඩායම ගැන දෙවනුව කතා කරමු)