වීඅයිපී හෙවත් ප්‍රභූ පෝලිම් නැතැයි මුලින් කී දළදා දැක්මට මේ වනවිට වීඅයිපී පෝලිමක්ද එක්වී තිබීම සැඟවිය හැකි කරුණක් බවට පත්වී නැත. පොදු මහජනතාව සඳහා දළදා නැරඹීම සඳහා ඇති පෝලිම්වල සිටින ජනතතාවටද මේ වනවිට එය රහසක් වී නැත. ඒ ඔවුන් දින ගණනක් මහ පාරේ හිඳිමින් දළදා නැරඹීමට දුෂ්කර කාර්යයක නිරත වෙද්දී ඔවුන් සිටින පෝලිම් පසු කරමින් දළදා නැරඹීම සඳහා ප්‍රභූවරුන් රැගත් වාහන යෑම සුලබ දසුනක් බවට පත්වී ඇති නිසාය. අප්‍රේල් 23 වැනිදා අපට ලැබුන දර්ශන අනුව එසේ දළදා නැරඹීම සඳහා පෝලිම්වල සිටින ජනතාව දළදා වැඳීම සඳහා වාහනවලින් යන ප්‍රභූන්ට සිය විරෝධය පළකරනු අයුරු දක්නට ලැබේ.
දළදා ප්‍රදර්ශනයේ මෙම ප්‍රභූ පෝලිම දළදා මාලිගාව පිටුපස ඇති ජාත්‍යන්තර කෞතුකාගාරය අසල ඇති දොරටුව මගින් ක්‍රියාත්මක වන අතර එය මල්වතු හා අස්ගිරි විහාර, දියවඩන නිලමේ, පොලිස් හා යුද හමුදා යන අය සඳහා විවෘත වී තිබේ. මල්වතු හා අස්ගිරි විහාරවලට අයත් භික්ෂූන් හා එම භික්ෂූන් විසින් අවසර ලබාදෙන ගිහියන් එම විහාරවලට පැමිණ එහි සිට වාහනවල නැඟී දළදා වැඳීම සඳහා දළදා මාලිගාවේ පිටුපස දොරටුව වෙත පිවිසීම සිදුකර බව අප වාර්තාවේ. දියවඩන නිලමේ මගින් පැමිණෙන පිරිස් ඔහුගේ නිල නිවසට පැමිණ එහි සිට වාහනවලින් දළදා මාලිගාවේ පිටුපස දොරටුවට පැමිණෙන බවද, පොලිස් හා හමුදා සාමාජිකයින් මහනුවර පොලිස් ක්‍රීඩාංගණයට පැමිණ එහි සිට වාහනවලින් දළදා මාලිගාවේ පිටුපස දොරටුවට පැමිණෙන බවද වාර්තාවේ.
එම ස්ථානවල සිට වාහන කිහිපයක් දවසට කිහිප වතාවක් ප්‍රභූන් ප්‍රවාහනය කිරීමේ නිරතවන නිසා එම වාහන සුපුරුදු දසුන් බවට පත්වී තිබේ. එමෙන්ම මල්වතු හා අස්ගිරි විහාරවලින් ගිහියන් රැගත් වාහන පැමිණීමේදී එක් භික්ෂුවක් සමඟ ගිහියන් ප්‍රභූ දළදා පෝලිමට ප්‍රවාහනය කිරීමද සුපුරුදු දෙයක් බවට පත්වී තිබේ.
මෙම තත්වය දළදා ප්‍රදර්ශනයක් පවත්වන්න යැයි ඉල්ලීම් කළ ජනාධිපති අනුර කුමාර දිසානායක සිතූ දෙයක් නොවිය හැකිය. ජනාධිපතිවරයාගේ ඉල්ලීම අනුව දළදා ප්‍රදර්ශනයක් සඳහා මල්වතු හා අස්ගිරි මහනාහිමිවරුන් අවසර දීමෙන් පසු ඒ පිළිබඳ නිවේදනය කළ අවස්ථාවලදී මෙවර දළදා ප්‍රදර්ශනයට ‘ප්‍රභූ පෝලිම්’ නැහැ යැයි කීවේ දළදා ප්‍රදර්ශන අවස්ථාවේ මෙතෙක් බලයේ සිටි ආණ්ඩුවලට වඩා වෙනස් යැයි කියන ආණ්ඩුවක් යටතේ එසේ වෙනසක් වේ යැයි සිතූ නිසා විය හැකිය.
එහෙත් එම වෙනස මෙවර දළදා ප්‍රදර්ශනයේදී රැකගන්නට ගිහි පැවිදි දළදා බාරකරුවන් අසමත් වී ඇති බව ප්‍රභූ පෝලිම් අපට පෙන්වා දෙයි. පැවති දළදා ප්‍රදර්ශනයන් සමඟ ගත්කල මෙවර ඇති ප්‍රභූ පෝලිමේ විශේෂත්වය වී ඇත්තේ ඒ තුළ පවතින ආණ්ඩුවේ හෝ විපක්ෂයේ දේශපාලනඥයින් හා ඔවුන්ගේ පවුල්වල සාමාජිකයින් නොමැති වීමයි. ආණ්ඩුවේ සාමාජිකයින් ප්‍රභූ පෝලිම පාවිච්චි නොකරන නිසා විපක්ෂ දේශපාලනඥයින්ද ඉන් වැළකී ඇති බව පෙනේ.
කෙසේ වෙතත් ජනාධිපතිවරයාගේ ඉල්ලීම අනුව මෙවර වසර 16කට පසු දළදා ප්‍රදර්ශනය පවත්වද්දී වෙනදා මෙන්ම ආණ්ඩුව ඒ සඳහා විශාල පිරිවැයක් දරන බවද පෙනේ. දළදා ප්‍රදර්ශනය සැරසීම සඳහා සහ නැරඹීමට පැමිණෙන ජනතාවගේ ආරක්ෂාව හා අනෙකුත් කටයුතු වෙනුවෙන් අතිරේක විදුලි බුබුළු යොදා ඇති අතර එම විදුලි ආලෝකය වෙනුවෙන් වන වියදම් දරාගනු ලබන්නේ ලංකා විදුලි බල මණ්ඩලය විසිනි. මහනුවර මහ නගර සභාව නගරය පිරිසිඳු කිරීම හා වැසිකිලි පහසුකම් සඳහා වියදම් දරා ගන්නා අතර ගඟවට කෝරලේ ප්‍රාදේශීය සභාවට වැව රවුමේ හට් සඳහා වියදම් දැරීමට සිදුවී තිබේ.
ලංකා ගමනා ගමන මණ්ඩලයට අතිරේක බස්රථද, දුම්රිය දෙපාර්තමේන්තුවට අතිරේක දුම්රියද යොදන්නට සිදුවී තිබේ.
ආරක්ෂාව සහ මිනිසුන් හැසිරවීම සඳහා පොලීසියේ සහ යුද හමුදාවේ සාමාජිකයින් 10,000ක පමණ පිරිසක් මහනුවරට කැඳවා තිබේ. ඔවුන්ගේ ආහාර වියදම් මෙන්ම විශේෂ රාජකාරි වියදම්ද දරන්නට සිදුවන්නේ රජයටයි. පොලිස් හා ආරක්ෂක අංශ සාමාජිකයින්ට නවාතැන් ගැනීම සඳහා මහනුවර හා ඒ අවට පාසල් 50ක් වසා තිබේ. එහි වන්දිය ගෙවීමට සිදුවන්නේ ඒවායේ ඉගෙන ගන්නා ළමයින්ට හා උගන්වන ගුරුවරුන්ටය.
මෙසේ මතුපිටින් පෙනෙන දෙයට අමතරව දළදා ප්‍රදර්ශනයේ ප්‍රභූ පෝලිමේ දියවඩන නිලමේ ප්‍රදීප් නිලංග දෑලගේ නිර්දේශයන් තුළ තවත් ඡන්ද දේශපාලනයක්ද සිදුවෙමින් පවතින බව වාර්තාවේ. ඒ ඉදිරි මාස කිහිපයක් ඇතුළත දළදා මාලිගාවේ දියවඩන නිලමේ නිලවරණය පැවැත්වීමට නියමිත හෙයිනි. එම නිලවරණයේදී ඡන්දය භාවිත කිරීමට හැකියාව ඇති ගිහි පිරිස වන්නේ පැරණි උඩරට රාජධානියට අයත් ප්‍රදේශවල දේවාලවලට අයත් බස්නායක නිලමේවරුන්, ඒවායේ ගිහි බාරකරුවන් හා පැරණි උඩරට රාජධානියට අයත් ප්‍රදේශවල කාන්තාවන් නොවන ප්‍රාදේශීය ලේකම්වරුන්ය. එම පිරිස්වලට හා ඔවුන්ගේ පවුල්වලට දළදා ප්‍රදර්ශනය ප්‍රභූ පෝලිමේ පෙන්නීම යනු ඉදිරි දියවඩන නිලමේ නිලවරණයට ඡන්ද පින් ලැබෙන වැඩක් බව අමුතුවෙන් කිවයුතු නැත. තවත් ආකාරයකින් ඉල්ලීම කළ ජනාධිපතිවරයා පවා බලාපොරොත්තු නොවූ ආකාරයට ප්‍රභූ පෝලිම තුළ සිදුවන්නේ එයයි. දියවඩන නිලමේ නිවසේ සිට ප්‍රභූ පෝලිමේ යන පිරිසට දින ගණන් මහ පාරේ පෝලිම්වල ලැග සිටින මහජනයාට සිතා ගැනීමටවත් බැරි දන්සල් ආහාර එම නිවසෙන් ලැබෙන්නේ ඒ නිසයි.
ඒ අනුව ඉදිරි පළාත් පාලන ඡන්දයේදී දළදා ප්‍රදර්ශනය මගින් සිය මැතිවරණ ජයග්‍රහණයට වක්‍ර ආකාරයෙන් වාසියක් ලබා ගැනීමට ජනාධිපතිවරයා ගත් උත්සාහයේ ප්‍රතිඵලවලට වඩා දියවඩන නිලමේවරයාගේ කටයුත්තේ ප්‍රතිඵලය ඵලදායක වනු ඇතැයි සිතිය හැකිය. මන්ද දළදා වැඳීමේ දුෂ්කරතා පෝලිම්වල සිටින සාමාන්‍ය ජනතාව එම ප්‍රභූ පෝලිම්වලට විරෝධය දක්වන නිසාය.
අප්‍රේල් 23 වැනිදා පොලීසිය නිවේදනය කරනු ලැබුයේ ඉදිරි දින කිහිපයේදී දළදා ප්‍රදර්ශනය නැරඹීම සඳහා අලුතින් පිරිස් නොඑන ලෙසය. ඒ ඒ වනවිටත් දළදා නැරඹීම සඳහා ලක්ෂ 3කට ආසන්න පිරිසක් මහනුවර නගරයට පැමිණ ඇති බව කියමින්ය. දළදා වැඳීම සඳහා ඇති සාමාන්‍ය පෝලිම් තුන මෙන්ම ප්‍රභූ පෝලිමද අවසානයේ දළදා වැඳීම සඳහා එක් වන්නේ එකම පෝලිමකටය. ඒ අනුව දළදා වැඳීම සඳහා දින ගණනාවක් මහපාරේ නිදිවර්ජිතව රස්තියාදු වන නිර්ප්‍රභූන් වන සාමාන්‍ය ජනතාවට සිදුවී ඇත්තේ ප්‍රභූන් නිසා සිය කාර්යය පමා කර ගන්නටය. දළදා ප්‍රදර්ශනයේ මහනුවර සිදුවන ඇත්ත එයයි.
විඩියෝව –
