ජාතික පාසල්වලට යොදා ඇති ජීවත්ව සිටිනා දේශපාලනඥයකු වන හිටපු ජනාධිපති මහින්ද රාජපක්ෂගේ නම අධ්‍යාපන අමාත්‍යවරයාට ඇති රේඛීය බලතල අනුව ඉවත් කිරීමට කටයුතු කරනවා දැයි සුසිල් ප්‍රේම ජයන්ත අමාත්‍යවරයාගෙන් ඇසූ ප්‍රශ්නයට සිනා වී ප්‍රශ්නය මඟ හැර ගිය බව ලංකා ගුරු සංගමයේ ලේකම් ජෝශප් ස්ටාලින් පවසයි.
ජෝශප් ස්ටාලින් එම ප්‍රශ්නය අමාත්‍යවරයාගෙන් අසා ඇත්තේ පසුගිය 16 දින අධ්‍යාපන අමාත්‍යංශයේ දී අධ්‍යාපන අමාත්‍යාංශය හා ගුරු විදුහල්පතිවරු සමග පැවති සාකච්ඡාවක දීය.
ඉන්දීය ණය යෝජනා ක්‍රමය යටතේ ව්‍යාජ ලේඛන සකස් කොට ප්‍රමිතියෙන් තොර ප්‍රතිදේහ එන්නත් රජයේ රෝහල්වලට බෙදා හැරීම මඟින් මුදල් වංචා කිරීම සහ රෝගීන්ගේ ජීවිත අනාරක්ෂිත තත්වයට පත් කිරීම හේතුවෙන් හිටපු සෞඛ්‍ය අමාත්‍ය කෙහෙලිය රඹුක්වැල්ලගේ නමින් කුණ්ඩසාලේ ඇති විද්‍යාලයේ නම් ඉවත් කර ගන්නා ලෙස එම පාසලේ දෙමාපියන් සහ ගුරුවරුන් මධ්‍යම පළාත් ආණ්ඩුකාරවරයාගෙන් ඉල්ලීමක් කර තිබුණි.
පාසල්වලට යොදා ඇති දේශපාලනඥයන්ගේ නම් ඉවත් කර ගන්නා ලෙස කළ ඉල්ලීම්වලට ප්‍රතිචාර වශයෙන් අධ්‍යාපන අමාත්‍ය සුසිල් ප්‍රේම ජයන්ත දැනට ජීවත්ව සිටිනා පුද්ගලයන්ගේ සහ දේශපාලනඥයින්ගේ නම් පළාත් පාසල්වලින් ඉවත් කිරීම සඳහා ආණ්ඩුකාරවරුන්ට උපදෙස් ලබාදුන්නේය.
එහෙත් ඔහු යටතේ ඇති ජාතික පාසල්වල එවැනි නම් ඉවත් කිරීමට ඔහු කටයුතු කළේ නැති අතර මහින්ද රාජපක්ෂ විද්‍යාල ලෙස නම් කොට ඇති මාතර සහ හෝමාගම ජාතික පාසල්වලට යොදා ඇති නම් ඉවත් කිරීම සම්බන්ධයෙන් ජෝශප් ස්ටාලින් මහතා විමසා ඇත්තේ ඒ අනුවය.
