20.2 C
Sri Lanka
3 July,2022

රනිල් මැරෙන්න යන කෙනෙකුටයි ඔක්සිජන් දීලා තිබෙන්නේ: සමගි ජන බලවේගයේ පාර්ලිමේන්තු මන්ත්‍රී හර්ෂණ රාජකරුණා

Must read

■ අමන්දිකා කුරේ

සමගි ජන බලවේගය අලුතෙන් පිහිටුවූ ආණ්ඩුවට සම්බන්ධ වූයේත් නෑ. එසේ සම්බන්ධ වන්නේත් නැති නම් ඔබේ පක්ෂයට මෙම අර්බුදයට විසඳුම් සෙවීමට ඇති වැඩපිළිවෙළ කුමක්ද?


ආණ්ඩුවට සම්බන්ධ වීම ප්‍රතික්ෂේප නොකළ බව අපි පැහැදිලිව කිව යුතුයි. ජනාධිපති ගෝඨාභය රාජපක්ෂ විසින් විපක්ෂ නායක සජිත් ප්‍රේමදාස මහතාට එම අවස්ථාව ලබා දුන්නේ නෑ කියලයි අපට පැහැදිලි වන්නේ. ජනාධිපතිවරයාට අවශ්‍ය වෙලා තිබුණේ ඔහුව ආරක්ෂා කරන කෙනෙක් පත් කරගන්න. ඒ සඳහා තමයි අගමැතිවරයා වශයෙන් රනිල් වික්‍රමසිංහ මහතාව පත් කරගත්තේ. මුළු රටම ඉල්ලන්නේ සර්ව පාක්ෂික ආණ්ඩුවක්. ඒ වගේ ම මුළු රටම ඉල්ලන්නේ ජනාධිපතිවරයාට ඉල්ලා අස් වෙලා ගෙදර යන්න කියලා. අපි ජනාධිපතිවරයාට ඉල්ලීමක් කළේ එතුමාට ඉල්ලා අස් වෙන්න අදාළ කාලය හරියට දන්වන්න කියලා. ඒ කොන්දේසිය නිසා තමයි අපට ආණ්ඩුවට එකතු වෙන්න බැරි වුණේ. කෙසේවෙතත් අපි පාර්ලිමේන්තුව තුළදී ආණ්ඩුවේ යහපත් තීරණවලට අපේ පක්ෂයේ සහයෝගය ලබා දෙන්න බලාපොරොත්තු වෙනවා.

ඒ කියන්නේ ඉදිරියේ දී ඔබේ පක්ෂය සර්වපාක්ෂික ආණ්ඩුවක් හදන්න මැදිහත් වීමක් කරමින් ද ඉන්නේ?


අපට රනිල් වික්‍රමසිංහ මහතා අගමැතිවරයා වශයෙන් ඉන්න ආණ්ඩුවක් යටතේ අපට සර්වපාක්ෂික ආණ්ඩුවක් හදන්න බෑ. රනිල් වික්‍රමසිංහ මහතා කියන්නේ පාර්ලිමේන්තුවේ දී සහ රටම ප්‍රතික්ෂේප කරපු කෙනෙක්. එතුමා පාර්ලිමේන්තු මැතිවරණයත් පරද වුණා. ඔහු පාර්ලිමේන්තුවට ආවේ ජාතික ලැයිස්තු මන්ත්‍රී ධුරයක් හරහායි. එතුමාට පාර්ලිමේන්තුවේ සහාය දක්වන කණ්ඩායමක් නෑ. දැන් එතුමා ශ්‍රී ලංකා පොදුජන පෙරමුණේ ප්‍රාණ ඇපකරුවෙක් බවට පත් වෙලා තිබෙනවා. අපි සර්වපාක්ෂික ආණ්ඩුවක් හදන්න බලාපොරොත්තු වෙන්නේ අපේ බහුතරයක් ඉන්න තත්වයක් එක්ක. එයින් අදහස් කළේ විපක්ෂයේ බහුතරයක් සිටින ආණ්ඩුවක් කියන එක. ආණ්ඩුවක් අසමත් වුණාම ඊළඟ බලපොරොත්තුව තිබෙන්නේ විපක්ෂය දිහාවට. විපක්ෂ නායක සජිත් ප්‍රේමදාසගේ යටතේ සර්වපාක්ෂික ආණ්ඩුවක් හදන්න අපි එකඟයි. ශ්‍රී ලංකා නිදහස් පක්ෂයේ කණ්ඩායම, දමිළ ජාතික සන්ධානයේ කණ්ඩායම ඇතුළු විපක්ෂයේ සියලු පක්ෂවල සහයෝගය ඒ සඳහා අවශ්‍යයි. එහෙම සර්වපාක්ෂික ආණ්ඩුවක් හදාගන්න තිබුණු අවස්ථාව තමයි ජනාධිපති ගෝඨාභය රාජපක්ෂ සහ අගමැති රනිල් වික්‍රමසිංහ එකතු වෙලා මේ රටට නැති කළේ.

සර්වපාක්ෂික ආණ්ඩුවක් පිහිටුවීමත් මග හැරුණා නම් මේ මොහොතේ මැතිවරණයකට ගොස් ආණ්ඩුවක් පිහිටුවීම ගැන ඔබේ අදහස කුමක් ද?


දේශපාලන ස්ථාවරත්වය පැහැදිලිවම හා ස්ථිරවම ලැබෙන අවස්ථාව තමයි මැතිවරණය කියන්නේ. නමුත් මේ මොහොතේ මැතිවරණයක් පැවැත්වීමේ ප්‍රශ්නයක් තිබෙනවා. පවතින මූල්‍ය අර්බුදයත් එක්ක ඒ සඳහා අවශ්‍ය මුදල් සම්පාදනය කරගැනීම පිළිබඳව ප්‍රශ්නයක් තිබෙනවා. නමුත් හැකි ඉක්මනින් මැතිවරණයක් පවත්වලා දේශපාලන ස්ථාවරත්වය ඇති කළ යුතුයි කියන මතයේ මම සිටිනවා.

ජනතාව සමගි ජන බලවේගය විශ්වාස කර ඉදිරි මැතිවරණයකදී ඡන්දය ලබා දේවි කියලා ඔබ හිතනවාද?


දැන් මේ ආණ්ඩුවට විශාල විරෝධයක් ජනතාව අතරින් නිර්මාණය වෙලා තිබෙනවා. ඒ ගැන කිසිම විවාදයක් නෑ. ඒ නිසා මේ මොහොතේ රට ඉදිරියට ගෙන යා හැකි එකම කණ්ඩායම හැටියට මම විශ්වාස කරන්නේ විපක්ෂ නායක සජිත් ප්‍රේමදාස මහතා ඇතුළු සමගි ජන බලවේගයේ කණ්ඩායම. අපේ පක්ෂයේ ආර්ථික විශේෂඥයන් ගණනාවක් ඉන්නවා. කබීර් හෂීම්, ආචාර්ය හර්ෂ ද සිල්වා, ඉරාන් වික්‍රමරත්න වගේ ආර්ථික ක්ෂේත්‍රය ගැන පුළුල් දැනුමක් ඇති දක්ෂ මන්ත්‍රීවරුන් අපේ කණ්ඩායමේ සිටිනවා. ඒ වගේම දක්ෂ තරුණ කණ්ඩායමකුත් අපේ කණ්ඩායමේ ඉන්නවා. ඒ නිසා මම විශ්වාස කරනවා සමගි ජන බලවේගය තමයි මේ වෙලාවේ ජනතාවට තිබෙන එකම විකල්ප තෝරා ගැනීම කියලා.

තරුණයන් දැනටම රට අතහැර යන්න පටන් අරන්. තරුණයන්ගේ අපේක්ෂා භංගත්වය රටට බලපෑමක් ඇති කරනවා නේද?


මේ තිබෙන තත්වයත් එක්ක රටේ තරුණ තරුණියන් විශාල අපේක්ෂා භංගත්වයක සිටින්නේ. ඒ ගැන කිසිම විවාදයක් නෑ. ඒ සඳහා එකම විකල්පය විකල්ප ආණ්ඩුවක් හදන එක. රනිල් වික්‍රමසිංහ මහතා අගමැති ධුරය භාරගත්තා කියලා, ජනතා විරෝධය එල්ල වෙලා තිබෙන ගෝඨාභය රාජපක්ෂ ඇතුළු ආණ්ඩුවට විශ්වාසයක් ඇති වෙලා නෑ ජනතාවගේ පැත්තෙන්. මුළු රටම ජනාධිපතිවරයාට යන්න කියද්දි පසුගිය දවසක එතුමා කිව්වා දාලා යන්නේ නෑ ඉල්ලා අස්වන්නේ නෑ කියලා. එයින් වෙන්නේ තරුණයන්ට මේ රට ගොඩනගන්න පුළුවන් කියලා තිබෙන යම් විශ්වාසයක් වුණත් නැතිවෙලා යනවා. ඒ නිසා මේ තරුණ පරම්පරාව තවත් අපේක්ෂා භංගත්වයට පත් නොකර ජනාධිපතිතුමා නිශ්චිත කාලවකවානුවක් දිය යුතුයි එතුමා ඉල්ලා අස්වීම සඳහා. ඒ බව රටට හෙළි කළ යුතුයි. එතුමා එහෙම කළොත් අපට පුළුවන් සියලු පක්ෂවල එකතුවෙන් සර්වපාක්ෂික ආණ්ඩුවක් නිර්මාණය කරලා රට ගොඩනගන්න හොඳ වැඩපිළිවෙළක් සියලු පක්ෂවල සහයෝගයෙන් කරගෙන යන්න. හිටපු අගමැති මහින්ද රාජපක්ෂ ඉවත් වෙලා ඒ වෙනුවට රනිල් වික්‍රමසිංහ මහතාව අගමැති කරලා පරණ ආණ්ඩුවම පත් කරගෙන රටේ ජනතාව තුළ විශ්වාසයක් ඇති කරන්න බෑ කියලා ජනාධිපතිතුමා තේරුම් ගන්න ඕනෑ.

ජනතාවට විශ්වාසය ඇති කරන්න නම් කළ යුත්තේ කුමක් ද?


ප්‍රධානම දේ තමයි සර්වපාක්ෂික ආණ්ඩුවක් පිහිටුවීම. ප්‍රජාතන්ත්‍රවාදය තහවුරු කරන්න අපි ව්‍යවස්ථා සංශෝධනයක් ගෙන ආ යුතුයි. ඒ හරහා රටේ ප්‍රජාතන්ත්‍රවාදය තහවුරු කරලා රටේ ජනතාවට විශ්වාසයක් ඇති කරවන්න පුළුවන්. 19 වැනි ව්‍යවස්ථා සංශෝධනය හරහා ඇති කරලා තිබුණු තත්වය නැවත ඇති කළ යුතුයි. අපි කලින් ඇති කරලා තිබුණු ඒ තත්වය සම්පූර්ණයෙන්ම විනාශ වුණා 20 වැනි ව්‍යවස්ථා සංශෝධනය නිසා. ඒ නිසා 21 වැනි ව්‍යවස්ථා සංශෝධයක් එක්ක හැකි ඉක්මනින් ප්‍රජාතන්ත්‍රවාදය තහවුරු කරලා ජනතාවට විශ්වාසයක් ඇති වන විදිහට කටයුතු සම්පාදනය කරන්න ඕනෑ.

21 වැනි ආණ්ඩුක්‍රම ව්‍යවස්ථා සංශෝධන යෝජනාවක් ආණ්ඩුව පැත්තෙන් ඇවිත් තිබෙන්නේ.
ආණ්ඩුව දැන් 21 වන සංශෝධනයක් ගැන කතා කළාට අපි මුලින් ම දාපු සංශෝධනය තමයි දැනට පාර්ලිමේන්තුවේ 21 වන ආණ්ඩුක්‍රම ව්‍යවස්ථා සංශෝධනය නමින් ගැසට් වෙලා තිබෙන්නේ. නමුත් විජේදාස රාජපක්ෂ මහතා ඇතුළු මේ ආණ්ඩුව ගෙන එන සංශෝධනයේ යම් යම් ගැටලුකාරී තත්වයන් තිබෙනවා. 19 වැනි සංශෝධනය යටතේ තිබුණු තත්වයවත් නෑ. ජනාධිපතිවරයාට 19 වන ආණ්ඩුක්‍රම ව්‍යවස්ථා සංශෝධනය යටතේ ඇමතිකම් දරන්න බෑ. හිටපු ජනාධිපති මෛත්‍රීපාල සිරිසේනගෙන් පසුව ජනාධිපතිවරයාට ඇමතිධුර දැරීමට ඇති හැකියාව අහෝසි වන විදිහටයි එහි ප්‍රතිපාදන සකස් වෙලා තිබුණේ. ඔහු දැරුවේ මහවැලි ඇමතිකම සහ පරිසර ඇමතිකම පමණයි. නමුත් එවැනි කොන්දේසි 20 වන ව්‍යවස්ථා සංශෝධනයෙන් ඉවත් වුණා. ආණ්ඩුව ගෙන එන 21 වන ආණ්ඩුක්‍රම ව්‍යවස්ථා සංශෝධන යෝජනාවේ මෙවැණි සරල ප්‍රතිපාදනවත් ඇතුළු වෙලා නෑ. ඒ නිසා අපි විශ්වාස කරනවා 21 වන ආණ්ඩුක්‍රම ව්‍යවස්ථා සංශෝධනයක් ගෙන එනවා නම් ඊට ප්‍රමාණවත් ප්‍රතිපාදන ඇතුළත් විය යුතුයි කියලා.


ඒ නිසා මම විශ්වාස කරනවා මුළු රටම නැවත ගෝඨාභය රාජපක්ෂ ජනාධිපතිවරයාට විරුද්ධව නැවත වතාවක් එකතු විය යුතුයි කියලා. එහෙම එකතු වෙලා හැකි ඉක්මනින් මේ සංශෝධන ටික කරන්න කියලා බල කළ යුතුයි. ඒ හරහා ඔහුට ඉල්ලා අස් වීමට අවශ්‍ය පරිසරය නිර්මාණය කළ යුතුයි. ඒ සඳහා හැමෝම එකතු විය යුතුයි. රනිල් වික්‍රමසිංහ මහතා මැරෙන්න යන කෙනෙක්ටයි මේ ඔක්සිජන් දීලා තිබෙන්නේ. අපි ඒ බව අමතක නොකළ යුතුයි.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි