19 C
Sri Lanka
1 December,2022

බැසිල්ගේ ඉල්ලා අස්වීම ආස්වාදයෙන් ඔබ්බට

Must read

■ පුරවැසියා

අලුත්ම ප්‍රවෘත්තිය බවට පත්වී ඇත්තේ බැසිල් රාජපක්ෂ සිය ජාතික ලැයිස්තු මන්ත්‍රී ධුරයෙන් ඉවත්වීමට තීරණය කර ඇති බවයි. මෙම සටහන ලියන මොහොතේ සිට පැය කිහිපයකින් උදාවන පසුදිනයේදී ඔහු මන්ත්‍රී ධුරයෙන් ඉල්ලා අස්වන බව තහවුරු කරමින් සමහර මාධ්‍ය මේ වනවිටත් වාර්තා කර ඇත. එමෙන්ම එම ඉල්ලා අස්වීමත් සමඟ හිස්වන මන්ත්‍රී ධුරයට ව්‍යාපාරික ධම්මික පෙරේරා පත් කිරීමට නියමිත බවද ඒ සමඟ වාර්තා වෙමින් තිබේ.


එසේ වුවද මේ සටහනේ අරමුණ වන්නේ ව්‍යාපාරික ධම්මික පෙරේරාගේ ආගමනය ගැන කතා කරන්නට නොවේ. බැසිල් රාජපක්ෂගේ ඉල්ලා අස්වීම ගැන කතා කරන්නටය. මෙම ඉල්ලා අස්වීම ගෝඨාභය රාජපක්ෂ ඇතුළු සියලු රාජපක්ෂවරුන් ශ්‍රී ලංකාවේ දේශපාලන ක්ෂේත්‍රයෙන් ඉවත් විය යුතු යැයි අරගල කරන ජනතාවට ආස්වාදයට කරුණක් බව අමුතුවෙන් කිවයුතු නැත. එසේ වුවද අප උත්සාහ කළ යුත්තේ එකී ආස්වාදයෙන් වැසී ඇති මෙම ඉල්ලා අස්වීම් පිටුපස තිබෙන රාජපක්ෂවරුන්ගේ සැබෑ අභිලාෂයන් හඳුනා ගැනීමටය. පුරවැසියා එසේ කියන්නට හේතුව වන්නේ රාජපක්ෂවරුන් කියන දෙය හා කරන දෙය අතරත්, කරන දෙය හා කියන දෙය අතරත් සහ සම්බන්ධයක් ඉතිහාසය පුරාම දක්නට නොලැබුණ නිසාය.


බැසිල් රාජපක්ෂගේ මෙම ඉල්ලා අස්වීමම ගතහොත් එය අපට තේරුම් ගතහැකි එක් ආකාරයක් වන්නේ ගෙන එනවා යැයි කියන 21ක් වන ආණ්ඩුක්‍රම ව්‍යවස්ථා සංශෝධනය තුළ අනිවාර්යෙන්ම ඇතුළත් කළ යුතුයැයි හා ඉවත් කළ යුතු යැයි විවාදයට ලක්වී ඇති ද්විත්ව පුරවැසි යෝජනාව හේතුවෙන් මෙම ඉල්ලා අස්වීම සිදුවන බවයි. ඒ මගින් ශ්‍රී ලංකා පොදුජන පෙරමුණ හෙවත් ආණ්ඩුව කරවන පක්ෂයේ යම් බෙදීමක් සිදුවනවා නම් එම බෙදීම සිදුනොවී බේරා ගැනීමේ මාර්ගයක්ද පෑදෙන අතර තවත් අතකට ආණ්ඩුවට මේ වනවිට සම්බන්ධ වී හෝ සහාය ලබාදීමට ඉදිරිපත් වී ඇති විපක්ෂ පිරිස් තවදුරටත් ආණ්ඩුවේ රඳවා ගැනීමේ මාර්ගයක්ද පෑදෙනු ඇත.


පුරවැසියා සිතන ආකාරයට මේ මගින් අවසානයේ සිදුවනු ඇත්තේ 21 වැනි සංශෝධනයේ ඇති ද්විත්ව පුරවැසි වගන්තිය ඉවත් වී එය පාර්ලිමේන්තුවට පැමිණ සම්මත වනු ඇතිය යන්නය. මන්ද ද්විත්ව පුරවැසිභාවය සම්බන්ධයෙන් අවධානය ප්‍රධාන වශයෙන්ම යොමු වන්නේ බැසිල් රාජපක්ෂට බැවින් ඔහුගේ ඉවත්වීමත් සමඟ ඒ සම්බන්ධයෙන් ඇති උනන්දුව අඩුවනු ඇති බවය.


එසේ වුවහොත් සිදුවනු ඇත්තේ කුමක්ද? බැසිල් රාජපක්ෂ නොවන තවම හරියාකාරව හඳුනාගෙන නැති ඉතිරි ද්විත්ව පුරවැසියන්ට තවදුරටත් පාර්ලිමේන්තුව නියෝජනය කිරීමට අවස්ථාව සැලසීම හා අවශ්‍ය නම් යළි මෙම සංශෝධන අවස්ථාවෙන් පසුව ජාතික ලැයිස්තුව මගින් පාර්ලිමේන්තුවට පැමිණීමට බැසිල් රාජපක්ෂට අවස්ථාව උදාවීමය.


අප කරුණු තේරුම් ගත යුත්තේ සතුරා ගැන අවතක්සේරුවෙන් හා අප ගැන අධිතක්සේරුවෙන් නොවේ. මේ ද්විත්ව පුරවැසිභාවය ගැන අප 19 වන සංශෝධනයෙන් පසු 20 වන සංශෝධනය සම්මත කිරීම දක්වා අතීතයට යමු. සිදුවූයේ කුමක්ද? ද්විත්ව පුරවැසි බාධකය ඉවත් කළහොත් ඒ සඳහා ඡන්දය නොදෙන බවට මරාගෙන මැරෙන ප්‍රකාශ කළ විමල්, වාසු ඇතුළු පිරිස අවසානයේ එම බාධකය ඉවත් කිරීමෙන් පසු එයට ලජ්ජාවක් නැතිව ඡන්දදය දීමය. එය සිදුවූයේ ජනාධිපතිවරයා එම විරුද්ධවාදීන්ට කියුවා යැයි කියන හැඟීම්බර කතාවක් හේතුවෙන්ය. කවුරුත් දන්නා එම කතාව නම් ද්විත්ව පුරවැසි බාධකය ගෙන ආවේ තමා අරමුණු කරමින් නිසා, එය තාවකාලික වශයෙන් යළි තිබුණ තත්වයට ගෙන ඒමට තමාට අවශ්‍ය බවත්, ගෙන ඒමට නියමිත අලුත් ආණ්ඩුක්‍රම ව්‍යවස්ථාවේදී එම ප්‍රතිපාදනය යළි ඇති කිරීමටත්, එතෙක් එම ප්‍රතිපාදනය යටතේ කිසිවකු පාර්ලිමේන්තුවට පත් නොකිරීමටත් ජනාධිපතිවරයා දුන් පොරොන්දුවය.


එහෙත් සිදුවූයේ කුමක්ද? ජනාධිපතිවරයා දුන් පොරොන්දුව කඩ කරමින් බැසිල් රාජපක්ෂ පාර්ලිමේන්තුවට පැමිණ මුදල් ඇමති ධුරයද ලබා ගැනීමය.


ඒ නිසා රාජපක්ෂවරුන්ගේ කියුම් හා කෙරුම් අප ඒ විදියටම බාරගත යුතු නැත. ඒ සඳහා මේ උදාහරණය සලකා බලන්න. ජනාධිපතිවරයා මෑතකදීම කියා තිබුණේ අගමැති ධුරයෙන් සිය අයියා වූ මහින්ද රාජපක්ෂව ඉවත් කිරීමට ගත් තීන්දුව ඉතා අසීරු එකක් වූ බවය. ඇත්තටම සිදුවූයේ එයද? නැත. අවශ්‍ය නම් මහින්ද රාජපක්ෂව අගමැති ධුරයෙන් ඉවත් කිරීමේ බලය ජනාධිපතිවරයාට තිබුණි. එහෙත් ඔහු එය කළේ නැත. සිදුවූයේ සාමකාමී අරගලකරුවන්ට පහරදීම නිසා ඇති වූ ප්‍රතිප්‍රහාරයේ බලවත්කම නිසා මහින්ද රාජපක්ෂට ඉල්ලා අස්වීමට සිදුවීමය.


එම මැයි 09 වැනිදා සිදුවීමෙන් පසු චමල් රාජපක්ෂ මහින්ද රාජපක්ෂව දැඩිව විවේචනය කරමින් පාර්ලිමේන්තුවේ කළ කතාව ගන්න. එමෙන්ම එම සිදුවීමෙන් පසු රාජපක්ෂවරුන්ගේ ඥාති සහෝදරයෙකු වන උදයංග වීරතුංග සමාජ මාධ්‍ය ඔස්සේ ජනාධිපතිවරයාට එරෙහිව තැබූ සටහන් ගන්න. ඒවායින් අපට ගතහැකි වූ මතුපිට තේරුම කුමක්ද? රාජපක්ෂවරුන් විරසකව දැන් ප්‍රසිද්ධියේම බැන ගන්නට පටන්ගෙන ඇති බවය. එහෙත් එවැනි දේවල් මගින් රාජපක්ෂවරුන් අතර ප්‍රශ්න ඇතිවී ඇති බව හෝ ඔවුන් වෙන්වී ඇති බව අප කල්පනාවට ගතයුතු නැත. ඒ සියල්ලම ඔවුන්ගේ අරමුණ වෙනුවෙන් රට ගොනාට ඇන්දවීමට පෙන්වන නාඩගම් පමණය. තවත් අතීතයට යන්න. පසුගිය ජනාධිපතිවරණයේ නාම යෝජනා අවස්ථාව ගන්න. ගෝඨාභය රාජපක්ෂගේ අපේක්ෂකත්වයට නීතිමය වශයෙන් ප්‍රශ්නයක් ඇති වේ යැයි උපකල්පනය කර රාජපක්ෂවරුන් කළේ කුමක්ද? චමල් රාජපක්ෂගේ නමින්ද ඇප තැන්පත් කිරීමය. එහි තේරුම කුමක්ද? සියල්ල කැරකෙන්නේ රාජපක්ෂවරුන් අතර පමණක් බව හා බලය සම්බන්ධයෙන් රාජපක්ෂවරුන් අතර ප්‍රශ්න නැති බවය. රාජපක්ෂවරුන් ඔවුනොවුන් වෙනුවෙන් අවශ්‍ය ආකාරයට පෙනී සිටින බවය. අප තේරුම් ගත යුත්තේද එයය.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි