22.9 C
Sri Lanka
27 September,2022

පොහොට්ටු චණ්ඩි මන්ත්‍රීවරු මාධ්‍යවේදීන්ගේ දූරකථන උදුරාගනිති: කතානායකත් පොහොට්ටු චණ්ඩි ආරක්ෂා කරයි

Must read

2022 මැයි 17 දින ගරු විපක්ෂ නායකතුමා ඇතුළු මන්ත්‍රීවරුන් කිහිප දෙනෙකු විසින් සභාවේදී මතු කරන ලද “ මාධ්‍යවේදීන් දෙදෙනෙකුගේ ජංගම දූරකථන පාර්ලිමේන්තු මන්ත්‍රීවරුන් දෙදෙනෙකු විසින් ඔවුන්ගේ භාරයට ගැනීමේ සිදුවීම ” සම්බන්ධව ප්‍රකාශයක් කිරීමට කැමැත්තෙමි.


මෙම සිදුවීම පිළිබඳව මා විසින් වේත්‍රධාරි වෙත දෙන ලද උපදෙස් ප්‍රකාරව පාර්ලිමේන්තු පොලීසිය මගින් විමර්ශනයක් සිදුකර වාර්තාවක් මා වෙත ලබාදී ඇත.


2022-05-17 දින පෙරවරුවේ කාරක සභා අංක 01 හි දී පැවති ආණ්ඩු පක්ෂ රැස්වීමෙන් අනතුරුව පෙ.ව. 10.00ට පමණ ආපසු පැමිණෙමින් සිටි මන්ත්‍රීවරුන් වීඩියෝගත කිරීමට අදාළ පුද්ගලයින් දෙදෙනා කටයුතු කර ඇත. ඔවුන් දෙදෙනාගෙන් එක් අයකු බිමි මහලේ කාරක සභා කාමර අංක 01 හි පිහිටි කොරිඩෝව අසලද, අනෙක් පුද්ගලයා කාරක සභා කාමර අංක 05-06 පිහිට ආලින්දයේද රැඳී සිටිමින් මෙම කාර්ය සිදුකර ඇත.


මෙම ක්‍රියාව සම්බන්ධව නොසතුට පළකළ ගරු මන්ත්‍රීවරුන් දෙදෙනෙකු විසින් එම ස්ථානයේ සිටි පුද්ගලයින් දෙදෙනා සතු ජංගම දූරකථන දෙක තම භාරයට ගෙන අනතුරුව සභා ගර්භයට පැමිණ මෙම සිදුවීම සම්බන්ධව ප්‍රකාශයක් කළ අතර මෙම පුද්ගලයින් කවරහුද යන්න විමර්ශනයක් කර ඔවුන් බැහැර කිරීමට කටයුතු කරන ලෙස ඉල්ලා සිටි අතර අදාළ ජංගම දූරකථන දෙක වේත්‍රධාරි වෙත භාරදීමට කටයුතු කර ඇත.


මෙම පුද්ගලයින් දෙදෙනා පාර්ලිමේන්තු රැස්වීම් ආවරණය සඳහා පැමිණෙන වාර්ෂික අවසරපත් හිමි පාර්ලිමේන්තු ජනමාධ්‍යවේදීන් බවට අනාවරණය වී ඇත.


පාර්ලිමේන්තු ජනමාධ්‍යවේදීන් හෝ වෙනත් ජනමාධ්‍යවේදීන් හෝ විසින් කාරක සභා රැස්වීම් අවසානයේදී ගරු මන්ත්‍රීවරුන්ගේ හඬ ප්‍රකාශ ලබා ගැනීම සම්බන්ධව වේත්‍රධාරීගේ අංක ී්රැෑරැ02 දරන 2022-04-29 දිනැති උපදෙස් පත්‍රිකාව පාර්ලිමේන්තු පොලීසිය වෙත නිකුත් කර ඇති අතර එහි පිටපත් පාර්ලිමේන්තු ජනමාධ්‍යවේදීන්ගේ සංසදයේ සහ ශ්‍රී ලංකා පාර්ලිමේන්තු ජනමාධ්‍යවේදීන්ගේ විද්‍යුත් හා නව මාධ්‍ය සංසදයේ සභාපති/ලේකම් වෙත ලබාදීමට කටයුතු කර ඇත.


මෙම උපදෙස් මාලාවට අනුව වේත්‍රධාරි විසින් නිකුත් කරන ලද වාර්ෂික ජනමාධ්‍යවේදී අවසරපත හා ඡායාරූපය සහිත හැඳුනුම්පත හිමි පාර්ලිමේන්තු ජනමාධයවේදීන්ට පමණක් එම හඬපට ලබාගැනීම කළ හැකි අතර බිම් මහලේ ප්‍රධාන ආලින්දයේ වෛද්‍ය මධ්‍යස්ථානය හා පුස්තකාලය අතරතුර ප්‍රදේශය තුළදී පමණක් එම කාර්යය සිදුකළ හැක.


කාරක සභා කාමර හෝ කාරක සභා කාමර ආලින්දවල සිට එවැනි කාර්යයන් සිදුකිරීම සඳහා වේත්‍රධාරි විසින් නිකුත් කරන ලද විශේෂ අවසර පතක් තිබිය යුතුවේ. මෙම අවස්ථාවේදී එවැනි විශේෂ අවසරයක් ලබාගෙන නොමැති බැවින් අදාළ ජනමාධ්‍යවේදීන් දෙදෙනා අනවසර ස්ථානයක සිට මෙම කාර්යය සිදුකර ඇති බව අනාවරණය වී ඇත.


දිවයින තුළ උද්ගත වත්මන් තත්වය යටතේ තමන් නොහඳුනන පුද්ගලයින් විසින් එවැනි ස්ථානයක සිට මෙවැනි කාර්යයක් සිදුකිරීමේදී ගරු මන්ත්‍රීවරුන් විශේෂ සංවේදීත්වයක් දැක්වීම නොවැළැක්විය හැකි කරුණකි. කෙසේ වුවද මාගේ උපදෙස් පරිදි එදින පස්වරුවේ ජංගම දූරකථන දෙක අදාළ ජනමාධ්‍යවේදීන් දෙදෙනා වෙත ලබාදීමට වේත්‍රධාරි විසින් කටයුතු කර ඇත.


මින් ඉදිරියට ක්‍රියා කිරීමේදී පාර්ලිමේන්තුව විසින් නිකුත් කර ඇති උපදෙස් හා මාර්ගෝපදේශයන්ට අනුකූලව කටයුතු කිරීම මගින් මෙවැනි තත්වයන් ඇතිවීම වළක්වා ගැනීමට කටයුතු කරන ලෙස සියලුම පාර්ලිමේන්තු ජනමාධ්‍යවේදීන් වෙත දන්වනු කැමැත්තෙමි.’


මේ ආකාරයට සඳහන් කර ඇත්තේ පාර්ලිමේන්තු වාර්තාකරුවන් වන පාර්ලිමේන්තු වාර්තාකරුවන්ගේ සංගමයේ සභාපති ස්වර්ණවාහිනියේ ප්‍රගීත් පෙරේරාට හා සිරස රූපවාහිනියේ කසුන් සමරවීරට බැන තර්ජනය කරමින් ඔවුන්ගේ ජංගම දූරකථන පොහොට්ටුවේ පාර්ලිමේන්තු මන්ත්‍රීවරුන් වන ඉන්දික අනුරුද්ධ හා ඩී වීරසිංහ උදුරා ගැනීමේ සිදුවීම සම්බන්ධයෙන් කතානායකවරයා නිකුත් කර ඇති නිවේදනයේය.


එම නිවේදනයේ ඇති පාර්ලිමේන්තු වේත්‍රධාරියා නිකුත් කර ඇතැයි සඳහන් වන පාර්ලිමේන්තු වාර්තා කිරීම් සම්බන්ධ උපදෙස් සම්බන්ධ තොරතුරුවලට අදාළ නිකුත් කළ දින වකවානු ඇත්ත හෝ නැත්ත කෙසේ වෙතත් එහි අඩංගු අනෙකුත් සඳහන් කිරීම් නොමඟ යවනසුලු වේ. මේ වූ කලී පොහොට්ටු මන්ත්‍රීවරුන් දෙදෙනා හා එම සිදුවීමේදී මාධ්‍යවේදීන් දෙදෙනාට පාට් දැමූ අනෙකුත් පොහොට්ටු සාමාජිකයින් බේරා ගැනීමට පොහොට්ටු පක්ෂයේ කතානායකවරයා ගනු ලැබූ උත්සාහයක් මිස එම මාධ්‍යවේදීන් දෙදෙනාට සාධාරණය ඉටුකිරීම සඳහා කරනු ලැබූ සාධාරණ පරීක්ෂණයක ප්‍රතිඵලයක් නොවේ.


එම සිද්ධිය අපට කියා පාන්නේ මයිනාගෝගම හා ගෝටාගෝගම සාමකාමී විරෝධතාකරුවන්ට පහරදීම හේතුවෙන් කෝපයට පත් මහජනයාගෙන් මෙතරම් පාඩම් ඉගෙනගෙන තිබියදීත් පොහොට්ටු පක්ෂයේ මන්ත්‍රීවරුන්ගේ චණ්ඩිකම් තවමත් අවසන් වී නැති බවයි.


මෙම සිදුවීම මැයි 17 වැනිදා සිදුවූයේ කමිටු ශාලාවක පැවති ආණ්ඩු පක්ෂයේ මන්ත්‍රීවරුන්ගේ රැස්වීමකින් අනතුරුව එහි සිට එළියට පැමිණෙන මන්ත්‍රීවරුන් ජංගම දූරකථන මගින් අදාළ මාධ්‍යවේදීන් දෙදෙනා විඩියෝ ගතකරමින් සිටියදීය. එම වීඩියෝගත කිරීම්වලට බාධා කිරීමට එම රැස්වීමෙන් පිටව ආ සෑම මන්ත්‍රීවරයකුම උත්සාහ කර නැත. සමහරුන් ඔවුන් හොඳාකරවම දන්නා එම මාධ්‍යවේදීන් දෙදෙනාට සුහද ප්‍රතිචාරද දක්වමින් ගොස් ඇත. එම සිදුවීමෙන් පසු සිය සගයින් බේරා ගැනීම වෙනුවෙන් පාර්ලිමේන්තුවට විත් පාර්ලිමේන්තු සභා ගර්භයේ දේ වාර්තා කිරීමට හැකි වූවත් ඉන් පිටත දේවල් වීඩියෝ කිරීමේ හැකියාවක් ඇතිද යන්න හා ඒ සම්බන්ධයෙන් සොයා බලන ලෙස කතානායකවරයාගෙන් ඉල්ලා සිටි ප්‍රේමනාත් සී දොලවත්ත මන්ත්‍රීවරයාද එසේ සුහද ප්‍රතිචාර දක්වා එම අවස්ථාවේ එම ස්ථානයෙන් ගිය අයෙකි. ඔහු එසේ පාර්ලිමේන්තුවෙන් ඉල්ලීමක් කර ඇත්තේ සිද්ධිය වූ ස්ථානයේ සිය මන්ත්‍රීවරුන් දෙදෙනාගේ සහායට පසුව පැමිණ මාධ්‍යවේදීන් වටකරගෙන සිටි අවස්ථාවට සහභාගි වීමෙන් පසුය. (මාධ්‍යවේදීන් දෙදෙනාට බාධා නොකරමින් ගිය සමහර මන්ත්‍රීවරුන් පසුව ඔවුන්ගේ සගයන්ගේ සහායට පැමිණ තිබුණි.)


මෙම සිදුවීමට සම්බන්ධ ඩී වීරසිංහ පොහොට්ටු මන්ත්‍රීවරයා සිරස මාධ්‍යවේදීයාගෙන් වීඩියෝ ගත කිරීම සම්බන්ධයෙන් ප්‍රශ්න කර ඇති අතර ඔහු මාධ්‍යවේදියෙකු බව පැවසීමෙන් පසු ‘මුන් හින්දා තමයි අපිට මෙහෙම වුණේ’ යැයි පවසමින් ඔහුගේ ජංගම දූරකථනය උදුරා ගැනීමට උත්සාහ දරා ඇත. ඒ අවස්ථාවේ මාධ්‍යවේදියා සිය ජංගම දූරකථනය රැක ගැනීම සඳහා දැඩි උත්සාහයක් දරා ඇති අතර එහි වටවූ මන්ත්‍රීවරුන් අතර සිටි චන්න ජයසුමන පොහොට්ටු මන්ත්‍රීවරයා මන්ත්‍රීවරුන්ට ඇඟට අත තියන්න කිසිවකුට බලයක් නැති බව කියමින් මාධ්‍යවේදියාට චණ්ඩි පාට් දමා ඇත. පාර්ලිමේන්තු පරිශ්‍රයට මන්ත්‍රීවරුන් හෝ පාර්ලිමේන්තු කාර්ය මණ්ඩලයේ නොවන කිහිප දෙනෙකු පැමිණ දූරකථනය මගින් වීඩියෝ කරන බවත්, කමිටු කාමරයේ ආණ්ඩු පක්ෂ රැස්වීම තිබෙන තැනටත් එම වීඩියෝගත කරන්නන් පැමිණි බවත්, එම පිරිස කවුද කියා සොයා බලන ලෙසත් චන්න ජයසුමන මන්ත්‍රීවරයා මුකුත් නොදන්නා ලෙස කතානායකවරයාගෙන් ඉල්ලා ඇත්තේ එසේ මාධ්‍යවේදීන් දෙදෙනාට චණ්ඩි පාට් දැමීමෙන් පසුය. නොදන්නා දෙදෙනෙකු යැයි පාර්ලිමේන්තුවට කීවද ඒ වනවිටත් මාධ්‍යවේදීන් දෙදෙනාව වටකරගෙන සිටි සියලු මන්ත්‍රීවරුන් ඔවුන් කවුදැයි දැන හඳුනාගෙන සිට ඇත.


පාර්ලිමේන්තුවට අවසර නොලත් පුද්ගලයින්ට පැමිණිය නොහැකි බව චන්න ජයසුමන මන්ත්‍රීවරයා නොදැන සිටීම පුදුම සහගතය. එසේ අවසර ඇතිව පැමිණෙන පිරිස් අනිවාර්යෙන්ම පාර්ලිමේන්තුවෙන් ලබාදෙන අවසර පත්‍රය පැළදිය යුතු අතර එම සිදුවීමට මුහුණ දුන් ප්‍රගීත් පෙරේරා යනු දීර්ඝ කාලයක් පාර්ලිමේන්තු වාර්තාකරණයේ යෙදෙන එම වාර්තාකරුවන්ගේ සංගමයේ සභාපතිවරයාද වන මන්ත්‍රීවරුන් නොදන්නා අයෙක් නොවේ. චන්න ජයසුමනගේ බබා පාට් හොඳ ගහ නොදන්නා අයටය. ඒ වාගේම ප්‍රේමනාත් සී දොලවත්තගේ බබා පාට්ද හොඳ ගහ නොදන්නා අයටය. පාර්ලිමේන්තු සභා ගර්භයෙන් බැහැරව එහි කමිටු ශාලාවල ඇතුළත දේවල් මෙන්ම කමිටු ශාලාවල සාකච්ඡාවලින් පසු එළියට පැමිණෙන මන්ත්‍රීවරුන්ව ආවරණය කරමින් ප්‍රශ්න ඇසීම කොතෙක් නම් අප දැක ඇද්ද? දොලවත්ත මන්ත්‍රීවරයා කළ යුත්තේ අවශ්‍ය නම් එවැනි රූපරාමු සොයාගෙන යළි බැලීමය.


එහෙත් මෙම සිදුවීමේ මෙතෙක් වාර්තා වී නැති ඇත්ත සිදුවීම වන්නේ අදාළ මන්ත්‍රීවරුන් දෙදෙනාගේ සහායට එම අවස්ථාවේදී පොහොට්ටු පක්ෂයේ මන්ත්‍රීවරුන් රොත්තක් ලෙස වටවී මාධ්‍යවේදීන්ට තර්ජනය කරමින් හැසිරී ඇති බව හා එසේ හැසිරුණු පුද්ගලයින් අතර ප්‍රේම්නාත් දොලවත්ත හා චන්න ජයසුමන ඉදිරියෙන්ම සිට ඇති බවය. මෙම සිද්ධියට සම්බන්ධ වූ මන්ත්‍රීවරුන්ගේ ඉල්ලීම පරිදි පාර්ලිමේන්තු වේත්‍රධාරියා මැදිහත් වී මාධ්‍යවේදීන්ගේ ජංගම දූරකථනවල තිබූ මන්ත්‍රීවරුන් පිටතට පැමිණෙන දර්ශන හා මාධ්‍යවේදීන් සමඟ ආරවුලක් ඇතිකර ගන්නා දර්ශනවල පිටපත් ලබාගෙන, පසුව මාධ්‍යවේදීන්ගේ දූරකථනවලින් එම දර්ශන මකා දමා ඇත.


එසේම පොලිස් පැමිණිලි ඉල්ලා අස්කර ගන්නා ලෙසත්, මෙම සිදුවීම ඉදිරියට ගෙන නොයන ලෙසටත් මාධ්‍යවේදීන්ට බලපෑම් එල්ල කර ඇති අතර එසේ නොවුණහොත් මාධ්‍යවේදීන්ගේ ජංගම දූරකථන ලබානොදෙන බවටද තර්ජනය කර ඇත. එමෙන්ම පසුව එම නාලිකාවල ප්‍රධානීන්ට කතාකර සිද්ධිය සමථයකට පත්කර ගැනීමටද උත්සාහ කර ඇත.


මෙම සිදුවීම සම්බන්ධයෙන් මාධ්‍යවේදීන් දෙදෙනා කතානායකවරයාට මෙන්ම පොලීසියටද පැමිණිලි කර ඇති අතර පාර්ලිමේන්තු පොලීසිය නම් ඔවුන්ගේ පැමිණිලි බාරගෙන නැත්තේ ඒ සඳහා ඔවුන්ට බලය නැතැයි කියමිනි. එසේම වැලිකඩ පොලීසියද ඔවුන්ගේ පැමිණිලි බාරගෙන ඇත්තේ සෑහෙන වේලාවක් ගතකිරීමෙන් පසු ඔවුන් නියෝජනය කරන මාධ්‍ය ආයතන කරන ලද විමසීම්වලට පසුවය. ඊට අමතරව අගමැතිවරයාට, විපක්ෂ නායකවරයාට හා පාර්ලිමේන්තුවේ නිලතල දරන පිරිස්වලටද ඔවුන් පැමිණිලි කර ඇත. මෙම සිදුවීම හෙළා දකිමින් සහ පාර්ලිමේන්තු මාධ්‍යවේදීන්ට වාර්තා කිරීමට ඇති අයිතිය කහවුරු කරන ලෙස ඉල්ලමින් ශ්‍රී ලංකා වෘත්තීය ජනමාධ්‍යවේදීන්ගේ සංගමය හා නිදහස් මාධ්‍ය ව්‍යාපාරය කතානායකවරයාට ලිපි යොමු කරමින් ඉල්ලා තිබුණි. කතානායකවරයාගේ ඉහත සඳහන් නිවේදනය මේ සෑම ඉල්ලීමක් සම්බන්ධයෙන්ම සාධාරණය ඉටු නොකරන එකක් බව දැන් පැහැදිලිය.


එම මාධ්‍යවේදීන් දෙදෙනා මන්ත්‍රීවරුන් සිතන ආකාරයට යම් වැරදි දෙයක නිරත වූවා නම් කළ යුතුව තිබුණේ ඒ බව කතානායකවරයාට පැමිණිලි කිරීමය. ඒ අනුව අවශ්‍ය පියවර ගත යුත්තේ කතානායකවරයා විසින්ය. එසේ නොකර මාධ්‍යවේදියෙකු හෝ වෙනත් පුද්ගලයකු සතුව පවතින ජංගම දූරකථනයක් සිය බාරයට ගැනීමේ හැකියාවක් පාර්ලිමේන්තු මන්ත්‍රීවරයකුට නැත. ඒ මගින් සිදුකර ඇත්තේ එම පාර්ලිමේන්තු මන්ත්‍රීවරුන් දෙදෙනාගේ චණ්ඩිකම මාධ්‍යවේදීන් දෙදෙනාට පෙන්නීමය. පැහැදිලිවම මෙම සිදුවීම පොහොට්ටු මන්ත්‍රීවරුන්ට එරෙහිව සිදුවූ ජනතා කෝපයේ වාඩුව මාධ්‍යයෙන් ගැනීමක්ය. මුන් හින්දා තමයි අපිට මෙහෙම වුණේ යැයි මන්ත්‍රීවරුන් තර්ජනය කර ඇත්තේ ඒ නිසාය. එහෙත් එම මන්ත්‍රීවරුන්ගේ නිවාස ඇතුළු දේපල විනාශ වීමට හේතුව මාධ්‍යයේ වාර්තා කිරීම්ද නොඑසේ නම් ඔවුන් විසින්ම බිඳ වට්ටාගෙන ඇති මහජන නියෝජිත කාර්යභාරයද යන්න තේරුම් ගත යුතුය.


පැහැදිලිවම මෙම සිදුවීම එම මාධ්‍යවේදීන් දෙදෙනාගේ වාර්තාකරණයේ අයිතිය උල්ලංඝනය කිරීමකි. වාර්තාකරණය කිරීම යන කාරණය පැත්තකට දැමුවද මන්ත්‍රීවරුන්ගේ සන්තකයට ජංගම දූරකථන ගැනීම මගින් එම මාධ්‍යවේදීන්ගේ මානව හිමිකම්ද උල්ලංඝනය කර ඇත. මාධ්‍යවේදීන්ගේ පෞද්ගලිකත්වය අතික්‍රමණය කර ඇත. එම මාධ්‍යවේදීන්ගේ ජංගම දූරකථනවල ඇති තොරතුරු බලහත්කාරයෙන් රැගෙන ඇත. ඒ මගින් එම මාධ්‍යවේදීන් රැකිය යුතු මූලාශ්‍රවල ආරක්ෂාව අනතුරකට නිරාවරණය කර ඇත.


මේ තර්ජනය කිරීමේ සිදුවීම පිළිබඳව පොලීසිය හෝ පාර්ලිමේන්තුව යම් පරීක්ෂණයක් කළද එම සිදුවීමට අදාල මාධ්‍යවේදීන් දෙදෙනාගෛ් පාර්ශ්වයේ වැදගත්ම සාක්ෂි වන ඔවුන් වීඩියෝගත කරන ලද දර්ශන දැන් ඔවුන් සතුව නැත. ඒවා ඇත්තේ පාර්ලිමේන්තුවේ වේත්‍රධාරියා බාරයේය. එම දර්ශනවල කොටස් අවශ්‍ය නම් කපා හැරිය හැකිය. සංස්කරණය කළ හැකිය. නැතිනම් එම දර්ශන සම්පූර්ණයෙන්ම මකා දැමිය හැකිය.


ඒ නිසා තර්ජනයට ලක්වූ මාධ්‍යවේදීන් දෙදෙනාට සාධාරණයක් ඉටුවේ යැයි හෝ ඒ සම්බන්ධයෙන් සාධාරණ පරීක්ෂණයක් සිදුවේ යැයි අපට අනුමාන කළ නොහැකිය. ඒ වෙන කිසිවක් නිසා නොවේ. එම සිදුවීමේ සියලු සාක්ෂි විත්තිකරුවන් නියෝජනය කරන පාර්ලිමේන්තුව සතුව පවතින බැවින්ය. එමෙන්ම ඉහත නිවේදනය අනුව කතානායකවරයාද මාධ්‍යවේදීන්ගේ මානව අයිතිවාසිකම් උල්ලංඝනය කිරීම ගැන කිසිදු සඳහනක් නොකර පාර්ලිමේන්තු උපදෙස් යන කඩතුරාවට මුවාවී සිය පක්ෂය වන පොහොට්ටුවේ මන්ත්‍රීවරුන් ආරක්ෂා කිරීමේ ප්‍රයන්තයක නිරතව සිටින බව නිරාවරණය කර ඇති බැවින්ය.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි