26.6 C
Sri Lanka
7 October,2022

පෝලිම්වල මියගිය මිනිස්සු සහ ඝාතනය වූ මිනිස්සු

Must read

■ ධනුෂි ලිහිණිකඩුව

ශ්‍රී ලංකාව දශක හතක් පුරාවට දියුණු වෙමින් පවතින රටකි. එය මෑත ඉතිහාසය තුළ ද එසේ ම ය. නමුත් වර්තමානය වන විට සමාජ ආර්ථික දේශපාලන යනාදි සෑම අංශයකින් ම දැඩි පසුගාමී තත්ත්වයකට ලංකාව පත් වී හමාර ය. දැන් දැන් මෙරට දියුණු වෙමින් පවතින රටක් ද යන්න සැක මතු කරයි. මෙවන් වාතාවරණයක් තුළ රටේ ජනතාව පසු වන්නේ දැඩි පීඩනකාරී ස්වභාවයකින් බව කිව යුතු නොවේ. එක් පසෙකින් ඉන්ධන පෝලිම් ද තවත් පසෙකින් අත්‍යවශ්‍ය භාණ්ඩ මිල දී ගැනීම සඳහා පෝලිම් ද කෙලවරක් නොමැතිව දිවෙන ගෑස් පෝලිම් ද දිනෙකට පැය තුන හතරක් සිදු වන විදුලිය විසන්ධි වීම් ද මහජනතාව හෙම්බත් කරමින් ඇත.
නොනවතින ජීවන අරගලයක නිරත වන ජනතාව කබලෙන් ලිපට ඇද දැමීමට පාලක පක්ෂයේ අත්තනෝමතික ක්‍රියාකලාපය හේතු වී තිබේ. රටේ ආර්ථික ක්‍රියාවලිය තවදුරටත් ඉදිරියට ගෙන යාමට මෙරට සතුව ඩොලර් නොමැත. ශ්‍රී ලංකාවේ භාවිත කළ හැකි විදේශ සංචිත ප්‍රමාණය මේ වන විට ඇමෙරිකානු ඩොලර් මිලියන 50කට වඩා අඩු බව වත්මන් මුදල් අමාත්‍ය අලි සබ්රි පාර්ලිමේන්තුවට මැයි 4 දැනුම් දී තිබේ. එවන් තත්ත්වයක ජනතාවට සිදුව ඇත්තේ තෙල් පෝලිම්වල මිය යන්නට ය. නැතහොත් උද්ඝෝෂණ කර වෙඩි කන්නට ය. නොඑසේ නම් සියතින් ම ගෙල වැළලාගෙන මිය යන්නට ය.


අර්බුද සමය පුරාවට ම දිවයිනේ නොයෙක් ප්‍රදේශවලින් එවන් ඛේදවාචකයන් අපට අසන්නට දකින්නට ලැබුණි. පළමු සිදුවීම වාර්තා වූයේ ඉකුත් මාර්තු 19 වැනි දා මහනුවර ප්‍රදේශයෙනි.
මහනුවර යටිනුවර වීදිය ප්‍රදේශයේ ඉන්ධන පිරවුම්හලක භූමිතෙල් පෝලීමක සිටියදී පාතදුම්බර උඩතලවින්න ප්‍රදේශයේ පදිංචිකරුවකු වූ මොහොමඩ් හනිෆා මොහොමඩ් ඉල්ලියාස් නමැති 71 හැවිරිදි දෙදරු පියෙකු ජීවිතක්ෂයට පත් ව ඇත. පැය 4 ක කාලයක් තෙල් පිරවුම්හලේ භූමිතෙල් පෝලිමේ තම වාරය එන තෙක් ගත කරමින් සිටි ඉල්ලියාස් හදිසියේ සිහිසුන්ව ඇද වැටී ඇති අතර මහනුවර ජාතික රෝහලට ඇතුළත් කළ ද ඒ වන විටද ඔහු මියගොස් සිට තිබේ. ඇද වැටුණු ඉල්ලියාස් අසලට කිසිවෙක් ළං නොවීම නිසා සිද්ධිය වූ ස්ථානයේ සිට ඔහුව රෝහල කරා රැගෙන යාමට දීර්ඝ වේලාවක් ගත වී ඇති බව ද වාර්තා වේ. ඉල්ලියාස්ගේ මරණය පිළිබඳ සිදුකළ පශ්චාත් මරණ පරීක්ෂණයෙන් හෙළි වී තිබුණේ ප්‍රධාන ධමනියක් පුපුරා යාමෙන් එම මරණය සිදුව ඇති බවයි. එසේ ධමනියක් පුපුරා යාමට ප්‍රධාන ම හේතු විය හැක්කේ දැඩිව ආතතියට පත්ව සිටීම බවත් වෛද්‍ය මතය විය.


මෙවන් ම සිදුවීමක් ඊට පසු දින ද වාර්තා විය. ඒ කඩවත ප්‍රදේශයේ සිපෙට්කෝ ඉන්ධන පිරවුම්හලක පෝලිමේ රැඳී සිටි ත්‍රීරෝද රථ රියැදුරෙකි. මාකොළ දකුණ සිරිමංගල මාවතේ සය වන පටුමගෙහි පදිංචිව සිටි සමරවීර ආරච්චිගේ එඩ්මන් රිචර්ඩ් පෙරේරා ද දෙදරු පියෙකි. එදින කඩවත ප්‍රදේශයට තම ත්‍රීරෝද රථයෙන් මගියෙකු හැරලවා ඉන්ධන පිරවුම්හලට පැමිණි ඔහු එහි දී සිහිසුන් ව ඇද වැටී ඇති අතර කඩවත පොලිසිය වහා ක්‍රියාත්මක වී ඔහුව රාගම රෝහලට ගෙන ගියද ඒ වන විටත් ඔහු මිය ගොස් සිට ඇත.


තෙවන මරණය ලෙස වාර්තා වූයේ එදින ම රාත්‍රී 8.30ට පමණ ඉන්ධන පිරවුම්හලක් ආශ්‍රිතව සිදු වූ මනුෂ්‍ය ඝාතනයයි. එය සිදු වූයේ නුවර – කොළඹ ප්‍රධාන මාර්ගයේ නිට්ටඹුව, හොරගොල්ල, සිපෙට්කෝ ඉන්ධන පිරවුම්හල අසලදී ය. එම මරණය දීර්ඝ කාලයක් පෝලිම්වල රැඳීමෙන් පීඩාවට පත් වීමේ ප්‍රතිඵලයක් ලෙස සිදු වූ මිනිස් ඝාතනයකි.
කොළඹ 14 සිරිමුතු උයනේ පදිංචිව සිටි අවිවාහක පුද්ගලයෙක් වූ තුවාන් මිල්ෂාන් තාජුඩින් නමැති 29 හැවිරිදි පුද්ගලයෙකු එලෙස ඝාතනයට ලක් ව ඇත. තාජුඩින් එදින රාත්‍රී 8.30ට පමණ සිය යතුරුපැදියට ඉන්ධන ලබා ගැනීමට පොම්පය අසල සිටියදී පෝලිම මඟහැර පැමිණි රථයක් තෙල් ලබා ගැනීමට සූදානම් වී ඇත. එම ත්‍රිරෝද රථයේ පැමිණියේ 38 හැවිරිදි බී. ඒ. නුවන් ප්‍රියදර්ශන නමැති නිට්ටඹුව, පනාවල පදිංචි අයෙකි. නුවන් ප්‍රියදර්ශන සිය ත්‍රිරෝද රථයට පෝලිමෙන් පිට පැන තෙල් ලබා ගැනීමට තැත් කරද්දී තාජුඩින් ඊට එරෙහි වී ඇත. අනතුරුව දෙදෙනා අතර බහින්බස් වීමක් සිදුව ඇති අතර එය ඉන්ධන පිරවුම්හලේ සීසීටීවී කැමරාවන්හි ද සටහන් වී තිබිණි. මග රැක සිටි තාජුඩින්ගේ යතුරුපැදිය ඉදිරිපිටට පැන නුවන්ට පිහි පහරක් එල්ල කර ඇත. ඇද වැටුණු තාජුඩින් වතුපිටිවල රෝහලට ඇතුළත් කළ ද අන්දමින් ඔහු ජීවිතක්ෂයට පත් විය.


එම ඝාතනයෙන් දිනකට පසු එනම් මාර්තු 21 වන දා පෙරවරුවේ මීරිගම නගර මධ්‍යයේ බෝ ගස අසල පිහිටි ඉන්ධන පිරවුම්හල අසලින් තවත් මරණයක් වාර්තා විය. මරණයට පත්වූයේ 76 හැවිරිදි අතුකෝරලලාගේ ජයරත්න වික්‍රමපාල නමැත්තෙකි. දරුවන් සයදෙනකුගේ පියකු වූ මීරිගම, නවාන පදිංචිව සිටි ජයරත්න වික්‍රමපාල ඩීසල් ත්‍රිරෝද රථයකින් පැමිණ පෝලිමේ සිට කෑන් තුනකට ඉන්ධන ලබාගෙන ඇත. පසුව ඉන්ධන පිරවූ කෑන් දෙකක් ත්‍රිරෝද රථයට රැගෙන ගොස් තබා තුන්වැනි කෑනයද රැගෙන යමින් සිටියදී ඔහු එක්වරම ඇද වැටී ඇත. ක්ෂණිකවම ගිලන් රියකින් මීරිගම මූලික රෝහලට ඇතුළු කිරීමට කටයුතු කළත් ඔහු ඒ වන විටත් මියගොස් සිටියේ ය.


පසුගිය මාර්තු 26 වැනිදා ද ඉන්ධන පිරවුම්හලක් අසලින් මරණයක් සැල විණි. පෝලිම්වල ළතැවීමෙන් සිදු වූ පස්වන මරණය ලෙස එම මරණය වාර්තා වූයේ අතුරුගිරිය ප්‍රදේශයේ ඉන්ධන පිරවුම් හලකිනි. එලෙස මිය ගියේ අතුරුගිරිය, ගල්පොත්ත පාරේ පදිංචිව සිටි එම්. ජිනදාස පෙරේරා නමැති 85 හැවිරිදි පුද්ගලයෙකි. ඔහු වෑන් රථයකින් පැමිණ ඉන්ධන ලබා ගැනීමට රථයෙන්ම පෝලිමේ ඉදිරියට ගොස් ඇත. එතරම් තදබදයක් නොවූ ඒ ඉන්ධන පිරවුම්හලෙන් ඉන්ධන ලබා ගැනීමට සැරැසෙද්දීම ඔහු මියගොස් සිටියේය. මියගිය ජිනදාස කලෙක සිටම හෘදය රෝගයෙන් පෙළෙමින් සිටි අයෙක් බව වාර්තා විය.


පෝලිම්වල රැඳී සිටීමෙන් හෙම්බත්ව ඇද වැටීම නිසා සිදු වූ 6 වන මරණය ලෙස අප්‍රේල් 9 වැනිදා රාත්‍රී 7ට පමණ දංකොටුව – මීගමුව ප්‍රධාන මාර්ගයට එක්වන ස්ථානයේ පිහිටි ඉන්ධන පිරවුම්හල අසලින් තවත් මරණයක් වාර්තා විය. මියගොස් සිටියේ පන්නල, ගෝනවිල, එලිවිල පදිංචි 47 හැවිරිදි එච්. ඒ. චමින්ද පුෂ්පකුමාර නමැත්තෙකි. ඔහු ඇඟලුම් කම්හලක සේවිකාවන් ප්‍රවාහනය කරන බස් රථ රියැදුරෙකි. චමින්ද මිය යන්නට මත්තෙන් බස්රථයට ඩීසල් ලබා ගැනීමට දින දෙකක් පුරා පෝලිමේ ළතැවූ බව වාර්තා වේ.


පුෂ්පකුමාරගේ මරණයෙන් පැය කිහිපයක් ගතවෙද්දී ඊට නුදුරු ප්‍රදේශයකින් ම තවත් මරණයක් වාර්තා විය. ඒ ඉකුත් 10 වැනිදා උදෑසන 7ට පමණ වන අතර මරණයට පත්ව සිටියේ කොච්චිකඩේ, දළුවකොටුව, තක්කියා පාර පදිංචිව සිටි 50 හැවිරිදි මුහම්මදු සරීෆ්දීන් මුහම්මදු ජසීම් නමැත්තෙකි. ඔහු සිය මෝටර් රථයට ඉන්ධන ලබා ගැනීමට මීගමුව – දංකොටුව මාර්ගයේ තඹරවිල පිරවුම්හල වෙත පැමිණ සිටි අතර ඉන්ධන ලබා ගැනීමෙන් අනතුරුව රියෙහි රෝද සඳහා සුළං පිරවීමට රථය නතරකොට තිබියදී ඔහු රථය තුළ ම මියගොස් සිට ඇත. ටයරවලට සුළං පුරවා අනතුරුව එහි සේවකයකු මෝටර් රථය තුළ පරීක්ෂා කරන විට රථයේ රියැදුරු අසුනේ වූ ජසීම් කිසිදු ප්‍රතිචාරයක් දක්වා නැත. පසුව 1990 සුවසැරිය ගිලන් රථ සේවකයන් පැමිණ පරීක්ෂා කිරීමේ දී ඔහු මියගොස් ඇති බව තහවුරු වීය.


මේ අතර ඉකුත් 10 වැනිදා යාපනය, අච්චුවේලි ප්‍රදේශයේ ඉන්ධන පිරවුම්හලක් අසල වාහන පෝලිමක සිදු වූ රිය අනතුරකින්ද මරණයක් සිදු වූ බවට වාර්තා විය. එම ඉන්ධනහලට ඩීසල් බවුසරය පැමිණීමෙන් පසුව ඇති වූ වාහන තදබදයට මැදිව මියගොස් සිටියේ අච්චුවේලිහි පදිංචි වයස අවුරුදු 72ක පුද්ගලයෙකි.


මේ අතර අප්‍රේල් 11 වැනිදා සඳුදා උදෑසන 6.30ට පමණ ගාල්ල, හිනිදුම, තවලම සිපෙට්කෝ ඉන්ධන හල අසලින් ද මරණයක් වාර්තා විය. එලෙස මරණයට පත් වූයේ තවලම, හබරකඩ, බදුවත්ත ප්‍රදේශයේ පදිංචිව 43 හැවිරිදි තිලක් ප්‍රසන්න කුමාර නමැති දෙදරු පියෙකි. ප්‍රසන්න ඉකුත් 10 වැනිදා රාත්‍රියේ සිට ම ඔහුගේ ලොරි රථයට ඉන්ධන ලබා ගැනීමට සඳහා පෝලිමට එක්ව පසුව රථය පෝලිමේ තබා නිවෙසට ගොස් ඇත. පසුව නැවත ඔහු පෝලිමට පැමිණ ඇත්තේ 11 වැනිදා අලුයම 4.30ට පමණ ය. අනතුරුව ඉන්ධන පිරවුම්හලෙන් ඩීසල් නිකුත් කිරීමත් සමඟ පෝලිම ඉදිරියට යද්දී ප්‍රසන්නගේ ලොරි රථය ඉදිරියට නොගැනීම පිළිබඳව පුද්ගලයන් විපරම් කර බලන විට ඔහු ලොරි රථයේ රියැදුරු අසුනේ ම මියගොස් සිට ඇති බවයි.


මේ අතර තෙල් අර්බුදය හේතුවෙන් සිදු වූ බරපතළ ම සිදුවීම ලෙස රට පුරා දැඩි ආන්දෝලනයකට තුඩු දුන් රඹුක්කන වෙඩි තැබීමේ සිද්ධිය සටහන් කළ හැකි ය. ඉන්ධන මිල ඉහල දැමීමත් සමග ඇති වූ නොසන්සුන්කාරී තත්ත්වයක් හේතුවෙන් පැය 15කට අධික කාලයක් දුම්රිය මාර්ගය වසා උද්ඝෝෂණයේ නිරතව සිටි ජනතාව විසුරුවා හැරීමට පොලිසිය කඳුළුගෑස් ප්‍රහාරයක් එල්ල කළ අතර ඒ අවස්ථාවේ පොලිසිය සහ උද්ඝෝෂකයන් අතර දැඩි උණුසුම්කාරී තත්ත්වයක් ඇති විය. ඒ අවස්ථාවේ පොලිසිය විසින් තබන ලද වෙඩි ප්‍රහාරයකට ලක් ව මිය ගියේ 42 හැවිරිදි දෙදරු පියෙකු වන චමින්ද ලක්ෂාන් නැමැති අයෙකි. සිදුවීමෙන් තුවාල ලද තුවාලකරුවන් 29 දෙනෙකු කෑගල්ල මහ රෝහලට ඇතුළත් කරන ලද අතර එම පිරිස අතරට පොලිස් නිලධාරීන් 15 දෙනෙක්ද වෙති. එමෙන් ම තුවාල ලැබූවන් අතර අපොස සාමාන්‍ය පෙළ හදාරන සිසුවෙක් ද සිටින අතර ඔහුට සිදුව ඇති හානිය ඉතා බරපතල බව වාර්තා වේ. හිරිවඩුන්න නාරාංබැද්ද කරදගස්තැන්න ලිපිනයේ පදිංචි චමින්ද ලක්ෂාන්ගේ මරණයෙන් දැඩිව කම්පනයට පත් ව සිටින්නේ ඔහුගේ බිරිඳ සහ ඇයගේ දරුවන් දෙදෙනා ය. තම ස්වාමිපුරුෂයාගේ මරණය සම්බන්ධයෙන් සාක්ෂි ලබා දුන් ඇය එහිදී හැඬු කඳුළින් සඳහන් කර සිටියේ යතුරුපැදියට ඉන්ධන ලබා ගැනීම පිණිස ඉන්ධන හල වෙත ගමන් ගත් තම සැමියාට නිකරුනේ වෙඩි තබන ලද පොලිසිය මිනී මරුවන් බවත් වරදකරුවන් වෙත නීතිය ඒ ආකාරයෙන් ම ක්‍රියාත්මක වනු දැකීම තමන්ට ඇති එක ම අපේක්ෂාව බවත් ය.


පෝලිම්වල රැඳී සිටීම දෛනික රාජකාරියක් බවට පත් ව ඇති සමයක මෙලෙස මරණ වාර්තා වීම ඇතැමෙකුට සාමාන්‍ය සිදුවීමක් ලෙස දැනෙනවා ඇත. නමුත් මේ අහිමි වන ජීවිත ඔවුන්ගේ කුටුම්බයන්ට කෙතරම් වටිනවා ඇත් ද යන්න දන්නේ සමීපතමයන් පමණි. මේ අතර පෝලිම්වල වූ මරණයන්ට අමතරව විදුලිය විසන්ධි කිරීම හේතුවෙන් නොයෙකුත් උපද්‍රවයන්ට ලක්ව අහිමිව ගිය ජීවිත ද රැසකි.


වැලිමඩ කැප්පෙටිපොළ අත්කම් නිවාස ප්‍රදේශයේ නිවෙසක 29 වැනිදා රාත්‍රියේ ජෙනරේටරයක් පිපිරී යෑම හේතුවෙන් දෙදෙනෙකු මරණයට පත් ව කුඩා දරුවෙක් දැඩි සත්කාර ඒකකයේ ප්‍රතිකාර ලබමින් සිටියි. මෙම පිපිරීම අප්‍රේල් 29 වැනිදා රාත්‍රී 8.30 ට පමණ සිදු විය. රාත්‍රියේ විදුලිය විසන්ධි කර තිබූ අවස්ථාවේ මෙම නිවසට ජෙනරේටරයක් මගින් විදුලි බලය ලබා ගෙන ඇති අතර නිවසේ කාමරයක තිබුණ ජෙනරේටරය නැවතී ඒ ගැන විපරම් කිරීමට නිවසේ සිටි කාන්තාවත් ඇගේ දරු දෙදෙනාත් ජෙනරේටරය අසලට ගොස් තිබේ. ඒ සමගම විශාල ශබ්දයක් ද සමග ජෙනරේටරය පුපුරා ගොස් ඇති බව මේ වනවිට සිදු කෙරුණ විමර්ශනවල දී අනාවරණය වී ඇතැයි පොලිසිය පවසයි. එහි දී ජීවිතක්ෂයට පත් ව ඇත්තේ 38 හැවිරිදි කාන්තාවක් සහ වයස අවුරුදු 9ක් වන ඇයගේ දියණියයි. අනතුරින් තුවාල ලද පස් හැවිරිදි පිරිමි දරුවා තව දුරටත් කොළඹ රිජ්වේ ආර්යා ළමා රෝහලේ දැඩිසත්කාර ඒකකයේ ප්‍රතිකාර ලබමින් සිටියි.


ලාම්පුවක් දල්වා පාඩම් කරමින් සිටි 16 හැවිරිදි සිසුවියක් ලාම්පුව පෙරළී පිලිස්සුම් තුවාල ලබා මියගොස් ඇත. මෙලෙස මිය ගොස් ඇත්තේ ඉලවාලි ප්‍රදේශයේ සිසුවියකි. විදුලිය විසන්ධි වූ අවස්ථාවේ දී ඉකුත් 2වෙනි දින රාත්‍රියේ මෙම සිසුවිය ලාම්පුව දල්වාගෙන සිය කාමරයේ දොර වසාගෙන පාඩම් කරමින් සිටියදී එය පෙරළී යාමෙන් මෙලෙස පිළිස්සුම් තුවාල ලබා ඇතැයි පොලිසිය සඳහන් කරයි. පියා විසින් ගෙන එන ලද පෙට්‍රල් බෝතලයක් එම කාමරයේ තිබී ඇති අතර ලාම්පුව පෙරලීමෙන් ගින්න පෙට්‍රල්වලට ඇවිලී මෙම ගින්න පැතිර ගොස් ඇති බව පොලිසිය පවසයි. ගින්න ඇති වීමත් සමගම කාමරයේ දොර වසා තිබීම හේතුවෙන් නිවැසියන්ට ක්ෂණිකව සිසුවිය බේරා ගැනීමට නොහැකි වී ඇති අතර දොර කඩා සිසුවිය බේරා ගන්නා අවස්ථාවේ ඇය දැඩි ලෙස පිළිස්සුම් තුවාල ලබා සිටි බව වාර්තා වේ.


මෙවැනි ම තවත් සිදු වීමක් හෙම්මාතගම පොලිස් බල ප්‍රදේශයෙන් වාර්තා විය. පවතින ඉන්ධන අර්බුදය හමුවේ නිවෙස් තුළ අතිරික්ත ඉන්ධන ගබඩා කිරීමකින් මෙම මරණය සිදු ව ඇති බව පොලිසිය පවසයි. අනතුරින් නිදන යහන මත ම මියගොස් ඇත්තේ සිව් වන වසරේ අධ්‍යාපනය ලබන පිරිමි දරුවෙකි.


ආර්ථික ගැටලු හේතුවෙන් ඇති වූ මානසික පීඩනය දරා ගත නොහැකිව පසු ගිය දා හැට නව හැවිරිදි තිදරු පියෙක් සියදිවි හානි කරගෙන ඇත. ගෙල වැලලාගෙන මෙලෙස මිය ගොස් ඇත්තේ ගල්ගමුව වලස්වැව ප්‍රදේශයේ පදිංචි ඩබ්. එම්.ඩිංගිරි බණ්ඩා නැමැති අයෙකි. ඉතා අසීරුවෙන් දිවි ගෙවූ ඔහු ඇතුළු පවුල පවතින අර්බුදය හමුවේ තවත් අගාධයට ඇද වැටී ඇති අතර සිය ගොවිතැන ද නිසරු වූ බව පවසමින් ඔහු දැඩි මානසික පීඩනයකින් පසු වූ බව බිරිඳ ප්‍රකාශ කර සිටියා ය. අසල කැලෑ රොදක තිබී ගෙල වැලලාගත් සිරුර හමු වී ඇත්තේ ඔහුගේ මිනිබිරියකටයි.


ඉන්ධන පෝලිම්වල සිදු වන මරණ පිළිබඳ අදහස් දක්වමින් ශ්‍රී ලංකා වෛද්‍ය සංගමයේ සභාපති මහාචාර්ය සමත් ධර්මරත්න ප්‍රකාශ කරන්නේ දැඩි අව්වට නිරාවරණය වීම නිසා විජලනය වීම මෙවැනි තත්ත්වයන්ට හේතු විය හැකි බව යි. ”අව්වේ හිටගෙන ඉන්නකොට ආවරණයක් නැහැ. අව්වෙදි විජලනය, නැත්නම් ඩීහයිඩ්රේෂන් වෙන්න පුළුවන්. ප්‍රධානම අවවාදය තමා, විජලනය වෙන්නේ නැතිවෙන්න වතුර බොන්න. යනකොට වතුර බෝතලයකුත් අරගෙන ගිහිල්ලා පුළුවන් තරම් වතුර බොන්න.”


කෙසේ වුව ද අර්බුද තත්ත්වයත් සමග බෝ නොවන රෝග සහිත පුද්ගලයින් මරණයට පත් වූ සිදුවීම් රැසක් වාර්තා වී ඇතත් අහිමි වූ ජීවිතවලට වගකිවයුත්තෙක් නොමැත. පෝලිම්වල ළතැවෙන අර්බුදය හමුවේ තැලී පොඩිවන ජනතාවට කඩිනමින් ඒ තත්වයෙන් මිදීමට ඉඩක් ලැබේවිද යන්න තවමත් ගැටලු සහගත ය.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි