20.2 C
Sri Lanka
3 October,2022

තාවකාලික පාලමකට පීත්ත පටි කපා ෂෝ දමන හමුදාපති

Must read

ඕනෑම දෙයක් පිළිවෙළකට කරනවා
යුද හමුදා මාධ්‍ය ප්‍රකාශක

‘පාලම ඉදිකිරීමේ පූර්ණ ශ්‍රම දායකත්වය යුද හමුදාවෙන් අපි ලබා දුන්නා. පාලම ඉදි කරන්න අරගත්තේ පාවිච්චියට නුසුදුසු ලයිට් කණු. ඒවා ලැබිලා තිබෙන්නේ දිසාපති හා සංඝ සභාවේ මැදිහත්වීමෙන්. යුද හමුදාවෙන් ලබා දුන්නේ ශ්‍රම දායකත්වය සහ තාක්ෂණික දායකත්වය පමණයි. පාලම විවෘත කිරීමේදී යොදා ගත්ත සංස්කෘතික කණඩායම යුද හමුදාවේම සංස්කෘතික කණ්ඩායමක්. ගහලා තිබුණ ටෙන්ට් ටිකත් යුද හමුදාවටම අයිති සම්පත්. ඒ ඇරෙන්න එළියෙන් අරගෙන මුදල් වියදම් වන දේවල් එතැනට අරගෙන තිබුණෙ නැහැ. යුද හමුදාවෙ සම්ප්‍රදායක් තමයි අපි ඕනෑම දෙයක් කරද්දි පිළිවෙළකට කරනවා. ඒ වගේ දෙයක් තමයි එතැන වෙලා තියෙන්නෙ. ඒ ඇරෙන්න අමතර ප්‍රචාරයක් කරලා කරපු දෙයක් එතන නැහැ. සම්ප්‍රදායානුකූලව තමයි සියලුදේම කළේ. මේ තාවකාලික පාලම යුද හමුදාවෙන් තමයි හැදුවේ, ඒ සඳහා යුද හමුදා භට පිරිස්වල දායකත්වයක් තියෙනවා. ඒ නිසා තමයි ආයතන ප්‍රධානියා විදිහට යුද හමුදාපති එතනට සහභාගි වුණේ.’■

මම නං පීත්ත පටි කැපුවේ නැහැ
ෆීල්ඩ් මාර්ෂල් සරත් ෆොන්සේකා

මේ පිළිබඳව හිටපු හමුදාපති ෆීල්ඩ් මාර්ෂල් සරත් ෆොන්සේකාගෙන් කළ විමසීමකදී ඔහු ප්‍රකාශ කළේ තමන් හමුදාව සම්බන්ධයෙන් විවේචන කිරීමට අකමැති බවත් තමන් හමුදාපතිව සිටිය දී නම් පීත්ත පටි කපන වැඩ නොකළ බවත් තමාට පැවරී ඇති රාජකාරිය පමණක් ඉටු කළ බවත්ය.■

■ ඇන්තනී වෙරංග පුෂ්පික

පරවි දූපත හෙවත් රන් දූපත දකුණු පළාතෙහි මාතර දිස්ත්‍රික්කයේ මාතර බස් නැවතුම්පොල හා වෙරළට යාබදව මුහුදට වන්නට පිහිටා ඇති දූපතකි. පරවි දූපත ශ්‍රී රෝහණ සංඝ සභාවේ උපෝෂිතාගාරය ලෙස ආගමික වශයෙන් පමණක් නොව දෙස් විදෙස් සංචාරකයන්ගේ සිත් ඇද ගන්නා සංචාරක ස්ථානයක් ලෙස ද ප්‍රචලිතය. දූපත පිහිටා තිබෙන්නේ වෙරළේ සිට මීටර 200ක් පමණ ඈතින් වූවත් මුහුදු රළ පහර නිසා දූපතට පයින් ගමන් කළ නොහැක. මේ නිසා ගොඩබිමේ සිට පරවි දූපතට යකඩින් තැනූ වැල් පාලමක් ඇත. මෙය අවස්ථා කිහිපයක දීම අබලන් වී විනාශ වූවත් තාවකාලිකව හෝ පරවි දූපතට පාලම් ඉදිකෙරිණි. පාර්ලිමේන්තු මන්ත්‍රී නිපුණ රණවකගේ සහ අමාත්‍ය චමල් රාජපක්ෂගේ මැදිහත් වීමෙන් පසුගිය වර්ෂයේ දී ද එම පාලම ප්‍රතිසංස්කරණ කටයුතු සිදු කළත් මාර්තු පස් වන දින එම පාලම මුහුදටම පහත් වූයේ පරවි දූපතට යන එන බැතිමතුන් හා දෙස් විදෙස් සංචාරකයන් පාලමෙන් ගමන් ගන්නා අතරතුරදීමය. කෙසේ වෙතත් ඉන් කිසිවෙකුටත් හානියක් වූයේ නැත. සිදු වූ එකම හානිය වූයේ පරවි දූපතට ගමන් කිරීමට තිබූ මාර්ගය ඇණ හිටීම පමණි.


රටේ කුමන හෝ ව්‍යසනයක දී හෝ ආපදා අවස්ථාවක දී ඉදිරියට විත් ජනතාවට පිහිට වන්නට පැමිණෙන්නේ ත්‍රිවිධ හමුදාවය. මෑත කාලයේ නම් හමුදාවන්ට විෂය නොවන සෞඛ්‍ය කෘෂිකර්මයේ පවා ගැටලු විසඳීමට සහ නගාසිටුවීමට හමුදාව පෙරට ආවේය. එපරිද්දෙන්ම කඩා වැටුණ පරවි දූපතත් ගොඩබිමත් යා කරන පාලම වෙනුවට තාවකාලිකව පාලමක් හැදීමේ වගකීම හමුදාව සිය කර මතට ගත්තේය. යුද්ධ හමුදාවේ ඉංජිනේරු බලකායේ තාක්ෂණික දැනුම ද වෘත්තීය නිපුණත්වය සමග සිය ශ්‍රමයෙන් වැඩ අරඹා සතියක් ගත වීමටත් පෙර පරවි දූපතට පාලමක් ඉදි කළහ. තාවකාලික පාලමක් හෝ දින කිහිපයක් තුළ වැඩ අරඹා ඉදිකිරීම පිළිබඳව යුද්ධ හමුදාවට ස්තූති වන්ත විය යුතුය. එමෙන්ම ඔවුන්ගේ නිපුණත්වය හා කැපවීම පිළිබඳව සතුටු විය යුතුය. නමුත් මෙහි කතා කළ යුතුම සහ මග නොහැරිය යුතු කාරණා කිහිපයක් ද ඇත.


පරවි දූපත හා ගොඩබිම යා කරන පාලම කඩා වැටීමෙන් අනතුරුව හමුදාව මැදිහත් වී ඉදිකරනු ලැබූවේ තාවකාලික පාලමකි. වෙලාවේ හැටියට සතියක් ගත වීමටත් පෙර තාවකාලික හෝ පාලමක් මුහුද මැදින් ඉදි කිරීම ලෙහෙසි පහසු කටයුත්තක් නොවන බව ඇත්තකි. පෙර කී ලෙසම එහි සම්පූර්ණ ගෞරවය පාලම ඉදිකළ සියලුම හමුදා භටයන්ට හිමි විය යුතුය.
තාවකාලික පාලමෙහි වැඩ නිමවා මාර්තු 12 දින එම තාවකාලික පාලම විවෘත කරනු ලැබුවේ රටේ ජාතික උත්සවයක් පරිද්දෙනි. මහා පරිමාණ ටෙන්ට් පාලම දෙපස ඉදිකොට තාවකාලික පාලම විවෘත කිරීම සුව පහසුව ඇතිව ආරාධිත අමුත්තන්ට සහ ජනී ජනයාට නැරඹීමට ද කටයුතු කොට තිබුණි. තාවකාලික පාලම විවෘත කිරීමේ ප්‍රධාන ආරාධිත අමුත්තා වූයේ ආරක්ෂක මාණ්ඩලික ප්‍රධානී සහ යුද්ධ හමුදාපති ජනරාල් ශවේන්ද්‍ර සිල්වාය. තාවකාලික පාලම විවෘත කිරීම සංකේතවත් කරමින් පීත්ත පටියක් ද කපන්නට කටයුතු යොදා තිබුණි. ජනරාල් ශ්වේන්ද්‍ර සිල්වා තාවකාලික පාලම විවෘත කිරීමේ පීත්ත පටිය කපන්නට පැමිණියේ ධජ පතාක ලෙල දෙවමින් මඟුල් බෙර වාදකයන් ද පෙරටු කර ගනිමින් රතු පලස් මතිනි.


එහි ප්‍රධාන වශයෙන් කතා කළ යුතු කාරණා දෙකක් ඇත. පළමු කරණාව වන්නේ ජනරාල් ශවේන්ද්‍ර සිල්වා මාර්තු 12 වන දින උත්සවාකාරයෙන් විවෘත කරනු ලැබූවේ තාවකාලිකව ඉදිකළ පාලමකි. යමෙක් තාවකාලිකව ඉදිකළ පාලම ඉදිකිරීමට වූ මහන්සියට වඩා මහන්සියක් එම තාවකාලික පාලම විවෘත කිරීමේ උත්සවයට මහන්සි වී ඇති බව නොසිතෙන්නේ නැත. තාවකාලික පාලමක් විවෘත කිරීමට උත්සවාකාරයෙන් පීත්ත පටි කැපීම හාස්‍යයකි. හාස්‍යයට ලක් වන්නේද අන් කවුරුවත් නොව ශ්‍රී ලංකා යුද හමුදාවම වන්නේය. ගොඩනැගිලි, පාලම්, බෝක්කු හෝ කවර හෝ දෙයක් විවෘත කිරීම සඳහා වියදම් වන්නේ ජනතාවගේ මුදල්ය. එය තාවකාලික නොව ස්ථිරව ජනතා අයිතියකට පත් කරන ඕනෑම දෙයකට වුවද උත්සව පැවැත්වීම මොන යම් හෝ කෙනෙක් අතින් සිදු වීම අනුමත කළ නොහැක. එය කාලාන්තරයක් පුරා ජනතාවගේ දෝෂ දර්ශනයට ලක් වූවකි. එවන් තත්වයක් තුළ යුද්ධ හමුදාපති ජනරාල් ශවේන්ද්‍ර සිල්වා තාවකාලිකව ඉදි කළ පාලමක පීත්ත පටි කපා විවෘත කිරීම කෙසේ අනුමත කළ හැකිද? අනෙක් අතට රටේ ජනතාව සිටින්නේ පාං ගෙඩියක් මිල දී ගන්නේ කෙසේ දැයි කල්පනා කරමිනි. එවැනි තැනකට වැටී ඇති ජනතාව ජාතික උත්සවයක් පරිද්දෙන් තාවකාලික පාලමක් විවෘත කිරීම දැක කුමක් නම් නොසිතයිද? මෙවැනි උත්සවයක් සංවිධානය කිරීමට පෙර රටත් ජනතාවත් ඇද වැටී ඇති තත්වය ගැන හෝ කල්පනා කිරීමට තිබුණි.


ගොඩබිමේ සිට පරෙවි දූපතට තාවකාලික පාලමක් ඉදිකොට එය උත්සවාකාරයෙන් විවෘත කිරීම පිළිබඳව කතා කළ යුතු දෙවැනි කාරණය වන්නේ පීත්ත පටි කපා තාවකාලික පාලම විවෘත කරනු ලැබූවේ අන් කවුරුවත් නොව ශ්‍රී ලංකා යුද්ධ හමුදාවේ හමුදාපති, ආරක්ෂක මාණ්ඩලික ප්‍රධානී ජනරාල් ශවේන්ද්‍ර සිල්වා වීමය. බැලූ බැල්මටම එහි තිබෙන්නේ දේශපාලනමය හැඩයකි. එය අතිශය බරපතළය. හමුදාපති ජනරාල් ශවේන්ද්‍ර සිල්වා නියෝජනය කරන්නේ යම්කිසි කණ්ඩායමක් හෝ දේශපාලන පක්ෂයක් නොව සමස්ත යුද හමුදාවමය. ඒ වගේම ජනරාල් ශවේන්ද්‍ර සිල්වා පීත්ත පටි කැපූ පළමු අවස්ථාවද මෙය නොවන්නේය. පසුගිය මාසයේ මාතලේ නගරය ආසන්නව උද්‍යානයක ඇවිදින මංතීරුව විවෘත කිරීමේ දී ද පීත්ත පටි කැපූ ප්‍රධාන ආරාධිත අමුත්තා මොහුය. ජනතා දේපළ අයිතියට පත් කිරීමේ දී හමුදාපති හෝ හමුදා නිලයන් විසින් පීත්ත පටි කැපීමේ සම්ප්‍රදායක් මීට පෙරත් පැවතුණා දැයි සෙවිය යුතුය.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි