බී වාර්තාවේ කරුණු අසත්‍යයි
ත්‍රස්ත ක්‍රියා පිළිබඳ විශේෂඥ කියයි
ශානි අබේසේකරට එල්ලකර ඇති චෝදනා අඩංගු වන්නේ කුලියාපිටිය මහෙස්ත්‍රාත් අධිකරණයට සීඅයිඩීය ඉදිරිපත් කර ඇති බී වාර්තාවේය.
පසුගිය මාසයේ පැවැති දෙරණ රූපවාහිනියේ ‘අලුත් පාර්ලිමේන්තුව’ වැඩසටහනකදී, ත්‍රස්ත කටයුතු පිළිබඳ විශේෂඥ රොහාන් ගුණරත්න, එම බී වාර්තාව ගැන මෙසේ කීවේය.
සංඛ: කුලියාපිටිය මහේස්ත්‍රාත් අධිකරණයට ඉදිරිපත් කරපු බී වාර්තාව සම්බන්ධයෙන් දැනුවත් වෙලා තියෙනවාද?
රොහාන් ගුණරත්න: මම ඒ වාර්තාව දැකලා තියෙනවා. හැබැයි ඒ වාර්තාවෙ කියනවා, සහරාන්ගේ බිරිඳ හාදියා කැකුණගොල්ලේ ඉඳලා තියෙනවා. සහරාන් ඇවිල්ලා එයාව එතැනින් අරගෙන ගෙදර ගියා කියලා. ඒක අසත්‍යයි. මොකද මම රිස්කාන් (රිස්කාන් කියන්නේ සහරාන්ගේ කණ්ඩායමේ හිටපු එක්කෙනෙක්) ඇවිල්ලා හාදියා සහ පුලස්තිනිව කුරුණෑගල ප්‍රදේශයෙන් අරගෙන ඒගොල්ලන්ගේ මීගමුවේ කටුවපිටියේ තියෙන සේෆ්හවුස් එකට රැගෙන ආවා. ඒ බී රිපෝට් එකේ තියෙන සමහර තොරතුරු සත්‍ය තොරතුරු නෙවෙයි. අපි හිතන්නේ ඒ ගැන තවදුරටත් විමර්ශනය කළ යුතුයි. ■
කොළඹ රිමාන්ඩ් බන්ධනාගාරයේ සිටින පාස්කු ඉරුදින ප්‍රහාරයේ ප්‍රධානියා වූ එම්සීඑම් සහරාන්ගේ බිරිඳගෙන්, සීඅයිඩී නිලධාරින් පිරිසක් ප්‍රකාශ සටහන් කරගත් බව ජනමාධ්‍ය වාර්තා කළේය.
මේ විමර්ශනය තුළින් තමා අත්අඩංගුවට ගැනීමේ සැලැස්මක් තිබෙන බව කියන අපරාධ පරීක්‍ෂණ දෙපාර්තමේන්තුවේ (සීඅයිඩී) හිටපු කීර්තිමත් අධ්‍යක්‍ෂවරයා වූ ශානි අබේසේකර මහතා, තමා අත්අඩංගුවට ගැනීමෙන් වැළැක්වීමේ නියෝගයක් නිකුත් කරන ලෙස ඉල්ලා ශ්‍රේෂ්ඨාධිකරණය ඉදිරියේ මූලික අයිතිවාසිකම් පෙත්සමක් ගොනුකළේය. අප, ශානි අබේසේකර මහතාගේ පෙත්සමේ සඳහන් කරුණුවල අනුවාදයක් මෙසේ ගෙන එන්නේ, එහි අඩංගු කරුණු ඒ හැටියටම අවබෝධ කරගන්නට පාඨකයන්ට පහසු වනු සඳහාය.
අද පළවන්නේ එහි සිව්වැනි නොහොත් අවසාන කොටසයි.
ශානි අබේසේකරට එරෙහිව කුලියාපිටිය මහේස්ත්‍රාත් අධිකරණයේ ගොනු කරන ලද 1411/2022 දරන බී වාර්තාව
තමා විසින් කරන ලද බරපතළ අතපසුවීම් හේතුවෙන් පාස්කු ඉරිදා ප්‍රහාරයට මගපෑදුණු බවට 9 වැනි වගඋත්තරකරු අධිකරණය ඉදිරියේ ‘බී’ වාර්තාවක් ගොනු කර ඇති බව 2022.02.10 වන දින ශානි අබේසේකරට දැනගන්නට ලැබිණි.
එම බී වාර්තාවෙන් ශානිට විරුද්ධව නගා ඇති චෝදනා මෙසේය.
ඒ. එස්අයිඑස් භාර ජේ්‍යෂ්ඨ නියෝජන්‍්‍ය පොලිස්පති නිලන්ත ජයවර්ධන විසින් 2018 ජනවාරි 24 එවන ලද වාර්තාව සම්බන්ධයෙන් ක්‍රියා කිරීමට ශානි අසමත් වී ඇත.
බී. මාවනැල්ල බුදුපිළිම විනාශ කිරීම සම්බන්ධයෙන් ඉන්ටර්පෝල්හි සහාය ලබාගැනීමට ශානි අසමත් වී තිබේ.
සී. මාවනැල්ල සිදුවීම පිළිබඳ විමර්ශන සඳහා ප්‍රමාණවත් ශක්තියක් ලබාදීමට ශානි අපොහොසත් වී තිබේ.
ඩී. 2019.02.19 දින රාත්‍රියේ එම්සීඑම් සහරාන් සහ මොහොමඩ් අන්වර් මොහොමඩ් රිස්කාන්, හාදියා (සහරාන්ගේ බිරිඳ) ඇගේ දරුවන් සහ සාරා ජැස්මින් හෙවත් මහේන්ද්‍රන් පුලස්තිනි රැගෙන යාම සඳහා කැකුණගොල්ලේ හාඩියාගේ නිවෙසට පැමිණ තිබේ.
ශානි කියන්නේ, සීඅයිඩීය අමතා එස්අයිඑස් බාර ජේ්‍යෂ්ඨ නියෝජ්‍ය පොලිස්පති නිලන්ත ජයවර්ධන විසින් එවන ලද 2018 ජනවාරි 24 දින ඇති කිසිම වාර්තාවක් ලැබී නැති බවය. ඒ වගේම එවැන්නක් ගැන දන්නේ නැති බවය. එන්ටීජේ නමැති ත්‍රස්තවාදී සංවිධානයක් ගැන ශානි හෝ සීඅයිඩීය දැනගත්තේ, 2018.12.23 සහ 26 අතර වූ මාවනැල්ලේ සිදුවීමෙන් පසු පමණකි. ජේ්‍යෂ්ඨ නියෝජ්‍ය පොලිස්පති නිලන්ත ජයවර්ධන සීඅයිඩීය සමග එන්ටීජේ එකක් ගැන කීවේ මාවනැල්ල සිදුවීමෙන් පසුවය. ඊට ඉහතදී නිලන්ත ජයවර්ධන එවූ කිසිම වාර්තාවක, එන්ටීජේ අන්තවාදී ක්‍රියාකාරකම් ගැන සම්බන්ධයක් නොවීය. ත්‍රස්තවාදී ක්‍රියාකාරකම් ගැන විමර්ශන භාරව ඉන්නේ ත්‍රස්ත විමර්ශන ඒකකය හෙවත් ටීඅයිඩීයයි. තමන්ගේ විෂය පරාසයට ඇතුළත් නොවන විමර්ශනයක් සීඅයිඩීය ආරම්භ කරන්නේ පොලිස්පතිවරයා නියම කළහොත් පමණකි.
පොලිස් අධිකාරි චාමික වික්‍රමසිංහගේ ඉල්ලීම මත සුදුසු පියවර ශානි අබේසේකර විසින් ගෙන ඇත. ඊට අදාළව නිර්නාමික පෙත්සමේ තිබෙන චෝදනා ශානි ප්‍රතික්ෂේප කරයි. බී වාර්තාවේ එවැන්නක් ගැන කියවුණත්, කෑගල්ල පොලිස් ස්ථානයේ සහකාර පොලිස් අධිකාරි කමල් පෙරේරාගෙන් කිසිම ඉල්ලීමක් හෝ ලිපියක් ලැබුණේ නැත.
පොලිස් පරීක්ෂක මාරසිංහ යටතේ නිලධාරීහු 30කට අධික සංඛ්‍යාවක් සිටියහ. සහකාර පොලිස් අධිකාරි වික්‍රමසේකර යටතේ පොලිස් නිලධාරීහු 100කට වැඩි ප්‍රමාණයක් සිටියහ. එම නිලධාරීන්ට, තමන්ගේ විමර්ශන කණ්ඩායම් තෝරාගැනීමේදී කිසිම බාධාවක් නොතිබිණ. ඒ නිසා සීඅයිඩී විමර්ශන කණ්ඩායම් හා ඔවුන්ගේ කාර්යයන් ගැන ක්‍ෂුද්‍ර මට්ටමේ කළමනාකරණය සීඅයිඩී අධ්‍යක්‍ෂ (ශානි)ගේ රාජකාරියක් නොවේ. පොලිස් පරීක්ෂක මාරසිංහගේ ලිඛිත ඉල්ලීම මත, දෙමළ කතාකළ හැකි නිලධාරීන් 2ක් හා පළපුරුදු ජ්‍යෙෂ්ඨ නිලධාරීන් 3ක් ඇතුළු පස් දෙනකුගෙන් යුක්ත කණ්ඩායමක් ද සීඅයිඩීහි අනෙක් ශාඛාවන්ගෙන් එකතු කර ශානි ඔහුට ලබාදුන්නේය. එම විමර්ශන සඳහා යොමුකළ කණ්ඩායම්වල ශක්තිය සම්බන්ධයෙන් පොලිස් පරීක්ෂක මාරසිංහගෙන් හෝ සහකාර පොලිස් අධිකාරි වික්‍රමසේකරගෙන් කිසිම පැමිණිල්ලක් ලැබුණේ නැත.
පොලිස් පරීක්ෂක මාරසිංහට අමතර පිරිස් අවශ්‍ය නම් ඔහුගේ ආසන්නතම සුපවයිසර්, සහකාර පොලිස් අධිකාරී සී.ඩබ්ලිව්. වික්‍රමසේකරගෙන් ඉල්ලීමක් කළ හැකිවිය. එය අසාර්ථක විණි නම්, එවකට සීඅයිඩී අධ්‍යක්‍ෂ වූ ශානි අබේසේකරගෙන් ඉල්ලීමක් කළ හැකිව තිබිණ. එයද අසාර්ථක වුණේ නම්, සීඅයිඩීයේ නියෝජ්‍ය පොලිස්පතිගෙන් ඉල්ලීම කළ හැකි ව තිබිණ. එයද අසාර්ථක වී නම්, සීඅයිඩීය බාර ජ්‍යෙෂ්ඨ නියෝජ්‍ය පොලිස්පති රවි සෙනෙවිරත්නගෙන් එම ඉල්ලීම කළ හැකිව තිබිණි. එම ඉල්ලීම් වාර්තාගත විය යුතුය. එහෙත් පොලිස් පරීක්ෂක මාරසිංහගෙන් එවැනි කිසිම ඉල්ලීමක් ඉදිරිපත් නොවුණි. එලෙසම තමාට අතිරේක නිලධාරීන් ලබා නොදීම ගැන ශානිට එරෙහිව මාරසිංහගෙන් කිසිම පැමිණිල්ලක්ද ඉදිරිපත් නොවීය. ඒ නිසා බී වාර්තාවේ ඊට අදාළව තිබෙන චෝදනා බැලූ බැල්මටම සාවද්‍යය.
සීඅයිඩීය ලද තොරතුරු අනුව, එම්සීඑම් සහරාන් නැගෙනහිර පළාතේ සැඟවී සිටින බවට අනුමාන කෙරිණි. මේ නිසා නැගෙනහිර පළාත තුළ සහරාන් සිටිනා තැනක් සොයාගැනීම සඳාහා අතිරේක ආවේක්‍ෂණ කණ්ඩායම් යොදවන ලදි.
හාදියා 2019.02.19 දින සීඅයිඩීයට සහ පාස්කු දින ප්‍රහාරය සම්බන්ධයෙන් වූ ජනාධිපති කොමිසම වෙත කළ ප්‍රකාශයෙහි, 2019.02.19 දින තම බිරිඳ, දරුවන් සහ සාරා ජෙස්මින් කැඳවාගෙන යාම සඳහා සහරාන් හෝ මොහොමඩ් රිස්කාන් කැකුණගොල්ලේ සිය නිවෙසට ආ බවක් සඳහන් වන්නේ නැත.
සීඅයිඩීය විසින් ආරක්‍ෂක රැඳවුම් නියෝගයක් මත හාදියා රඳවාගත් පසුව, ඇය සිට ඇත්තේ සීඅයිඩීයේ ලේඛනාගාරය භාර නිලධාරි වන මේ පෙත්සමේ 2 වැනි වගඋත්තරකරු භාරයේය. ඊට අමතරව හාදියාගේ දරුවා ඩෙංගු උණෙන් පෙළෙද්දී 2 වැනි වගඋත්තරකරුගේ රැකවරණය යටතේ සිට ඇත.
විශ්වාසවන්ත මූලාශ්‍රයකින් ශානිට දැනගන්නට ලැබී ඇත්තේ සහ විශ්වාස කරන්නේ, නිර්නාමික පෙත්සමේ තිබෙන කරුණු සහ බී වාර්තාවේ කරුණු සැසඳීමට 2වැනි වගඋත්තරකරු සැලසුම් කරන බවයි. ඒ හරහා හාදියා සාක්‍ෂිකාරියක ලෙස යොදාගෙන ශානි අබේසේකරට එරෙහිව ප්‍රකාශයක් කරවාගැනීමට බවයි.■ (අවසන්)
