21 C
Sri Lanka
5 October,2022

සොනික් සොනික් මතුවෙයි. ශානිට එරෙහි නිර්නාමික පෙත්සම විමර්ශනය කරන්නට ශානිගේ තරහකාරයන්ට දෙයි

Must read

කොළඹ රිමාන්ඩ් බන්ධනාගාරයේ සිටින පාස්කු ඉරුදින ප්‍රහාරයේ ප්‍රධානියා වූ එම්සීඑම් සහරාන්ගේ බිරිඳගෙන්, සීඅයිඩී නිලධාරින් පිරීසක් පැය හයක ප්‍රශ්න කිරීමකින් පසු ප්‍රකාශයක් සටහන් කරගත් බව පසුගියදා ජනමාධ්‍ය වාර්තා කළේය. තවදුරටත් ඇගෙන් ප්‍රශ්න කිරීමට නියමිත බවද සඳහන් වෙයි.


මේ විමර්ශනය තුළින් තමා අත්අඩංගුවට ගැනීමේ සැලැස්මක් තිබෙන බව කියන අපරාධ පරීක්‍ෂණ දෙපාර්තමේන්තුවේ (සීඅයිඩී) හිටපු කීර්තිමත් අධ්‍යක්‍ෂවරයා වූ ශානි අබේසේකර මහතා, තමා අත්අඩංගුවට ගැනීමෙන් වැළැක්වීමේ නියෝගයක් නිකුත් කරන ලෙස ඉල්ලා ශ්‍රේෂ්ඨාධිකරණය ඉදිරියේ මූලික අයිතිවාසිකම් පෙත්සමක් ගොනුකළේය.


අප, ශානි අබේසේකර මහතාගේ පෙත්සමේ සඳහන් කරුණුවල අනුවාදයක් මෙසේ ගෙන එන්නේ, එහි අඩංගු කරුණු ඒ හැටියටම අවබෝධ කරගන්නට පාඨකයන්ට පහසු වනු සඳහාය.
අද පළවන්නේ එහි තුන්වෙනි කොටසයි.

ශානිගේ පෙත්සමේ වගඋත්තරකරුවෝ

  1. මෙරිල් රංජන් ළමාහේවා, සහකාර පොලිස් අධිකාරි, අපරාධ පරීක්‍ෂණ දෙපාර්තමේන්තුව
  2. නිරෝෂණී හේවාපතිරණ, කාන්තා ප්‍රධාන පොලිස් පරීක්‍ෂක, අපරාධ පරීක්‍ෂණ දෙපාර්තමේන්තුව.
  3. කාවින්ද පියසේකර, ජේ්‍යෂ්ඨ පොලිස් අධිකාරි, අධ්‍යක්‍ෂ, අපරාධ පරීක්‍ෂණ දෙපාර්තමේන්තුව
  4. ඩබ්ලිව්. තිලකරත්න, නියෝජ්‍ය පොලිස්පති, අපරාධ පරීක්‍ෂණ දෙපාර්තමේන්තුව
  5. නෙවිල් ද සිල්වා, සහකාර පොලිස් අධිකාරි, වැඩබලන අධ්‍යක්‍ෂ, කොළඹ අපරාධ කොට්ඨාසය.
  6. රොහාන් ප්‍රේමරත්න, නියෝජ්‍ය පොලිස්පති (අපරාධ-බස්නාහිර පළාත)
  7. දේශබන්දු තෙන්නකෝන්, ජ්‍යෙෂ්ඨ නියෝජ්‍ය පොලිස්පති, බස්නාහිර පළාත, කොළඹ
  8. සීඩී වික්‍රමරත්න, පොලිස්පති
  9. ලලිත් දිසානායක, ප්‍රධාන පොලිස් පරීක්‍ෂක, විශේෂ ශාඛාව භාර නිලධාරි, අපරාධ පරීක්‍ෂණ දෙපාතර්තමේන්තුව
  10. ඩීකේ ඉන්දුක සිල්වා, ප්‍රධාන පොලිස් පරීක්‍ෂක
  11. මේජර් ජෙනරාල් විශ්‍රාමික ජගත් අල්විස්, මහජන ආරක්‍ෂක අමාත්‍යාංශයේ ලේකම්
  12. සරත් වීරසේකර, පාර්ලිමේන්තු මන්ත්‍රී, මහජන ආරක්‍ෂාව පිළිබඳ ඇමති
  13. කමල් ගුණරත්න, ආරක්‍ෂක ලේකම්
  14. නීතිපති

පාස්කු ඉරිදා ප්‍රහාරයෙන් පසු American Federal Bureau of Investigation හරහා එම්සීඑම් සහරාන් සමග නිතර සන්නිදෙනය කළ පුද්ගලයකුගේ ඉන්ටර්නෙට් ප්‍රොටෝකෝල් හෙවත් අයිපී ලිපිනයක් ගැන දැනගැනීමඑට සීඅයිඩී නිලධාරීන්ට හැකිවිය. එය සොයාගත්තේ පාස්කු ඉරිදා ප්‍රහාරය සමග සම්බන්ධ පරිගණක, ජංගම දූරකථන, ඉන්ටර්නෙට් ගිණුම් ආදිය විශ්ලේෂණය කිරීමෙනි. සහරාන් හෝ එන්ටීජේ හෝ සමග තමාගේ සම්බන්ධය ගැන කිසිම තොරතුරක් දීම ප්‍රතික්‍ෂෙප කළ ඔහුගෙන් සීඅයිඩී නිලධාරීහු ප්‍රශ්න කිරීම ඇරඹූහ. ඉන්පසු, එවකට ඩීඑම්අයි අධ්‍යක්ෂ බි්‍රගේඩියර් චූලා කොඩිතුවක්කු හරහා ආරක්ෂක අමාත්‍යාංශය, එම පුද්ගලයා සීඅයිඩීයේ රඳවා තබා ගැනීමෙන් වළක්වාලීය. ඒ එම පුද්ගලයාගේ ක්‍රියාකාරකම් ‘ජාතික ආරක්‍ෂක හේතු මත කළ, රහස් හමුදා බුද්ධි මෙහෙයුමක කොටසක්’ බව කියමිනි.


පාස්කු ප්‍රහාරයෙන් පසු සිදුකළ විමර්ශන හරහා, මාතලේ වාසය කළ, එන්ටීජේ සමග සම්බන්ධයක් තිබුණු ‘පොඩි සහරාන්’ හෙවත් ‘මාතලේ සහරාන්’ නමැති පුද්ගලයකු සොයාගන්නට හැකිවිය. මාතලේ පොලිස් ස්ථානයේ නිලධාරීන් විසින් ඔහු අත්අඩංගුවට ගන්නා ලද අතර, එදිනම සීඅයිඩීය විසින් ඔහු අත්අඩංගුවට ගන්නා ලදි.


පොඩි සහරාන්ගෙන් ප්‍රශ්න කරද්දී ඔහු ‘සොනික් සොනික්’ නමැති පුද්ගලයකු සමග සන්නිවේදනය කරගෙන ඇති බව දැනගන්නට ලැබිණි. ඉන්පසු අයිපී ලිපිනයක් හරහා සොනික් සොනික්ගේ සිම් කාඩ්පත සොයාගැනීමට හැකිවිය. එම සොයාගැනීමෙන් පසු, සොනික් සොනික් පාවිච්චි කළ සිම් කාඩ්පත් සහ අයිපී ලිපිනයන් ගැන සීඅයිඩීය විමර්ශනය කළේය.
විමර්ශනවලට අනුව සොනික් සොනික් පාවිච්චි කළ සිම් කාඩ්පත කොළඹ නගර රථවාහන පොලිසියේ (සිටි ට්‍රැෆික් ඩිවිෂන්) සේවය කළ කාන්තා පොලිස් සාජන්ට්වරියකගේ නම යටතේ ලබාගත් එකක් බව සොයාගත හැකිවිය. අනතුරුව සීඅයිඩීය එම කාන්තා පොලිස් නිලධාරිනියගෙන් ප්‍රශ්න කළේය. ඇය අනාවරණය කළේ, එම සිම් කාඩ්පත තමා සමග සම්බන්ධයක් තිබුණු, එස්අයිඑස් වෙත අනුයුක්තව සිටි බණ්ඩාර නම් උපපොලිස් පරීක්‍ෂකවරයාට ලබාදුන් බවයි.


ඊළඟට, උපපොලිස් පරීක්‍ෂක බණ්ඩාරගෙන් සීඅයිඩීය ප්‍රශ්න කළේය. ඒ අවස්ථාවේදී, ශානි අබේසේකරට කතාකළ එස්අයිඑස් භාර නියෝජ්‍ය පොලිස්පති සම්පත් ලියනගේ, එම ප්‍රශ්න කිරීම දිගටම නොකරන්නැයි කීවේය. ඒ, ‘බණ්ඩාර සහ පොඩි සහරාන් අතර සම්බන්ධය ජාතික ආරක්‍ෂාව සම්බන්ධ රහස් මෙහෙයුමක කොටසක් බව’ කියමිනි.


කෙසේ වෙතත්, එම නියෝජ්‍ය පොලිස්පතිවරයාගේ ඉල්ලීම පිළිපැදීම ශානි අබේසේකර ප්‍රතික්ෂේප කළ අතර, බණ්ඩාරගෙන් ප්‍රකාශයක් ලබාගැනීමට සමත්විය.


එහෙත් උපපොලිස් පරීක්ෂක බණ්ඩාර සිය ප්‍රකාශයේදීද එම ස්ථාවරයම දැරූ අතර පොඩි සහරාන් සමග තමාගේ සම්බන්ධයක් ගැන කිසිම තොරතුරක් හෙළිකිරීම ප්‍රතික්‍ෂෙප කළේය.
පාස්කු ප්‍රහාරයෙන් පැය කිහිපයකට පසු, එස්අයිඑස් භාර ජ්‍යේෂඨ නියෝජ්‍ය පොලිස්පති නිලන්ත ජයවර්ධන, එන්ටීජේ පාලන ව්‍යුහය සහ වවුනතිව්හි පොලිස් නිලධාරින් දෙදෙනා ඝාතනය ගැන එන්ටීජේහි සම්බන්ධයට අදාළ සාක්‍ෂි දැක්වෙන සම්පූර්ණ විස්තරයක් පළමුවැනි වරට සීඅයිඩීය වෙත ලබාදී ඇති බව ශානිට දැනගන්නට ලැබිණි. ඉකුත් මාස හතරක කාලය තුළ බුද්ධි සේවාවල කිසිම සහයෝගයක් නැතිව සීඅයිඩීය සහරාන් ගැන විමර්ශන කළේය. එන්ටීජේහි පාලන ව්‍යුහය සහ වවුනතිව් ඝාතනවලට ඔවුන්ගේ සම්බන්ධයට අදාළ මේ නිශ්චිත තොරතුරු නිලන්ත ජයවර්ධන විසින් පාස්කු දින ප්‍රහාරයට පෙර සීඅයිඩීය වෙත ලබාදී තිබුණේ නම් හෝ ආරක්‍ෂක මණ්ඩලයට ඉදිරිපත් කර තිබුණේ නම්, ප්‍රහාරය වළක්වා ගන්නට හැකියාව තිබුණි.


සීඅයිඩීයේ විමර්ශනවල ප්‍රතිඵලයක් ලෙස වව්නතිව්, මාවනැල්ල, වනාතවිල්ලුව, කාත්තන්කුඩි සහ පාස්කු ඉරිදා සම්බන්ධ ප්‍රහාරවලට සම්බන්ධ සැකකරුවන් අදාළ මහේස්ත්‍රාත් අධිකරණවලට ඉදිරිපත් කර තිබේ. සමහර සැකකරුවන් ත්‍රස්තවාදය වැළැක්වීමේ පනත යටතේ සීඅයිඩීයේ රඳවා ඇත.

2019 සිට පෙත්සම්කාර ශානිට එරෙහිව කරන ලද අහේතුක සහ අසාධාරණ චෝදනා


ශානි අබේසේකර වනාහි ශ්‍රී ලංකා පොලිස් දෙපාර්තමේන්තුවේ ඉතා වර්ණවත් සහ ජාත්‍යන්තරව කීර්තිමත් ජ්‍යෙෂ්ඨ නිලධාරියෙකි. ඔහු 2019 නොවැම්බර් 21 වන දින අත්තනෝමතික, අසාධාරණ සහ ද්වේෂසහගත ලෙස සීඅයිඩී අධ්‍යක්ෂ ධුරයෙන් ඉවත් කර ගාල්ලේ නියෝජ්‍ය පොලිස්පතිගේ පෞද්ගලික සහකාර හැටියට මාරුකර යවන ලදි. මේ වනතුරුත් එම ස්ථාන මාරුව අනුමත කිරීමට ජාතික පොලිස් කොමිසම විසින් හේතු ඉදිරිපත් කර නැත. අත්තනෝමතිකව සේවය අත්හිටුවීමෙන් පසු, 501 දරන අසාමාන්‍ය අංකයකින් ඔහුට සහ ඔහුගේ පවුලේ අයට තර්ජනාත්මක දුරකථන ඇමතුමක් ලැබිණි.


අත්තනෝමතික ලෙස මාරු කිරීමෙන් පසුව, ශානිගේ ආරක්‍ෂාව පිණිස හිටපු පොලිස්පති එන්කේ ඉලංගකෝන් විසින් ලබාදී තිබුණු වාහන සහ ආරක්ෂක නිලධාරීන්ද අහේතුකව සහ අත්තනෝමතිකව ඉවත් කරගන්නා ලදි. ඒ 8 වැනි වගඋත්තරකරු විසිනි.


2020.01.07 දින අත්තනෝමතික අසාධාරණ ලෙස සහ කිසිදු තර්කයක් නැතිව ශානි අබේසේකරගේ වැඩ තහනම් කරන ලදි. ඒ, පාර්ලිමේන්තු මන්ත්‍රීවරයකු සමග ඔහු කළ දූරකථන කතාබහක් මත යැයි කියමිනි. ශානිට නගන ලද චෝදනා තහවුරු කිරීම සඳහා කිසිම විමර්ශනයක් සිදු නොකෙරිණි. එම පටිගත කරන ලද දූරකථන කතාබහට අදාළව ඔහුට චෝදනා පත්‍රයක්වත් ලබා නොදුන් අතර, ප්‍රකාශයක් ලබාගැනීම සඳහා කැඳවීමක්වත් නොකෙරිණි.


මොහොමඩ් ෂියාම් නමැති ව්‍යාපාරිකයා පැහැරගෙන යාම සහ කොන්ත්‍රාත් ලෙස ඝාතනය කිරීමට නියෝජ්‍ය පොලිස්පති වාස් ගුණවර්ධන සම්බන්ධ කිරීමට, ශානි ඇතැම් ආයුධ ව්‍යාජ ලෙස හඳුන්වා දී ඇති බවට අසත්‍ය චෝදනා නගා 2020.07.31 දින ශානි අත්අඩංගුවට ගන්නා ලදි. 2020.08.07 දින ඔහු ගම්පහ මහේස්ත්‍රාත්වරයා වෙත ඉදිරිපත් කරන ලදි. එහිදී ඇප ඉල්ලිම ප්‍රතික්‍ෂෙප වුණේ අධිකරණ බලය නැතැයි කියමිනි. ඉන්පසු ගම්පහ මහාධිකරණය වෙත ඉදිරිපත් කළ ඇප අයැදුමද 2020.02.09 දින ප්‍රතික්‍ෂෙප කරන ලදි. ඉන්පසු එම තීරණය ප්‍රතිශෝධනය සඳහා ඉල්ලීමක් ශානි 2021.06.16 දින අභියාචනාධිකරණයට ඉදිරිපත් කළ අතර, ඒ අනුව මාස දහයකට වැඩි කාලයක් රිමාන්ඩ් බන්ධනාගාරගතව සිටි ශානිට ඇප ලැබුණේය.


ඇප නියම කරමින් අභියාචනාධිකරනයේ විනිසුරුවරු මෙසේ කීවෝය.


‘වරදකරු කරන ලද මිනිමරුවන්ගේ පැහැදිලි සහායකයන්ගේ සහ ආධාරකරුවන්ගේ ප්‍රකාශයන් මත සැකකරුට (ශානිට) එරෙහිව ගම්පහ මහේස්ත්‍රාත් වෙත කරුණු වාර්තා කර ඇත. චෝදිත වැරදි ක්‍රියා තහවුරු කිරීම සඳහා අසත්‍ය සාක්ෂි නිර්මාණය කිරීමට උත්සාහ කර තිබේ. කෙසේ වෙතත්, මෙම ස්ථාවරය තහවුරු කිරීමට හෝ බැලූබැල්මට නඩුවක් ගොඩනැගීමට හෝ හැකිවන පිළිගත හැකි සාක්ෂි කිසිවක් අධිකරණයේ අවධානයට ඉදිරිපත් කර නොතිබුණි.’
වරින් වර ශානි ප්‍රකාශ ලබාගැනීමට විශේෂ විමර්ශන ඒකකය සහ අපරාධ පරීක්ෂණ දෙපාර්තමේන්තුව වෙත කැඳවන ලදි. එකී විමර්ශන ඒකක දිගින් දිගටම ශානි අබේසේකර කැඳවන ලද්දේ සහ ඔහුගෙන් දීර්ඝ ලෙස ප්‍රශ්න කරන ලද්දේ 2019 පාස්කු ඉරිදා ත්‍රස්තවාදයට සම්බන්ධ යැයි කියනු ලබන අමතර අපරාධවලට ඔහු ව්‍යාජ ලෙස පටලවා ගැනීමට වුවමනාවෙනි. ශානිට විරුද්ධව තවත් නිර්නාමික පෙත්සම් කිහිපයක් ඉදිරිපත් වී ඇත. එම නිර්නාමික පෙත්සම්කරුවන් සම්බන්ධයෙන්ද වැඩිදුර විමර්ශන කිරීමට කොළඹ අපරාධ කොට්ඨාසයට යොමුකර ඇත.


2019 පාස්කු ඉරිදා ප්‍රහාරය පිළිබඳ ජනාධිපති කොමිසම, පාර්ලිමේන්තු තේරීම් කාරක සභාව ඇතුළු අර්ධ අධිකරණ ආයතන කිහිපයක පුළුල් විමර්ශනවලින් පසුව වුවද සම්පාදනය කරන ලද වාර්තා කිසිවකින් සීඅයිඩීය හෝ ශානි අබේසේකර වැරදි ක්‍රියාවක් සිදු කර ඇති බවට සොයාගෙන නැත. ඔහුට හෝ සීඅයිඩීයට හෝ එරෙහිව කිසියම් ක්‍රියාමාර්ගයක් ගත යුතු බවට නිර්දේශ කර නැත. ශානිගේ කිසිම තීරණයක් ගැන දෝෂාරෝපණයක් කර නැත.

නිර්නාමික පෙත්සම් විභාග කරන විශේෂ ඒකකයේ නිලධාරීන් ගැන


1, 2 සහ 10 වැනි වගඋත්තරකරුවන් පිළිවෙළින් අධීක්‍ෂණ නිලධාරි සහ විමර්ශන නිලධාරීහු වෙති. ශානි සේවයේ යෙදී සිටියදී මේ අයට විරුද්ධව විනය ක්‍රියාමාර්ග ගෙන ඇති නිසා මේ නිලධාරීන්ට ශානි කෙරෙහි වෛරයක් ඇත. එබැවින් 1, 2 සහ 10 වැනි වගඋත්තරකරුවන් ශානිට විරුද්ධව ඇති නිර්නාමික පෙත්සම් ගැන කිසිම විභාගයක් කිරීමට නුසුදුස්සෝ වෙති.

1 වැනි වගඋත්තරකරු


1 වන වගඋත්තරකරු වෙත, කොළඹ මහේස්ත්‍රාත් අධිකරණය හමුවේ ඇති අංක බී3932/11 දරන භාරත ලක්ෂ්මන් ප්‍රේමචන්ද්‍ර ඇතුළු සිව්දෙනා ඝාතන නඩුවේදී ‘විමර්ශන නිලධාරියා ලෙස සීඅයිඩීය නියෝජනය කිරීමට අපොහොසත් වීම නිසා’ චෝදනා පත්‍රයක් දෙන ලදි. එම චෝදනා මත 2012.04.01 දින ඔහුගේ වැඩ තහනම් කරන ලදි. ඉන්පසු ඔහුට එරෙහිව විෂමාචාරය, වංකබව යනාදි චෝදනා යටතේ චෝදනා පත්‍රයක් ලබාදෙන ලදි. ඔහු වරද පිළිගත්තේය.
කෙසේ වෙතත් 2010.04.11 දිනැති ලිපිය මගින් 1 වන වගඋත්තරකරු කිසිදු හේතුවක් නොමැතිව නැවත සේවයේ නැවත පිහිටුවන ලදි. ඔහු පොලිස් පරීක්ෂක නිලයට උසස් කිරීම 2006.02.01 දින සිට 2001.04.01 දිනට ගෙනයන ලදි. ඉන්පසුව 2006.01.01 දින සිට ප්‍රධාන පොලිස් පරීක්‍ෂක හැටියට උසස් කරන ලදි.


2012 වැලිකඩ බන්ධනාගාරයේ සමූලඝාතනයේ විමර්ශන භාරව ශානි අබේසේකර ක්‍රියාකළ නිසා, නිර්නාමික පෙත්සම් විමර්ශනය කිරීමට 1 වන වගඋත්තරකරුට පුද්ගලික අවශ්‍යතාවක් ඇත. ඔහුගේ සොහොයුරු එවකට බන්ධනාගාර කොමසාරිස් එමිල් රංජන්ද එම නඩුවේ විත්තිකරුවෙකි. 2022 ජනවාරි මාසයේදී ත්‍රිපුද්ගල මහාධිකරණ විනිසුරු මඬුල්ලක් විසින් එමිල් රංජන් මිනිමැරුමට වරදකරුකරන ලදි. එම අධිකරණයේදී ඔහු විත්තිකූඩුවේ සිට කළ ප්‍රකාශයෙන්, තමාට විරුද්ධව ශානි අබේසේකර පක්‍ෂපාතී විමර්ශනයක් සහ සාක්‍ෂි ගෙතීමක් කර ඇති බව කිව්වේය. එහෙත් එය පිළිගත නොහැකි බවට අධිකරණය සැලකුවේය. ඉන්පසු එමිල් රංජන්ට මරණ දඬුවම නියම කරන ලදි.

2018 වර්ෂයේදී ඇවන්ගාඩ් මැරිටයිම් සර්විසස් සමාගමට අදාළ විමර්ශන අතරතුරදී 1 වැනි වගඋත්තරකරු නීතිපතිවරයාගේ නිර්දේශය මත විනය කාරණා මත සීඅයිඩීයේ සිට ළමා හා කාන්තා කාර්යාංශයට මාරු කර තිබේ. කෙසේ වෙතත්, 2019දී ඔහු නැවතත් සීඅයිඩීයට පත්කරන ලදි. ශානි සිතන්නේ ඒ මුළුමනින්ම දේශපාලන හේතුවක් මත විය යුතු බවයි.
ඇවන්ගාඩ් මැරිටයිම් සර්විසස් පිළිබඳ විමර්ශන අතරතුරදී 1 වන වගඋත්තරකරු ස්ථානමාරු කිරීමට ශානි අබේසේකර දුන් නිර්දේශය ගැන දේශපාලන පළිගැනීම් පිළිබඳ ජනාධිපති කොමිෂන් සභාවට, ශානිට එරෙහිව පැමිණිල්ලක් 1 වැනි වගඋත්තරකරු ඉදිරිපත් කර තිබේ.

2 වැනි වගඋත්තරකරු


ශානි සීඅයිඩී අධ්‍යක්ෂවරයා ලෙස සේවයේ යෙදී සිටියදී 2 වැනි වගඋත්තරකරුට එරෙහි අක්‍රමිකතා සම්බන්ධ පැමිණිල්ලක් ලැබිණි. ශානි එය අල්ලස් කොමිසමට යොමුකළේය. ඒ පිළිබඳ විමර්ශනය අල්ලස් කොමිසමේ තවමත් සිදුවෙයි.


2020.11.10 දින 2 වැනි වගඋත්තරකරු සීඅයිඩීයේ සිට මාතර කොට්ඨාසයට මාරු කර යවා ඇත. කෙසේ වෙතත්, ඉහත නිර්නාමික පෙත්සම ලැබීමෙන් පසු 2021.11.25 දින 2 වැනි වගඋත්තරකරු නැවත සීඅයිඩීයට කැඳවා එම පෙත්සම ගැන පරීක්ෂණ පැවැත්වීමට පවරන ලදි.

10 වැනි වගඋත්තරකරු


10 වැනි වගඋත්තරකරුට එරෙහිව විනය ක්‍රියාමාර්ග රැසක් ඇත. ශානි අබේසේකර දායක වූ විනය පරීක්‍ෂණ මෙසේය.


ඒ. පොලිස්පතිවරයාගේ නියෝගය මත 10 වැනි වගඋත්තරකරුට එරෙහිව මූලික පරීක්ෂණයක් ශානි පවත්වා ඇත. ඒ පුදුකුඩි ඉරිප්පු, දේවපුරම් ග්‍රාමයේ නීති විරෝධී පතල් හෑරීමක් ගැන පරීක්‍ෂණයක් පැවැත්වීමට 10වැනි වගඋත්තරකරු අසමත් වීමේ චෝදනාවක් මතය. පරීක්‍ෂණයේ කරුණු මත 10වැනි වගඋත්තරකරු සීඅයිඩීයෙන් පිටතට මාරුකිරීමට ශානි නිර්දේශ කළේය. ඉන් අනතුරුව 10වැනි වගඋත්තරකරු ශානි කළ ස්ථාන මාරුකිරීමේ නිර්දේශයට එරෙහිව මූලික අයිතිවාසිකම් පෙත්සමක් ගොනුකළේය. එහෙත් මුල් අවස්ථාවේදීම මූලික අයිතිවාසිකම් පෙත්සම නිෂ්ප්‍රභ කරන ලදි.


බී. දූෂණ සිද්ධියක් මත පැවැති පරීක්‍ෂණයකදී 10 වැනි වගඋත්තරකරුට එරෙහිව ඉදිරිපත් වූ අල්ලස් පැමිණිල්ලක් අල්ලස් කොමිසමට ශානි විසින් ඉදිරිපත් කර ඇත.


ජ. 10 වැනි වගඋත්තරකරු සීඅයිඩීයේ කාන්තා පොලිස් කොස්තාපල්වරියක සමග පැවැත්වූ විවාහයෙන් පිටත සම්බන්ධයක් ගැන ගොනුකරන ලද පැමිණිල්ලක් ශානි සීඅයිඩීය භාර නියෝජ්‍ය පොලිස්පති රවි සෙනෙවිරත්නට යොමු කළ අතර, ඒ, විශේෂ විමර්ශන ඒකකයක් විසින් ඒ ගැන විමර්ශනයක් කළ යුතු බවට නිර්දේශ කරමිනි.


ඉන්පසු, එම කොස්තාපල්වරිය සීඅයිඩීයෙන් පිටතට මාරුකර යැවීමට ශානි අබේසේකර පියවර ගත්තේය.


ඈ. 2016.09.25 දින තමා පහරදී කොල්ලකෑමට ලක්වූ බව පවසමින් 10 වැනි වගඋත්තරකරු විසින් වැලිකඩ පොලිස් ස්ථානයට අසත්‍ය පැමිණිල්ලක් ගොනු කරන ලදි. ඉන්පසු සීඅයිඩීය විසින් 10වැනි වගඋත්තරකරුට චෝදනා පත්‍රයක් නිකුත් කළේය.
2016දී විනය හේතු මත 10වැනි වගඋත්තරකරු සීඅයිඩීයෙන් පිටතට මාරුකරන ලදි. 2021.12.15 දින ඔහු නැවත සීඅයිඩීයට ඇතුළත් කරගන්නා ලදි. ඒ තමා ගැන පරීක්‍ෂණය පැවැත්වීම සඳහා දේශපාලන පත්වීමක් ලෙස බව ශානි සැබැවින්ම විශ්වාස කරයි.


1,2 සහ 10 වගත්තරකරුවන් ශානිට එරෙහිව වෛරයක් ගොඩනගා ගත්තේ ශානි සේවයේ යෙදී සිටියදී ඔවුන්ට එරෙහිව පියවර ගත් නිසාය. එනිසා 1, 2 සහ 10 වගඋත්තරකරුවන් නිර්නාමික පෙත්සම ගැන විභාග කිරීම පූර්ව විනිශ්චයික, සහ/හෝ ශානිගේ නම කැතකිරීමේ යටි අරමුණෙන් කරන්නකි.■
ලබන සතියට

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි