21.5 C
Sri Lanka
6 October,2022

කැකුණගොල්ලේදී
සහරාන්ගේ බිරිඳ හමුවීමෙන් පසු

Must read

කොළඹ රිමාන්ඩ් බන්ධනාගාරයේ සිටින පාස්කු ඉරුදින ප්‍රහාරයේ ප්‍රධානියා වූ එම්සීඑම් සහරාන්ගේ බිරිඳගෙන්, සීඅයිඩී නිලධාරින් පිරීසක් පැය හයක ප්‍රශ්න කිරීමකින් පසු ප්‍රකාශයක් සටහන් කරගත් බව පසුගියදා ජනමාධ්‍ය වාර්තා කළේය. තවදුරටත් ඇගෙන් ප්‍රශ්න කිරීමට නියමිත බවද සඳහන් වෙයි.
මේ විමර්ශනය තුළින් තමා අත්අඩංගුවට ගැනීමේ සැලැස්මක් තිබෙන බව කියන අපරාධ පරීක්‍ෂණ දෙපාර්තමේන්තුවේ (සීඅයිඩී) හිටපු කීර්තිමත් අධ්‍යක්‍ෂවරයා වූ ශානි අබේසේකර මහතා, තමා අත්අඩංගුවට ගැනීමෙන් වැළැක්වීමේ නියෝගයක් නිකුත් කරන ලෙස ඉල්ලා ශ්‍රේෂ්ඨාධිකරණය ඉදිරියේ මූලික අයිතිවාසිකම් පෙත්සමක් ගොනුකළේය.
අප, ශානි අබේසේකර මහතාගේ පෙත්සමේ සඳහන් කරුණුවල අනුවාදයක් මෙසේ ගෙන එන්නේ, එහි අඩංගු කරුණු ඒ හැටියටම අවබෝධ කරගන්නට පාඨකයන්ට පහසු වනු සඳහාය.
අද පළවන්නේ එහි දෙවැනි කොටසයි.

ශානිගේ පෙත්සමේ වගඋත්තරකරුවෝ

  1. මෙරිල් රංජන් ළමාහේවා, සහකාර පොලිස් අධිකාරි, අපරාධ පරීක්‍ෂණ දෙපාර්තමේන්තුව
  2. නිරෝෂණී හේවාපතිරණ, කාන්තා ප්‍රධාන පොලිස් පරීක්‍ෂක, අපරාධ පරීක්‍ෂණ දෙපාර්තමේන්තුව.
  3. කාවින්ද පියසේකර, ජේ්‍යෂ්ඨ පොලිස් අධිකාරි, අධ්‍යක්‍ෂ, අපරාධ පරීක්‍ෂණ දෙපාර්තමේන්තුව
  4. ඩබ්ලිව්. තිලකරත්න, නියෝජ්‍ය පොලිස්පති, අපරාධ පරීක්‍ෂණ දෙපාර්තමේන්තුව
  5. නෙවිල් ද සිල්වා, සහකාර පොලිස් අධිකාරි, වැඩබලන අධ්‍යක්‍ෂ, කොළඹ අපරාධ කොට්ඨාසය.
  6. රොහාන් ප්‍රේමරත්න, නියෝජ්‍ය පොලිස්පති (අපරාධ-බස්නාහිර පළාත)
  7. දේශබන්දු තෙන්නකෝන්, ජ්‍යෙෂ්ඨ නියෝජ්‍ය පොලිස්පති, බස්නාහිර පළාත, කොළඹ
  8. සීඩී වික්‍රමරත්න, පොලිස්පති
  9. ලලිත් දිසානායක, ප්‍රධාන පොලිස් පරීක්‍ෂක, විශේෂ ශාඛාව භාර නිලධාරි, අපරාධ පරීක්‍ෂණ දෙපාතර්තමේන්තුව
  10. ඩීකේ ඉන්දුක සිල්වා, ප්‍රධාන පොලිස් පරීක්‍ෂක
  11. මේජර් ජෙනරාල් විශ්‍රාමික ජගත් අල්විස්, මහජන ආරක්‍ෂක අමාත්‍යාංශයේ ලේකම්
  12. සරත් වීරසේකර, පාර්ලිමේන්තු මන්ත්‍රී, මහජන ආරක්‍ෂාව පිළිබඳ ඇමති
  13. කමල් ගුණරත්න, ආරක්‍ෂක ලේකම්
  14. නීතිපති

සහරාන් ගැන සීඅයිඩීය පැවැත්වූ වැඩිදුර විමර්ශනය


ඒ.එච්.එම්. හමාස් නමැති වනාතවිල්ලුව සිද්ධියේ සැකකරුවෙකු විසින් සපයන ලද තොරතුරු මත, 2019.02.02 පුත්තලමේ කළ විමර්ශනවලදී ඒආර්ඒ ලෙබ්බේ නම් පුද්ගලයකුගෙන් ප්‍රකාශයක් සටහන් කරගැනීමට සීඅයිඩීයට හැකිවිය. එම ප්‍රකාශය මත එම්සීඑම් සහරාන් පාවිච්චි කළ දූරකථනයක අංකයක් ලබාගත හැකිවිණි. කෙසේ වෙතත්, ඔවුන්ට ලබාගත හැකිවුණේ, එම දූරකථන අංකයට පැමිණි හා පිටට ගිය සාමාන්‍ය ඇමතුම්වල විස්තර පමණි. එම දූරකථන ඇමතුම් වාර්තාවලින් දැනගත හැකිවුණේ සහරාන් මෙම දූරකථනය සිය පවුලේ සාමාජිකයන් සමග කතාකිරීමට යොදාගත් බවයි.


එම දූරකථන අංකය ගැන කළ විමර්ශනවලදී සහරාන් අතුළු එන්ටීජේ සාමාජිකයන් ‘ත්‍රීමා’ නමැති මුදල් ගෙවන ජංගම දූරකථන යෙදවුමක් හරහා සන්නිවේදනය කර ඇති බවයි. එය ඕපන් සෝර්ස් යෙදවුමකි. අන්ත දෙක අතර සන්නිවේදනය අනාවරණය නොවන ඇමතුම් සහ පණිවිඩ හුවමාරු යෙදවුමකි. සීඅයිඩී නිලධාරීන් එම්සීඑම් සහරාන් ඉන්ටර්නෙට් හරහා කළ පණිවිඩ හුවමාරුවල විස්තර ඉල්ලා සිටි නමුත්, එහි සේවා සපයන්නන් කිසිදු වාර්තාවක් හෝ විස්තරයක් ලබාදුන්නේ නැත. හේතුව ලෙස දැක්වූයේ ඕපන් සෝර්ස් හා අන්ත දෙක අතර සන්නිවේදනය අනාවරණය නොවන යෙදවුමක විස්තර ලබාගැනීමට පහසුකම් ප්‍රමාණවත් නොවන බව කියමිනි.


ඒ.එච්.එම්.මුෆිස්ගෙන් ලබාගත් ප්‍රකාශ කිහිපයක් මත ලැක්ටොවත්තට පුපුරන ද්‍රව්‍ය ප්‍රවාහනය සඳහා එන්ටීජේ සාමාජිකයන් යොදාගත් වෑන් රථයක් ගැන අනාවරණය විය. එවැනි ගමනකදී එම වෑන් රථය කල්පිටිය නාවික හමුදා මුරපොළේදී පරීක්‍ෂා කර තිබිණි. ඉන් පසු සීඅයිඩී නිලධාරීන් 2019.02.15 දින කල්පිටිය නාවික හමුදා කඳවුරට ගිය අතර, වෑන් රථයේ විස්තර ලබාගත්හ. ඒ අනුව සහරාන් සහ කණ්ඩායම පාවිච්චි කළ අංක ඩබ්ලිව්පී පීඒ 2855 දරන නිසාන් වැනට් වෑන් රථයක තොරතුරු ලැබිණි.


නිසාන් වැනට් වෑන් රථයේ හිමිකරු සොයා ගැනීම සඳහා සීඅයිඩීය 2019.02.18 සහ 19 දිනවල කුලියාපිටිය කැකුණගොල්ල, අලහිටියාව, ගාල්ලගම, කෑගල්ල, මාවනැල්ල සහ අරණායක යන ප්‍රදේශවල සෝදිසි කර ඇත. මේ සෝදිසියේදී 6 දෙනකුගෙන් ප්‍රකාශ සටහන් කරගෙන ඇත.


ලබා ගත් එම ප්‍රකාශවලින් කැකුණගොල්ලේ සහරාන්ගේ බිරිඳට අයත් නිවසෙක් සොයාගන්නට හැකිවිය. 2019.02.19 දින සීඅයිඩී නිලධාරීන් සහරාන්ගේ බිරිඳ වන අබ්දුල් කාදර් ෆාතිමා හාදියා හෙවත් සිත්තියා හමුවී සහරාන්ගේ ඡායාරූපයක් පෙන්වා ප්‍රශ්න කළහ. ඡායාරූපයේ සිටින්නේ තම ස්වාමියා බව ඇය පිළිගත්තාය. එහෙත් ඔහු කොහේ සිටීදැයි නොදන්නා බව කීවාය. ඉන්පසු, සීඅයිඩීයට ප්‍රකාශයක් දුන් බව සහතික කරනු සඳහා ඡායාරූපයේ පිටිපස අත්සන් කරන ලෙස ඉල්ලා සිටින ලදි.


හාඩියාගේ සොහොයුරු මොහොමඩ් අන්වර් මොහොමඩ් රිස්කාන් විසින් දෙන ලද ප්‍රකාශය මත, වැනට් වෑන් රථය කැකුණගොල්ලෙන් සොයාගත හැකිවිය. එය භාරයට ගන්නා අවස්ථාව වන විට එහි අයිතිකාරකම වෙනස් කර තිබිණි.


එම වෑන්රථය මාවනැල්ල මහෙස්ත්‍රාත් අධිකරණයට ඉදිරිපත් කරන ලද අතර එයින් ලද නියෝග මත රජයේ රස පරීක්‍ෂවරයා වෙත යවන ලදි.


සහරාන් සොයාගැනීමට සීඅයිඩීය ප්‍රදේශ කිහිපයක සෝදිසි කිරීම් සිදු කර ඇත.


ඒ මෙසේය;


ඒ. 2019.02.27 සිට 2019.03.02 දක්වා කුලියාපිටිය, කැකුණගොල්ල, පත්තම්පිටිය, හෙට්ටිපොළ සහ පුත්තලම. ඩොනල්ඩ් ප්‍රියන්ත නමැති කෙනකුගෙන් ගත් ප්‍රකාශයක් අනුව, සහරාන් ලැක්ටොවත්තේ, කුලියාපිටිය පැලවත්තේ සහ හෙට්ටිපොල සැඟවී සිට ඇති බව සොයාගත්තේය.


බී. 2019.03.06 දින කල්කුඩා, පාසිකුඩා පොල්වත්තක් පරීක්‍ෂාකරන ලදි.


සී. 2019.03.19 දින ග්‍රෑන්ඩ්පාස් පොලිස් බල ප්‍රදේශය සෝදිසි කරන ලදි.


සීඅයිඩීය විසින් සිදු කරන ලද අඛණ්ඩ සෝදිසි කිරීම් නිසා සහරාන් නිතරම ඔහු සිටින ස්ථානය වෙනස් කර ඇත.

කාත්තන්කුඩියේ සිදු වූ පාපැදි පිපිරවීම පිළිබඳ සීඅයිඩී පරීක්ෂණ


2019.04.16 දින හෝ ඊට ආසන්න දිනකදී කාත්තන්කුඩියට නුදුරින් ඉඩමක බයිසිකලයක් මත තබා තිබූ බෝම්බයක් පුපුරුවා හැර ඇත. 2019.04.17 දින එම ඉඩමේ හිමිකරු මේ සම්බන්ධයෙන් කාත්තන්කුඩි පොලිස් ස්ථානයට පැමිණිල්ලක් කළේය. 2019.04.18 දින එම පිපිරීම සම්බන්ධයෙන් එවකට එස්අයිඑස් භාර ජ්‍යෙෂ්ඨ නියෝජ්‍ය පොලිස්පති නිලන්ත ජයවර්ධන, සීඅයිඩීය භාර ජ්‍යෙෂ්ඨ නියෝජ්‍ය පොලිස්පති රවි සෙනෙවිරත්නට දැන්වීය. එදිනම, රවි සෙනෙවිරත්න එවකට පොලිස්පතිවරයා දැනුවත් කළ අතර, ඔහුගේ නියමය පිට සහකාර පොලිස් අධිකාරි වික්‍රමසේකර ඊට අදාළ විමර්ශන සඳහා පත්කෙළේය.


විමර්ශනවලට අනුව, කාත්තන්කුඩියේ පිපිරීම කළ කණ්ඩායමට මිලදී ගත් එක හා සමාන මෝටර් බයිසිකල් දෙකක විස්තර සොයාගැනීමට හැකිවිය. එම යතුරුපැදි දෙකෙහි ලියාපදිංචි හිමිකරු සොයා දෙන ලෙස එස්අයිඑස් ඉල්ලා සිටියේ අනෙක් මෝටර් බයිසිකලය සොයා ගැනීමටය.


එම මෝටර් බයිසිකල් දෙකේ චැසි අංකවල විස්තර 2019.04.20 දින ලැබී ඇත. රවී සෙනෙවිරත්න විසින් එම තොරතුරු එවකට පොලිස්පතිවරයාගේ නියෝගය මත වෙත බස්නාහිර පළාතේ ජේ්‍යෂ්ඨ නියෝජ්‍ය පොලිස්පති නන්දන මුණසිංහ වෙත ලබාදී ඇත.

සහරාන් සහ එන්ටීජේ විසින් කරන ලද පාස්කු ඉරිදා මරාගෙන මැරෙන ප්‍රහාර
2019.04.21 දින පෙ.ව. 8.45 සිට විනාඩි 20 ක කාලය තුළ කොළඹ ජනප්‍රිය හෝටල් සහ මීගමුව, මඩකලපුව සහ කොළඹ පල්ලි කිහිපයක, සම්බන්ධීකරණය කරන ලද මරාගෙන මැරෙන බෝම්බ ප්‍රහාර හතක් සිදු විය. එදිනම පස්වරු 1.40 සහ 2.35 අතර තවත් ප්‍රහාර දෙකක් සිදුවිය.


මරාගෙන මැරෙන බෝම්බ ප්‍රහාර පහත පරිදි වේ;
පෙරවරු 8.45 සහ 8.55: කොළඹ ෂැංග්‍රිල්ලා හෝටලය
පෙරවරු 8.45: කොච්චිකඩේ සාන්ත අන්තෝනි දේවස්ථානය
පෙරවරු 8.45 සහ 8.50 අතර: කටුවාපිටිය ශාන්ත සෙබස්තියන් දේවස්ථානය
පෙරවරු 8.47: කොළඹ කිංග්ස්බරි හෝටලය
පෙරවරු 9.03: මඩකළපුවේ සියොන් දේවස්ථානය
පෙරවරුඩ 9.12: කොළම සිනමන් ග්‍රෑන්ඩ් හෝටලය
පස්වරු 1.40 සහ 1.45 අතර: දෙහිවල ට්‍රොපිකල් ඉන්
පස්වරු 2.15 සහ 2.35: 656/90, මහවෙල උද්‍යානය, දෙමටගොඩ.

පාස්කු ප්‍රහාරයෙන් පසු


එම පාස්කු ඉරිදා ප්‍රහාරය සම්බන්ධයෙන් සීඅයිඩීය පරීක්ෂණ ආරම්භ කළ අතර, ඒ හරහා ලබාගත් තොරතුරු මත එන්ටීජේ ක්‍රියාකාරිකයෙකු වන මොහොමඩ් සරීෆ් ඇඩම් ලෙබ්බේ හෙවත් ”ගෆූර් මාමා”. අත්අඩංගුවට ගැනීමට සමත් විය. ”ගෆූර් මාමා” අල්ලාගෙන ප්‍රශ්න කරන අතර ඔහුගේ තොරතුරු අනුව වව්නතිව් ප්‍රදේශයේදී පොලිස් කොස්තාපල්වරුන් දෙදෙනා ඝාතනය කර ඇත්තේ සහරාන් නායකත්වය දුන් එන්ටීජේ ත්‍රස්ත කන්ඩායම විසින් බව අනාවරණය විය. ”ගෆූර් මාමා” විසින් සපයන ලද සාක්ෂි මත පදනම්ව; ඝාතනයට ලක් වූ පොලිස් නිලධාරීන් දෙදෙනා සතුව තිබූ රිවෝල්වර දෙකක් වව්නතිව් සහ කල්මුණේ ප්‍රදේශවලින් සොයා ගැනීමට සීඅයිඩීයට හැකි විය.


පාස්කු ඉරිදා ප්‍රහාරයෙන් සතියකට පසු අම්පාර කොට්ඨාසයේ නිලධාරීන් විසින් සයින්දමරුදු ප්‍රදේශයේ එන්ටීජේ ආරක්‍ෂිත නිවසකින් ටී56 ගිනි අවියක් සොයාගන්නා ලදි. පසුව ලැබුණු රස පරීක්‍ෂක වාර්තා අනුව මෙම ගිනිඅවිය වවුනතිව්හි පොලිස් නිලධාරීන් ඝාතනයට යොදාගත් අවිය විය. වවුනතිව් මිනිමැරුම් සිදුවූ තැනින් සොයාගත් උණ්ඩ කොපු මෙම අවියෙන් නිකුත්වූ ඒවා බවද රස පරීක්‍ෂක වාර්තාවෙන් තහවුරු විය.


2019.04.26වැනිදා කල්මුණේහි එන්ටීජේ ආරක්‍ෂිත නිවෙසකදී හමුදාව සහ එන්ටීජේ ත්‍රස්තවාදීන් අතර සිදුවු දරුණු වෙඩි හුවමාරුවකදී අවම වශයෙන් පුද්ගලයින් 16 දෙනෙක් ජීවිතක්ෂයට පත්වූහ.


මොහොමඩ් හෂීම් නම් සහරාන්ගේ පියා, සයිනි හෂීම් සහ රිල්වාන් හෂීම් නම් ඔහුගේ සහෝදරයන් දෙදෙනා එහිදී ඝාතනය වූ අය අතර වූහ. සහරාන්ගේ බිරිඳ අබ්දුල් කාදර් ෆාතිමා හාඩියා හෙවත් සිත්තියා සහ ඇගේ දරුවාද එම නිවස තුළ තුවාල ලබා සිටියදී හමුවිය. ඇය පොලිස් භාරයට ගෙන අම්පාර මහ රෝහලට ඇතුළත් කර ඇත.


සීඅයිඩී නිලධාරීන් විසින් කරන ලද වැඩිදුර විමර්ශන හරහා පහත කරුණු අනාවරණය විය,
ඒ. 2019.04.21 වන දින අබ්දුල් ලතීෆ් ජමිල් නම් එන්ටීජේ ක්‍රියාකාරිකයා ටාජ් සමුද්‍රා හෝටලයේදී ඔහුගේ මරාගෙන මැරෙන බෑගය පුපුරවා හරින්න අදහස් කර ඇත. කෙසේ වෙතත්, දූරකථන ඇමතුමක් ලැබීමෙන් පසු ඔහු ටාජ් සමුද්‍රයෙන් පිටවිය. එය සීසීටීවී දර්ශනවලින්ද තහවුරු වේ.


බී. පසුව ඔහු දෙහිවල ට්‍රොපිකල් ඉන් නම් හෝටලයට ගොස් ඇත. ඔහු වෙන්කර ගත් එහි කාමරයක මරාගෙන මැරෙන බෝම්බ බෑගය තබා දෙහිවල පල්ලියකට යාඤාව සඳහා ගොස් ඇත. ඔහු පල්ලිය තුළ සිටියදී, එහි සිටි අනෙක් අය ජමීල් ඔවුන්ට නුහුරු සහ නොදන්නා බව දැනගත්හ. ඔවුන් ඒ බව මුස්ලිම් පල්ලියේ ආරක්ෂක නිලධාරියාට දන්වා ඇත. ඔහු විශ්‍රාමික පොලිස් නිලධාරියෙකි.


සී. ආරක්ෂක නිලධාරියා ජමීල්ගෙන් ප්‍රශ්න කරන විට ජමීල් බිරිඳ සමග ආරාවුලක් නිසා තමා නිවසින් පැමිණි බව ආරක්ෂක නිලධාරියාට දැන්වීය. තහවුරු කිරීමක් අවශ්‍ය නම් බිරිඳට කතා කරන ලෙස ආරක්ෂක නිලධාරියාගෙන් ඔහු ඉල්ලා සිටියේය. අනතුරුව එම ආරක්ෂක නිලධාරියා ජමීල්ගේ බිරිඳට දුරකථනයෙන් කතා කළ විට ආරාවුලක් නිසා පෙරදා රාත්‍රියේ ජමීල් නිවසින් පිටව ගිය බව ඇය පවසා ඇත.


ඒ මොහොතේ ජමීල් සොයා බුද්‘ධි නිලධාරීන් කිහිප දෙනකු ඔහුගේ නිවෙසට පැමිණ සිටින බවද ඇය ආරක්‍ෂක නිලධාරියාට දැන්වීය.


ඩී. සුළු මොහොතකින් ආරක්ෂක නිලධාරියාට ජමීල්ගේ බිරිඳගේ දූරකථනයෙන් තවත් දුරකථන ඇමතුමක් ආවේය. කතාකළ හමුදා බුද්ධි අංශ නිලධාරියෙක් ඇමති බුද්ධි අංශයේ නිලධාරින් පල්ලියට පැමිණෙන තෙක් ජමීල් අල්ලාගෙන සිටින ලෙස දැන්වීය.


ආරක්‍ෂක නිලධාරියා එය ප්‍රතික්‍ෂෙප කළේය.


ඊ. කෙසේ වෙතත්, හමුදා බුද්ධි අංශය පල්ලියට ඒමට පෙර ජමීල් පල්ලියෙන් පිටව ට්‍රොපිකල් ඉන් වෙත ගොස් ඇති අතර එහිදී මරාගෙන මැරෙන බෝම්බ බෑගය පුපුරුවා ගත්තේය.


එෆ්. පිපිරීමෙන් පසු ජමිල්ගේ බිරිඳගේ ජංගම දුරකථනයෙන් ආරක්ෂක නිලධාරියා ඇමතූ හමුදා බුද්ධි අංශ නිලධාරියා එම ආරක්ෂක නිලධාරියා වැල්ලවත්ත පොලිස් ස්ථානය වෙතට එදිනම කැඳවා ඇත. එම බුද්ධි අංශ නිලධාරීන් හමුදා බුද්ධි අධ්‍යක්‍ෂ කාර්යාලයෙන් (ඩීඑම්අයි) බව එම අවස්ථාවේදී ආරක්ෂක නිලධාරියා දැනගෙන ඇත.


ජී. පාස්කු ප්‍රහාරය පිළිබඳ ජනාධිපති විමර්ශන කොමිසම හමුවේ සාක්‍ෂි දුන් එම ආරක්‍ෂක නිලධාරියා පිපිරීම සිදුවූ දිනයේ සිදුවූ එම සිදුවීම් දාමය හෙළි කළේය.


එච්. පසුව හෙළිවූ පරිදි, හමුදා බුද්ධි නිලධාරීන් පළමුව වැල්ලම්පිටියේ ජමීල්ගේ මවගේ නිවෙසට ගොස් තිබේ. ඉන්පසු ඔවුන් ට්‍රොපිකල් ඉන් පිපිරීම සිදුවන්නට පෙර දෙමටගොඩ ජමීල්ගේ නිවෙසට ගොස් ඇත. එහෙත් ඒ සහරාන් සහ එන්ටීජේ ගැන ඒ වනවිටත් විමර්ශන කරමින් සිටි සීඅයිඩීය දැනුවත් කිරීමෙන් තොරවය.


සහරාන් සොයාගැනීමට උදව් කරන ලෙස සීඅයිඩීය දිගින් දිගටම කළ ඉල්ලීම් කළද, ඩීඑම්අයි වෙත අනුයුක්ත හමුදා නිලධාරීන්ට අබ්දුල් ජමීල්ගේ අනන්‍යතාව, එන්ටීජේහි ඔහුගේ භූමිකාව, සහ ඔහු සිටින තැන් ගැන පූර්ව දැනුමක් තිබුණු නමුත්, තවමත් නොදන්නා යම් හේතු මත සහරාන් අල්ලාගැනීමට සහ එන්ටීජේ විනාශ කිරීමට එම තොරතුරු සීඅයිඩීය සමග බෙදා නොගන්නට තීරණය කර තිබුණු බවට සාධරාණව පෙනීයයි.■

ලබන සතියට.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි