19.3 C
Sri Lanka
27 September,2022

සහරාන් සහ ඔහුගේ ආණ්ඩු හිතමිතුරන් ගැන
ශානිගේ හෙළිදරව්ව

Must read

කොළඹ රිමාන්ඩ් බන්ධනාගාරයේ සිටින පාස්කු ඉරුදින ප්‍රහාරයේ ප්‍රධානියා වූ එම්සීඑම් සහරාන්ගේ බිරිඳගෙන්, සීඅයිඩී නිලධාරින් පිරීසක් පැය හයක ප්‍රශ්න කිරීමකින් පසු ප්‍රකාශයක් සටහන් කරගත් බව පසුගියදා ජනමාධ්‍ය වාර්තා කළේය. තවදුරටත් ඇගෙන් ප්‍රශ්න කිරීමට නියමිත බවද සඳහන් වෙයි.


මේ විමර්ශනය තුළින් තමා අත්අඩංගුවට ගැනීමේ සැලැස්මක් තිබෙන බව කියන අපරාධ පරීක්‍ෂණ දෙපාර්තමේන්තුවේ (සීඅයිඩී) හිටපු කීර්තිමත් අධ්‍යක්‍ෂවරයා වූ ශානි අබේසේකර මහතා, තමා අත්අඩංගුවට ගැනීමෙන් වැළැක්වීමේ නියෝගයක් නිකුත් කරන ලෙස ඉල්ලා ශ්‍රේෂ්ඨාධිකරණය ඉදිරියේ මූලික අයිතිවාසිකම් පෙත්සමක් ගොනුකළේය.


එම පෙත්සමෙන් සහ ඊට අදාළ දිවුරුම් ප්‍රකාශයෙන් ශානි අබේසේකර මහතා හෙළිදරව් කරන කරුණු, පාස්කු ඉරු දින ප්‍රහාරය සම්බන්ධයෙන් මෙතෙක් හෙළිදරව් වී තිබෙන කරුණුවලට වඩා ගැඹුරින් එම ත්‍රස්ත කණ්ඩායමේ අතීතය, ඔවුන්ට උදව් කළ අය, ඔවුන්ගේ ක්‍රියාකාරකම් සහ රජයේ විවිධ ආරක්‍ෂක අංශ සමග ඔවුන් පැවැත්වූ සම්බන්ධකම් ගැන සවිස්තරාත්මකව හෙළිදරව් කරන්නේ වෙයි.


ඒ නිසා පෙත්සමෙන් ඔහු හෙළිකරන කරුණු උනන්දුවක් දක්වන්නන්ගේ මහත් අවධානයට ලක්විය.


අපි, ශානි අබේසේකර මහතාගේ පෙත්සමේ සඳහන් කරුණුවල අනුවාදයක් මෙසේ ගෙන එන්නේ, එහි අඩංගු කරුණු ඒ හැටියටම අවබෝධ කරගන්නට පාඨකයන්ට පහසු වනු සඳහාය.
අද පළවන්නේ එහි මුල් කොටසයි.


පසුව, මෙලෙස පළවන කරුණු විශ්ලේෂනය කර, සිදුවීම් හැටියට වෙන වෙනම සංග්‍රහ කිරිමටද බලාපොරොත්තු වෙමු.

ශානි අබේසේකරට එරෙහිව 2021 දෙසැම්බර් 20 වැනි දින හෝ ඊට ආසන්න දිනකදී නිර්නාමික පෙත්සමක් යොමු කර තිබිණි. ශානි 2019 අප්‍රේල් 21 වන දින, පාස්කු ඉරිදා ප්‍රහාරයට වගකිව යුතු පාර්ශ්වයක් ලෙස එහි සඳහන් වී තිබේ. එම නිර්නාමික පෙත්සම සම්බන්ධයෙන් විමසීමක් සීඅයිඩී විශේෂ ශාඛාව විසින් දැනටමත් ආරම්භ කර ඇත. පිළිවෙළින් මෙම පෙත්සමේ 1, 2 සහ 10 වැනි වගඋත්තරකරුවෝ අධීක්ෂණ නිලධාරියා සහ විමර්ශන නිලධාරීන් ලෙස කටයුතු කරති.

නිර්නාමික පෙත්සමේ චෝදනා


ඉහත සඳහන් නිර්නාමික පෙත්සමෙන් මොහොමඩ් කාසිම් මොහොමඩ් සහරාන්ගේ විමර්ශනයට සම්බන්ධ වුණ (මෙතැන් සිට එම්.සී.එම්. සහරාන් ලෙස හැඳින්වේ); ශානිට සහ ඔහුගේ යටත් නිලධාරීන්ට එරෙහිව චෝදනා ඉදිරිපත් කර ඇත. එම චෝදනා පහත සඳහන් පරිදිය.


අ) ශානි ඇතුළු අපරාධ පරීක්ෂණ දෙපාර්තමේන්තුවේ නිලධාරීන් එම්සීඑම් සහරාන් ගැන නිසි පරිදි පරීක්ෂණයක් කර නොමැති බව.


ආ) ශානි විසින් සහරාන් ගැන විමර්ශන පැවැත්වීම හිතාමතාම නොසලකා හැර ඇති බව.


ඇ) කැකුණගොල්ලේ සහරාන්ගේ නිවසට ගිය උප පොලිස් පරීක්ෂක ඩයස් ඇතුළු සීයිඩී නිලධාරීන් කණ්ඩායමට උපදෙස් දීම ශානි පැහැර හැර ඇති බව.


එමගින් සහරාන්ගේ බිරිඳගේ නිවසට අවශ්‍ය ආරක්ෂාව ලබා දීම ශානි දැන දැනම මග හැර ඇත.


ඈ) උප පොලිස් පරීක්ෂක ඩයස්, සැරයන් විජේරත්න, සාජන්ට් පාලිත, සැරයන් නන්දලාල්, පොලිස් කොස්තාපල් දිසානායක (රියැදුරු) සහ පොලිස් කොස්තාපල් යාපා සහරාන්ගේ බිරිඳගේ නිවෙසට ගොස් එම උපොප ඩයස් අයිපී මාරසිංහට සහ ශානිට දූරකථන ඇමතුම් ලබාදී ඇත.


ඉ) නිසි ආරක්ෂාව සහ ආරක්ෂාව සපයා තිබුණේ නම් එමගින් පුද්ගලයන් 300කට ආසන්න පිරිසකගේ මරණය සහ 200 කට වැඩි පිරිසක් තුවාල සිදුවීම වැළැක්විය හැකිව තිබුණි. එමගින් එම්.සී.එම්. සහරාන් අත්අඩංගුවට ගන්නට තිබුණි.


ඊ) ඉහත සඳහන් හේතූන් මත ශානිට සහ එම්.සී.එම්. සහරාන්ගේ විමර්ශනවල නිරත වූ නිලධාරීන් කණ්ඩායමට එරෙහිව සාධාරණ පරීක්ෂණයක් පැවැත්වීමට 10 වැනි වගඋත්තරකරුගෙන් ඉල්ලා සිටී.


එම්.සී.එම්. සහරාන්ගේ නායකත්වයෙන් යුක්ත ජාතික තව්ෆීක් ජමාත් (මෙතැන් සිට සමහර විට ‘එන්ටීජේ’ ලෙස හැඳින්වේ) ත්‍රස්ත කණ්ඩායමට අදාළ පරීක්ෂණ පැවැත්වූ තමාට යටත් නිලධාරීන් වන පොලිස් පරීක්ෂක මාරසිංහ, උප පොලිස් පරීක්ෂක ඩයස්, පොලිස් සැරයන් නන්දලාල් සහ පොලිස් සැරයන් පාලිත යන මහත්වරුන්ගෙන් ලබාගත් ප්‍රකාශ වඩාත් විස්තරාත්මකව මෙහි පසුව විස්තර කෙරේ.


නිර්නාමික පෙත්සම ගැන විමර්ශනයේදී සහරාන් ගැන විමර්ශන කණ්ඩායමේ අධීක්ෂණ නිලධාරි ලෙස කටයුතු කළ පොලිස් අධිකාරී සී.ඩබ්ලිව්.වික්‍රමසේකර මහතාගෙන්, එවකට අපරාධ පරීක්ෂණ දෙපාර්තමේන්තුවේ ප්‍රධානියා වූ ජ්‍යෙෂ්ඨ නියෝජ්‍ය පොලිස්පති රවී සෙනෙවිරත්නගෙන් සහ එවකට අපරාධ පරීක්ෂණ දෙපාර්තමේන්තුවේ අධ්‍යක්ෂවරයා ලෙස කටයුතු කළ ශානිගෙන් ප්‍රකාශ ලබාගෙන නැත.


ඒ නිර්නාමික පෙත්සමෙන් ශානිට එරෙහිව එල්ල වී ඇති චෝදනා විමර්ශනය කිරීමේ අරමුණෙන් 1, 2, සහ 9 වැනි වගඋත්තරකරුවෝ ද්වේශ සහගතව සහ/හෝ අත්තනෝමතික ලෙස ශානි අත්අඩංගුවට ගැනීමට සැලසුම් කරති. ඉන් පසුව, පහත විස්තර කෙරෙන එක් අයෙකුගේ හෝ කිහිප දෙනෙකුගේ යටි අරමුණු ඉටුකර ගැනීමට ත්‍රස්තවාදය වැළැක්වීමේ (තාවකාලික විධිවිධාන) පනත යටතේ ශානි රඳවා තබා ගැනීමට නියෝගයක් ලබා ගැනීමට කටයුතු කරයි.


නිර්නාමික පෙත්සමේ ඉහත සඳහන් කර ඇති චෝදනා ප්‍රමාද වූ සහ අසත්‍ය, ගොතන ලද ඒවා වන බව ශානි පවසයි. ඒවා ශානිට අගතියක් ඇති කිරීම සඳහා නිර්මාණය කර ඇත. එම නිර්නාමික පෙත්සමේ පැමිණිලිකරුවන් සහ/හෝ වින්දිතයින් විසින්, ඊට අදාළ සාක්ෂි කිසිවක් ඉදිරිපත් කර නැත. ඒවා කිසිම වේදිකාවකදී නගන ලද චෝදනාද නොවේ.

සරත් කිව්වෙත් මේ චෝදනාමයි


2021.11.11 වැනි දින 12 වැනි වගඋත්තරකරු වන සරත් වීරසේකර ඇමතිවරයා පාර්ලිමේන්තු කතාවකදී එම නිර්නාමික පත්‍රිකාවට ඇතුළත්ව තිබූ සියලුම චෝදනා ප්‍රකාශ කළේය. (හැන්සාඩ් පත්‍රයේ 2317 පිටුවේ සිට 2325 පිටුව දක්වා). නිර්නාමික පෙත්සම සහ එම පාර්ලිමේන්තු කතාව අතර සම්බන්ධයක් ඇති බව ශානි විශ්වාස කරයි.


එම පෙත්සමෙන් තමාට එරෙහිව කර ඇති ද්වේශසහගත, ව්‍යාජ, පදනම් විරහිත, අසාධාරණ චෝදනා සියල්ල තමා දැඩි ලෙස ප්‍රතික්ෂේප කරන බව ශානි පවසයි. එම පෙත්සමේ එකම පදනම තමාට අගතියක් ඇති කිරීමෙන් තම කීර්තිය හා ගෞරවය කෙලෙසීමත් තමා සිරගත කිරීමත් බව ඔහු වැඩිදුරටත් සඳහන් කරයි.


නිර්නාමික පෙත්සම පිළිබඳ විමර්ශන ගොනුව දෙපාර්තමේන්තුව විසින් ශානිට එරෙහිව අපරාධ නඩු කටයුතු ආරම්භ කිරීමට උපදෙස් ලබාගැනීමට නීතිපතිවරයා වෙත යොමුකර ඇති බව තමන්ට විශ්වාසවන්ත මූලාශ්‍රයකින් තොරතුරු ලැබුණු බව ඔහු කියයි.

පාස්කු ඉරිදා ප්‍රහාරයට පෙර එන්ටීජේ ගැන සීඅයිඩීය පැවැත්වූ පරීක්ෂණ

■ වව්නතිව්හිදී පොලිස් නිලධාරීන් දෙදෙනෙකුගේ ඝාතනය සම්බන්ධයෙන් අපරාධ පරීක්ෂණ දෙපාර්තමේන්තුවේ පරීක්ෂණ සහ අපරාධ පරීක්ෂණ දෙපාර්තමේන්තුව නොමඟ යවන්න හමුදා බුද්ධි අංශයේ උත්සාහය


2018.11.30 දින ගනේෂ් දිනේෂ් සහ වල්පිට ගමගේ නිරෝෂන් ඉන්දික ප්‍රසන්න නමැති පොලිස් කොස්තාපල්වරුන් දෙදෙනෙකුට නැඟෙනහිර පළාතේ මඩකළපුව, වව්නතිව්හි මුරපොලකදී නාඳුනන ප්‍රහාරක කණ්ඩායමක් පිහියෙන් ඇන වෙඩි තබා ඝාතනය කර ඇත.
මියගිය පොලිස් කොස්තාපල්වරුන් දෙදෙනා සතුව තිබුණු රිවෝල්වර (අංක. 641042 සහ අංක 639927) සහ පතොරම් 10 ක් සහ ඔවුන්ගේ නිල ඇඳුම්වල කොටස් (පටි සහ පීක් කැප්) ද ප්‍රහාරක කණ්ඩායම විසින් රැගෙන ගොස් ඇත.


2018.11.30 වන දින, එවකට පොලිස්පතිගේ නියමයෙන් සීඅයිඩීයේ විශේෂ විමර්ශන ඒකකයට (එස්අයියූ) ඉහත කී ඝාතනය පිළිබඳ විමර්ශනය කිරීමට පැවරිණි.


ඉහත කී විමර්ශනවලදී සීඅයිඩී නිලධාරීන් එම ප්‍රදේශයේ පොලිස් නිලධාරීන් කිහිප දෙනෙකු ඇතුළු පුද්ගලයින් 30 දෙනෙකු වැඩි පිරිසකගෙන් ප්‍රකාශ ලබාගෙන ඇත. ඊට අමතරව හමුදා බුද්ධි අධ්‍යක්ෂ මණ්ඩලය (මෙතැන් සිට ඩීඑම්අයි ලෙස හැඳින්වේ) ද සිද්ධියට අදාළව රහස් පොලිසියට තොරතුරු ලබා දුන්නේය.


ඒ අනුව, 2018.12.05, 2018.12.08, 2018.12.14, සහ 2019.01.03 දින දරන වාර්තාවලින් ඩීඑම්අයි විසින් පොලිස් නිලධාරීන් දෙදෙනා ඝාතනය කළේ හිටපු එල්.ටී.ටී.ඊ සාමාජිකයන් විසින් බව සඳහන් කර ඇත. ඔවුන්ට අනුව ඒ, ‘වව්නතිව් පොලිසිය 2018.11.27 දින පැවැත්වීමට නියමිතව තිබූ එල්.ටී.ටී.ඊ සංවිධානයට ගෞරව කිරීමේ යුද අනුස්මරණ උත්සවවලට බාධා කිරීමෙන් කුපිත වීම’ නිසාය.


2018.12.08 දිනැති වාර්තාවෙන් කියන්නේ ඝාතනයට ලක්වූ පොලිස් කොස්තාපල්වරුන් අනියම් සබඳතාවක් පැවැත්වූ විවාහක කාන්තාවකගේ සැමියා පොලිස් කොස්තාපල් ඝාතනය කිරීමට හිටපු එල්ටීටීඊ සාමාජිකයෙකුට කොන්ත්‍රාතුවක් දී තිබෙන බවයි. එපමණක් නොවේ, 2019.01.03 දිනැති ඩීඑම්අයි වාර්තාවෙන් වැඩිදුරටත් තහවුරු කර තිබුණේ, සැකකරුවන් එල්.ටී.ටී.ඊ වන බවත්, නමින් අජන්තන් සහ රාසයගම් සර්වානන්දන් හෙවත් ඉමියවන් යන සැකකරුවන් දෙදෙනා බවත්ය.


ඩීඑම්අයි වෙතින් ලද ඉහත කී බුද්ධි වාර්තාවලට පෙර කොස්තාපල්වරුන් දෙදෙනා ඝාතනයට සම්බන්ධ සැකකරුවන් හිටපු කොටි සාමාජිකයන් යැයි සනාථ කිරීමට සී.අයි.ඩී විමර්ශනවලට වෙනත් සාක්ෂි තිබුණේ නැත.


2018.12.03 දින හෝ ඊට ආසන්න දිනකදී එවකට රාජ්‍ය බුද්ධි සේවයේ (එස්අයිඑස්) ජ්‍යෙෂ්ඨ නියෝජ්‍ය පොලිස්පති නිලන්ත ජයවර්ධන, උප පොලිස් පරීක්ෂකවරයෙකු විසින් ලබාදුන් තොරතුරක් මත පදනම්ව, සීඅයිඩීය භාර ජ්‍යෙෂ්ඨ නියෝජ්‍ය පොලිස්පති රවී සෙනෙවිරත්නට අපරාධ ස්ථානයට කිලෝමීටර් 3ක් එපිටින් වූ වෙල්යායක ඇළක් තුළ තිබී හමු වුණු මෝටර් සයිකල් ජැකට්ටුව මිනීමරුවාට සම්බන්ධ එකක් බවට දන්වා ඇත. එවකට එස්අයිඑස් නියෝජ්‍ය පොලිස්පතිවරයා එම තොරතුර ලබාදුන්නේ ඝාතනයෙන් දින තුනක් ඉක්ම ගිය තැනදීය.


ඉන් අනතුරුව එම තොරතුර මත පදනම්ව, සීඅයිඩී කණ්ඩායමකට එම බයිසිකල් ජැකට්එක සම්බන්ධ පරීක්ෂණ පැවැත්වීමට පවරන ලදි. එදිනම එනම්, 2018.12.03 දින සීඅයිඩී කණ්ඩායමේ නිලධාරීන් එම ස්ථානයට ගොස් ඇති අතර, ඔවුන් එහි යන විටත් එස්අයිඑස් එම ස්ථානයට පැමිණ සිට ඇත.


විමර්ශනය සඳහා පොලිස් නිල සුනඛ අංශයද සමග සීඅයිඩීයේ පොලිස් අධිකාරි ජයසිංහ යොදවා තිබේ. ජැකට්ටුවෙන් ඉව ලබාගත් සුනඛයන් එම ඉව හඹා ගියේ අජන්තන් නමැති හිටපු කොටි සාමාජිකයාගේ නිවසට මිසක් අපරාධ ස්ථානය වෙත නොවේ.


සීඅයිඩී නිලධාරීන් වැඩිදුර විමර්ශන සිදු කළ අතර, එම පොලිස් නිලධාරීන් දෙදෙනාගේ ඝාතනයේ මහ මොළකරුවන් බවට සැක කළ අජන්තන් සහ රාසයගම් සර්වානන්දන් හෙවත් ඉමියවන් යන අය ත්‍රස්තවාදය වැළැක්වීමේ පනත යටතේ රඳවාගෙන සිටියහ.

එස්අයිඑස් බොරු


පසුව කරන ලද පාස්කු ඉරිදා ප්‍රහාර සම්බන්ධ පරීක්ෂණවලින්, ප්‍රහාරයෙන් හෙළි වූයේ ඉහත කී අජන්තන් සහ හිටපු කොටි සාමාජිකයා පොලිස් නිලධාරීන් ඝාතනයට වගකිවයුතු නොවන බවයි. අජන්තන් සහ හිටපු එල්ටීටීඊ සාමාජිකයා පොලිස් නිලධාරින් ඝාතනය කිරීම සම්බන්ධයෙන් (ඩීඑම්අයි සහ එස්අයිඑස් විසින්) බොරුවට කොටු කර තිබුණි.


පොලිස් නිලධාරීන් දෙදෙනා ඝාතනය කිරීම සම්බන්ධයෙන් නියම ඝාතකයන් හඳුනාගැනීමෙන් වළක්වා සීඅයිඩීයේ පරීක්ෂණ නොමඟ යැවීමට යතුරුපැදි ජැකට්ටුව පාසල් බෑගයක දැමීමට ඩීඑම්අයි සහ එස්අයිඑස් කුමන්ත්‍රණය කර ඇති බවට සැක බව ශානි අබේසේකෙර පෙත්සමෙන් කියයි.


මේ විදියට එස්අයිඑස් සහ ඩීඑම්අයි විසින් ඇති කළ ව්‍යාකූලත්වය හේතුවෙන් පොලිස් නිලධාරීන් දෙදෙනා ඝාතනය කළේ සහරාන් නායකත්වය දුන් එන්ටීජේ ත්‍රස්තවාදි කණ්ඩායම බව අනාවරණය කරගත හැකිවුණේ පාස්කු ප්‍රහාරයෙන් පසුවය.

මාවනැල්ල සහ වනාතවිල්ලුව විමර්ශන


සීඅයිඩිය සහ එන්ටීජේ අතර, මූලික ගැටුම ඇතිවුණේ 2018.12.134 සහ 2018.12.26 දින අතර මාවනැල්ල, පේරාදෙණිය සහ වෙලම්බඩ පොලිස් බල ප්‍රදේශවල බුද්ධ ප්‍රතිමා විනාශ කිරීම පිළිබඳ පරීක්‍ෂණවලදීය. ඒ පිළිබඳ මූලික පරීක්‍ෂණ සිදුකළේ මාවනැල්ල පොලිස් ස්ථානය සහ කෑගල්ල අපරාධ විමර්ශන අංශය විසිනි. පොලිස්පතිවරයාගෙන් 2018.12.26 ලැබුණු වාචික නියෝගයක් මත මාවනැල්ල සහ කෑගල්ල පොලිස් ස්ථානවලට සහාය වීමට සීඅයිඩී කණ්ඩායමක් පත්කරන ලදි. පොලිස් පරීක්‍ෂක මාරසිංහ, සහකාර පොලිස් අධිකාරි සීඩබ්ලිව් වික්‍රමසේකර ඇතුළු කණ්ඩායමක් ඒ සඳහා පත්කෙරිණි.


එම සීඅයිඩී නිලධාරීන් කණ්ඩායමේ සහාය ඇතිව, මාවනැල්ල සිදුවීමට සම්බන්ධ සැකකරුවන් 9 දෙනෙකු අත්අඩංගුවට ගැනීමට 2018.12.26 දින කෑගල්ල පොලිස් කොට්ඨාසය සමත් විය.


එම 9 දෙනාගෙන් තවදුරටත් ප්‍රශ්න කිරීමේදී ඔවුන් පිටුපස සිටි ප්‍රධාන සැකකරුවන් වන මොහොමඩ් ඊබ්‍රහිම් සාදික් අබ්දුල්ලා සහ මොහොමඩ් ඊබ්‍රාහිම් සාදික් අබ්දුල් හක් නමැති පුද්ගලයන් දෙදෙනකු හෙළිකර ගැනීමට සීඅයිඩීය සමත් විය.


එම ප්‍රධාන සැකකරුවන් දෙදෙනා අත්අඩංගුවට ගැනීම සඳහා, මීට පෙර අත්අඩංගුවට ගත් 9 දෙනාගේ දූරකථන ඇමතුම් වාර්තා පරීක්‍ෂණයට ලක්කළේය. එම වාර්තා අනුව, මොහොමඩ් ඊබ්‍රාහිම් සාදික් අබ්දුල්ලා සහ මොහොමඩ් ඊබ්‍රාහිම් සාදික් අබ්දුල් හක් පුත්තලම වනාතවිල්ලුව ඒඑච්එම් මුෆීස් නමැත්තකු සමග සමීප සම්බන්ධතා පවත්වා ඇති බව හෙළිවිය.


2018.12.27 හෝ ඊට ආසන්න දිනකදී මේවාට සම්බන්ධ සැකකරුවන් 9 දෙනාම මාවනැල්ල මහේස්ත්‍රාත්වරයා වෙත ඉදිරිපත් කෙරුණි. ඒ, සිවිල් සහ දේශපාලන අයිතිවාසිකම් සඳහා වන ජාත්‍යන්තර සම්මුතිය සහ දණ්ඩ නීති සංග්‍රහය යටතේය.


විමර්ශන අතරතුරදී, කෑගල්ල පොලිස් ප්‍රදේශයට අනුයුක්ත පොලිස් අධිකාරී චාමික වික්‍රමසිංහ, මාවනැල්ල සිදුවීම ලංකාවේ ඒකීයභාවය, සාමය සහ ආරක්‍ෂාවට බාධා කිරීම සඳහා ජාත්‍යන්තර ත්‍රස්තවාදී සංවිධානයක ක්‍රියාවක්දැයි තහවුරු කරගැනීම සඳහා ඉන්ටර්පෝල්හි සහාය ලබාදෙන ලෙස ශානි අබේසේකරගෙන් ඉල්ලා සිටියේය.


ශානි ඉන්ටර්පෝල්හි සහාය ඉල්ලූ විට, ලංකාවේ ඉන්ටර්පෝල් ශාඛාවේ පොලිස් අධිකාරි රංජිත් වෙදසිංහ ඔහුට කිව්වේ, මාවනැල්ල සිද්ධිය ඍජුවම ජාත්‍යන්තර සංවිධානයකින් කළ බවට පැහැදිලිව හඳුනාගත නොහැකි නිසා, ඉල්ලා සිටි සහාය දෙන්නට ඉන්ටර්පෝල්ට නොහැකි බවයි.


ඉන් අනතුරුව 2018.12.31 දින මාවනැල්ල සිද්ධියේ සමස්ත පරීක්ෂණ භාර ගන්නට එවකට පොලිස්පතිවරයා සීඅයිඩීයට නියෝග කළේය.


ඉන් පසුව තස්ලිම් නම් ඔත්තුකරුවෙකුගේ සහාය ඇතිව සහ ඩිජිටල් අධිකරණ වෛද්‍ය සාක්ෂි පිළිබඳ දැඩි විමර්ශනයකින් පසුව, 2019.01.16 දින පමණ සීඅයිඩී නිලධාරීන්ට, පුත්තලම වනාතවිල්ලුවේ ලැක්ටොවත්ත නම් වතුයායේ පිහිටි එන්ටීජේහි ආරක්‍ෂක නිවසක් හෝ පුහුණු කඳවුරක් සොයාගත හැකි විය. එදිනම පස්වරු 5.30ට හෝ ඊට ආසන්නව සීඅයිඩී කණ්ඩායම එය වටලා නිවස තුළ තිබුණු කිලෝග්‍රෑම් සියයකට අධික ප්‍රමාණයකින් යුක්ත ලංකාවේ නිෂ්පාදිත යූරියා නටයිටේ්‍රට් පුපුරන ද්‍රව්‍යද, ඩෙටනේටර් 99ක්, සේව නූල්, ගිනි අවි කොටස්, මාලිමා යන්ත්‍ර සොයාගෙන ඇත.


පොලිස් පරීක්‍ෂක මාරසිංහ එම සොයාගත් ද්‍රව්‍ය ගැන ශානි අබේසේකරට දැන්වීය. ශානි කළේ, එම පුපුරන ද්‍රව්‍ය නිෂ්ක්‍රිය කරන ලෙස විශේෂ කාර්ය බලකායේ කමාන්ඩර් වෙත දැන්වීමයි.
වැටලීම සිදුකරන අවස්ථාවේ ලැක්ටොවත්තේ සිටි සීඅයිඩී නිලධාරීන් සැකකරුවන් 4 දෙනකු අත්අඩංගුවට ගත්හ. ඒඑච්එම් මුෆිස්, ඒඑච්එම් හාමාස්, එම්එන්එම් නෆ්රිඩ් සහ එම්එන්එම් නවීඩ් ඒ අයයි. මේ හතර දෙනා වැඩිදුර ප්‍රශ්න කිරීම් සඳහා ත්‍රස්තවාදය වැළැක්වීමේ පනත යටතේ දින 90ක ආරක්‍ෂක නියෝග මත රඳවාගන්නා ලදහ. ඉහත දෙදෙනකුගෙන් දිගින් දිගටම ප්‍රශ්න කිරීමේදී පහත කරුණු හෙළිවිය.

  1. එන්ටීජේහි නායකයා එම්සීඑම් සහරාන් බව.
  2. සහරාන් අන්තවාදී දේශන සහ වැඩමුළු පැවැත්වූ බව.
  3. නුවරඑළියේදී එන්ටීජේ සාමාජිකයන් සඳහා සහරාන් විසින් කෙටි ගිනිඅවි පුහුණු පාඨමාලා පැවැත්වූ බව.
  4. සියලු එන්ටීජේ සාමාජිකයන්ට ඔවුන්ගේ නම්වලට අමතරව ආරූඪ නම් දමා තිබුණු බව.
  5. සංවිධානයේ සාමාජිකයන් මරාගෙන මැරෙන ප්‍රහාරකයන් සහ හුදෙකලා හිවල් ප්‍රහාරකයන් ලෙස කණ්ඩායම් දෙකකට බෙදා තිබුණු බව.
  6. සහරාන් සහ සංවිධානයේ ප්‍රධාන සාමාජිකයන් ගිනි අවි එකතුකරමින් සිටි බව සහ ලැක්ටොවත්තේ පුපුරන ද්‍රව්‍ය නිෂ්පාදනය කරමින් සිටි බව.
  7. සහරාන් ලැක්ටොවත්තේ පුහුණු කඳවුරක් ආරම්භකිරීමට සැලසුම්කර තිබුණු බව.
    මුෆිස් සහ හමාස් යන දෙදෙනාගෙන් සිදුකළ ප්‍රශ්න කිරීම්වලින් සහරාන් ශ්‍රී ලංකාවේ වාර්ගික අසමගිය ඇති කිරීමට අන්තවාදී ක්‍රියාකාරකම් කිහිපයක් සිදු කිරීමට අදහස් කරගෙන සිටින බව අනාවරණය විය.

2019.01.17 දින හෝ ඊට ආසන්න දිනකදී ශානි අබේසේකර, එම ස්ථානයට ගියේය. එහෙත්, ඒ වන විටත් සීඅයිඩීයට කිසිදු පූර්ව දැනුම්දීමකින් තොරව සහකාර පොලිස් අධිකාරි මල්ලවාරච්චි, එස්අයිඑස් නිලධාරීන්, ලෙෆ්ටිනන්ට් කර්නල් අනුරුද්ධ කරුණාරත්න, සහ ඩීඑම්අයිහි කැප්ටන් නානායක්කාර ප්‍රමුඛ ඔවුන්ගේ වෙන වෙනම කණ්ඩායම්වල නිලධාරීහු, විමර්ශනය සඳහා එහි පැමිණ සිටියහ. විශේෂ කාර්ය බලකායේ නිලධාරීහුද, එම පුපුරන ද්‍රව්‍ය නිෂ්ක්‍රිය කිරීම සඳහා බාරගැනීමට එහි පැමිණ සිටියෝය. රජයේ රස පරීක්‍ෂකවරයාද සිටියේය.
එස්අයිඑස් සහ ඩීඑම්ටී නිලධාරීන්ට, අත්අඩංගුවට ගත් සැකකරුවන් හතරදෙනාගෙන් ප්‍රශ්න කරන්නට සහ එන්ටීජේහි නිෂ්පාදනවල ඡායාරූප ගන්නට අවසර ලැබී තිබිණ.


මේවාට සම්බන්ධ සැකකරුවන් 4 දෙනා 2019.01.26 දින හෝ ඊට ආසන්න දිනකදී මාවනැල්ල මහේස්ත්‍රාත්වරයා වෙත ද ඉදිරිපත් කෙරිණි.


2019.02.06 දින රහස් පොලිස් නිලධාරීන් බී වාර්තාවෙක් ගොනුකරමින් සහරාන්ට රටින් පිටවීම තහනම් කිරීමේ නියෝගයක් මාවනැල්ල මහේස්ත්‍රාත්ගෙන් ලබාගත්හ.


ගැඹුරින් විමර්ශනය කිරීමෙන් පසුව එම්.එන්.එම්. නෆ්රිඩ් සහ එම්.එන්.එම්. නවිද් ලැක්ටොවත්තේ ත්‍රස්ත ක්‍රියාවකට කිසිදු ආකාරයකින් සෘජුව හෝ වක්‍රව සම්බන්ධ වූයේ නැති බව තහවුරු වීමෙන්, ත්‍රස්තවාදය වැළැක්වීමේ පනත යටතේ දැඩි කොන්දේසි සහිතව 2019.04.10 දින නිදහස් කරන ලදි. එම කොන්දේසි තවමත් බලාත්මකය.


2019.02.02 දින සීඅයිඩීය භාර රවී සෙනෙවිරත්න සමග ශානි එවක ජනාධිපති මෛත්‍රීපාල සිරිසේන හමුවී ඉහත සියලු කාරණා පැහැදිලි කර මෙම කාරණය බරපතළ ලෙස සලකා බැලිය යුතු බව අවධාරණය කරන ලදි.


සීඅයිඩීය ආරක්ෂක මණ්ඩලයේ සාමාජිකයකු නොවූ නිසා, සෙනෙවිරත්න ජනාධිපතිවරයාගෙන් ඉල්ලා සිටියේ, මේ කාරණය ආරක්ෂක මණ්ඩලයේ අවධානයට යොමුකර රහස් පොලිසියට සහය වීමට බුද්ධි අංශවලින් සහ හමුදාවෙන් සහාය ලබා ගෙන ත්‍රස්තවාදී බෝම්බ ප්‍රහාර හෝ අන්තවාදී ක්‍රියාකාරකම් වැළැක්වීමට පියවර ගන්නා ලෙසයි.


ඒ සඳහා ආරක්‍ෂක මණ්ඩල රැස්වීමට සහභාගි වීමට රවි සෙනෙවිරත්නට අවස්ථාවක් දෙන බව කීවත්, එය ජනාධිපතිවරයා අතින් ක්‍රියාවට නොනැංවිණි.


වනාතවිල්ලුවේ හෙළිදරව්වෙන් පසු, සීඅයිඩී නිලධාරීහු එම්.සී.එම්. සහරාන් සහ ඔහුගේ සමීපතමයන් අත්අඩංගුවට ගැනීමට වැඩිදුර විමර්ශන සිදු කළෝය. එම පරීක්ෂණවලදී සීඅයිඩී නිලධාරීන්ට බදුර්දීන් මොහොමඩ් මොහිදීන් හෙවත් ආමි මොහිදීන් නම් පුද්ගලයකු හඳුනා ගැනීමට හැකි විය.


ඔහු 2017.03.10 දින අලියාර් හන්දියේ සිදුවීමට සැකකරුවෙකි. සීඅයිඩී නිලධාරීන් ආමි මොහිදීන්ගේ පසුබිම විමර්ශනය කළ අතර, ඔහු සහරාන්ගේ සමීපතමයකු බව හෙළිදරව් විය. අලියාර් සිද්ධියෙන් පසු ඔහු සහරාන් සමත තිබුණු සම්බන්ධය අත්හැර දමා ඇත. අලියාර් සිදුවීමෙන් පසු කල්මුනේ මහේස්ත්‍රාත් විසින් ඔහු අත්අඩංගුවට ගැනීමේ වරෙන්තුවක් නිකුත් කර තිබිණ.


පසුව සීඅයිඩීයේ පොලිස් සාජන් නන්දලාල් සහ උපපොලිස් පරීක්‍ෂක ඩයස්, එන්ටීජේ සහ එහි ක්‍රියාකාරකම් ගැන ඔත්තුකරුවකු ලෙස ඔහු යොදාගෙන තිබේ.■
ලබන සතියට.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි