22.9 C
Sri Lanka
27 September,2022

විකල්ප විප්ලවවාදී ආණ්ඩුවක් පිහිටුවන්න ඕනෑ
කඳුරට ජනතා පෙරමුණේ නායක පාර්ලිමේන්තු මන්ත්‍රී
මනෝ ගනේෂන්

Must read

■ අමන්දිකා කුරේ

මීට පෙර දමිළ ජාතික සංධානය ඇතුළු පක්ෂ විසින් ඉල්ලීම් කිහිපයක් මුල් කරගනිමින් ඉන්දියානු අගමැතිවරයාට යොමු කළ ලිපියට ඔබ ඇතුළු පක්ෂ කිහිපයක් අත්සන් කළේ නෑ. ඔබගේ පක්ෂය එයින් පරිභාහිරව ඉන්දියාවට ලිපියක් යොමු කරන බව ඔබ මීට පෙර කිව්වා.


මෙහෙම ලිපියක් යොමු කරන්න අවශ්‍යයි කියලා මුලින් ම කතා වුණේ උතුරු නැගෙනහිර විතරක් නෙවෙයි ලංකාවේ හැමතැනම ඉන්න දමිළ භාෂාව කතා කරන ජනතාව වෙනුවෙන් පෙනී සිටින පක්ෂ එකතු වෙලා. ඒ වගේ ම වතුකරයේ ජීවත් වෙන ඉන්දියානු සම්භවයක් ජනතාව නියෝජනය කරන පක්ෂ එකතු වෙලා. ඒ වගේ ම මුස්ලිම් ජනතාව නියෝජනය කරන පක්ෂත් එකතු වුණා. 13 වැනි සංශෝධය ක්‍රියාත්මක කරවීම පිළිබඳ ලිපියක් සකස් කරලා ඉන්දියානු අගමැතිවරයාට යැවීමටයි යෝජනා කරගත්තේ. ඉන්දියානු අගමැතිවරයාට ඒ ලිපිය යවන්න හේතු වුණේ 13 වන සංශෝධනය ලංකාවේ ඇති කළේ ඉන්දියාව සහ ලංකාව අතර ඇති කරගත ගිවිසුම්වලින් නිසා. ඒ අනුව ඉන්දියා ආණ්ඩුව හා ලංකා ආණ්ඩුව අතර පවතින මිත්‍රත්වය පාවිච්චි කරලා පළාත් සභා ඡන්දය කඩිනමින් ප්වත්වන්න සහ 13 වන සංශෝධනය ක්‍රියාත්මක කරවන්න කියන ඉල්ලීම් කරන්න තමයි අපි එකතු වෙලා මුලින් ම සාකච්ඡා කළේ.
ඒ අනුව උතුරු නැගෙනහිර පක්ෂ සමග මමත් ශ්‍රී ලංකා මුස්ලිම් කොංග්‍රසයේ නායක රවුෆ් හකීම් මහතාත් එකතු වෙලා කටයුතු කළා. පසුව මේ සාකච්ඡාවට ඉලංගෙයි තමිල් අරසු පක්ෂය එකතු වූවායින් පසුව අපි මුලින් සාකච්ඡා කරලා තිබුණු අරමුණු වෙනස් වුණා. ඔවුන්ට තිබුණේ 13 වන සංශෝධනයට එහායින් යන අවශ්‍යතාවන් ඉටු කරගන්න සහ ෆෙඩරල් ක්‍රමයක් ඇති කරවන්න. එපමණක් නොවෙයි ඔවුන් ස්වයං නිර්ණය අයිතිය සම්බන්ධයෙනුත් ඉල්ලීමක් කළ යුතු බව කීවා. ඒ අවස්ථාවේ දී එම එකතුවෙන් මමත් රවුෆ් හකීම් මහතාත් ඉවත් වුණා. අපට ෆෙඩරල් ක්‍රමයට සහ ස්වයං නිර්ණය අයිතියට එකඟ වෙන්න බෑ කියලා අපි කිව්වා. අපි ඉල්ලන්නේ ලංකාවේ ව්‍යවස්ථාවේ දැනට පවතින 13 වන සංශෝධනය ක්‍රියාත්මක කරවන්න කියලා විතරයි.. එතනින් එහාට විසඳුමකට අපි එකඟවෙන්නේ නෑ. ඒ අන්ව දමිළ ජාතික සංධානය ඇතුළු පක්ෂ කිහිපයක් ලිපියක් හදලා ඉන්දියානු මහකොමසාරිස්තුමාට භාර දුන්නා ඉන්දියානු අගමැතිතුමාට භාර දීමට.


පසුව අපි තීරණයක් ගත්තා දකුණේ ජීවත් වන ඉන්දියානු සම්භවයක් ඇති දමිළ කතා කරන ජනතාව විදිහට අපේ දේශපාලන අභිලාෂ පදනම් කරගෙන වෙනම ලිපියක් සකස් කරන්න තීරණය කළා. වතුකරයේ ජීවත් වන ජනතාව සහ කඳුකරයේ ජීවත්වන අනෙකුත් ජනතාවගේ අභිලාෂයන් මේ විදිහට අපි ලිපියකින් සකස් කරනවා කියලා. ඉන්දියානු අගමැතිතුමාට පමණක් මේ ලිපිය යොමු කරන එක සුදුසු නැති නිසා අපි මේ ලිපිය ඉදිරියේ දී ශ්‍රී ලංකා ආණ්ඩුවට, විපක්ෂනායක තුමාට සහ සියලුම පක්ෂ නායකතුමන්ලාටත් ජාත්‍යන්තර සමාජයටත් යොමු කරන්න බලාපොරොත්තු වෙනවා. මේ වෙනකොට ලිපිය සම්බන්ධ අවසන් තීරණයක් ගෙන අවසන්.


අපි මේ ලිපියෙන් ඉල්ලන්නේ ලංකාවේ ආණ්ඩුක්‍රම ව්‍යවස්ථාවෙන් ලබා දීලා තියෙන පුරවැසිභාවයට අදාල සියලු ප්‍රතිලාභ අපට ලබා දෙන්න කියලා. අපි මේ ලිපියෙන් ඉල්ලලා තියෙනවා 13 වන සංශෝධනය ක්‍රියාත්මක කරන්න සහ පළාත් සභා ඡන්දය කඩිනමින් පවත්වන්න කියලා. ඒ වගේම ඉන්දියව සමග ඇතිකරගත් සම්මුතියක ප්‍රතිඵලයක් වශයෙන් සිදු කළ 16 වන සංශෝධනය ක්‍රියාත්මක කරන ලෙසත් අපි ඉල්ලනවා. සිංහල හා දමිළ භාෂාවන් රාජ්‍ය භාෂාවන් විදිහට සලකලා ඉංග්‍රීසි භාෂාව සංධාන භාෂාවක් විදිහට යොදාගන්න කියන එකයි ඒකෙන් අදහස් වෙන්නේ.


ඒ වගේම දකුණේ වතුකරයේ ජනතාවට සමාජයට තව තවත් එන්න භූමි සීමාවලින් තොර සමාජ සභාවක් අපි ඉල්ලනවා. ඒ තුළින් භූමි සීමා නැතිව ජනතාවගේ ප්‍රශ්නවලට විසඳුම් සෙවීමට අපට අවස්ථාවක් ලැබෙනවා. ඒ වගේම මධ්‍යම ආණ්ඩුව, පළාත් සභා හා පළාත් පාලන ආයතන විදිහට බලය බෙදී යාම තවත් ශක්තිමත් කරන්න කියලා අපි ඉල්ලලා තියෙනවා. උතුරු නැගෙනහිර දමිළ පක්ෂ ගනුදෙනු කරන්නේ මධ්‍යම ආණ්ඩුඅත් එක්ක. නමුත් වතුකරය ආශ්‍රිත පක්ෂ ගොඩක් වෙලාවට පළාත් සභා පළාත් පාලන ආයතන තමයි නියෝජනය කරන්නේ. පවතින ඡන්ද ක්‍රමය වෙනස් කරන්න එපා කියලා අපි ඉල්ලනවා. පවතින සමානුපාතික ක්‍රමය හරහා තමයි සුළු පක්ෂවලට පත් වෙන්න අවස්ථාවක් ලැබෙන්නේ. අපේ පක්ෂය පමණක් නොවෙයි ජනතා විමුක්ති පෙරමුණ වැනි පක්ෂවලටත් පත් වෙන්න අවස්ථාව තියෙන්නේ ඒ ඡන්ද ක්‍රමය නිසා තමයි. වතුකරයේ ජීවත් වෙන ජනතාවට ගෞරවනීයව ජීවත් වෙන්න අයිතිය දෙන්න කියලාත් අපි ඉල්ලනවා. පසුගිය කාලයේ එවැනි ජනතාවට දේශපාලන, ආර්ථික, සෞඛ්‍ය, අධ්‍යාපනික හා ඉඩම් අයිතිය ලබා ගැනීම සම්බන්ධයෙන් විශාල ප්‍රශ්නයක් ගොඩනැගිලා තිබුණා. ඒ නිසා ඒ අයට ඒ දේවල් ලබා දීලා විශේෂ අවස්ථාවක් ලබා දීලා ඔවුන්ව ජාතික මට්ටමට ගෙන එන්න අවස්ථාවක් දෙන්න කියලා අපි ඉල්ලනවා.

ඉදිරියේ දී දමිළ ජාතික සංධානය සහ සමගි ජන බලවේගය සමග ඔබේ පක්ෂ දේශපාලන සබන්ධතා පවත්වන්න බලාපොරොත්තු වන්නේ කෙසේ ද?


දමිළ ජාතික සංධානය සමග අප්ට 13 වන සංශෝධනය සහ භාෂා අයිතිය වැනි දේවල් සම්බන්ධයෙන් එක තැනක එකතු වෙලා කතා කරන්න හැකියාව තියෙනවා. නමුත් එක සංධානයක් හදලා එකට වැඩ කරන්න අවස්ථාවක් නෑ කියලා මම හිතන්නේ. දමිළ ජාතික සංධානය සමග හා සමගි ජන බලවේගය සමග වැඩ කරනවා කියන එක විෂය දෙකක්. මැතිවරණ ක්‍රියාවලිවල දමිළ ජාතික සංධානය සමග එකට වැඩ කරලා නෑ අපි තවම. සමගි ජන බලවේගය සමග අපි මැතිවරණ දේශපාලනය සිදුකරගෙන යනවා. නමුත් සමගි ජන බලවේගයේ අපිට තවම නිල වශයෙන් සංධානයක් නිර්මාණය වෙලා නෑ. සමගි ජන බලවේගය පටන් ගත්තේ සංධානයක් හැටියටයි. නමුත් එක්සත් ජාතික පක්ෂයේ නායකත්වය රනිල් වික්‍රමසිංහ මහතා ලබා නොදුන්නු නිසා සජිත් ප්‍රේමදාස මැතිතුමා සමගි ජන බලවේගය එතුමාගේ පක්ෂය කරගත්තා. ඒ සම්බන්ධව අපි එක්ක කතා කළේ නෑ. සමගි ජන සංධානයක් හදනවා කියලා අපට පොරෙන්දු වුණා අවුරුද්දකට කලින්. ඒක තවම හදන්න බැරි වුණු එක ලොකු අඩුපාඩුවක් හැටියට මම දකිනවා. නමුත් අපි සජිත් ප්‍රේමදාස මහතාට චෝදනා කරන්න යන්නේ නෑ ඒ සම්බන්ධයෙන්. අවස්ථා එන විදිහට සුදුසු විදිහට අපි කටයුතු කරන්න බලාපොරොත්තු වෙනවා.

මේ වෙනකොට ආණ්ඩුව ප්‍රතික්ෂේප කරලා ජනතාව විකල්ප සොයනවා. පවතින අර්බුද හමුවේ ඔබ ජනතාවට යෝජනා කරන විසඳුම් මොනවාද?


වර්තමාන ආණ්ඩුව වැටිලා ඉවරයි. ආණ්ඩුව තුළ සිටින අය කතා කරන්නේ නෑ. මාධ්‍ය හමුවකටවත් එන්නේ නෑ. ආණ්ඩුව වට්ටලා අයින් කරන එක නෙවෙයි දැන් අපේ අභියෝගය. විකල්ප ආණ්ඩුවක් හදන එකයි අපේ අභියෝගය. ඒ හදන ආණ්ඩුව පරණ තැටියම ආපහු හරවලා දාන ආණ්ඩුවක් වෙන්න බෑ. ආණ්ඩුව තුළින් ඉන්න කොටසකුයි, සමගි ජන බලවේගේ කොටසකුයි, ශ්‍රී ලංකා නිදහස් පක්ෂයේ කොටසකුයි අරන් ආණ්ඩුවක් හදලා වැඩක් නෑ. අපි ගන්න ඕනෑ වෙන විදිහකට හිතන අයව. අලුත් විදිහට කල්පනා කරලා වැඩ කරන අයව. විකල්ප විප්ලවවාදී ආණ්ඩුවක් පිහිටුවන්න ඕනෑ. ඒ වගේම එයට ප්‍රගතිශීලී දැක්මක් තිබිය යුතුයි. මේ වැටිලා තියෙන තැනින් ගොඩගන්න එක ලේසි වැඩක් නෙවෙයි කියලා අපි දන්නවා.

ජිනීවා මානව හිමිකම් කවුන්සිලය ශ්‍රී ලංකාව සම්බන්ධයෙන් සකස් කළ වාර්තාව පසුගිය සතියේ ආණ්ඩුවට භාර දුන්නා නේද?


කලින් මානව හිමිකම් කවුන්සිලය විසින් අවධානය යොමු කළේ යුද්ධය ඇතුළේ පීඩාවට පත් වෙලා ඉඳපු ජනතාව සමබන්ධයෙන්. දැන් එතනින් එහාට ගිහින් රටේ ප්‍රජාතන්ත්‍රවාදය, මානව හිමිකම්, මාධ්‍ය නිදහස, ස්වාධීන අධිකරණය සහ පොලිසිය පවත්වාගෙන යාම ගැන දැන් ඔවුන් අවධානය යොමු කරනවා. ආණ්ඩුව දැන් ජාත්‍යන්තර ප්‍රජාව ඉදිරියෙ හැම පැත්තෙන් ම අසමත් වෙලා ඉන්නේ. ඒ නිසා ජාත්‍යන්තර සමාජයේ විශ්වාසය නැතිවෙලා තියෙනවා. මේක ආණ්ඩුව විසින් ඉල්ලලා කරගත්ත දෙයක්. අපි ආණ්ඩුවට කියන්නේ ජාත්‍යන්තර සමාජය ඉස්සරහ දැන්වත් විශ්වාසය දිනාගන්න කටයුතු කන්න කියලා. ජී.එල්. පීරිස් විදේශ ඇමතිතුමා ජාත්‍යන්තර සමාජයට ගිහින් කියන කතා සහ ආණ්ඩුව රට තුළ සිදු කරන දේවල් අතර විශාල පරස්පරතාවක් තියෙනවා. ඒ නිසා ආණ්ඩුව යන ගමන ගැන අපට කිසි සෑහීමකට පත් වෙන්න බෑ. ආණ්ඩුව වැටුණාට අපට ප්‍රශ්නයක් නෑ. නමුත් ආණ්ඩුව වැටෙන්නේ අපේ හැමෝගෙම රටත් වට්ටගෙන.


ඉදිරියේ දී මානව හිමිකම් සැසි පැවැත්වෙනවා. සැප්තැම්බර් මාසයේ පැවැත්වෙන සැසියේ දී ශ්‍රී ලංකාව පිළිබඳ තීරණය ඔවුන් ලබා දෙයි. ජාත්‍යන්තර මූල්‍ය අරමුදලට යන්න හෝ මේ හැමදේකටම ඒක බලපාවි. රට තුළ හරි නිදහසක් නැති නම් ජාත්‍යන්තර සමාජය අපට උදවු කරන්න කැමති වෙන්නේ නෑ. අනිවාර්යයෙන් ම මානව හිමිකම් කවුන්සිලයේ දී ලංකාවට ලොකු ප්‍රශ්නයකට මුහුණ දෙන්න සිදු වෙනවා.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි