20.2 C
Sri Lanka
3 October,2022

පොලිසිය, නින්දිත.

Must read

පාස්කු ඉරිදා මරාගෙන මැරෙන ප්‍රහාරයේ නායකයා ලෙස කටයුතු කළ සහරාන් හෂීම්ගේ බිරිඳ වන ෆාතිමා කාදර් හාදියාගෙන් අපරාධ පරීක්ෂණ දෙපාර්තමේන්තුව හෙවත් සීඅයිඩීය ප්‍රශ්න කර ඇත.


ඒ පාස්කු ඉරුදින ප්‍රහාරයට මාස දෙකකට කලින් ඇය කුලියාපිටිය නිවසේදී ප්‍රශ්න කරමින් සිටි අවස්ථාවේදී සහරාන් හෂීම් අත්අඩංගුවට ගැනීමේ අවස්ථාවක් එවක සීඅයිඩී නිලධාරීන් මඟහැරී යැයි කියන සිදුවීමක් සම්බන්ධයෙන්ය.


මෙම ප්‍රශ්න කිරීම කර ඇත්තේ වැලිකඩ බන්ධනාගාරයේදී වන අතර ඒ සඳහා කුලියාපිටිය අධිකරණයෙන් අවසර ලබා ගැනීමක් සිදුකර ඇති බව මාධ්‍ය වාර්තා කර ඇත.


සීඅයිඩීය මේ කැස කවන්නේ කුමකටද යන්න පිළිබඳ තේරුම් ගැනීම අමාරු නැත. මේ උත්සාහය වත්මන් ආණ්ඩුවට හිසරදයක් වී ඇති පාස්කු ඉරුදින ප්‍රහාරය සම්බන්ධයෙන් නිවැරදි විමර්ශනයක් කරමින් ඒ සම්බන්ධයෙන් දැනට අනාවරණය වී ඇති සියලු තොරතුරු සොයාගත් එවකට සීඅයිඩීයේ අධ්‍යක්ෂවරයා වශයෙන් කටයුතු කළ ශානි අබේසේකර ඇතුළු පිරිස යළි බොරු චෝදනාවක් යටතේ කොටු කරන්නටය.


වාස් ගුණවර්ධන සිද්ධිය සම්බන්ධයෙන් බොරු චෝදනාවක් මත ශානි අබේසේකරට නඩු පැවරූ බව මේ වනවිට හෙළිදරව් වී අවසන් අතර මේ සිදුකරන්නට යන්නේ එහි දෙවන නාටකය බව පැහැදිලිය.


දේශපාලන වුවමනා එපාකම් මත ශ්‍රී ලංකා පොලීසිය ඉතා නින්දිත ලෙස මේ වනවිට කටයුතු කරමින් සිටින බවට පසුගිය කාලයේ එල්ල වූ චෝදනා බරපතළ වන අතර කොළඹ අගරදගුරු මැල්කම් කාදිනල් රංජිත් හිමි පොලිස්පතිවරයාට හා පොලීසියට එල්ල කරන ලද චෝදනා බරපතළය. ඒ හිමි එක් අවස්ථාවක කීවේ සිය රාජකාරිය නිසි ලෙස කිරීමට නොහැකි නම් පොලිස්පතිවරයා සිය නිල ඇඳුම ගලවා ගෙදර යායුතු බවය.


ආසන්නතම සිදුවීම් වන කතෝලික ක්‍රියාකාරිකයකු වන ෂෙහාන් මාලක අත්අඩංගුවට ගැනීමේ සිදුවීමේදී හා බොරැල්ල සියලු ශාන්තුවරයන්ගේ දේවස්ථානයට බෝම්බයක් තිබීමේ සිදුවීමේදීද පොලීසිය දේශපාලන වුවමනා එපාකම් මත කටයුතු කරන බව පෙන්නුම් කර ඇත.


පොලීසිය මෙතරම්ම දේශපාලන වුවමනා එපාකම් මත කටයුතු කරන අයුරක් මෑත කාලයේ දැක ගන්නට හැකිවී නැත.


පසුගිය යහපාලන ආණ්ඩු සමයේ ස්වාධීන පොලිස් කොමිසමක් මගින් පොලීසියට ලබාදුන් කොන්ද කෙළින් කරගෙන වැඩ කිරීමේ හැකියාව යළි එයට ළඟා කරගත යුතු බව මෙම සිදුවීම්වලින් මොනවට පැහැදිලි වේ. එදා පොලීසිය බාර ඇමතිවරයාට තබා ජනාධිපතිවරයාටවත් පොලිස් කොස්තාපල්වරයකු මාරු කිරීමේ හැකියාව තිබුණේ නැත.
පොලීසිය සන්නද්ධ හමුදාවක් නොවන ජනතාවගේ සිවිල් කටයුතු සම්බන්ධයෙන් මැදිහත් වන දෙපාර්තමේන්තුවකි. එහි සේවයේ යෙදෙන්නන්ට සංවිධානය වීමේ හා වෘත්තීය සමිති පිහිටුවීමේ අයිතිවාසිකම් තිබේ. කනිෂ්ඨ නිලධාරීන්ගේ හා පොලිස් පරීක්ෂකවරුන්ගේ සංගම් ආදිය එයට තිබුණි. එමෙන්ම ඊට ඉහළ පොලිස් නිලධාරීන්ගේ එකතු මෙන්ම විශ්‍රාමික පොලිස් නිලධාරීන්ගේ එකතුද එයට තිබේ.


ලියුම්කරුගේ අදහස වන්නේ සේවයේ යෙදී සිටින හා සේවයෙන් විශ්‍රාම ගොස් සිටින පොලීසියේ මේ සියලු අය එකට එකතුවී පොලීසිය පත්ව ඇති මේ නින්දිත තත්වයෙන් බේරා ගැනීම සඳහා යම් උත්සාහයක් ගත යුතු බවය. නැතහොත් අපට යම්කිසි හෝ ගෞරවයකින් කතාකළ හැකි පොලීසියක් ඉතුරු වන්නේ නැත.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි