19.3 C
Sri Lanka
27 September,2022

නාවික හමුදාවට කිව්වාට වැඩක් නෑ
අපේ මත්ස්‍ය සම්පත ඉන්දියාවට දෙන්න එපා උතුරේ ධීවරයෝ හඬනගති

Must read

■ අමන්දිකා කුරේ

ඉන්දීය ධීවරයන් ශ්‍රී ලංකා මුහුදු සීමාවට මසුන් මරන්නට පැමිණීම වරින් වර පසුගිය කාලය පුරාවට ම ඇති වූ ගැටලුවකි. එහි දී ධීවරයන් විවිධ විරෝධතා දැක්වූ අතර ඊට නිසි පිළිතුරක් තවමත් ලැබී නොමැත. ඉන්දීය ධීවරයන් මෙරට මුහුදු සීමාවට පැමිණීමේ ප්‍රශ්නයට වැඩි වශයෙන් මුහුණ දෙන්නට සිදුව තිබෙන්නේ උතුරේ ධීවරයන්ට ය. යුද්ධය පැවති කාලයේ ශ්‍රී ලංකාවේ උතුරු මුහුදේ මසුන් ඇල්ලීමට මුහුදු යාමට ධීවරයන්ට අවසර නොතිබුණි. මේ වන විට ඊට අවසර ඇති හෙයින් කුඩා බෝට්ටුවලින් ගොස් උතුරේ ධීවරයෝ මසුන් මැරීම සිදු කරති. කාලයක් තිස්සේ මසුන් ඇල්ලීම සිදු නොකළ බැවින් උතුරු මුහුදේ මත්ස්‍ය අස්වැන්නද ඉහළ මට්ටමක පවතින බව උතුරු ධීවරයෝ පවසති. ඔවුන් පෙන්වා දෙන්නේ ඉන්දීය ධීවරයන් මසුන් මැරීම සඳහා ලංකා මුහුදු සීමාවට පැමිණීමට එය එක් හේතුවක් බවයි.


මෙම දකුණු ඉන්දීය ධීවරයන් ට්‍රෝලර් යාත්‍රා භාවිත කරමින් ලංකා මුහුදු සීමාවේ මසුන් මරන අතර ශ්‍රී ලංකාවේ දැනට තහනම් පන්න ක්‍රමයක් වන දැල් ක්‍රමයක් භාවිත කරමින් ඔවුන් මෙම මසුන් මැරීම කරන බවට ධීවරයෝ චෝදනා කරති. මෙම දැල් මුහුදු පතුල දක්වාම යොදා ඇදගෙන යාම නිසා මත්ස්‍ය අස්වැන්න පමණක් නොව කුඩා මාළු පැටවුන් හා ඔවුන්ට ජීවත් වීමට අවශ්‍ය පරිසරය ද එමගින් විනාශ වේ. දකුණු ඉන්දියානු මුහුදේ දිගින් දිගටම දකුණු ඉන්දීය ධීවරයන් මෙලෙස තහනම් පන්න ක්‍රම භාවිත කරමින් මසුන් ඇල්ලීම නිසා එහි මත්ස්‍ය සම්පත සැලකිය යුතු ප්‍රමාණයකින් අඩුව තිබීම නිසා ඔවුහු වරින් වර ශ්‍රී ලංකා මුහුදු සීමාවට ඇතුළු වී මසුන් ඇල්ලීම සිදු කරති.


පසුගිය කාලය පුරාවටම පේදුරුතුඩුවේ වෙල්වැටිතුරෙයි ප්‍රදේශයේ ධීවරයන් මෙම ගැටලුවට මුහුණ දුන් අතර ඉන්දීය ධීවරයන්ගේ ට්‍රොලර් යාත්‍රා ගමන් කිරීමේ දී වෙල්වැටිතුරෙයි ධීවරයන්ගේ ධීවර ආම්පන්නවලට අවස්ථා ගණනාවක දීම හානි සිදු වී තිබුණි. එම ට්‍රෝලර් යාත්‍රාවලින් වෙල්වැටිතුරෙයි ධීවරයන්ගේ යාත්‍රා හප්පාගෙන යන්නට වෑයම් කළ අවස්ථා ද වාර්තා විය. ධීවරයන් වරින් වර මේ පිළිබඳව ධීවර ඇමති ඩග්ලස් දේවානන්දද දැනුවත් කළ අතර ඔවුන් හා දමිළ ජාතික සංධානයේ ක්‍රියාකාරීන් එක්ව වරක් බෝට්ටුවලින් ගොස් විරෝධතාවක් ද දක්වන ලදි.


එවැනි පසුබිමක් තිබිය දී පසුගිය සතියක වෙල්වැටිතුරෙයි සිට මුහුදු ගිය ධීවරයන් දෙදෙනෙකු අතුරුදන් වූ අතර දින කිහිපයකට පසු ඔවුන්ගේ සිරුරු වෙරළට ගොඩ ගසා තිබුණි. ධීවරයන් පවසන්නේ ඔවුන් දෙදෙනා මිය යන්නට හේතුව ඉන්දීය යාත්‍රාවකින් ඔවුන්ගේ බෝට්ටුව හප්පාගෙන ගොස් ඇති නිසා බවයි. ඒ අනුව ඔවුන් දින 8ක පමණ කාලයක් සත්‍යග්‍රහයක ද නිරත වූයේ මෙම සිදුවීම්වලට අදාළව යුක්තිය ඉටු කරදෙන ලෙස හා නැවත ඉන්දීය ට්‍රෝලර් යාත්‍රා ලංකා මුහුදු සීමාවට පැමිණීම වළක්වන ලෙස ඉල්ලමිනි. ධීවර ඇමතිවරයා ද අවස්ථා දෙකක දී එම ධීවරයන් සමග සාකච්ඡා කිරීමට පැමිණිය ද සාකච්ඡා විසඳුමකින් තොරව අවසන් විය. අවසන් සාකච්ඡාවේ දී ධීවර විරෝධය හමුවේ ධීවර ඇමතිවරයා කෝපයට පත්වී ධීවරයන්ට බැන වදිමින් සාකච්ඡාව අතරමැද ඉවත්ව ගියේ ය.


මේ වන විට ධීවර විරෝධයට සහයෝගය දක්වන දමිළ ජාතික සංධානයේ පාර්ලිමේන්තු මන්ත්‍රී ශානකියන් රාසමාණික්කම් මෙලෙස අදහස් පළකළේ ය.


‘මේක අද ඊයේ අටන් ගත්ත ප්‍රශ්නයක් නෙවෙයි. කාලයක් තිස්සේ අපි මේ ප්‍රශ්නයට විසඳුම් ඉල්ලනවා. දකුණු ඉන්දීය ට්‍රෝලර් යාත්‍රා ඇවිල්ලා තහනම් ක්‍රම යොදාගෙන සිදු කරන මේ මසුන් ඇල්ලීම නිසා අපේ මත්ස්‍ය සම්පත විනාස වෙනවා. අවුරුදු සිය ගාණක් යනවා ඒ වගේ දෙයක් ස්වාභාවිකව නැවත සැකසෙන්න. ඉන්දීය මුහුදු සීමාවේ දිගටම මේ වැඩේ කරලා ඒවා විනාශ වෙලා නිසා තමයි ලංකාව පැත්තට එන්නේ. කලින් එකක් දෙකක් හොරෙන් ඇවිත් හොරෙන් යන එකක් තිබුණේ. දැන් එළිපිටම ඒ යාත්‍රා ඇවිල්ලා යනවා කිසිම බයක් නැතිව. යාපනය මුහුදු වෙරළට ගියාම පේන දුරකින් තමයි මේ යාත්‍රා ඇවිල්ලා මාළු අල්ලන්නේ. නාවික හමුදාවට දැනුම් දුන්නාට වැඩකුත් නෑ. නාවික හමුදාව අපට නිල වශයෙන් නොකිව්වාට අපි ඒ නිලධාරීන්ට කතා කරලා ඇහුවාම කියන්න්නේ ඒ ට්‍රෝලර් යවන්න අදාළ උපදෙස් ඉහළින් ලැබිලා නෑ කියලා. පහුගිය දවසක මාළු අල්ලන්න ගිය ධීවරයෝ දෙන්නෙක්ගෙ මළ සිරුරු හමුවුණා. එක මළ සිරුරක් හිස මොකක් හරි දේකට අහු වෙලා තැලිලා කියලා පේනවා. අපි සැක කරන්නේ ඉන්දීය බෝට්ටුවකින් මෙයාලාව හප්පලා එක්කෙනක්ව බෝට්ටුවේ හිර වෙන්න ඇති කියලා.


අපට තියෙන ප්‍රශ්නය මේ තියෙන ප්‍රශ්නයට අදාළව පවතින නීතියවත් ක්‍රියාත්මක කරන්නේ නැති එක. එහෙම මුහුදු සීමාව උල්ලංඝනය කරලා ආවාම නඩු දාන්න ඕනෑ. දැන් හරියට ඒක ක්‍රියාවලියවත් වෙන්නේ නෑ. දකුණේ ධීවරයන් හා දකුණු ඉන්දීය ධීවරයන් අතර මේ ප්‍රශ්නය ඇති වුණා නම් මේ වෙනකොට රට පුරාම ජාතික ප්‍රශ්නයක් ඇති කරලා විසඳුම් දෙන්නත් සෑහෙන්න පාර්ශ්ව ඉදිරිපත් වෙලා ඉවරයි. දැන් ප්‍රශ්නය තියෙන්නේ උතුරේ දමිළ ධීවරයන් සහ දකුණු ඉන්දියාවේ දමිළ ධීවරයන් අතර නිසා මේකට තවම කවුරුත් විසඳුම් දෙන්න ඉදිරිපත් වෙලා නෑ. පසුගිය කාලය පුරාවටම ඉන්දියාවේ රාජ්‍ය තාන්ත්‍රිකයන්ව අපේ රටේ අය ගිහින් හමුවුණා. ඒ වෙලාවේ දී මේකට විසඳුමක් ඉල්ලන්න තිබුණා. මේ ප්‍රශ්නය ඉන්දියානු නාවුක හමුදාව සහ ලංකාවේ නාවුක හමුදාව කියන අංශ දෙකම එකතු වෙලා කරන්න ඕනෑ දෙයක්.”
නාවික හමුදා මාධ්‍ය ප්‍රකාශක කපිතාන් ඉන්දික ද සිල්වාගෙන් කළ විමසීමේ දී ඔහු පැවසුවේ ඉන්දීය ධීවරයන් අත්අඩංගුවට ගැනීමට යාමේ දී ඔවුන් කළහකාරීව හැසිරී නාවුක හමුදා බෝට්ටුවලට ද හානි කර පැන යාමට උත්සාහ කරන බවයි.


‘මේ අයව අල්ලාගන්න යනවිට ඔවුන් ඉතාම කලහකාරීව හැසිරිලා අපේ බෝට්ටුවලටත් හානි කරලා පැනලා යන්න උත්සාහ කරනවා. පසුගිය දවසකත් එහෙම අල්ලාගන්න ගියාම අපේ බෝට්ටු දෙකකට හානි කළා. ඒ වගේම අපි මේ පිළිබඳව සෝදිසියෙන් ඉන්නේ. ශ්‍රී ලංකා මුහුදු සීමාවේ ගැඹුරු මුහුදේ ඉන්නවා නම් අපි ඔවුන්ව ආපසු හරවා යවනවා. එහෙම නැති නම් අල්ලාගන්නවා. මුහුද කියන්නේ වැටක් ගහලා තියන්න පුළුවන් දෙයක් නෙවෙයි. අපි සෝදිසියෙන් හිටියට ඔවුන් කොහොමහරි හොරෙන් එන්න උත්සාහ කරනවා.’


ධීවරයන් මුහුණ දී තිබෙන ගැටලු සම්බන්ධයෙන් විමසීමට අප යාපනය දිස්ත්‍රික් ධීවර සමුපකාර සමිතියේ සභාපති ආන්නලිංගම් ආන්නරාසා සම්බන්ධ කරගත්තෙමු. ඔහු පවසන්නේ දකුණු ඉන්දියාව ආශ්‍රිතව 25000ක පමණ බෝට්ටු ප්‍රමාණයක් මසුන් ඇල්ලීම සඳහා යන බවයි. ඒ අතරින් ට්‍රොලර් බෝට්ටු 2500ක් පමණ පවතින බවත් ඔවුන්ගෙන් ඇතැම් යාත්‍රා ශ්‍රී ලංකා මුහුදු සීමාවට පැමිණෙන බවත් ඔහු පවසයි. මීට පෙර උතුරු පළාතේ ධීවරයන් 27000ක් පමණ සිටිය ද මේ වන විට එම ප්‍රමාණය 23000ක් දක්වා අඩු වී තිබෙන්නේ මෙම හේතුව නිසා බව ආන්නරාසා මහතා පෙන්වා දෙයි.


මෙම ට්‍රෝලර් බෝට්ටු බහුතරයක් දකුණු ඉන්දීය ව්‍යාපාරිකයන්ට සහ දේශපාලකයන්ට අයත් ඒවා බවට ඔහු චෝදනා කරයි. 2004-2016 කාලය තුළ සාමාන්‍ය ඉන්දියානු ධීවරයන් සමග සහයෝගයෙන් ශ්‍රී ලංකාවේ ධීවරයන් ද කටයුතු කළ ද මේ වන විට එම තත්වය වෙනස් තිබේ. එමෙන් ම 2016 දී හිටපු විදේශ ඇමති මංගල සමරවීර, පාර්ලිමේන්තු මන්ත්‍රී එම්.ඒ.

සුමන්තිරන් හා ඉන්දීය විදේශ ලේකම් අතර මේ පිළිබඳව සාකච්ඡාවක් පවත්වා නැවත ඉන්දියානු ධීවරයන් ශ්‍රී ලංකා මුහුදු සීමාවට ඇතුළු නොවන බවට එකඟතාවකට පැමිණිය ද ඒවා ක්‍රියාත්මක වී නොමැති බව ආන්නරාසා මහතා පෙන්වා දෙයි. ‘ඉන්දියාව අපිට බැරි අවස්ථාවල උදවු කළා තමයි. නමුත් අපේ ගේ ඉස්සරහට ඇවිත් අපේ වස්තුව කොල්ලකාලා යනවා නම් අපට තවදුරටත් බලන් ඉන්න බෑ’ ඔහු පවසයි. දීර්ඝ කාලයක් පුරාවටම පවතින මෙම ගැටලුවට විසඳුමක් සෙවීමට අපහසු වී ඇත්තේ දමිළ ජනතාව නියෝජනය කරන දමිළ පාර්ලිමේන්තු මන්ත්‍රීවරුන් මෙම ප්‍රශ්නයට බෝල පාස් කිරීමක් සිදු කරන නිසා බවට ඔහු චෝදනා කරයි. ‘දමිළ ජනතා නියෝජිතයන් විවිධ කරුණුවලට ඉන්දියාවේ අයව හමුවෙනවා. ඉතින් ඔවුන්ට ඇයි බැරි දමිළ ජනතාවගේ මේ ප්‍රශ්නය ගැනත් කතා කරන්න.’


තවදුරටත් මෙම ගැටලුවට අදාළව ආණ්ඩුව විසඳුම් ලබා දීමට සූදානම් නැති නම් මෙම ප්‍රශ්නය පිළිබඳව යුරෝපා සංගමය ඇතුළු ජාත්‍යන්තර සංවිධානවලට පැමිණිලි කිරීමට බලාපොරොත්තු වන බව ආන්නරාසා මහතා පැවසුවේය. ඊට අමතරව මෙම ප්‍රශ්නය සම්බන්ධයෙන් මූලික අයිතිවාසිකම් නඩුවක් ගොනු කිරීමට ද සිය සංගමය හා මුලතිව්, කිල්නොච්චි, මන්නාරම දිස්ත්‍රික්කවල ධීවර සංගම් ද බලාපොරොත්තු වන බව ඔහු වැඩිදුරටත් පැවසුවේ ය.■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි