No menu items!
29.7 C
Sri Lanka
29 March,2024

ඔහුගේ දියුණු අදහස් මගේ ළපටි අදහස් ගැළපුණේ නෑ – රංගන ශිල්පිනී මොරින් චාරුණී

Must read

■ ප්‍රියන්ජිත් ආලෝකබණ්ඩාර

ඔබේ පළමු රංගන ප්‍රවිෂ්ඨය ‘කරදිය වළල්ල’ විත්‍රපටය?
කරදිය වළල්ල අධ්‍යක්ෂණය කළේ සිරිල් වික්‍රමගේ. කැමරාකරණය ඩොනල්ඩ් කරුණාරත්න, තිර රචනය උදයකාන්ත වර්ණසූරිය. කරදිය වළල්ලේදී ස්වර්ණා මල්ලවාරච්චි, විමල් කුමාර ද කොස්තා, ඩබ්ලිව්. ජයසිරි වගේ ප්‍රවීණයන් එක්ක උප ප්‍රධාන චරිතයක් කරන්න හාහා පුරා කියලා මට අවස්ථාව ලැබුණා. සිනමාව හෝ කලාව ගැන මොනවත්ම දන්නේ නැතිව හිටිය මගේ දායකත්වය කරදිය වළල්ලට එකතුවෙන්නේ ඒ ප්‍රවීණයන් මට දැක් වූ සහයෝගය නිසා. මම ඉහළට නගිනකම් ඔවුන් ඉනිමග ශක්තිමත්ව අල්ලාගෙන හිටියා.
මම ක්ෂේත්‍රයට එනකොට ටෙලි නාට්‍ය තිබුණේ නෑ. මහා සිනමාව තමයි තිබුණේ. පටන් ගත්තේ සිනමාවෙන්. වීඩියෝ තාක්ෂණයේ වගේ නෙමෙයි සිනමාවෙදි වැරදි, වැරදි නැවත නැවත එකම රූප රාමුව ගන්න බෑ. එහෙම වුණොත් විශාල වියදමක් පටල පට සඳහා වැය වෙනවා. ඒ නිසා කැමරාවට පුහුණු වෙනවා. ආලෝකකරණයට පුහුණු වෙනවා. ශබ්දවලට පුහුණු වෙනවා. සියලුම අංග සම්පූර්ණ වුණාට පස්සේ රූගත කිරීමකට යන්නේ. එවැනි පුහුණුවීම් ගණනාවක් කළාම චරිතය බොහෝ ඔපමට්ටම් වෙනවා. රංගනයේ හා අනෙක් අංශවල තියෙන අඩුපාඩු අවම කරගන්න අවස්ථාව ලැබෙනවා. දර්ශන තලයට යන්න කලින් පිටපත කියවීම කරනවා. දර්ශන තලයේදීත් තවත් සූදානම් වෙලා තමයි අපි රූගත කිරීමකට යන්නේ. එහෙම වුණාම හොඳ ස්ථාවර භාවයක්, හොඳ පෝෂණය වීමක්, හොඳම නිර්මාණයක් බිහි වීමේ ඉඩකඩක්, රංගන ශිල්පීන්ට, ශිල්පිනියනට රංගනය ඉතා ඉහළින් කිරීමේ හැකියාවක් ලැබෙනවා. අද තාක්ෂණය දියුණු වෙලා තිබුණත් එදා අනුගමනය කළ ක්‍රමවේදය අදටත් අදාලයි. මගේ දෙවැනි චිත්‍රපටිය චණ්ඩින්ගෙත් චණ්ඩියා. ඒකේ මට ප්‍රධාන චරිතය ලැබෙනවා.

ගම්පෙරළිය ටෙලි නාට්‍යය ඔබට විශේෂ වුණේ කොහොමද?
ගම්පෙරළියේ නන්දාගේ චරිතය රඟපාන්න ලැබීම මගේ ජීවිතේ සුවිශේෂ කාරණාවක්. පුණ්‍යා හීන්දෙනිය ගම්පෙරළිය චිත්‍රපටයේ නන්දාගේ චරිතය උපරිමයෙන් කරලා සම්මානයට පාත්‍ර වෙලා තිබුණේ. බර්ට්‍රම් නිහාල් මහත්මයාගේ ගම්පෙරළිය ටෙලිනාට්‍යයට එනකොට මම විත්‍රපටි 10ක විතර රඟපාලා තිබුණේ. මගේ පළමු ටෙලි නාට්‍යය තමයි බර්ට්‍රම් නිහාල් අධ්‍යක්ෂණය කළ සාමයේ තරුව නත්තල් නාට්‍යය. ඒකේ මරියතුමියට රඟපෑවේ මමයි. ඊට පස්සේ බර්ට්‍රම් නිහාල්ගේම සුභ ප්‍රාර්ථනා, සාම පූජා ටෙලි නාට්‍යවල හා ඔහුගේම ජයතු ක්‍රිස්තු ටෙලි චිත්‍රපටියේ රඟපාලා තිබුණා. සංඛ්‍යාත්මකව නිර්මාණ ප්‍රමාණය වැඩි වුණාට මට සිනමාව හා රංගනය පිළිබඳව ලොකු දැනුමක් තේරුමක් තිබුණේ නෑ. ඒ වෙනකොට මම ගම් පෙරළිය චිත්‍රපටය බලලා තිබුණේ නෑ. තිස්ස අබේසේකර මහත්තයා තමයි ගම්පෙරළිය ටෙලි නාට්‍යයේ තිර පිටපත ලිව්වේ. තිස්ස අබේසේකර මහත්තයා මට කිව්වා චිත්‍රපටිය බලන්න කලින් මාර්ටින් වික්‍රමසිංහ මහත්තයාගේ ගම්පෙරළිය, කලියුගය, යුගාන්තය, අපේ ගම පොත් ටික කියවන්න කියලා. ඒ වෙනකොට තිස්ස අබේසේකර මහත්තයාගේ දොළොස් මහේ ගංගාව, තුන්කල් සිහිනය ටෙලි නාට්‍ය දෙකකට මම සම්බන්ධ වෙලා තිබුණා. එයා තමයි මට රංගනය ගැන, සිනමාව ගැන බොහෝ දේවල් කියලා දුන්නේ. දෙබස් කියනකොට කොහොමද හඬ පාලනය කරගන්නේ කියා දුන්නේ. පොත පත ඇසුරු කරන්න, ලෝකයේ උසස් සිනමා කෘති රස විඳින්න උනන්දු කළේ. ඒ පුහුණු කිරීම්, මග පෙන්වීම්වලින් පස්සේ තමයි තිස්ස අබේසේකර මහත්තයා මා බර්ට්‍රම් නිහාල් මහත්තයා ළඟට යොමු කළේ. බර්ට්‍රම් නිහාල් මහත්තයාත් මට සෑහෙන්න උපදෙස් දුන්නා. ගම්පෙරළියේදි ජෝ අබේවික්‍රම, වසන්ත කොටුවැල්ල, චාන්දනී සෙනෙවිරත්න, ජැක්සන් ඇන්තනී, අනුලා බුලත්සිංහල, රිචාඩ් වීරක්කොඩි, අමිත්ත වීරසිංහ වගේ පිරිසක් එක්ක වැඩ කරන්න ලැබුණා. ඒ ශිල්පීන් එක්ක මම නවකයි. මහැමෝගෙන්ම ලැබුණු ආදරය, ගෞරවය, අනුශාසනා, අවවාද දිරි ගැන්වීම් පුදුමයි. දැනටත් මට චරිතයක් ලැබුණාම දර්ශන තලයට යන්නේ විවෘත මනසින්. අධ්‍යක්ෂවරයා කියන්නේ මොකක්ද කියලා බලලා ඒ අනුව රඟපානවා. මගේ සාර්ථකත්වයක් ලබලා තියෙනවා නම් ඒ මගේ හැකියාවට වැඩියෙන් එදා ඉඳන් මට වැඩ කරන්න හම්බ වෙච්ච ප්‍රවීණ අධ්‍යක්ෂවරු, කැමරා අධ්‍යක්ෂවරු, අංග රචනා ශීල්පීන් හා සහෝදර නළු නිළියන් නිසා කියලයි මම හිතන්නේ. අවුරුදු තිස් අටක් තිස්සේ මේ හැමෝම තමයි මාව හදලා මේ තරම් දුර අරන් ඇවිත් තියෙන්නේ.

දෙපා නොළත් දෙපාදයෝ චිත්‍රපටයේදි මොකද වුණේ?
ෂෙල්ටන් පයාගල මහත්තයාගේ ගොළු මුහුදේ කුණාටුව චිත්‍රපටයට මම රඟපෑමෙන් සම්බන්ධ වුණා. ඒ චිත්‍රපටයේ වැඩ ඉවර වුණායින් පස්සේ එකතු වෙලා නිර්මාණයක් කරමු කියලා පයාගල මහත්තයා මට යෝජනා කළා. මගේ ළඟ විශාල මුදලක් තිබුණේ නැති නිසා මගේ අම්මා, නංගි, මාමාගේ දායකත්වයෙන් අපි චිත්‍රපටයක් කරමු කියලා මම යෝජනා කළා. ඒ අනුව තමයි 1991 දෙපා නොලත් දෙපාදයෝ කියලා චිතටයක් කරන්න පටන් ගත්තේ. මම එහි ප්‍රධාන චරිතය රඟපෑවා. දෙපා නොලත් දෙපාදයෝ චිත්‍රපටයේ යේසුස් වහන්සේගේ ජීවිතය බොහෝම යථාර්ථවාදී ආකාරයෙන් පෙන්නුම් කරලා තිබුණා. ඒ නිසා කතෝලික භක්තිකයෝ මේ චිත්‍රපටයෙන් යේසුස් වහන්සේට අගෞරවයක් වෙනවා කියලා හිතයි කියන බය මට ඇති වුණා. මගේ පියාත් කතෝලිකයෙක්. දෙපා නොළත් දෙපාදයෝ චිත්‍රපටියේ 1971 විප්ලවයට සම්බන්ධ අදහස් එහෙමත් ඇතුළත් වෙලා තිබුණා. චිත්‍රපටිය 50% ක් විතර රූගත වේගන යනකොට, මේ පිළිබඳව ෂෙල්ටන් මහත්තයා හා මා අතරේ මත ගැටුම් ඇති වුණා. මට චිත්‍රපටය දියාරු කරන්න බෑ. මම බය නෑ. වගේ දැඩි අදහසක ෂෙල්ටන් මහත්තයා හිටියේ. එයා විප්ලවවාදියානේ. ඒ කතාව දුර දිග ගිහින් ඔයාට ඕනෑ විදිහට ඔයා ඕක කරගන්න මගේ නමක්වත් චිත්‍රපටයට ගාව ගන්න එපා කියලා පයාගල මහත්තයා චිත්‍රපටයෙන් අයින් වුණා. ඒ සිද්ධියෙන් පස්සේ එල්මෝ හැලිඩේ, සෝමපාල රත්නායක හා මම එක්වෙලා චිත්‍රපටය ඉවර කරන්න කටයුතු කළා. පයාගල මහත්තයාගේ දෙපා නොලත් දෙපාදයෝ කියන නම අයින් කරලා හංස විලාපය කියලා නම දැම්මා.

චිත්‍රපටය පාඩු ලැබුවා?
මුදල් ලැබෙනවා නැති වෙනවා. ඒ ගැන මගේ පසුතැවීමක් නෑ. ෂෙල්ටන් පයාගල කියන්නේ විශිෂ්ට නිර්මාණකරුවෙක්. ඒ වගේම උතුම්, ගෞරවාන්විත මනුස්සයෙක්. අවාසනාවකට ඔහුගේ දියුණු අදහස් හා මගේ ළපටි අදහස් ගැළපුණේ නෑ. චන්ද්‍රරත්න මාපිටිගම එක්ක පයාගල මහත්තයා සම අධ්‍යක්ෂණය කළ මලට නොඑන බමරු චිත්‍රපටයේ තේමාව වගේම දෙපා නොලත් දෙපාදයෝ චිත්‍රපටයේ තේමාවත් තවමත් මේ රටේ කිසිදු කලාකරුවෙක් අත තියපු නැති තේමා. ඒවා ඉතාම නිර්භීත නිර්මාණකරුවෙකුට පමණක් කරන්න පුළුවන් නිර්මාණ. පයාගල මහත්තයා චිත්‍රපටියේ 80% ක් අධ්‍යක්ෂණය කරලා තිබුණේ. අඩි 80,000ක්. ඒ දර්ශන ඉතාම ලස්සනට රූගත කරලා තිබුණා. මම බයට ඒවායෙන් බොහෝ කොටස් අයින් කළා. අයින් කළ පටල පට තියාගෙන හිටියා නම් අඩුම තරමේ චාර්තා චිත්‍රපටයක් හරි හදන්න තිබුණා. සාමාන්‍ය ජීවිතේ ගැනත්, කලාව ගැනත් පයාගල මහත්තයාට විශාල අත්දැකීම් තිබුණා. අද තමයි මට ෂෙල්ටන් මහත්තයාගේ නිර්මාණයේ ගැඹුර, වටිනාකම දැනෙන්නේ. ඔහුගේ විශිෂ්ට නිර්මාණය මම නිසා දියාරු වීම ගැන මම ඉතාම කනගාටු වෙනවා. ඔහු අපට සලකපු විදිහෙන්, ඔහු අපිව මෙහෙයවපු විදිහෙන් ඒ බව ස්ථිර වෙලා තියෙනවා. ඔහුගේ ඒ නිර්මාණ ශක්තියටයි මම බලපෑම් කළේ. වාර ගණනාවක් පයාගල මහත්තයා එක්ක කතා කරන්න මම උත්සාහ කළා. මට ඔහුගෙන් සමාව ඉල්ලන්න වුවමනා වෙලා තිබුණා. සමාව ඉල්ලනවාට පයාගල මහත්තයා කැමති නෑ. එයා කියන්නේ වැරදි නොකර ඉන්න. එතකොට සමාව ඉල්ලන්න ඕනෑ නෑ කියලා. ඒ අදහස හරියටම හරි. ජීවිතේ ඇත්ත හරියටම අල්ලගත්ත මනුස්සයෙක් එයා. ලෞකික සැපසම්පත් එයාට අදාළම නෑ. පයාගල මහත්තයා මැරෙන්න කලින් සමාව ගන්නවත් ඉඩක් මට ලැබුණා නම් හිතට සහනයක්. ඒ අවස්ථාවත් මට ලැබුණේ නෑ.

දශක හතරකට ආසන්න කාලයක් ටෙලි නාට්‍යයට, සිනමාවට ඔබේ දායකත්වය ලබා දෙමින් ඉන්නවා?
අවුරුද්දක් තිස්සේ කොවිඩ් ප්‍රශ්නේ දිහා බලාගෙන ඉඳලා බැරිම තැන වැඩ පටන් ගත්තා. ධනුෂ්ක රත්නායකගේ දාම්, රොහාන් සමරදිවාකරගේ කොටදෙනියාව නාට්‍යවල හා ලක්ෂ්මන් පුෂ්ප කුමාරගේ නාට්‍යක රඟපෑම් කරගෙන යනවා. චන්න පෙරේරාගේ සඳදිය චිත්‍රපටයේ රූගත කිරීම් සිද්දවෙනවා. කොවිඩ් වෛරස් තත්වයට අදාළ සෞඛ්‍ය නිර්දේශවලට අනුවයි වැඩ කරන්න වෙලා තියෙන්නේ. දවසට කිහිප වතාවක් අත් හෝදන්න ඕනෑ. පරතරය තබා ගැනීම ගැන සැලකිලිමත් වෙන්න ඕනෑ, පිඟන් කෝප්ප වෙනම තියාගෙන අපි අපිම හෝදා ගන්න ඕනෑ. ■

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි